الكفاءات القطريه مقارنه بالاجنبيه .. موضوع للنقاش (يمكن احد الاعضاء مدير يسمع النقاش)

[طويل الرمح]

نشوف اغلب الدوائر الحكوميه و الشركات بالقطاع الخاص بالاخص اغلب المدراء اجانب

هل لا يوجد قطري كفو يمسك مكان الاجنبي ؟

ملاحظات من واقعنا و حياتنا اليوميه

شاب قطري شغال في احد مصانع الغاز في قطر يشتغل ما شالله نحله ما يوقف و فاهم و مجتهد بطريقة او ما او لعانة من مديره الاجنبي الشباب اللي معاه و اصغر منه ترقوا و هو محلك سر ... انتهى به المطاف مجلات الجريمه و سيدتي و زهرة الخليج و بعدها تكملة باقي الدوام نوم ... من المسؤول عن احباط طموح هذا الشخص ؟

مستشار "امريكي" معاي في الدوام سلمته تقرير لمراجعته و الموافقه عليه تفاجات يسالني كيف سويت هالشغله اللي من اساسيات المواد اللي خذناها في الجامعه يعني طالب سنة اولى جامعه يحلها و هو مغمض ... في حين هناك شاب قطري في نفس القسم يسوى عشرة منهم بخبرته وجهده للدوام وحبه له واخلاصه ...

حضرت ورشة تدريب و كان اغلب الحضور من الاجانب لفت انتباهي هندي مسماه الوظيفي مختص تحول الى نكته و ضحك للموظفيين الباقين من شدة غبائه ... من المسؤول عن دفن الشباب القطري الطموح و توظيف مثل هذه العقول الغبيه

شاب امريكي عفوا خبير امريكي شغال مع احد الاصدقاء على اساس انه مهندس خبير في البنيان و الهندسه المعماريه طاح في الانسان الغلط .. شاب قطري من افضل المهندسين .. بعد كثر الاخطاء طفح كيل اخونا القطري مسك يده يمسح عليها قاله يدك ناعمه مش يد مهندس معماري ايش تخصصك ؟؟ بعد الحاح من اخونا القطري تفاجاء بالاجابه مهندس بيئه :eek5:

انا لست ضد توظيف الخبرات الاجنبيه ابدا ... ولكن شي يستاهل على الاقل

والله العظيم يجونا من شركاتهم و بلادينهم توهم متخرجين يشتغلون عندنا خبراء

كم شاب قطري طموح مجتهد مخلص يعطي البلد اكثر من الاجنبي تضيع احلامه بسبب تهميشه

[غير البشر]

هل لا يوجد قطري كفو يمسك مكان الاجنبي ؟




شلفايده لو يمسك
عنبر اخو بلال
يضر المواطن ولايعطيه شي ولابينفعه بشي للأسف

[Dawn]

غير هالاشيا اللي قلتها ناس يجونا مطرودين وما ينفعون للشغل كلش ويجونا يشتغلون بمسمى خبير .. اعرف كم شخص من هالاشكال .. واشهر وحده اظن مديرة كلية المجتمع لان الوطن كتبت عنها لكن فيه منها واااايد في قطر ولا حد درى عنهم للاسف ...

[Dawn]

وشوف بخصوص مميزات القطري عن الاجنبي

ممكن يتميز باشيا كثيره لكن ابرز شي ممكن يتميز فيه هو انه يعطي ( من قلب ) مب علشان الراتب ،، وتلقاه يتسامح ويتنازل عن حقوق كثيره مستحيل الاجنبي يتنازل عنها ... غير هذا يقدم اكثر من المطلوب منه ..

[R 7 A L]

مشكلتنا مو من الاجانب
مشكلتنا من أنفسنا
احنا سبب المشكلة

[بدون]

عندنا أكثر من واحد بهالمسميات و لما تساله عن موضوع يقعد يتفلسف ، تقول له ما يصير ،، يزيد في التفلسف حبتين ... تسوي اللي قال لك عليه!
و النتيجة يجيك المدير يغسل شراع ام جابتك لأن اللي قاله المستشار/ الخبير غلط ،،،
تقول له أن المستشار أو الخبير عطاك التوجيهات
يرد عليك أنا المدير و تاخذ التوجيهات مني و بس !!!!!

عجل الخبير شفايدته ؟؟؟؟؟

حق غسال الشراع ؟؟؟؟؟

[D0ha]

هناك اعتبرها انا شخصيا مثابة مشكله يعاني منها بعض القطريين " لحد يطالعني"...وهي التدريب والتطوير...لنبدأ من اول السلم:
- الشاب القطري يتخرج من احدى الدول الاجنبية ولنفترض انها الولايات المتحدة الأمريكية
- تخصص مناسب ويتناسب مع متطلبات الهيئة او المؤسسة ولكن يتم تعيينة بشروط...وهي كالأتي:
- يحتاج الى دخول دورة لغة انجليزية (الأخ يقول له, باقي لك اشوي وتعدي اللغه لكن للأسف لازم الدورة) على فكره المقوله هذي قالها حق نص شبابنا, ومايدري انها قديمه..
- يحتاج الى تطوير....تطوير مايخلص يبونه ايصير طيارة ولا صاروخ
- يحتاج الى دورات خارجية....لا والبدل يكون بدل متدرب يعني نص الموظف
- يحتاج الى تدوير وظيفي....ماخلصنا من الاولى الا القرار يفر فيه الى مكان ثاني...يعني ارجع الى الرقم 2
- يحتاج الى اعادة تأهيل....مجرد تعميم بدورات جديده الا وتم وضع اسمه..."فقير"
- يحتاج ويحتاج ويحتاج الى اخر ماينتهي من دورات ودورات...ينظر الى العمر الا وهو 60 سنة او البند المركزي....او باركينغ الخبراء المنزليين.

يتم توجيه كتاب شكر وتقدير على السنوات التى خدم فيها هذه المؤسسة...يفكر في العمر الذي قضاه وهو يتعلم ويتدرب...يحك راسه شوي, يسأل نفسه: انا شسويت في عمري؟
يرد يكلم المسؤل عنه: تعال يالطيب شسالفة؟
يستغرب انه مديره جديد " من فئة الخبراء" تم تعيينه من سنوات....
يرجع ويدور له طراد يحدق عليه ويغني: يازمان الصبا وتالي الليل يدور الربع
صج زمان اغبر

أيام

[تغلبية]

للحين الجماعة عندهم عقدة " الرجل الأشقر " والحين صارت " الخبير الاجنبي" وكأن اللي جاو جايين يخترعون الذرة !

وأغلب اللي يجون ما يعطون مثل مايعطي القطري المخلص

لكن من يسمع وللأسف !


الميزة الوحيدة في الآجنبي وما تتوفر في أغلب القطريين .. انه مكينة شغل .. ماعنده مشكلة لو اشتغل 10 ساعات متواصلة سمته وحده !

[D0ha]

الميزة الوحيدة في الآجنبي وما تتوفر في أغلب القطريين .. انه مكينة شغل .. ماعنده مشكلة لو اشتغل 10 ساعات متواصلة سمته وحده !

كلام سليم وصحيح...شاهدت بأم عيني هذا الوضع والاختلاف مابين الطرفين...الاجنبي وبمختلف الجنسيات يعمل دون انقطاع.....في المقابل هناك بعض المواطنين يعمل بمجرد انتهاء العمل.

[بيرق قطر]

مشكلتنا مو من الاجانب
مشكلتنا من أنفسنا
احنا سبب المشكلة


أيدك الرأي ولأكن

النصيحة لإخواني

الصبر ثم الصبر ثم الصبر

وتأكد إن هذا الوطن وطنك والأجنبي شخص عابر

وتأكد إن كان الأجنبي يسرق 100 إلف وأنت معه

فاشلون لو طلعت ونفرد بالمكان والله ليلعب بالدنيا كلها

لذا نصبر على بلوانا لحد ما الله يفرجها

[الزجاجي]

عقدة الخواجه !!

حبيت اقولكم موقف حصل لي في شغلي .. جهه حكوميه
حبيت اكمل دراستي وحولوني على لجنه .. اللجنه فيها الرئيس ونائب الرئيس وغيرهم من كبار الشخصيات في جهتي .. الشي المضحك والمحزن ان خبروني اتكلم بالانجليزي في اللجنه .. ليش لان المستشار أمريكي

معقوله رئيسي ما يعرف يقولي وافقنا عليك أو لا !!
والمشكله الاكبر ان اللجنه تقرر مصير التوظيف للموظفين الجدد او الترقيات او اكمال الدراسه وكلها ترجع لهذا المستشار

[شيخ الديرة]

مشكلتنا مو من الاجانب
مشكلتنا من أنفسنا
احنا سبب المشكلة

هذا بيت القصيد وأنا أتفق معك

لو خسر الفريق الرياضي أول شي نطالب بيه مدرب اجنبي, أو لاعب أجنبي أو حتى حكم أجنبي
عندما نحتاج رعاية طبية أما نطالب بالعلاج في بلاد أجنبية أو نريد طبيب أجنبي يعالجنا هنا

كل ما جاء في المشاركة الأساسية هو امتداد لظاهرة الأنبهارية بالأجنبي وهي ظاهرة أجتماعية لا يمكن حلها بتغيير أفراد معينين.

[احبك يابلد]

مشكلتنا مو من الاجانب
مشكلتنا من أنفسنا
احنا سبب المشكلة

:nice:

[سهيل قطر]

الله المستعان

حسبي الله ونعم الوكيل

[النائب]

الكفاءات القطرية موجودة وبكثرة والحمد لله

ولكن المشكلة إن أصحاب القرار لا ينظرون إلى أصحاب الكفاءة من المواطنين بقدر نظرتهم إلى اسماء عائلاتهم . يعني التعين بإسم العائلة قبل الكفاءة .

وهذا الشي إللي جعل تعيينات القطريين في المناصب العليا كمدراء ورؤساء أقسام في الهيئات والمؤسسات قليله .

[meeemz]

- يحتاج الى دخول دورة لغة انجليزية (الأخ يقول له, باقي لك اشوي وتعدي اللغه لكن للأسف لازم الدورة) على فكره المقوله هذي قالها حق نص شبابنا, ومايدري انها قديمه..
- يحتاج الى تطوير....تطوير مايخلص يبونه ايصير طيارة ولا صاروخ
- يحتاج الى دورات خارجية....لا والبدل يكون بدل متدرب يعني نص الموظف
- يحتاج الى تدوير وظيفي....ماخلصنا من الاولى الا القرار يفر فيه الى مكان ثاني...يعني ارجع الى الرقم 2
- يحتاج الى اعادة تأهيل....مجرد تعميم بدورات جديده الا وتم وضع اسمه..."فقير"
- يحتاج ويحتاج ويحتاج الى اخر ماينتهي من دورات ودورات...ينظر الى العمر الا وهو

المشكله انهم ما يطرشون دورات ، الدورات كله تطلع للأجانب .. اما القطري لي طلب دوره ينظر اليه كانه يبي يتفسح او يغير جو سواء الدوره كانت داخليه ام خارجيه

[OREO]

كلام سليم وصحيح...شاهدت بأم عيني هذا الوضع والاختلاف مابين الطرفين...الاجنبي وبمختلف الجنسيات يعمل دون انقطاع.....في المقابل هناك بعض المواطنين يعمل بمجرد انتهاء العمل.

كلامك صحيح .. لان القطري يتبع القوانين المتبعه و عكس الاجنبي اللي يجلس لاجل الاوفرتايم و تضبيط العلاقات ... ( في انسان ما يحب يروح البيت وقت انتهاء العمل و يجلس مع هله ؟؟؟ )

في الدول المتقدمه الموظفين ما يشتغلون اكثر من الوقت المعتاد و المسجل حسب القوانين و اللوائح لجهة العمل الا ما ندر و حسب اهمية الشغل و تكلفة الشغل الا في قطرنا و خليجنا لاجل مصالحهم الشخصيه .. و لابد نحط في البال بأن من اهم مقومات العمل الامانه و الاخلاص اللي معظم الاجانب ما يملكونها و خاصه بعد اوقات الدوامات الرسميه ,..

[قلم ساخن]

الحين اعتقد سواسية

لان دخلت عندنا ثقافات سمية وتفاعل معاها القطري وصار القطري والاجنبي واحد

الزين والشين فيهم

[راسي براسك]

بسم الله الرحمن الرحيم ,,

أخوي طويل الرمح ..

تحيه طيبه لك وبعد ,,

من خلال تجربتي في العمل مع الأجانب والقطريين في قطاع واحد ,,

لاحظت ملاحظات عديده وهي :

الأجانب : الألتزام في الوقت والحضور باكرا ً
القطريين : الحضور بعد نصف ساعه من الوقت والعذر ( زحمه )

الأجانب : تجدهم كـ خلية النحل في العمل والجديه
القطريين : يعملون لكن يوجد نوع من التأخير .


هذا المثال ليس لـ الجميع ولكن الأغلبية ,,
وأبناء وطننا فيهم الخير لكن لا أعلم ماهذا الأستهتار أحياناً
أنظر الى الجريده وسوف ترى خيرة أبنائنا ومنجزاتهم يومياً

يتحسر قلبي لما أشوف الأجنبي ماسك منصب مدير
والقطري تحته مسؤول فقط !
لكن لما ترى طريقة العمل لدى الأثنين ترى المدير أنشط من المسؤول بكثير .

[meeemz]

بقولكم سالفه : مؤسسه كبيره ماسكينها قطريين يروحون لشركه قطريه والشركه القطريه يعطونهم عرض
المؤسسه ترفض العرض
و يروحون لشركه اجنبيه ويتعاقدون معاهم بمبالغ (الله اعلم كم ) بعدها اتيي الشركه الاجنبيه وتتعاقد مع الشركه القطريه تنفذ كل شي (من إلى)
للاسف المسؤولين مب هامهم الشغل اهم شي في بالهم معمول بعقول و بايدي اجنبيه

[R 7 A L]

بسم الله الرحمن الرحيم ,,

أخوي طويل الرمح ..

تحيه طيبه لك وبعد ,,

من خلال تجربتي في العمل مع الأجانب والقطريين في قطاع واحد ,,

لاحظت ملاحظات عديده وهي :

الأجانب : الألتزام في الوقت والحضور باكرا ً
القطريين : الحضور بعد نصف ساعه من الوقت والعذر ( زحمه )

الأجانب : تجدهم كـ خلية النحل في العمل والجديه
القطريين : يعملون لكن يوجد نوع من التأخير .


هذا المثال ليس لـ الجميع ولكن الأغلبية ,,
وأبناء وطننا فيهم الخير لكن لا أعلم ماهذا الأستهتار أحياناً
أنظر الى الجريده وسوف ترى خيرة أبنائنا ومنجزاتهم يومياً

يتحسر قلبي لما أشوف الأجنبي ماسك منصب مدير
والقطري تحته مسؤول فقط !
لكن لما ترى طريقة العمل لدى الأثنين ترى المدير أنشط من المسؤول بكثير .





اخوي
لاتنسى ان القطري عنده ظروف تختلف عن الاجنبي


الاجنبي يجي فاضي ماعندة الا الدوام
وقعدتة في البيت تعتبر علية خسارة
لانهم يحسون خسارة الكهرب حتى في الدقايق الى يقعدونها في البيت .


القطري ياخوي اذا رجع من الدوام ومن 8 ساعاات عمل يجية عمل أخر مع الأهل

الله يعين القطريين مو مرتاحين لا جسدياً ولا نفسياً والكل يدور عليهم الزله


بعدين خلنا نكون واقعيين 99% من الوظايف مو متوقفه أذا تاخر الواحد 10 دقايق

[طويل الرمح]

اخوي
لاتنسى ان القطري عنده ظروف تختلف عن الاجنبي


الاجنبي يجي فاضي ماعندة الا الدوام
وقعدتة في البيت تعتبر علية خسارة
لانهم يحسون خسارة الكهرب حتى في الدقايق الى يقعدونها في البيت .


القطري ياخوي اذا رجع من الدوام ومن 8 ساعاات عمل يجية عمل أخر مع الأهل

الله يعين القطريين مو مرتاحين لا جسدياً ولا نفسياً والكل يدور عليهم الزله


بعدين خلنا نكون واقعيين 99% من الوظايف مو متوقفه أذا تاخر الواحد 10 دقايق

اخوي راسي براسك كلام رحال صحيح

نعم الاجانب ملتزمين بالوقت اكثر من القطري

ولكن انا حاب اوضح و واكد على عنوان الموضوع "الكفاءات" يعني القطري الكفو في قطريين وايييييييد من يداوم لين يطلع جرايد و كرك ... انا اتكلم على اللي ملتزم بعمله و اللي فاهم شغله اكثر من مديره الاجنبي و بعدين انا شايف قطريين وايد عندنا في الدوام من 7 ونص لين 6 المغرب ما يطلع و مسؤؤلي واحد منهم هذا اللي خلاني احس فيه وانقهر عشانه و يدعم الشباب القطريين قد ما يقدر و يعلمهم و ويوجههم .... ان شالله ان شالله بيمسك رئيس قسم قريب

بخصوص اللي يتكلم عن الدورات والتطوير يا انك فتحت باب و تبي اطلع اللي في قلبي هههههههه

تخيل اداوم في اسبوع في المطافي و انا مالي خص شغل في المكتب حتى الشخص الثاني يقول للي يدربني ياخي ما يحتاج شدخله ؟؟ قال لا لازم يروح و يتعلم ههههههههه

غير الدورات الخارجيه ممنوووووووع ... دخلت على المدير و قلت له انت تحسبني بروح اتمشى ؟؟ ترى اقدر اسافر بفلوسي كل سنه مب محتاج كورساتكم و دوراتكم

هييييييييه قلبه متروسه

[SPIRIT_OF_QATAR]

يعتمد على الشخص نفسه في ناس قطريين عندنا مبدعين وقدروا خلال فتره بسيطه
يطيرون الاجانب الي فوقهم وياخذون مكانهم بعد مااثبتوا قدراتهم

ليش يحبون الاجانب ربعنا .. من الي شفته في شغلي
اول نقطه ان المسؤول القطري يقدر يتحكم اكثر في الاجنبي حتى لو في مشكله في المصنع بعد الدوام
بيتصله وبيروح المصنع اما القطريين مب كلهم يروحون المصنع في ناس يروحون وناس يقولون الدوام
خلص ليش اروح خصوصا لو مافي اوفر تايم لهم

نقطه ثانيه يحبونها في الاجنبي انه يعرف يكتب تقارير ويزينها ويلونها ويتكلم بس لو بتجي للمعلومات اتحصل
القطري فاهم اكثر منه بس الاخ مالي عين المدير بتقاريره

نقطه ثالثه وشفتها عندنا في بعض الاجانب لما اتصير مشكله حتى لو يعرف الحل لها يخليها وينطر ينطر
لين تكبر المشكله والكل يسمع عنها من المسؤولين الكبار وتصير قضيه يجيك البطل ويحلها بغمضة عين
ويقوم سوقه وسط المسؤولين وهاي صارت عندنا اكثر من مره

نقطه رابعه .. التكتلات ولا العصابات الي يسوونها في الشغل مثلا عندنا الهنود شايلين بعض .. واحد من ربعنا
القطريين كان يدور معلومات عن شغله معينه وجاء الهندي قاله ماقدر اعطيك هل اوراق الي تبيها والملفات وبعضها مب عندنا .. كلمه هندي ثاني مع القطري في نفس القسم بعد ما شكى له الحال وفي دقايق كل
المعلومات الي صاحبنا القطري كان يبيها وصلته ومافي شي صعب كان ومن نفس الشخص الي رفض يعطيه!!

وبعض الاجانب يخافون على مكانهم من يحطون قطري تحته عشان يدربه .. مايدربه عدل ويخش عنه
المعلومات ويحاول يطفر عيشته وفي الاخير في التقرير يقول هل شخص مايعرف شي .. شلون تبيه يعرف
ويستفيد وانت الي المفروض خبره ودربه ماقاعد اتشوف شغلك عشان مايروح مكانك


هاي عن الاجانب .. بس مو معناته القطريين ملائكه القطريين عليهم كلام بعد

مثلا بعض الي يشتغلون عندنا مايشتغلون من قلبهم .. يجون مجرد المسؤول يشوفهم وياخذون المعاش اخر
الشهر ويدورون الترقيات بدون مايبذلون مجهود .. انا اقول البعض ومشكله الناس يشوفون هل فئه
ويعومنها على كل القطريين يقولون القطريين مو مال شغل..

نقطه ثانيه عن القطريين لما يكون مسؤوولك قطري وتجي تشتغل وتنزل المصنع من 7 الصبح وتطلع
الساعه 9 ولا 10 في الليل واليوم الثاني كلمة يعطيك العافيه مايقولك هاي تحطم الموظفين ماتحس بتقدرين
وهذي صارت لي اكثر من مره بس الله كريم


فلما يقارنون الاجنبي مع القطري يقولون لا القطري مايشتغل والاجنبي شغال
انا اتكلم من الي صاير عندي في الدوام واكرر بعض الاجانب وبعض القطريين مب الكل
عندنا اجانب مب مقصرين ويستاهلون وعندنا قطريين بعد يستاهلون يمسكون مناصب اكبر

[alzween]

صدقني في دولة قطر يوجد فساد إداري كبير ومحسوبية هي التي جعلت هذه الأمور تنتشر ، ثم إن عقدة الخواجة ما زالت مسيطرة على الإدارة ، بمجرد أن تكون جنسية أربية أو أمريكية أو استرالية ، فستجد مسمى وظيفي كبير ورفيع بانتظارك ، أعرف إحدى الإدارات توزع لقب خبير بالمجان، خبير إداري، خبير شاي ، خبير حلويات ، خبير غسيل ، وكل واحد من هؤلاء الخبراء يتقاضى راتبا لا يحلم به المواطن القطري مع العلم أنني لست مواطنا ، لكن هذه حقائق شاهدتها ، وكلي أسف أن يصل الفساد الإداري إلى هذا الحد وتصل الوساطة لمنح مسميات وظيفية لأشخاص قد لا يكون أحدهم يحمل شهادة ثانوية.

[الغالي!]

انا اعرف ناس كانو بياعين في الستي وراحو بلدنهم ورجعو الدوحه بعقود خارجيه واعرف ناس اجانب كانو في حفل افتتاح تطوع في توزيع الكتب عن الافتتاح في احد الجهات الحكوميه والان مسولين في هذي الجهات اي خبرات بس للاسف ساعات القطري لمسك منصب ينسى امه بعد مش القطرين !!!!!!!!!!!!!تخبط في تخبط