المساعد الشخصي الرقمي

مشاهدة النسخة كاملة : استفسار لارتفاعات السقف المناسبة للمنزل



almaf1a
08-05-2011, 08:53 AM
السلام عليكم ورحمة الله وبركاته

يا اخوان عندي استفسار وانا حاليا في مرحلة الانتهاء من الخرائط
الطابق الارضي راح تكون في صالات مفتوحه
والمصمم عاملي الخرائط على ارتفاع 3.9 متر لكل طابق
هل الارتفاع مناسب وكم راح يكون صافي الارتفاع بعد الارضيات والجبس
هل راح يكون الارتفاع غير كافي في حالة وضع ثريا كرستال بحجم مناسب
تنصحوني ازيد الارتفاع في الطابق الارضي وهل هو مسموح في تصديق الخرائط

فيدوني بنصائحكم الله يخلييكم

دروب العمر
08-05-2011, 09:01 AM
انا انصحك انك ترفع من الطابق الأرضي .. والطابق الأول تخليه عادي .. لانك بتتعب في الجبس تحت والغرف في الطابق الأول راح يكون ناعم

سهم طايح
08-05-2011, 09:03 AM
4 - 4.20

اعتقد بيكون ممتاز

نور الحور
08-05-2011, 09:04 AM
نصيحة ارفع قد ما تقدر .. أحلى وأفخم ..
وحط في حسابك الجبس والمكيفات (إذا كانت سنترال) والأرضيات ..
بيكون البيت أحلى بسقف مرتفع وخاصة لو كانت فيه صالات مفتوحة .. وأصلاً السقف العالي يوسع المكان ..

almaf1a
08-05-2011, 09:49 AM
الف شكر للتواصل
المكيفات سبليت
ان شاء الله راح اكلم المكتب يرفع الين 4.2 او 4.3 خصوصا ان القعدة الي في الصاله مرتفعه عتبه والثانيه عتبتين
الف شكر لكم يا اخوان
وان شاء الله يفيدونا اكثر الاعضاء

بويوسف
08-05-2011, 10:12 AM
اذا كنت بتركب مكيفات سبليت فما في داعي ترفع اكثر .. بالعكس لو تنزل افضل 3.6

نور الحور
08-05-2011, 12:58 PM
اذا كنت بتركب مكيفات سبليت فما في داعي ترفع اكثر .. بالعكس لو تنزل افضل 3.6


بو يوسف مع تقديري واحترامي لرايك .. أنا أختلف معاك ..ترى السقف النازل بياخذ وايد من جماليات البيت خاصة لو مثل ما قال أخونا almaf1a فيه صالات مختلفة الارتفاعات .. أعتقد 4 ونص بيكون مناسب .. ونصيحة روح شوف الفلل اللي تنبني على الطبيعة وبتفهم قصدي .. وممكن تسأل مهندس ديكور من اللحين وهو بيفيدك..

بوخالد911
08-05-2011, 01:28 PM


مناسب

almaf1a
08-05-2011, 01:35 PM
الف شكر للجميع على التواصل
الاراء متضاربه حتى خارج الموضوع هذا
في الي يقولي مناسب جدا
وفي الي يقولي دام صالات مفتوحه تحتاج لارتفاع اكبر
ياريت نسمع اراء اكثر واذا اي شخص عنده معلومه بالنسبه للبلدية راح توافق
بمعنى اخر هل هناك سقف محدد للبيت كامل

بويوسف
08-05-2011, 03:04 PM
الف شكر للجميع على التواصل
الاراء متضاربه حتى خارج الموضوع هذا
في الي يقولي مناسب جدا
وفي الي يقولي دام صالات مفتوحه تحتاج لارتفاع اكبر
ياريت نسمع اراء اكثر واذا اي شخص عنده معلومه بالنسبه للبلدية راح توافق
بمعنى اخر هل هناك سقف محدد للبيت كامل


اخوي انا مهندس ومتخصص في البناء وحتى لا تحتار في الموضوع سأقوم بشرحه بتفصيل أكبر ..

لا يوجد حد أعلى في البلدية بل يوجد حد أدنى واظن انه 2.8 لكل دور .. وبحد أقصى للفيلا 12.5 للدور الارضي+الدور الأول+طابق السطح بالأضافة الى ارتفاع منسوب الارض.

لا تحتاج الى ارتفاعات كبيرة الا في بعض الحالات وهي:
1- في حال انك ستقوم بعمل تكييف مركزي ستحتاج على الاقل الى نصف متر لعمل الدكتات أما في حالة اكتفائك بوضع مكيفات سبلت فيجب ان تحسب حساب الجبس فقط حوالي نص متر لا اكثر ..
2- الارتفاعات الكبيرة تكون جيدة في حالات كون المساحات كبيرة اما في حالة الغرف العادية والمساحات العادية فال 3 امتار صافي الارتفاع كافي جدا ولا داعي لزيادته.
3- يجب ان تضع في الاعتبار امر سهى عنه الكثير من محبي الارتفاعات الغير مبررة وهي بأنك كلما ترتفع اكثر كلما ستزيد درجات السلم اكثر ولا اظن ان تلك فكرة سليمة الا اذا كان هناك مصعد يحل تلك المشكلة.
4- الارتفاعات الكبيرة للمساحات الصغيرة غير مستحب ولا يعطي شكلا جيدا وسيجعلك تحتاج الى تبريد اكثر للمكان .. وهذا امر مهم عندنا ويجب ان يوضع في الاعتبار ..

لا خاب من استشار ولاخسر من استخار .. بالتوفيق ان شاءالله.

صــوت قطــر
08-05-2011, 11:09 PM
اخوي انا مهندس ومتخصص في البناء وحتى لا تحتار في الموضوع سأقوم بشرحه بتفصيل أكبر ..

لا يوجد حد أعلى في البلدية بل يوجد حد أدنى واظن انه 2.8 لكل دور .. وبحد أقصى للفيلا 12.5 للدور الارضي+الدور الأول+طابق السطح بالأضافة الى ارتفاع منسوب الارض.

لا تحتاج الى ارتفاعات كبيرة الا في بعض الحالات وهي:
1- في حال انك ستقوم بعمل تكييف مركزي ستحتاج على الاقل الى نصف متر لعمل الدكتات أما في حالة اكتفائك بوضع مكيفات سبلت فيجب ان تحسب حساب الجبس فقط حوالي نص متر لا اكثر ..
2- الارتفاعات الكبيرة تكون جيدة في حالات كون المساحات كبيرة اما في حالة الغرف العادية والمساحات العادية فال 3 امتار صافي الارتفاع كافي جدا ولا داعي لزيادته.
3- يجب ان تضع في الاعتبار امر سهى عنه الكثير من محبي الارتفاعات الغير مبررة وهي بأنك كلما ترتفع اكثر كلما ستزيد درجات السلم اكثر ولا اظن ان تلك فكرة سليمة الا اذا كان هناك مصعد يحل تلك المشكلة.
4- الارتفاعات الكبيرة للمساحات الصغيرة غير مستحب ولا يعطي شكلا جيدا وسيجعلك تحتاج الى تبريد اكثر للمكان .. وهذا امر مهم عندنا ويجب ان يوضع في الاعتبار ..

لا خاب من استشار ولاخسر من استخار .. بالتوفيق ان شاءالله.

:victory::victory::victory:

almaf1a
09-05-2011, 07:36 AM
اخوي انا مهندس ومتخصص في البناء وحتى لا تحتار في الموضوع سأقوم بشرحه بتفصيل أكبر ..

لا يوجد حد أعلى في البلدية بل يوجد حد أدنى واظن انه 2.8 لكل دور .. وبحد أقصى للفيلا 12.5 للدور الارضي+الدور الأول+طابق السطح بالأضافة الى ارتفاع منسوب الارض.

لا تحتاج الى ارتفاعات كبيرة الا في بعض الحالات وهي:
1- في حال انك ستقوم بعمل تكييف مركزي ستحتاج على الاقل الى نصف متر لعمل الدكتات أما في حالة اكتفائك بوضع مكيفات سبلت فيجب ان تحسب حساب الجبس فقط حوالي نص متر لا اكثر ..
2- الارتفاعات الكبيرة تكون جيدة في حالات كون المساحات كبيرة اما في حالة الغرف العادية والمساحات العادية فال 3 امتار صافي الارتفاع كافي جدا ولا داعي لزيادته.
3- يجب ان تضع في الاعتبار امر سهى عنه الكثير من محبي الارتفاعات الغير مبررة وهي بأنك كلما ترتفع اكثر كلما ستزيد درجات السلم اكثر ولا اظن ان تلك فكرة سليمة الا اذا كان هناك مصعد يحل تلك المشكلة.
4- الارتفاعات الكبيرة للمساحات الصغيرة غير مستحب ولا يعطي شكلا جيدا وسيجعلك تحتاج الى تبريد اكثر للمكان .. وهذا امر مهم عندنا ويجب ان يوضع في الاعتبار ..

لا خاب من استشار ولاخسر من استخار .. بالتوفيق ان شاءالله.

الف شكر لك اخوي
كلامك طبق الاصل من الي قاله المصمم
بالذات نقطه درجات السلم

الف شكر لكل من تواصل والواضح اني راح اخلي الارتفاع على ماهو عليه

ولنا لقاء مع اسألتي
بسندركم :secret:

بوفهد 5555
09-05-2011, 08:14 AM
اسمع اخوي نصيحة احسن ارتفاع 4 امتار اذا كانت المكيفات اسبيلت او وندو اما اذا كانت مكيفاتك دك فانصحك لا يقل الارتفاع عن اربع امتار ونص وبقولك ليش...... لان البلاط بياخذ منك 10 سم متر والجبس بياخذ على الاقل من 20 ـ 30 سم واذا كان ارتفاع البيت اقل من ثلاث او ثلاث ونص بيكون البيت نازل حتى الثريا بتكون نازله وايد وهذا الكلام من خبرة انا بنيت فلل وايد وانا دايم انصح ربعي والحين انا ابني بيتي الخاص وحطيت الارتفاع اربع ونص .. والبيت كل ما زاد ارتفاعه كان البيت احلى وشرح وايد واكثر فخامة اما اذا كان نازل راح تحس انا كئيب ومب شرح واهم شي يكون الارتفاع في الدور الارضي اما الدور الاول والبنت هاوس ما تحتاج حق ارتفاع وايد المهم لا يقل عن ثلاث ونص متر ـ بالنسبة حق الدري ما راح يكون دري عمارة كل الي بيزيد تقريبا اربع او خمس دريات

العولقي
09-05-2011, 09:10 AM
ماشاء الله الاراء مختلفه مع الرغم اني كنت متوقع انها بتكون واحده للكل الا وهي نعم للاسقف المرتفعه ! ! ! !
عموما انا من وجهة نظري انك تقسم ارتفاع الفله اللي هو حد اقصى 12 متر من ارضية الحوش لين سقف غرفة الدرج او البنت هاوس !
يعني كمثال في الفله اللي ابنيها حاليا : ارتفاع البيت عن الحوش 60 سانتي وارتفاع الدور الارضي 4.20 متر وارتفاع الدور الاول 3.90 متر والبنت هاوس 2.85 متر ! والباقي حق الوارش 45 سانتي.
طبعا هاي اللي في الرسومات عشان اطلع رخصة البناء لاني في الواقع راح ارفع البنت هاوس الى 3.60 متر !
انا صراحة من مجربين الاسقف المرتفعه وهي بصراحة تعطي فخامه في البيت وممكن انك تحط الشكل اللي يعجبك من الجبس بدون ماتخاف !
طبعا احب ان انبه من لايعلم ان هذه الارقام هي لارتفاع مع حساب سمك السقف يعني لازم ترجع للرسومات وتنقص السمك من الارقام المذكوره وتكون عادة من 20 الى 35 سانتي !
حبيت اطرح تجربتي وسلامتكم !

almaf1a
09-05-2011, 09:45 AM
ان شاء الله بروح على قياسات الاخ العولقي
60 سم+4.2 م+3.9م+2.85م+45سم
اتمنى التكلفه ماتزيد وايد خصوصا ان مساحة البنيان في الطابق الارضي 335 متر مربع

الف شكر لكل من شارك في الموضوع
وان شاء الله نستفيد اكثر من مشاركات الاخوان الباقيين

نور الحور
09-05-2011, 10:29 AM
ان شاء الله بروح على قياسات الاخ العولقي
60 سم+4.2 م+3.9م+2.85م+45سم
اتمنى التكلفه ماتزيد وايد خصوصا ان مساحة البنيان في الطابق الارضي 335 متر مربع

الف شكر لكل من شارك في الموضوع
وان شاء الله نستفيد اكثر من مشاركات الاخوان الباقيين




شكلنا حيرناك هههههههه

بس تدري الاستشارة حلوة ومفيدة ..
بويوسف ما قصر طرح لك خبرته كمهندس (وترى هالمعلومة جديدة علي << الله يعينك عيل على أسألتي يا بو يوسف هههه)

والأخوان وفوا وكفوا.. بس حبيت أزيد لك كم نقطة وأنت قرر بعدين ..

أنا زرت عدد من الفلل .. صراحة وايد فرق لما يكون السقف عالي << وأنا أقصد الدور الأرضي أكيد وخاصة المناطق المفتوحة .. بتحس بالفخامة والوسع وبتتحكم على كيفك بمستوى الجبس ..

من نصيحة مهندس الديكور .. يقول السقف لازم عالي عشان يبين فيه جماليات الديكور >> ممكن تستشير مصمم ديكور بعد ..

بالنسبة لارتفاع الدرج عدة درجات فهذا طبيعي لكن ما بيكون الفرق متعب وايد هي كم درجة وخلاص << منها لياقة بعد :victory:

السقف العالي بعد بييسر لك تسوي الاتفاعات اللي تحبها في مستوى الأرضية .. مثل ما تفضلت وقلت إن عند صالات مرتفعة ..

والله ييسر لك .. ترى موضوعك جذبني أعرف أكثر من الأعضاء المؤيدين وغير المؤيدين لارتفاع الأسقف .. وإن شاء توصل لقرار ترتاح له ..

بويوسف
09-05-2011, 11:54 AM
ان شاء الله بروح على قياسات الاخ العولقي
60 سم+4.2 م+3.9م+2.85م+45سم
اتمنى التكلفه ماتزيد وايد خصوصا ان مساحة البنيان في الطابق الارضي 335 متر مربع

الف شكر لكل من شارك في الموضوع
وان شاء الله نستفيد اكثر من مشاركات الاخوان الباقيين

انت الجبس اللي بتسويه عادي والا بتعمله ثلاث طبقات ؟

اربع متر وعشرين كثير بيكون تكلفة زيادة طبعا وبيكون زيادة درجات وبتحتاج تكييف اكثر ..

3.6 صافي بعد الغاء سماكة السقف بيكون كافي خصوصا ان الجبس لن يتعدى 40cm

خل المهندس يرتب لك على اساس ان الارتفاع الصافي بعد الجبس يكون 3 امتار .. اكثر من هذا الارتفاع لن يكون مناسبا الا لمساحات كبيرة 10 متر واكثر ..

al saad
09-05-2011, 12:01 PM
انا بيتي الحالي الصاله 7 متر
والغرف 4
والبيت من دور واحد .... مثل المسجد

والبيت الجديد كله 4 بدون جبس بس كرونيشه

almaf1a
09-05-2011, 12:27 PM
شكلنا حيرناك هههههههه

بس تدري الاستشارة حلوة ومفيدة ..
بويوسف ما قصر طرح لك خبرته كمهندس (وترى هالمعلومة جديدة علي << الله يعينك عيل على أسألتي يا بو يوسف هههه)

والأخوان وفوا وكفوا.. بس حبيت أزيد لك كم نقطة وأنت قرر بعدين ..

أنا زرت عدد من الفلل .. صراحة وايد فرق لما يكون السقف عالي << وأنا أقصد الدور الأرضي أكيد وخاصة المناطق المفتوحة .. بتحس بالفخامة والوسع وبتتحكم على كيفك بمستوى الجبس ..

من نصيحة مهندس الديكور .. يقول السقف لازم عالي عشان يبين فيه جماليات الديكور >> ممكن تستشير مصمم ديكور بعد ..

بالنسبة لارتفاع الدرج عدة درجات فهذا طبيعي لكن ما بيكون الفرق متعب وايد هي كم درجة وخلاص << منها لياقة بعد :victory:

السقف العالي بعد بييسر لك تسوي الاتفاعات اللي تحبها في مستوى الأرضية .. مثل ما تفضلت وقلت إن عند صالات مرتفعة ..

والله ييسر لك .. ترى موضوعك جذبني أعرف أكثر من الأعضاء المؤيدين وغير المؤيدين لارتفاع الأسقف .. وإن شاء توصل لقرار ترتاح له ..

اي والله ياخوي احترت
المشكلة ما اعرف كم متر مربع بتفرق معاي علشان اعرف التكلفه اذا كانت تستاهل او لا
الله يسمع منك واوصل الى قرار
شاكر لك على دعوتك الطيبه وردك الوافي




انت الجبس اللي بتسويه عادي والا بتعمله ثلاث طبقات ؟

اربع متر وعشرين كثير بيكون تكلفة زيادة طبعا وبيكون زيادة درجات وبتحتاج تكييف اكثر ..

3.6 صافي بعد الغاء سماكة السقف بيكون كافي خصوصا ان الجبس لن يتعدى 40cm

خل المهندس يرتب لك على اساس ان الارتفاع الصافي بعد الجبس يكون 3 امتار .. اكثر من هذا الارتفاع لن يكون مناسبا الا لمساحات كبيرة 10 متر واكثر ..

مرحبا اخوي بويوسف تعبناك معانا يالغالي

اخوي المشكلة اني لحد اللحين ماقررت نوع الجبس او سماكته
وشغل الديكورات راح اعتمده في المستقبل بعد ما اخلص من البناء
النقطة الرئيسيه الي انا احاتيها صافي الارتفاع في الصالة المفتوحه
لان عندي hall وهو على مستوى الفيلا
وعندي sala مرتفعه بمقدار 30سم عن الhall
وعندي sitting مرتبعه بمقدار15 سم عن الhall
فصافي الارتفاع مختلف من مكان الى اخر
المشكلة ياخوي اني ماراح اقدر اعرف التكلفة المقدره لو رفعت الطابق الارضي 30 سم
لان فيها تكلفة بنيان وتشطيب للصالات والمجلس والمطعم وغرفة وحمامين (يكرمون القارئين) ومطبخ داخلي صغير
ما اعرف المقصود بسماكة السقف بس برفق صورة توضيحيه تبين ارتفاعات البيت
مع الوضع في الاعتبار ان البينت هاوس راح اخليه في الخريطه بس ماراح ابينه ممكن للمستقبل

http://img651.imageshack.us/img651/8539/img00248201105091219.jpg

بويوسف
09-05-2011, 01:31 PM
اي والله ياخوي احترت
المشكلة ما اعرف كم متر مربع بتفرق معاي علشان اعرف التكلفه اذا كانت تستاهل او لا
الله يسمع منك واوصل الى قرار
شاكر لك على دعوتك الطيبه وردك الوافي



مرحبا اخوي بويوسف تعبناك معانا يالغالي

اخوي المشكلة اني لحد اللحين ماقررت نوع الجبس او سماكته
وشغل الديكورات راح اعتمده في المستقبل بعد ما اخلص من البناء
النقطة الرئيسيه الي انا احاتيها صافي الارتفاع في الصالة المفتوحه
لان عندي hall وهو على مستوى الفيلا
وعندي sala مرتفعه بمقدار 30سم عن الhall
وعندي sitting مرتبعه بمقدار15 سم عن الhall
فصافي الارتفاع مختلف من مكان الى اخر
المشكلة ياخوي اني ماراح اقدر اعرف التكلفة المقدره لو رفعت الطابق الارضي 30 سم
لان فيها تكلفة بنيان وتشطيب للصالات والمجلس والمطعم وغرفة وحمامين (يكرمون القارئين) ومطبخ داخلي صغير
ما اعرف المقصود بسماكة السقف بس برفق صورة توضيحيه تبين ارتفاعات البيت
مع الوضع في الاعتبار ان البينت هاوس راح اخليه في الخريطه بس ماراح ابينه ممكن للمستقبل

http://img651.imageshack.us/img651/8539/img00248201105091219.jpg


ولايهمك يالطيب مافيها تعب ان شالله ..

عزيزي بما ان الارتفاع عندك 3.9 فتقريبا السقف يكون بسماكة .3 وحط في الحساب ايضا احتمال ارتفاع منسوب الارضية .15 يعني بيكون عندك 3.45 وهو معقول نوعا ما ..

وحتى ترتاح من حيرتك فأنا انصحك بأن تجعل الارتفاع الارضي 4.2 بدلا من 3.9 والاول يكون 3.6 وبهالطريقة ما تكون في اي تكلفة زايدة من المقاول .. لأنك رفعت الارضي ونزلت من الاول ..

وان شالله يكون بيت عامر بالطاعة والإيمان :)

اضافة: بما أن هناك اختلاف في مناسيب الصالات الارضية كما فهمت من كلامك فالأفضل أن تزيد من الارتفاع كما كتبت بالأعلى بدلا من ما هو مصمم ..

العولقي
09-05-2011, 01:32 PM
اخوي انا اسف اذا فعلا شتت افكارك ولايهون الجميع انا مب قصدي اقلل من شأنهم واشكك في اراءهم ولاكن كل واحد وذوقه !:rolleyes2:
بس مثل ماقلت لك في البدايه السقف اذا كان مرتفع تقدر عقب تنزله للمستوى اللي تبيه خصوصا عند وجود غرف او صالات او مجالس في نفس الطابق ! وكل مكان وله ارتفاع مناسب له ! لاكن ماتقدر يوم تسوي سقف الدور من الصبيه انك تخلي مكان مرتفع ومكان نازل ! اذا الحل خذ اعلى ارتفاع تبيه وبعدين نزل بالجبس في بعض الاماكن !
بالنسبه للتكلفه اذا انت للحين ماسويت عقد مقاول او اتفقت مع حد فصدقني ماراح يفرق معاه 3.90 او 4.20 لانها كلها تحسب معاه اسقف مرتفعه !
لاكن اذا اتفقت معاه وعقب قلت له ابي ازيد 30 سانتي راح سويلك من الحبه قبه ويقولك راح احسبها كم تكلف من طابوق وحديد وبلاستر وصبغ والحسابه تحسب والموضوع مايستاهل !

almaf1a
09-05-2011, 01:41 PM
انا شاكر لكم والصراحة استفدت كثير من مداخلاتكم
الحمدلله للحين ما اتفقت مع المقاول
اللحين اتضحت الصورة بالنسبة لي
اخواني بو يوسف والعولقي الله يجزاكم الف خير يارب

العولقي
09-05-2011, 01:52 PM
موفق يارب وعقبال مانشوف الثريا معلقه في السقف ان شاء الله ويومها تقول العولقي قالها !:nice:

AL-ANSARI
09-05-2011, 02:42 PM
كلن وذوقه

ZURICH
09-05-2011, 03:58 PM
مثل ماقال كلً وذوقة

اذا بتسوي ديكور في الدور الي فوق ارفع السقف 4 متر واذا مو مسوي 3.60 حلو
مو حلوة الغرف الصغيرة يكون سقفها مرتفع بدون ديكور

بالنسبة للسقف كل ماكان مرتفع يكون اجمل لأنة يعطي فخامة ويكبر المكان

عندي الدور الأرضي 4.20 صالة مفتوحة والاول 4 متر

كل ماكان البيت مرتفع كل ماكان اجمل :)

بوفصول
09-05-2011, 05:50 PM
ارفع ياخوي مب خسران .. والتكلفة بسيطة ..

وبالنسبة للتكييف .. ود الخرايط حق شركة مكيفات واستشيرهم ...

عشان تاخذ راحتك في الجبس والانارة والعتبات والمداخل والدرايش وحتى كبتات الحوائط ...

وبالنسبة للدرج ، كثر الصحون ..

بالتوفيق .

وجزاكم الله خير على الموضوع

khaldoon
09-05-2011, 07:25 PM
اتفق مع اخوي العزيز بويوسف و خصوصا انه السقف العالي بيكون رائع بس لحق عليه بالتكييف

almaf1a
10-05-2011, 07:35 AM
الف شكر لكل من تواصل
والله لا يحرمنا من مشورتكم يا جماعه

almaf1a
12-05-2011, 11:48 AM
اقوى هوشه مع المهندس اليوم
قاعد يكبر ويضخم الاشياء
يقولي برفعلك في كل عتبيه من الدرج سانتيمتر واحد (هل هذا عادي) لاني استنكرت الموضوع
ويقول السالفه تحتاج شغل كثير وتعديل في الخرائط
طلعت ال 3.9 هي بالاساس 3.7 بعد خصم الصبيه بين الطابقين
وقالي الحد المسموح للارتفاع للبيت كامل 12.40
قلتله نقص من الطابق الاول وارفع الارضي
يعني في النهايه وبعد خصم عرض الصبيات
4متر للارضي
3.5 للطابق الاول
والباقي للبنت هاوس والصبيات وارتفاع البيت عن السقف
ان شاء الله 3.5 تكون كافيه لغرف النوم من غير الارضيه والجبس يعني بيطلعلي 3 متر صافي واشوفها معقوله للغرف

الله يعيين

العولقي
12-05-2011, 12:20 PM
طبعا احب ان انبه من لايعلم ان هذه الارقام هي لارتفاع مع حساب سمك السقف يعني لازم ترجع للرسومات وتنقص السمك من الارقام المذكوره وتكون عادة من 20 الى 35 سانتي !

اخوي كلام المهندس صحيح مثل ماقلت في السابق ان الارتفاع يشمل سمك السقف !
بس مب سالفه ان يكبر الموضوع لازم يكون متعاون وياك في كل فكره تطرحها له لانه يكسب رضا الزبون في الاخير !
عموما بالنسبه للدرج في حلول كثيره للاسقف المرتفعه تختلف بإختلاف شكل الدرج اذا دائري او عادي طلوع ثم استراحه ثم طلوع للطابق العلوي !
اذا كان عادي عندك حلين غير عن كلام المهندس :
1 - انك تمد الدرج - يعني تضيف سلمه او اثنين حسب الحاجه في بداية الدرج طبعا اذا مايضايق ممر او مدخل.
2 - انك تخليه يحط لك سلمه او اثنين في منطقة الاستراحه اللي في نص الدرج وهاي اللي انا سويته .
هاي الصوره مأخوذه من موضوع اخوي خليفه توضح كلامي (من بعد إذنك بودعي)!
http://im2.gulfup.com/2011-03-14/1300129534407.jpg

بوخالد2
12-05-2011, 12:23 PM
انصحك ترفع الدور الارضي فقط تقريبا 4

و الاول 3.50

احسن

والله يبارك لك ان شاءالله

almaf1a
12-05-2011, 01:02 PM
اخوي كلام المهندس صحيح مثل ماقلت في السابق ان الارتفاع يشمل سمك السقف !
بس مب سالفه ان يكبر الموضوع لازم يكون متعاون وياك في كل فكره تطرحها له لانه يكسب رضا الزبون في الاخير !
عموما بالنسبه للدرج في حلول كثيره للاسقف المرتفعه تختلف بإختلاف شكل الدرج اذا دائري او عادي طلوع ثم استراحه ثم طلوع للطابق العلوي !
اذا كان عادي عندك حلين غير عن كلام المهندس :
1 - انك تمد الدرج - يعني تضيف سلمه او اثنين حسب الحاجه في بداية الدرج طبعا اذا مايضايق ممر او مدخل.
2 - انك تخليه يحط لك سلمه او اثنين في منطقة الاستراحه اللي في نص الدرج وهاي اللي انا سويته .
هاي الصوره مأخوذه من موضوع اخوي خليفه توضح كلامي (من بعد إذنك بودعي)!
http://im2.gulfup.com/2011-03-14/1300129534407.jpg

اسكت ياخوي تقول اطر منه صدقه
ماكني دافع له حقه
الله يسلمك الدرج دائري وللاسف مافيه استراحه
اضافة سلمه راح يعفس السالفه (على كلامه)
ففضل انه يرفع سانتي في كل سلمه (اتمنى ان هذا ما يأثر اذا تغيرت القياسات في ارتفاع كل سلمه سانتي واحد)
الصوره موضحه صعوبه اضافه سلمه في اول الدرج
http://imageshack.us/m/718/5660/img00250201105121254.jpg

اللحين قالي لا تجيني الا لما اتصل فيك
وبنشوف الحل معاه
الف شكر لك على مجهودك ومساعدتك


انصحك ترفع الدور الارضي فقط تقريبا 4

و الاول 3.50

احسن

والله يبارك لك ان شاءالله

ان شاء الله بيكون 4 الارضي
والاول 3.4
بعد خصم الصبيه فقط
زيادة عليهم الجبس والارضيات
الله يجزاك خير على الدعوه الطيبه

العولقي
12-05-2011, 11:14 PM
توكل على الله اخوي وماتحاتي ترى الا سانتي واحد مب مشكله الله يعينك عليها وتقريبا ارتفاع كل سلمه 15 سانتي + 1 = 16 سانتي يعني اوكيه !

":::::" موفق ان شاء الله ":::::"

العولقي
12-05-2011, 11:19 PM
اعتذر من الاخوه الاعضاء اللي طرشوا لي على الخاص لعدم امكاني الرد من الخاص والسموحه ليس بارادتي ولكن من شروط الاداره ! وانا دائما اقول (خير الكلام ماقل ودل) !
يعني مب لازم ادش كل مواضيع المنتدى واقول كلام مافي منه فايده ! فارجوا من الاداره النظر في ذلك !

العولقي
12-05-2011, 11:35 PM
عموما احب اوضح للجميع لتعم الفائده :
الارتفاعات للفلل اللي ماشيه مع الاستشاريين والمهندسين هي كالاتي:
3.60 للارضي + 3.60 للاول + 3 للبنت هاوس
وماانصح احد انه يقلل من هاالارقام ولا ياخذ من الدور الاول ويحطه في الارضي لانها اقل مايمكن تقبلها ولاكن مافي مانع من الاضافه في الدور الارضي دون التقليل في الدور الاول"

من رأي :
1-اذا فله للاستثمار فخلك على الارتفاعات الاستاندر.
2-اذا فله للسكن وكانت مساحتها صغيره ! يكفي انك تزيد في الدور الارضي بما لايزيد عن 30 سانتي.
3-اذا فله للسكن وكانت مساحتها كبيره ! فمن الافضل ان الدور الارضي يكون بين 4 - 4.20 والدور الاول اذا كان فيه صاله او غرفه ماستر كبيره فمن الافضل يكون بين 3.80 - 3.90 على حسب مساحة الفله !

والسموحه من الجميع وحاضر لاي استفسار "

بوحارب
13-05-2011, 02:40 PM
من 13 الى 15 طابوقة الأرتقاع اشوفه مناسب جدا

almaf1a
15-05-2011, 11:09 AM
الف شكر للجميع
مشاركات مفيدة

ANONYMOUS
19-05-2011, 06:48 PM
عندي كم ملاحظه


الاولى.. البيت للسكن ولا بتأجره..


الثانيه.. المساحات كبيره ولا يادوب .. يعني الصاله كمثال.. 11 في 20.. .؟
هنا تحتاج ارتفاع 6 امتار..
اما لو 4 في 6 .. لاتتعب عمرك .. ماتنفع الارتفاعات في المساحات الصغيره..


الثالثه .. الارتفاع بيزيد في كل شي
1- الدري
2- الصبغ
3- السيراميك للحمامات والمطابخ .. يكرم القارىء
4- تكاليف التكييف

واخيرا

كم ميزانيتك.. مليون.. مليونين ؟؟ 3 ملايين ؟؟

لان في ناس خلصت فلوسهم وموقف بنيانهم ولا في امل يسلفهم البنك اي قرش زياده..

وفي ناس خلصوا بنيان ولا عندهم يفرشون..

التزم بميزانيتك..

عشان ماتوصل مرحله تطق صبع فيها


والله يوفقك