تقرير : دوحة - نيويورك - دوحة

[بنت سيف]

دوحة - نيويورك - دوحة

بناء على طلب العضو بوخليفة 123 .. أضع هذا الموضوع .. والذي انقله لكم من مدونتي ..

* *

دوحة - نيويورك - دوحة :: الجزء الأول

http://www.saifqatar.net/files/5/new_york_night.jpg

ساعات احط في مدونتي .. سوالف مرت علي أو أنا جزء منها .. علشان ما أنساها
هذي وحدة منها .. ما بغيت الأيام تطويها وأنساها

في بداية الشهر الحالي .. رحت أنا والأهل لنيويورك لمدة أسبوعين ..
عادة أسافر لواشنطن دي سي .. ولأني من زمان ما رحت نيويورك .. رزيت ويهي ورحت معاهم ..

تغيرت نيويورك .. لفت نظري منظر نيويورك وهي عارية ..
الكم مرة اللي رحتهم هناك كانت الدنيا صيف والأشجار عليها ورق والحدائق خضرة ..

بس هالمرة الورق طايح والشجر واقف بهياكل بنية .. وكان نازل ثلج ..

فأصبحت المقارنة حادة بين البني والأبيض ..

في الطريج من المطار للفندق مرينا على ثلاثة مقابر يغطيها الثلج .. وشكلها فوضى ..
عمري ما انتبهت لها من قبل لأن الشجر بأوراقه يغطيها ..

طبعا سكنا في منهاتن .. في فندق انتركونتنتال باركلي في الشارع 48 ..
وهاذي قصة بروحها ..

مكانه استراتيجي .. قريب من الفيفث افينيو وماديسون افينيو وبارك افينيو ..

ومع إن الحرارة في هالأسبوعين كانت بين 2-8 درجة مئوية ..

إلا إن كمية المشي اللي سويناها .. كانت كبيرة .. وحلوة ..

وبعد كمية الثياب اللي علي غيرمريحة وكثيرة ما تم شي ما لبسته علشان اتدفى ..

بين الشوارع .. كان في تحديث الألمانيومي للعربانات اللي تبيع سندويشات ..

وأغلب الواقفين يبيعون عرب .. وصور السندويشات عبارة عن فلافل وشاورما ..
ومعلقة يافطة "حلال" .. (حسيت بالانتشار الإسلامي اللي أسعدني جداً)

والحقيقة شفت في هالمنطقة في كل زاوية شارع تقريبا واحدة منها يا يبيعون فاكهة أو سندويشات أو تي شيرتات
..

طبعاً تسوقنا ورحنا مطاعم وغيرنا جو ..
لكن فندقنا هو القصة .. ماخذين غرفتين مفتوحتين على بعض ..

المبنى قديم والحمامات ضيقة بجد ..
وبعد مو مشكلة .. غرفتي الليتات فيها .. عجيبة ..

إذا طيفت الليت .. تنطفي كل أنوار الحجرة وما اقدر افتح ليت الأباجورة شي يحر بجد ..

كلمت إدارة الفندق .. قالوا .. هذي الحجرة بالذات .. لازم نكسر الحائط علشان .. نصلح وصلات الكهرباء ..

طيب ليش سكنتونا فيها .. كان حطيتونا في غرف ثانية ..

قالوا يوم نزلتوا ما كان في غرف مفتوحة على بعض إلا هالغرفتين .. الحين موجود ..
وممكن نغير غرفكم .. بس ما رضينا ما نبغي نسكر شنط ونفتح شنط ..

المأساة الثانية في الفندق .. مافيه "روم سيرفس" بين 12 الظهر لحد 5 مساءً .. ليش مب فاهمة ..

الفندق موقعه جيد .. بس .. الباقي .. لكم عليه وايد .. لحد يروح له ..

طبعا كنا فكرنا نتتقل لفندق ثاني أحسن من نغير الغرف ..

بس ما قدرنا لأن الفنادق مشغولة بسبب مؤتمر في الأمم المتحدة حضر له تقريبا 7000 شخص من جميع أنحاء العالم ..
..

زرنا عدة أماكن في نيو يورك مثل متحف المتروبوليتان وتايم سكوير ..
بغيت نروح مسرحيات .. بس كانت كلها قديمة وشايفنها ..
طبعا صورت .. كثير وفي كل مكان رحنا له في نيويورك ..

آخر موقف .. في مطار جيه إف كيه "كيندي" ..

كان يوم رجعتنا يوم ماطر بشدة وريح قوية ..

ووصلنا المطار .. ووزنا وخذنا بطاقات الصعود للطائرة ..

لكن بسبب الريح الشديدة .. حركة الطيران توقفت تماماً في المطار .. بسبب الجو العاصف ..

وتأخر إقلاع طيارتنا "القطرية" 4 ساعات في حين الغيت رحلات الإماراتية والاتحاد ..
وأول ما فتح المطار ..
كنا في طريقنا للدوحة .. الرحلة كانت مريحة جداً ..

It's good to be home

بنت سيف
25/3/2010

[بنت سيف]

دوحة - نيويورك - دوحة :: الجزء الثاني

http://www.saifqatar.net/files/5/6184537_PA1809791.jpg


الشهر الماضي .. قرروا الأهل زيارة نيويورك .. وطبعاً كالعادة رزيت ويهي ورحت معاهم ..

أول شيء كنت محتاجة أزور طبيب جراحة أعصاب لمشكلة الانزلاق الغضروفي اللي في ظهري ..

وثاني شيء .. سفرة قصيرة وفسحة وتسوق وتغيير جو ..

هالمرة سكننا في فندق أحسن من المرة اللي فاتت ..
لأن مافي ضغط على الفنادق مثل المرة اللي فاتت .. سكننا في فندق Ritz-Carlton – Central Park ..

والحقيقة الفندق أكثر من رائع .. سواء في الغرف و الخصوصية والخدمات والحمامات ..
يعني فرق عن فندق السنة الماضية ..

السالفة اللي أبغي اسجلها لكم في هالرحلة .. تتعلق فيني ..

قبل ما تنزل الطيارة في مطار JFK في نيو يورك ..
حسيت بجفاف في جلدي ..
فقمت حطيت كريم على يدي .. ( الموضوع عادي .. لحد الحين)

عند الجوازات .. بعدما طلعنا من الطيارة ..
قال لي ضابط الجوازات حطي أصابعج اليمين على السكانر وبعد أصبعج اليمين ونفس الشي لليد الشمال ..
بعدها حط جوازي على صوب ..
وسوى نفس الشيء لأهلي وختم جوازاتهم .. أنا ما ختم جوازي ..

رد حق جوازي وسألني .. هذي أنتي اللي في الصورة ؟؟؟!!
قلت نعم .. بس وزني كان أكثر فيها ..
قال .. بصماتج غير مطابقة .. تعالي معاي ؟؟؟؟

طبعاً .. ما اقول لكم عن الرعب اللي دخل فيني .. لكني ظليت متماسكة ..

وداني غرفة كبيرة يمكن فيها 50 كرسي .. وكونترات عالية عليها أربع ضباط .. من الحجم الثقيل ..

وفي المدخل فية ضابطة قاعدة على مكتب .. عطاها جوازي وقال روحي قعدي على كرسي لحد ما ينادونج ..

طبعا جلست على كرسي .. وسبعمائة مليون فكرة في راسي .. وتذكرت كريم اليد اللي حطيته على يدي قبل ما تنزل الطيارة ..

جلست حوالي 10 دقائق .. متخرعة طبعاً .. وظهري لمكتب الضابطة ..

ما وعيت إلا يد تطق على ظهري .. موظفة تقول لي .. تفضلي جوازج .. بصماتج مطابقة .. واضح إن كريم أو جل كانوا على يدج وقت ما حطيتها على السكانر ..
فتحت الجواز .. لقيت ختم 6 شهور إقامة على الكرت ..
خذت الجواز بهدوء .. ومشيت لصالة الشنط .. وكانوا أهلي ينتظروني ومعاهم الشنط ..

نصيحة مخلصة :: لحد يحط على يده كريم أو عطر قبل ما يدخل أي مطار من مطارات أمريكا ..

** ** **

يوم وصولنا كان جمعة ودرجة الحرارة 13 مئوية .. وصلنا الفندق وريحنا ونزلنا نتمشى ونتعشى ..
ورجعنا الفندق .. يوم ثاني قلنا بنروح السوق ..

طلعنا من الفندق .. ولا ذاك البرد .. درجة الحرارة كانت -2 مئوية ..

وليلتها نزل ثلج ونزلت درجة الحرارة إلى -8 مئوية ..

كانت سفرة خفيفة لطيفة ..
رحت للطبيب .. وإطمانيت على نفسي ..
ورحت السوق .. وتمشيت .. واستانست


تحياتي
بنت سيف
21/3/2011

[sara jsm]

المبدعه بنت سيف
سردج راائع كـ العادة ووصفج مميز وممتع :)
لكن ليش ماحطيتي صور اكثر ,,
مع ان كلامج خلاني اتخيل المناظر اللي شفتيها ,,
بس مايمنع تخلينا نشوفها بعد :o
عالعموم الحمدلله عالسلامة ,,
وان شاءالله استانستي بهالرحلة ,, ^ ^

[R 7 A L]

مررت سريعاً هنا عندما لمحت دوحة نيويورك دوحة

وطرا علي ان شاء الله الرجعة من نيويورك الى الدوحة







زيارة واحدة لهذه الموضع لاتكفي

[أجودية]

شوقتينا لنيويورك ...وياليت في صور ...كل الشكر للموضوع الرائع

[قطري فلته]

السلام عليكم ورحمه الله وبركاته

اختي الفاضله

كيف تعاملهم مع العرب ؟ وخاصه المراه بلحجاب.؟

وهل وجدتي مضايقات خلال فتره اقامتك او نظرات لك ؟

وكم المده الى تحتاج اقامتها نيويورك لاني افكر انزل نيويورك 4 ليالى واغادر الى فلوريدا اورلاندو..؟

يعني نيويورك 4 ليالى فلوريدا اورلاندو 8 ليالى ميامي 6 ليالى

وانا فى انتظارد ردك بفارغ الصبر لاني سوف ااغير من اوروبا الى امريكا

وتقبلى بقبول فائق الاحترام

[بنت سيف]

المبدعه بنت سيف
سردج راائع كـ العادة ووصفج مميز وممتع :)
لكن ليش ماحطيتي صور اكثر ,,
مع ان كلامج خلاني اتخيل المناظر اللي شفتيها ,,
بس مايمنع تخلينا نشوفها بعد :o
عالعموم الحمدلله عالسلامة ,,
وان شاءالله استانستي بهالرحلة ,, ^ ^

sara jsm

مراحب .. في الموضوع ..

الحقيقة .. أنا أكثر من السوالف الخاصة في مدونتي ..

وأغلب الصور .. ما أحطها النت .. لأنها خاصة وفيها أفراد من العائلة ..

وكذلك من الصعب وضع وايد في المدونة .. تاخذ علي مساحات .. ما اقدر اضبطها ..

شاكرة لك المرور والرأي

بنت سيف

[بنت سيف]

مررت سريعاً هنا عندما لمحت دوحة نيويورك دوحة

وطرا علي ان شاء الله الرجعة من نيويورك الى الدوحة





زيارة واحدة لهذه الموضع لاتكفي



رحال ..

حياك الله في الموضوع ..

وسفرة وعودة موفقة إلى الدوحة ..

تحياتي

بنت سيف

[بنت سيف]

شوقتينا لنيويورك ...وياليت في صور ...كل الشكر للموضوع الرائع

أجودية ..

أهلا بك في الموضوع

وكما ذكرت الصور ما اقدر أحطها لأن أغلبها خاص ..

تحياتي

بنت سيف

[بنت سيف]

السلام عليكم ورحمه الله وبركاته

اختي الفاضله

كيف تعاملهم مع العرب ؟ وخاصه المراه بلحجاب.؟

وهل وجدتي مضايقات خلال فتره اقامتك او نظرات لك ؟

وكم المده الى تحتاج اقامتها نيويورك لاني افكر انزل نيويورك 4 ليالى واغادر الى فلوريدا اورلاندو..؟

يعني نيويورك 4 ليالى فلوريدا اورلاندو 8 ليالى ميامي 6 ليالى

وانا فى انتظارد ردك بفارغ الصبر لاني سوف ااغير من اوروبا الى امريكا

وتقبلى بقبول فائق الاحترام

قطري فلته

بداية .. لا مشكلة بتاتا مع الحجاب والعباية ..

الكثير من المتحجبات في مدينة نيويورك .. تراهم بشكل متواجد تقريبا في كل مكان ..

والحقيقة موضوع الحجاب في نيويورك .. صار مؤشر للانتشار الإسلامي ..
وهو شيء مفرح حقيقة ..

بالنسبة لنيويورك 4 أيام .. بالنسبة لي .. أسبوع أحس إنه يكفي للسياحة والتسوق ..

أما أورلاندو .. 8 أيام .. حلوين جداً ..

ميامي .. أحس 4 أيام .. وايد عليها .. 6 أيام كثير ..

تقسيم الأيام هو حسب تفضيلاتي .. وليس شرط أن يكون هو الأفضل ..

تحياتي وشكرا لمرورك

بنت سيف

[قطري فلته]

اختي الفاضله.
بنت سيف

اشكرك على الرد السريع

عموما ساخذ من نصيحتك بنسبه الايام

والسوال الاهم وهو..

الفنادق المفضله بنسبه للولايات....
خاصه الفنادق الرواد الخليجين فيها

فنادق نيويورك

فنادق واشنطن

وفنادق اورلاندو

ماهو الافضل الطيران الداخلى .

ماهو رايك فى استجار سياره للتنقل بنسبه الاورلاندو والباقى التاكسي....

قطري فلته

وفنادق ميامي

ويجعل الله من ميزان حسناتك

[خشوف]

اختي بنت سيف
سردج روعه

نبي صور:(

[بنت سيف]

اختي الفاضله.
بنت سيف

اشكرك على الرد السريع

عموما ساخذ من نصيحتك بنسبه الايام

والسوال الاهم وهو..

الفنادق المفضله بنسبه للولايات....
خاصه الفنادق الرواد الخليجين فيها

فنادق نيويورك

فنادق واشنطن

وفنادق اورلاندو

ماهو الافضل الطيران الداخلى .

ماهو رايك فى استجار سياره للتنقل بنسبه الاورلاندو والباقى التاكسي....

قطري فلته

وفنادق ميامي

ويجعل الله من ميزان حسناتك

قطري فلته

حياك الله أخوي .. ويسعدني أن أقدم رأي مفيد ..

عموماً .. الفنادق المتميزة في نيويورك كثيرة ..

عندهم .. الرتيز كارلتون .. سنترال بارك ..
والرتيز كارلتون .. باتري بارك ..
والفور سيزونز ..
والسانت ريجيز ..

بالنسبة لواشنطن .. الريتز .. تايسون كورنر أو كريستال سيتي ..
بيكونون في شمال فيرجينيا ..
والحياة في الشارع 24 في واشنطن دي سي
والفور سيزونز ..
والسانت ريجيز ..

اورلاندو .. سكننا في الحياة بس من زمان .. ما أعرف إذا للحين زين ..
واقترح استئجار سيارة .. شرط تعرف حق السواقة وقوانينها في أمريكا ..

بالنسبة لميامي .. رحت لها من أكثر من 20 سنة .. وما أعرف ايش الفنادق الزينة فيها ..

أرجو لك التوفيق .. مع العلم كل اللي ذكرته هو مقترحات ..

بنت سيف

[بنت سيف]

اختي بنت سيف
سردج روعه

نبي صور:(

شاكرة لج .. المرور


تحياتي

بنت سيف

[barod]

تقرير رائع لكن تنقصه الصور لكن معذوره بما انه صور خاصه

[بوخالد911]

لا هنتي للموضوع

[بنت سيف]

تقرير رائع لكن تنقصه الصور لكن معذوره بما انه صور خاصه

شكرا لك بارود على المرور

تحياتي

بنت سيف

[بنت سيف]

لا هنتي للموضوع

شكرا لك


بنت سيف

[عيون قطر]

فديت نيويورك احلى مكان سافرت له رحت هناك 3مرات وان شاء الله اذا الله قدرني اروحها شهر 8 او 9 كنت اسكن الريتز كارلتون ولا الفورسيزون بعد حلو بس بس الريتز شرح ويفتح النفس وكل شي قريب عندي صور كثيره بس ماعندي وقت احطها ان شاء الله في اقرب وقت احطها لكم

[مهره]

والله شوقتينا الله يكتب النا ونروح بس كم ساعة فى الطيارة لانى من النوع الى ماحب قعدة الطيارة فترات طويلة اتملل

[بو خليفه 123]

ابداع كالعاده من دكتوره مبدعه ..


تخيلت كل المناظر و الغريب انهم ماسألوك نفس السؤال المعتاد .. Where the heck is Qatar ?


ننتظر تفاصيل الزياره .. و نتائج الفحص .. و تصويرك لدى التفاحه في تايمز سكوير والمزيد من مدونات بنت سيف الرائعه ..

ماعليكم شر و اجر و عافيه ..

[بنت سيف]

فديت نيويورك احلى مكان سافرت له رحت هناك 3مرات وان شاء الله اذا الله قدرني اروحها شهر 8 او 9 كنت اسكن الريتز كارلتون ولا الفورسيزون بعد حلو بس بس الريتز شرح ويفتح النفس وكل شي قريب عندي صور كثيره بس ماعندي وقت احطها ان شاء الله في اقرب وقت احطها لكم

عيون قطر

شكرا على المرور ..

وننتظر التقرير والصور

تحياتي

بنت سيف

[بنت سيف]

والله شوقتينا الله يكتب النا ونروح بس كم ساعة فى الطيارة لانى من النوع الى ماحب قعدة الطيارة فترات طويلة اتملل

مهره

من الدوحة لنيويورك مباشر ..

مابين 14 ساعة ونص إلى 15 ساعة ..

بس ممكن تسوين رحلتح عن طرق مكان ما في أوروبا .. بتصير اطول .. لكن الترانزيت يوم أو يومين ممكن يساعد ..

تحياتي

بنت سيف

[بنت سيف]

ابداع كالعاده من دكتوره مبدعه ..


تخيلت كل المناظر و الغريب انهم ماسألوك نفس السؤال المعتاد .. Where the heck is qatar ?


ننتظر تفاصيل الزياره .. و نتائج الفحص .. و تصويرك لدى التفاحه في تايمز سكوير والمزيد من مدونات بنت سيف الرائعه ..

ماعليكم شر و اجر و عافيه ..

أهلا بوخليفة 123

شاكرة مرورك .. وهذا الموضوع تلبية لطلبك ..

لا ما سألوا .. لأن وايد من أهل قطر ينزلون الفندق ..
كان معانا في ذاك الوقت .. أسرتين من قطر ..

الظاهر يعرفون قطر .. عن طريق السفارة ..

الزيارة الحمد لله زينة .. والطبيب طمنا

والأمور تمام ..

شكرا لاهتمامك وتقديرك

تحياتي

بنت سيف

[علموني]

روعه .. تابعي

[بو خليفه 123]

اشكرك على تلبية الطلب .. نتمنى لك المزيد من السفرات الممتعه لتلبية المزيد من الطلبات


تقبلي تحياتي

[بنت سيف]

روعه .. تابعي

حياك الله ..

تحياتي

بنت سيف

[بنت سيف]

اشكرك على تلبية الطلب .. نتمنى لك المزيد من السفرات الممتعه لتلبية المزيد من الطلبات


تقبلي تحياتي

شكرا بوخليفة123

لم أعد اكتب عن سفراتي .. في المدونة ..

ولكنني سأفعل بين الفترة والفترة

تحياتي

بنت سيف