تخيل ,,, لو كان الدوام بعد صلاة الفجر!!!

[القيسي]

هذي فكره في خاطري

-يقعد الموظف يصلي الفجر

- يتريق

- ويداوم حتى قبل طلوع الشمس

- ويخلص مع أو قبل اذان الظهر

- يرد يتغدى مع أهله ويقيل

- يقوم العصر يخلص مشاويره أو يزور ربعه " مثل شيبان أول "

- يصلي العشا وينام على السنه.

وش رايكم, مب أحسن؟؟؟

[ANONYMOUS]

ولا أروع من هالفكره

[شبح الصمت]

اي والله فكره حلووه اش زينها صراحة

مؤيد مؤيد

[36R]

ايه على شيبان اول

وحياة اول

مب الحين نخلص من الدوامات ع 4 العصر

يا كافي ، يجبرونك على ترك كل شيء يتعلق بالدين والحياه الاجتماعيه

[out]

ايه على شيبان اول

وحياة اول

مب الحين نخلص من الدوامات ع 4 العصر

يا كافي ، يجبرونك على ترك كل شيء يتعلق بالدين والحياه الاجتماعيه

:nice:

[رذاذ]

والله طريقة حلوووه واسلوب جديد ..
الدوام من 5 الين 12:30 الظهر..


^_^ اشتقت لدوام رمضان ههههههههههههههههههه

[مخطط قطري]

يليت بس وين الي يطبق

[فتى الجود]

موؤيد
وبشدة

ولو تبغي نكتب كتاب للمستويات الادارية العليا بالدولة
نقول لهم هذا مطلب شعبي انا او من يكتب اسمه
سبحان الله انا دايما اتمنى هالشي
وامس بس ذكرت با احد المواضيع كان ردي انه ياليت يردون الدومات
مثل زمان يوم كان المدراس بعد الفجر مباشرة

وهذا الرابط فيه ردي امس

http://www.qatarshares.com/vb/showthread.php?p=7182324#post7182324

الرد رقم 4784

[رذاذ]

بس صراحه اتوقع صعب ..

اللحين اكثر الدوامات ع الساعة 7:30 ونص ساعة فلكسبل ويتاخرون يجون 8:10 و 8:30

تخيل الدوام الساعة 5 الساعة كم بيجون الموظفين !! .. والموظفاااات ..

يعني الموظفات يقعدون من الساعة 3 لجل يجهزون نفسهم يبالهم ساعتين ريوق وتجهيز الاطفال وغيره ..

صعب لو بنظره واقعية

[الـقـاسـي]

ياليت والله اتمنى هالشي على الاقل بتترتب الحياه شوي ومنها يجبرون الناس يقعدون على صلاه الفجر ويتفاولون اليوم بأوله وصلاه الظهر كل واحد يصلي في المسجد اللي عند بيتهم ويتغدى ويقيل وباقي اليوم يكون مرتاح وعنده وقت ..

[الساهر 17]

سبحان الله اليوم قاعد افكر بنفس الفكرة ولد حلال ( خوش فكرة تصلي وتروح الشغل شيء طيب )

[القيسي]

موؤيد
وبشدة

ولو تبغي نكتب كتاب للمستويات الادارية العليا بالدولة
نقول لهم هذا مطلب شعبي انا او من يكتب اسمه
سبحان الله انا دايما اتمنى هالشي
وامس بس ذكرت با احد المواضيع كان ردي انه ياليت يردون الدومات
مثل زمان يوم كان المدراس بعد الفجر مباشرة

وهذا الرابط فيه ردي امس

http://www.qatarshares.com/vb/showthread.php?p=7182324#post7182324

الرد رقم 4784



أنا اتعهد ارفع الموضوع على مستوى أعلى اذا لقيت قبول من الاعضاء.

بس اتمنى أسمع الايجابيات والسلبيات من الاعضاء الموقرين

[SonOfQatar]

أخوي الأمر كله إيجااابيات .. أولها صلاة الفجر محد بيفوتها و الصلوات الباقية أكييد لأن الواحد بيرجع بعد صلاة الظهر و ياخذها قيلوله لين العصر يقوم نشيييط ويبدأ نشاااطه الإجتماعي :) أنـــــــــــــا من المؤيدين للفكرة و ياللليت يطبقونها و الله لكن ما أتوقع حد بيلتفت لها لأن بعض أماكن العمل مرتبطة بمواعيد معينه نفس البنووك و البوررصه و تدرون الفلووووس صااايره للأسسسسسسف أهم شي بهالدنيا !!

[wadha-qa]

الفكره حلووه و الكل وده يخلص دوامه بدري ويرجع بيته يرتااح بس صعبه الامهات يطلعون الفجر و عيالهم لين الحين نايمين من بيجهزهم و انتو ذابحين الحريم كله تقولون ليش تقط عيالها ع الخدم

[احبك يابلد]

تخيلت واعجبني متى بيتطبق ؟

[ابوخالد السل]

زمان كان المجتمع المسلم يبدأ يومه مع صلاة الفجر اليوم صلاة الفجر في بعض المساجد تحصل الامام والمؤذن يصلون او يصليان !
اعتقد انهم في جمهورية السودان جربوا هذا النظام وما نجح لاسباب ، احنا كتجربة ممكن نخلي الدوام من بعد صلاة الفجر اختياري للموظفين ونشوف مدى اقبال وقبول الناس

[ورقة غار]

من اللي يقوم على صلاة الفير اى واحد جون ولامايكل ولا الارباب ديفيد

[@شيخة@]

هذي فكره في خاطري

-يقعد الموظف يصلي الفجر

- يتريق

- ويداوم حتى قبل طلوع الشمس

- ويخلص مع أو قبل اذان الظهر

- يرد يتغدى مع أهله ويقيل

- يقوم العصر يخلص مشاويره أو يزور ربعه " مثل شيبان أول "

- يصلي العشا وينام على السنه.

وش رايكم, مب أحسن؟؟؟



والله اخوي يعطيك العافيه على الفكره الصراحه وااايد حلووووو ..

انا عن نفسي اقوم من الفجر واصلي واطلع للدوام يعني على الساعه 6 وشي اكون فالمكتب بس للاسف اطلع من الدوام 2 ونص وحزات زياده خبرك لو طلعت بدري عالساعه 1 نفس الحكومات على طول اليوم الثاني كتاب الانذار موجوده خخخخخخ مع لعلم انا في جهه حكوميه .. :weeping:

ومشكور عالموضوع ..

:victory:

[قطرية فذة]

هذا الحلم العربي

[بوخالد911]

وطر مضى

:(
:(
:(

[GRNAS2002]

ليش ما يصير فيه استفتاء
وأنا اوووووول واحد موافق

[boamir]

والله انا اقترح بالنسبه للرجال هالطريقه تكون بعد صلاة الفجر
اما بالنسبه للنساء يعطونهم ساعتين تأخير والسبب تجهيز العيال حق المدارس واشياء ثانيه ممكن تتعلق بالبيت

يازينها الواحد يدق سلف ويروح المسيد ويخلي الموتر شغال يسخن وهو يصلي مع الجماعه اول مايخلص سيييده الدواام وهو مرتاح نفسيا وفي نفس الوقت الله يحفظه لأجل صلاته مع الجماعه

عن نفسي اقوم حق صلاة الفجر وعقبها اكون نشيط بس بعدين ارقد واقوم 7 ونص وانا تعباااااان ومالي خلق مادري ليش ؟!!

روى مسلم (657) عن جندب بن عبدالله رضي الله عنه قال : قال رسول الله صلى الله عليه وسلم : ( مَن صَلَّى الصُّبحَ فَهُوَ فِي ذِمَّةِ اللَّهِ ، فَلا يَطلُبَنَّكُمُ اللَّهُ مِن ذِمَّتِهِ بِشَيْءٍ فَيُدرِكَهُ فَيَكُبَّهُ فِي نَارِ جَهَنَّمَ ) .

[سوق واقف]

والله ولا أروع انا أصلي الفجر وعلى طول سوق السمك أحضر المزاد

ولا أروع


وما أحلى أن تتلذذ بصلاة الفجر في جماعه ومن ثم تعمل يا الله ...

وتمر تاخذلك كيمة الصبح وجباتي وكرك . . . .م م م م م

[أبو عبدالعزيز]

فكرة رائعة جدا
وأؤيدها وبقوة
اقترح تثبيت انتهاء الدوام مع الساعة ١٢ ظهرا
لأن هذا الوقت يصلح لصلاة الظهر في جميع أيام السنة
أما بدء الدوام فيكون بوقت يحدد بعد صلاة الفجر بساعة أو ساعتين وبحسب الصيف أو الشتاء
وعلى أن تحدد جهات العمل التي تدوام الفترة المسائية ويكون دوامها من حيث الانتهاء مرتبط بصلاة العشاء
وبالتالي نكون جمعنا إمكانية التوافق مع الدول الشرقية والغربية معا

[راعي ال VXR]

والله ولا أروع انا أصلي الفجر وعلى طول سوق السمك أحضر المزاد

ولا أروع


وما أحلى أن تتلذذ بصلاة الفجر في جماعه ومن ثم تعمل يا الله ...

وتمر تاخذلك كيمة الصبح وجباتي وكرك . . . .م م م م م


احسنت قولا :nice: وبارك الله فيك

[بوحمد111]

امنية كل واحد مداوم على صلاة الفجر مع الجماعة يتمنى الدوام هذا وإن حصل انا اشهد ان بنشوف المساجد متروسة من المصلين وتكون فكره حلوه لنشر التوعيه لصلاة الفجر في المساجد

[Abdulraman]

والله احلى شي

[بونو]

ترى الدوام في شركات الراجحي على هالنظام ياجماعه ... وهذا هو النظام الاسلامي لان الارزاق تتوزع في وقت الفجر ... وهذي في بالي من زمان .... بس حكم الأوي

[مريومة]

أبركها من ساعة

[سعود00]

السلام عليكم ورحمه الله وبركاته

أحيك اخوي القيسي على الفكرة الطيبة

فعلاً انا أعيشها يومين في الأسبوع بحكم طبيعة عملي شفتات ومن خلال تجربة

احلى دوام عندي هم يومين الصبح أصلي الفجر واروح الدوام على راحتي

ويبتدي العمل الساعة 6 وانا كلي تفائل وحيوية ونشاط بعيد عن التفهي والكسل

إن شاء الله يطبقونه على الكل عشان الكل يصلي الفجر في جماعة ويباشر يومه بتفائل وحيوية ونشاط

[سهيل قطر]

هههههههههههههههه

هذه هو دوامي من بعد صلااه الفجر مرات صلااه الفجر على الطريق وفي مسااجد خاارج المنطقه ولكن يخلص الدوام السااعه 3 العصرر وارجع اووصل البيت من 3 ونص ومرات 4 الا ربع

[abdo222]

لا مب حلو الصراحه ،، احلى شيء نومه بعد الفجر !!!!!!

[ام ناصر1]

فكرة رائعة جدا
وأؤيدها وبقوة
اقترح تثبيت انتهاء الدوام مع الساعة ١٢ ظهرا
لأن هذا الوقت يصلح لصلاة الظهر في جميع أيام السنة
أما بدء الدوام فيكون بوقت يحدد بعد صلاة الفجر بساعة أو ساعتين وبحسب الصيف أو الشتاء
وعلى أن تحدد جهات العمل التي تدوام الفترة المسائية ويكون دوامها من حيث الانتهاء مرتبط بصلاة العشاء
وبالتالي نكون جمعنا إمكانية التوافق مع الدول الشرقية والغربية معا
أميل لهذا الرأي والاقتراح

[mannoo66]

والله يسوون في العالم خير لو تطبق هالنظام بيكسبون فينا أجر المداومة على صلاة الفجر واغتنام هالوقت المبارك

[ummalaz]

فكره ممتازه طبقت عندنا في السودان العام 2000
في البدايه كانت صعبه نوعاً ما لان الناس ساعتها
استغربت الوضع وكان الاطفال ينامون في الصفوف خخخ
بس بمرور الوقت اصبح الموضوع عادي

[ضحية البورصة]

حلو بس اللي دوامهم شفت ؟

[Bo jassim]

ياغالي


اقوول ماشالله ربعنا يقلدون الغرب في كلشي

لكن الشي الي يخدم ديننا للاسف




انا درست في امريكا وكان توقيتهم في الصيف يتاخر ساعه وفي الشتاء يتقدم
لان الشمس تغيب متاخر في الصيف

وهذا المفروض الي يصير

يعني تخيل الدولة الطبق هالنظام وياخرون ساعه الحين

وكل واحد في بيته يقدم ساعته على توقيت قطر الصيف الجديد

وتكون صلاة الفجر الساعه 5 بدل الساعه 4

والغروب ساعه 5 بدل ساعه 6

ويعطيك العافيه واتمنى يوصل الصوت للمسؤولين

[الأستاذ]

لقد طبقت هذه الفكرة في رمضان منذ ثلاث سنوات في جهة عملي ..
جعلت الدوام من بعد الفجر وحتى الساعة العاشرة والنصف ..
في البداية كان هناك اعتراض وتذمر ..
بعد مرور الاسبوع الاول ..
تم استمزاج الأراء حول إلغاء الفكرة أو استمرارها لبقية الشهر ..
كان هناك نسبة 83% من المؤيدين ..
الـ 17% الباقيين كانوا يواجهون مشكلة رئيسة وهي تتمثل في تعارض الدوام الجديد مع دوام بقية افراد الاسرة من أبناء أو موظفين بجهات أخرى ..
ولا يملكون وسيلة مواصلات لحل هذه المشكلة ..
أضطررت لإعادة النظام القديم لعدم التمكن من حل هذه المشكلة ..
رغم نجاح فكرة الدوام المبكر ..
سواء من خلل الاستبيان .. أو الملاحظة على الاداء والنتائج ..
الخلاصة .. لكل فكرة جديدة معارضين ..
ولكن تجربتها تثبت فشلها أو نجاحها ..
يجب منح الاسرة وقتاً كافياً للإلتقاء والتجمّع ..
نحن بنظامن الحالي ..نساهم في التفكك الأسري وما سيرتب عليه بشكل مباشر أو غير مباشر ..
وسندفع الملايين لاحقاً للبحث عن حلول لهذه المشاكل والقضايا الاجتماعية ..
يجب إلاّ نستكثر على انفسنا تجربة نمط جديد من الانظمة ..
خاصة أنه يتناسب مع عاداتنا الإجتماعية .. ومواعيدنا الدينية ..
بدل أن نعاند أنفسنا .. ونستمر في تجارب اثبتت فشلها منذ البداية ..
كما يحدث في التعليم الآن ..

[intesar]

فكرة حلوة وتحل البركة

[حمد بن سعد]

هههههههههههههههههههههههههههههه



مسكين المواطن القطري عليه افكار عجيبه وحلوه لاكن ...............!

[Cute Mother]

صراحة حلوة الفكرة واتذكر اول يوم كنا في المدرسة إنة كان في دوام صيفي ودوام شتوي والصيفي كان يبدأ الساعة 6 ونص ! يعني قريب من الفكرة وكانت الدنيا سهالات ..

[الـراسي]

جان زين بس ربعك ما يوافقون

الربع الاجانب لازم نكون على توقيتهم

[R 7 A L]

فكرة اكثر من رائعة

سنوات كثيرة عندما كنت في دوامي السابق في رمضان كانت مواقيت عملنا بعد صلاة الفجر الى قبل صلاة الظهر بساعة
وكنا مرتاحين من الجدول

[مشاغب]

جد كلامك طيب اول حاجه اتساعد اخوك المسلم على الصلاة وثاني حاجه تبتعد من حرارة الشمس وترد البيت وتجتمع مع اسرتك ولي شجعني اكتب لك وقت الصلاة شي طيب الناس صاحيه لصلاة ربي يجزيك خير اخوي

[القيسي]

أشكر جميع الاخوة والاخوات على تفاعلهم مع الموضوع.

وأتمنى نوجد حل مع بعض لهذه الإشكالات والتساؤلات من الاعضاء :

1- العضو رذاذ

بس صراحه اتوقع صعب ..

اللحين اكثر الدوامات ع الساعة 7:30 ونص ساعة فلكسبل ويتاخرون يجون 8:10 و 8:30

تخيل الدوام الساعة 5 الساعة كم بيجون الموظفين !! .. والموظفاااات ..

يعني الموظفات يقعدون من الساعة 3 لجل يجهزون نفسهم يبالهم ساعتين ريوق وتجهيز الاطفال وغيره ..

صعب لو بنظره واقعية




2- العضو wadha-qa


الفكره حلووه و الكل وده يخلص دوامه بدري ويرجع بيته يرتااح بس صعبه الامهات يطلعون الفجر و عيالهم لين الحين نايمين من بيجهزهم و انتو ذابحين الحريم كله تقولون ليش تقط عيالها ع الخدم



3- العضو ورقة غار


من اللي يقوم على صلاة الفير اى واحد جون ولامايكل ولا الارباب ديفيد




4- العضو abdo222


لا مب حلو الصراحه ،، احلى شيء نومه بعد الفجر !!!!!!



5- العضو ضحية البورصة


حلو بس اللي دوامهم شفت ؟

[فلور]

والله ياريت فكره حلووووووووه
مب الحين نروح البيت والله لا غداء ولا نوم

[ziad1971]

فكرة حلوه ورائعة

وهذا رأيي وهو منقول


قال تعالى : (أَقِمِ الصَّلاةَ لِدُلُوكِ الشَّمْسِ إِلَى غَسَقِ اللَّيْلِ وَقُرْآنَ الْفَجْرِ إِنَّ قُرْآنَ الْفَجْرِ كَانَ مَشْهُوداً) (الاسراء:78)

يرغب القرآن بالنوم المبكر و الاستيقاظ منذ الفجر و قد روي عن النبي عليه الصلاة و السلام أنه قال : بورك لأمتي في بكورها " و قال : " ركعتا الفجر خير من الدنيا وما عليها " ، و تحقيقاً لذلك ، أمر عليه الصلاة و السلام بعدم الزيارات بعد العشاء بقوله : " لا تجتمعوا بعد صلاة العشاء إلا لطلب العلم ."

أما الفوائد الصحية التي يجنيها الإنسان بيقظة الفجر فهي كثيرة منها :

1 ـ تكون أعلى نسبة لغاز الأوزون (o3) في الجو عند الفجر ، و تقل تدريجياً حتى تضمحل عند طلوع الشمس ، و لهذا الغاز تأثير مفيد للجهاز العصبي ، ومنشط للعمل الفكري و العضلي ، و بحيث يجعل ذروة نشاط الإنسان الفكرية و العضلية تكون في الصباح الباكر ، و يستشعر الإنسان عندما يستنشق نسيم الفجر الجميل المسمى بريح الصبا ، لذة و نشوة لا شبيه لها في أي ساعة من ساعات النهار أو الليل .

2 ـ إن أشعة الشمس عند شروقها قريبة إلى اللون الأحمر ،و معروف تأثير هذا اللون المثير للأعصاب ، و الباعث على اليقظة و الحركة ، كما أن نسبة الأشعة فوق البنفسجية تكون أكبر ما يمكن عند الشروق ، و هي الأشعة التي تحرض الجلد على صنع فيتامين د .

3 ـ الاستيقاظ الباكر يقطع النوم الطويل ، وقد تبين أن الإنسان الذي ينام ساعات طويلة و على وتيرة واحدة يتعرض للإصابة بأمراض القلب و خاصة مرض العصيدة الشرياني الذي يأهب لهجمات خناق الصدر لأن النوم ما هو إلا سكون مطلق ، فإذا دام طويلاً أدى ذلك لترسب المواد الدهنية على جدران الأوعية الشريانية الإكليلية القلبية ، ولعل الوقاية من عامل من عوامل الأمراض الوعائية ، هي إحدى الفوائد التي يجنيها المؤمنون الذين يستيقظون في أعماق الليل متقربين لخالقهم بالدعاء و الصلاة ، قال تعالى في سورة الفرقان : ( و الذين يبيتون لربهم سجداً و قياماً ) الفرقان : 64 . و قال تعالى مرغباً في التهجد في سورة المزمل : ( إن ناشئة الليل هي أشد وطأً و أقوم قيلاً) المزمل : 6 .

و ناشئة الليل هي القيام بعد النوم .

4 ـ من الثابت علمياً أن أعلى نسبة للكورتزون في الدم هي وقت الصباح حيث تبلغ (7 ـ 22 ) مكروغرام / 100 مل بلاسما ، و من المعروف أن الكورتزون هو المادة السحرية التي تزيد فعاليات الجسم بالطاقة اللازمة له .

و إذا ما أضفنا هذه الفوائد إلى تلك التي بيناها عند الحديث عن الصلاة و الوضوء نجد أن المسلم الملتزم بتعاليم القرآن ، هو إنسان فريد بالفعل ، حيث يستيقظ باكراً و يستقبل اليوم الجديد بجد و نشاط و يباشر أعماله اليومية في الساعات الأولى من النهار ، حيث تكون إمكاناته الذهنية و النفسية و العضلية على أعلى مستوى ، مما يؤدي لمضاعفة الإنتاج ، كل ذلك في عالم ملؤه الصفاء و السرور و الانشراح و لو تصورنا أن ذلك الإلزام أخذ طابعاً جماعياً فسيغدو المجتمع المسلم ، مجتمعاً مميزاً فريداً و أهم ما يميزه هو أن الحياة تدب فيه منذ الفجر .

المصادر : أبحاث الدكتور إبراهيم الراوي في مجلة الحضارة العددان 6 ـ10

[القيسي]

قال تعالى : (أَقِمِ الصَّلاةَ لِدُلُوكِ الشَّمْسِ إِلَى غَسَقِ اللَّيْلِ وَقُرْآنَ الْفَجْرِ إِنَّ قُرْآنَ الْفَجْرِ كَانَ مَشْهُوداً) (الاسراء:78)

يرغب القرآن بالنوم المبكر و الاستيقاظ منذ الفجر و قد روي عن النبي عليه الصلاة و السلام أنه قال : بورك لأمتي في بكورها " و قال : " ركعتا الفجر خير من الدنيا وما عليها " ، و تحقيقاً لذلك ، أمر عليه الصلاة و السلام بعدم الزيارات بعد العشاء بقوله : " لا تجتمعوا بعد صلاة العشاء إلا لطلب العلم ."




أشكرك أخوي زايد

[ضي البدر]

حلوة الفكرة ليش لا .. وياريت تتطبق نام بكير وبتصحى بكير وشوف الصحة كيف بتصير.. والله صج خطة عمل وآلية جديدة تنفع حق فترة الصيف بالذات.. بيكووون جو ولا أروع..

يعطيكم العافية اخونا الكريم وموفقين ان شاءالله..

[جراح]

أؤيد وبشدة وأشكرك على هالفكرة واتمنى تطبيقها ولو على سبيل التجربة لمدة ستة اشهر او على الاقل يكون عندنا دوام صيفي يبدأ من اول ابريل ويكون فيه الدوام يبدأ من الساعة 5 ودوام شتوي يبدأ تطبيقة من اول اكتوبر ويكون فيه الدوام يبدأ من الساعة 6 ونرجع نقيل ونعرف شيء اسمه مقيال بعد صلاة الظهر

[مستر بن]

واللي تدااوم ف البيت ,, شنو تسوي ’’


الصرااحة الفكرة رووعه ’’

[MAZEN37]

في السعوديه دوام رمضان بعد المغرب لين الفجر وبالنهار رقاد- في الصناعيه

[ع.م]

فكرتك روووعة والله مافي أصح ولا أنشط ولاأسعد من هالنظام..!!

يناسب ديننا، يناسب جونا، يناسب صحتنا، يناسب يناسب !!

شنوا نقدر نسوي عشان نطالب به؟؟

[ElRayyan]

كان زين

ع الاقل نلتزم بأوقات الصلاه اللي مايأخرها عندنا كثر الدوامات والمقيال

[jeep-srt8]

يارييييييييييييييييييييييييييييييييييييييييييييييي يييييت

بس الهنود بينشبولنا والمسيحين

[بوسلمان 2010]

الله يوفق ان شاء الله

[hasss1969]

لو مسئول كبير يتبنى الفكرة انا اشهد انه المساجد بتعمر من المصليين...وبيكون في ميزان حسناته ونصيب من دعوات المصليين له بطيب الدعاء ستكون بشكل يومي...ياليتني كنت مسئول كبير لمدة يوم واحد بس..اصدر القرار وبعدها يعزلوني...

[قطر دزاين]

جدي وجدك سبقونا بعد صلاه ما يرقدون وتعرف ما فيه مواصلات

[ورقــة أمــل]

احسن فكرة والله منها الواحد يخافظ على صلاة الفجر ومايضيع ساعة ساعتين يرقد فيهم وتروح عليه نومة يداوم ععل طل ويرجع البيت مرتاح وعنده وقت حق نفسه وعياله وبيته

[ورقــة أمــل]

هههههههههههههههه

هذه هو دوامي من بعد صلااه الفجر مرات صلااه الفجر على الطريق وفي مسااجد خاارج المنطقه ولكن يخلص الدوام السااعه 3 العصرر وارجع اووصل البيت من 3 ونص ومرات 4 الا ربع


ول اتعس من دوامي ذي الله يعينك :omg:

[القيسي]

جدي وجدك سبقونا بعد صلاه ما يرقدون وتعرف ما فيه مواصلات

صح لسانك,

واحنا نبغي نكون خير خلف لخير سلف

[Doha Sun]

ماتخيل بالمرة .. يصلح للرجال اكثر من الحريم

[الامير]

سلام عليكم
تعرف انا هذا الفكره من زمان داولتها معا كم شخص بس لو يسونها فتره يعني من شهر 12 الى 3 وشف تغير الكبير وتغير في الاسره بيكون ترابط قوي الى درجه ماتتوقعها

[تحداني]

احسها صعبه اشوي ان انداوم بعد صلاه الفجر
خاصه تعودنا على النومه المتأخره .. بالأصح الحياه تبدأ في هالزمن بعد المغرب


واذا تغير موعد الدوام
ضروري يتغير نمط الحياه من مرافقها الى مجمعاتها .. الى مزاجنا
الى حتى التكوين الداخلي للإنسان عشان نقدر نتاقلم :)

هي حلوه ومو حلوه


جملك الله برضى الرحمن

[ام السعف]

وقت صلاة الفجر يتغيرمع تغير الفصول ،، فاشلون بتكون ساعة الدوام ؟

مرة الساعة 3 ونص ومرة الساعة 5 ؟

ما ادري ،، مع انه ما تفرق معاي ،،بس اشوفه مب شي :(

[al-vtc]

اتمنى بصرااااحه

[القيسي]

احسها صعبه اشوي ان انداوم بعد صلاه الفجر
خاصه تعودنا على النومه المتأخره .. بالأصح الحياه تبدأ في هالزمن بعد المغرب


واذا تغير موعد الدوام
ضروري يتغير نمط الحياه من مرافقها الى مجمعاتها .. الى مزاجنا
الى حتى التكوين الداخلي للإنسان عشان نقدر نتاقلم :)

هي حلوه ومو حلوه


جملك الله برضى الرحمن

بس ليش ما نرد نمط الحياه الاول,
عشان نحافظ على الصلوات, والروابط الاجتماعيه.
قال تعالى:"وَجَعَلْنَا اللَّيْلَ لِبَاسًا * وَجَعَلْنَا النَّهَارَ مَعَاشًا"

ملاحظة: مشكور على الدعوة الطيبة.

[تحداني]

بس ليش ما نرد نمط الحياه الاول,
عشان نحافظ على الصلوات, والروابط الاجتماعيه.
قال تعالى:"وَجَعَلْنَا اللَّيْلَ لِبَاسًا * وَجَعَلْنَا النَّهَارَ مَعَاشًا"

ملاحظة: مشكور على الدعوة الطيبة.




الشكر لله اخي الفاضل .. الله يرضى عليك

هو لو تبي الحقيقه " الحياه الأول " كل شي فيها أحلى وأجمل
ولو نتمنى نرجع نبي نرجع ابكل تفاصيلها
في اشياء ممكن .. وفي اشياء غير ممكنه
وفي اشياء تعتمد على امور ثانيه


بس ولا يصير خاطرك الا طيب
راينا من رايك .. نخلي الدوام بعد الفجر .. لوفيها هذا الكم من التواصل





وجملك الله برضى الرحمن

[تحداني]

وقت صلاة الفجر يتغيرمع تغير الفصول ،، فاشلون بتكون ساعة الدوام ؟

مرة الساعة 3 ونص ومرة الساعة 5 ؟

ما ادري ،، مع انه ما تفرق معاي ،،بس اشوفه مب شي :(




لا ادققين كثير يا ست الحسن والدلال
فارق التوقيت .. راح نلجأ للوسط .. وفي الوسط سنجد خير الامور ان شاء الله


جملك الله برضى الرحمن

[طائر النورس]

إذا داومنا مبكّر بننجبر ننام مبكّر بعد

[رُفق المجنّا]

شئ طيب بتخدم الناس بـشكل كبير

نمط الحياة راح يتغير لـ الأفضل كما عهده الأوائل , كذلك تتغير أوقات العمل مما سيؤثر ايجابياً ع مسألة الإزدحام

موفقين

[قطر دزاين]

انا ما شفت في ها الجيل الى من رحم ربي مثل شيبنا ليس صلاه الفجر فقط وانما التهجد اخر الليل وسبحان الله بدون منبه يصحيه هو تقول سبحان الله متبرمج على ها الاوقات احنا مع الاسف الشديد وقت للعب تلقى الواحد نشاطه موصل 100% ولكن عند قومه الليل والفجر تحصله يتسحب والبعض ياخر صلاه الفجر وهو بيده انه يقوم ويصلي في وقتها وشيابنا قدوتنا اجل كيف بيكون للاب عند وفاته ابن صالح يدعو له انا لا اعمم ولكن البعض

[بوسلمان 2010]

ايه والله كان زين حتى صحتك بتغير من قومت الفجر وظاهر من البيت وانت في ذمت ربك ومن الساعه ( 5 )

والين الساعه (30/12)الظهر عجيب والله

[القيسي]

شئ طيب بتخدم الناس بـشكل كبير

نمط الحياة راح يتغير لـ الأفضل كما عهده الأوائل , كذلك تتغير أوقات العمل مما سيؤثر ايجابياً ع مسألة الإزدحام

موفقين


اخالفك الراي اخوي في مسالة الازدحام, لأن لو كان دوام جميع الجهات بعد الفجر بتصير الزحمة ذاك الوقت.
أتوقع في حل ثاني للزحمة وبطرحه باذن الله في موضوع مستقل.

ومشكور على مرورك العطر......

[ام شيخه]

انا من المؤيديين وبقوووووووه

يالييييييييت احد يسمع ويطبق هالشور

جزاك الله خير اخوي القيسي

[البيت بيتك]

ولا أروع من هالفكره

[عذب الكلام 1]

اى والله هذا يوم المسلم يبدى بصلاه وينتهي بصلاه اوءيد

[ام السعف]

لا ادققين كثير يا ست الحسن والدلال
فارق التوقيت .. راح نلجأ للوسط .. وفي الوسط سنجد خير الامور ان شاء الله


جملك الله برضى الرحمن

حاليا حسب دوامنا الحالي هو خير الأمور الوسط ،، في الشتا
الشروق يتأخر وقته لما تطلع الشمس واليهال يتريقون الساعة 7 حلو يبدأ
الدوام فيه ،، يعني البسوسو تطلع تاخذ اليهال من الساعة 5 او 5 ونص
تخيلي لو الدوام الساعة 5 هالأطفال معقولة يدورون في البسوسو
من الساعة 3 ونص :(

احنا نعاني من طووول ساعات العمل ،، يعني لو يلغون اجازة يومين
ويردون ساعات العمل مثل قبل اعتقد يكون افضل :shy:

في نقطة جدا مهمة :
رسولنا الكريم عليه افضل الصلاة والسلام
كان يصلي الفجر ويستغل الوقت ما بين بعد صلاة الفجر وشروق الشمس
في التعبد والدعاء والذكر ،، مب في العمل ،، لأن العمل ممدوح في النهار
والنهار يعني شروق الشمس :(

[القيسي]

في نقطة جدا مهمة :
رسولنا الكريم عليه افضل الصلاة والسلام
كان يصلي الفجر ويستغل الوقت ما بين بعد صلاة الفجر وشروق الشمس
في التعبد والدعاء والذكر ،، مب في العمل ،، لأن العمل ممدوح في النهار
والنهار يعني شروق الشمس :(


أشكر مرورك العطر اختي ام السعف

النقطة اللي ذكرتيها أكثر من مهمة,
وش رايك لو قلنا يكون الدوام بعد الشروق؟
يعني لو الواحد يصلي الفجر, ويتريق, ويتجهز, وبعدين يمشي بتكون اطلعت الشمس وهو في الطريق, او حتى قبل لايطلع يعني تقريبا 5:30 - 6:00 على حسب الفصل.
وبعدين يخلص الدوام قبل الظهر يعني قبل الحر يرد يتغدى مع اهله وعياله ويقيل على الرااااحه.
مهب أحسن؟

[تحداني]

حاليا حسب دوامنا الحالي هو خير الأمور الوسط ،، في الشتا
الشروق يتأخر وقته لما تطلع الشمس واليهال يتريقون الساعة 7 حلو يبدأ
الدوام فيه ،، يعني البسوسو تطلع تاخذ اليهال من الساعة 5 او 5 ونص
تخيلي لو الدوام الساعة 5 هالأطفال معقولة يدورون في البسوسو
من الساعة 3 ونص :(

احنا نعاني من طووول ساعات العمل ،، يعني لو يلغون اجازة يومين
ويردون ساعات العمل مثل قبل اعتقد يكون افضل :shy:

في نقطة جدا مهمة :
رسولنا الكريم عليه افضل الصلاة والسلام
كان يصلي الفجر ويستغل الوقت ما بين بعد صلاة الفجر وشروق الشمس
في التعبد والدعاء والذكر ،، مب في العمل ،، لأن العمل ممدوح في النهار
والنهار يعني شروق الشمس :(




معاج حق ام السعف .. خاصه بالشتا هنا قمه المعاناه
وعليه عليهم هاليهال .. الدنيا امظلمه وهم طالعين للمدارس
عشان جي قلنا من البدايه اعتقد صعبه اشوي


وبالفعل الرسول عليه الصلاه والسلام
كان يقضيها تعبد وتلاوه قرآن واستغفار

عذرا صاحب الموضوع
ام السعف لي عتب كبير عليج كبر الدنيا .. والعتاب من باب المحبه
لكن حاولت ادور لج 20 عذر وما قدرت اوصل للــ 70 صعب علي
الطرق ما وصلتني لك .. ما اعرف وين المشكله ؟؟


جملك الله برضى الرحمن

[سويسرا]

اضم صوتي لصوتك