بلوى....من بلاوي المطاعم في قطر!!!!

[طائر النورس]

السلام عليكم ورحمة الله....

من حقّ هذا الموضوع أن يُدبّج وتُرصد كافّة مظاهره بدقّة كبيرة....نظراً لتعلّقه بأحد المطالب الأساسيّة العليا للبشريّة...وهو جانب الصحّة....إلا أن ضيق الوقت لديّ يجعلني أقتصر على ذكر جانب فقط من جوانب التقصير والإهمال المشترك بين المطاعم والقائمين عليها من ناحية...والجهات المسؤولة في البلديّة والصحة من جهة أخرى.

وفي الوقت الذي نجد فيه الرقابة المتناهيّة تقوم على قدمٍ وساق في الدول المتقدّمة....نجد التقصير ظاهراً في بلداننا العربيّة للأسف الشديد بالرغم من ارتباط المفاهيم الصحيّة بقيمنا الدينيّة والشرعيّة....

سأكتفي بمظهرٍ واحد فقط...وذكري لهذا المظهر لا يعني اختزال الملاحظات بهذه الظاهرة....

لفت نظري كيف يُباشر العمّال في الكثير الكثير الكثير من المطاعم بمختلف مستوياتها التعامل مع الأطعمة ولمسها دون لبس قفازات صحيّة لذلك.... رأيتُ عدداً من المطاعم الهنديّة والتركيّة والمصريّة ترتكب هذه المخالفة...وإذا لبسوا تجد أن أصابع القفازات قد تقطّعت ليصبح وجودها وعدمها سواء...فضلاً عمّن يباشر لمس الأطعمة بالقفازات ويستلم الأموال في نفس الوقت...لتتنقل الميكروبات والجراثيم بسهولة ويسر من وإلى الزبائن....


الحل في نظري : حملات تفتيش مفاجئة وغرامات فلكيّة تجعل للمتلاعبين بحياة الناس عبرةً لغيرهم....


كذلك: إقامة دورات (إجبارية) لكل أصحاب المطاعم مدفوعة الثمن من قِبَل أصحاب المطاعم لكافة العاملين....هذه الدورة المصغّرة تقوم بدور التوعية الصحيّة ومخاطر الجراثيم وكيفية الوقاية منها....باختصار: كل ما هو لصيق بحياتهم


صدقوني: لم أقصد بكتابة هذا الموضوع مجرّد بثّ الهموم أو الأنس بهذا الهمّ المشترك...بل أقصد أن أطالب بإيصال هذا الصوت وهذه الشكوى إلى المسؤولين....أين مرشحينا وعن هذه القضيّة؟؟؟ من يُبلغ عنّي شكواي؟؟؟

وجزاكم الله خيراً

[chillis]

والله صدقني البلديه مهب مقصره بس هم يتجاوزون

[شموخ دائم]

,

,


مرحبا

موضوع طيب بارك الله فيك
اتفق معاك نريد زياده في الحمايه وزياده في النظافه الاكل مرتبط بالصحه
علينا دور احنا لو شفنا شي بهذه الطريقه لازم نكلم المسئول في المطعم وما نسكت
لان اهمال العامل هذه مشكله كبيره لا صاحب المطعم ولا المدير
يرضى فيها صرفوا مبالغ كبيره على المطعم ومن المهم لديهم
ان المطعم ياخذ سمعه طيبه ونظيف ولكن العمال هم المهملين
لا تنسى ان هم جايين من بيئه مختلفه وقرى بعيده ما عمرهم شافوا القفازات
الا في قطر

في الدول المتقدمه يوظفون شخص في المطعم شغلته مراقبه النظافه للعاملين
يراقب القفازات ويراقب تغطيه الشعر يراقب غسيل الاواني ويراقب نظافه الارضيه ويراقب غسيل الخضروات قبل تقطيعها
هذا الشخص مهم جدا شغلته نظافه المكان وشديد جدا على العمال
ياخذ راتب للمحافظه على نظافه وسمعه المحل
للاسف لايوجد هذا الشخص الا في فنادق قطر

اتمنى يكون شي اجباري في قطر توظيف شخص في المطاعم تحت مسمى ( مراقب نظافه )


دمت بطيب

,

,


اخوك

شموخ دائم

[meeemz]

فعلا هالشي كل المطااعم ترتكبه بلا استثناء ، يبلسون القفاز في يد وهاليد يسون فيها كل شي ويمسكون فيها الفلوس والله لوعو جبدي خاصه مال الذره ، لو مايلبسونه ابرك ... في امريكا يلبسون قفاز يديد في كل مره وعند الحساب يفصخونه و هالحركه شفتها في سب واي، يغيرون القفاز

[بوسعيد2]

القطري اهم من...........................

[غزلان]

اما مسك لفلوس والطلب بنفس القفاااز كم مره صارت وكم مره اكنسل الطلب والشي الثاني اذا بتفتح الكيس تدخل يدها كلها داخل الكيس الى بتحط فيه الطلب:rolleyes2:

ولا الفلبينيات منعدمه عندهم النظافه الا البعض

[كازانوفا]

للاسف ما منهم فايده تكلمنا معاهم بس ردهم كريه

[La Bella]

هههههههههه تذكرت أمس عند مندرين الغرافة
حاط العصير تحت باطه
عيزان الأخ يوصل طلب طلب للسيارات
يمسك طلب بيدة وطلب تحت باطه
:eek5: عصبت عليه وماخذت الطلب ورحت

[abdulla4u]

لا حياه لمن تنادي ...

[الحال مايساعد]

صحيح والله .... العامل تحصله لابس "قفازات" ويفتح يده بالكيس ، يحط الساندويش أو الفطاير بالكيس بنفس اليد إللي لابسه القفاز ، ويستلم الفلوس بعد بنفس اليد
لكن!!!
أنا أشوف انه المشكله فينا حنا المفروض تبلغ على طووووووووووووول
والإخوان ماراح يقصرون في البلدية

[الدمعه]

حتى احنا لاحظنا هالشي وتقريبا بوالعيال كل اسبوع يسوي مشكله في مكان ..

مره ماكدونالز اللي في محطه بوهامور ..ومره باسكن روبنز .. ومره برجر كينج

واي مكان ناخذمنه وجبات ويكون هو نازل يطلب الطلب لازم ينادي مديرهم ويهاوشهم

ولافي فايده ..

بعد الفلبن اهون من البنغال مايخلي مكان مايحكه ويزخ الاكل وع ....

اذا لهم موقع الكتروني بنكتب لهم بس يعني هالشي من الاساسيات المفروض مايتغير ..

وهالشي بس صار احين هالفتره .. مااعرف وشو السبب ..

[intesar]

البلدية مو مقصرة

[فيزيائية]

البلدية وراهم بس احنا كمواطنين لازم مانسكت عن حقنا
في كذا مطعم فاست فود رفضت استلم الوجبة لان (الشيبس) اللي يحطونه جدامنا تحطة الموظفة بدون قفازات (يعني يلمس يدها) ...
ولما اعترضت المدير على طوووول رماه في الزباله وطلب منها لبس قفاز
موقف ثاني في مطعم مشهور طلبت لبنتي سباجتي وطلبت الصوص على جنب
وجابها لي وعلى وجهها جبن رجعتها لان بنتي فيها حساسية الجبن
راح وقلب المعكرونة في صحن ثانية (يعني جديدة)....
ولما اكتشفت الموضوع ماسكت وكلمت المدير وهاوشتة ...
استهبال وعدم اهتمام فينا ولا في صحتنا كأننا ناكل ببلاش !!!
الخلاصة ...
لانقول كل شي على البلدية او الرقابه لان احنا لازم نفعل دورنا ومانسكت عن حقوقنا.

[@north_star@]

الحين صار نادر تحصل عمال المطاعم لابسين قفازات والمصيبة الاكبر اذا كان لابس قفازات تلاقيه يروح يدخن برا المطعم وهو لابس نفس القفازت وما يخلي شي ما يلمسه وبالاخير هو اللي يحطلك الطلب بالكيس والله المستعان

[airbus]

اي والله ذكرتني الاسبوع الي طاف كنت طالب من محل معروف وجبة سوبر ستار <<<<<< الحين عرفتوا اي مطعم المهم بعد ماطلبت دخلت الحمام الله يعزكم اغسل يدي الا اشوف الي يشتغل في تحظير الطعام طلع من حمام بدون مايغسل يده !!!!!!!!! على طول رحت كنسلت الطلب وقطيت كم كلمة ورحت



وربي يوفق الجميع

[طائر النورس]

شكر الله لكم تفاعلكم....


الأخوة الذين يقولون: "البلديّة ما قصّروا"....أقول لهم: البلديّة بيدهم أن يفعلوا أكثر بكثييير مما يفعلوه الآن....

بالطبع أنا لا أتحدّث فقط عن القطاع التنفيذي والإشرافي في البلديّة....بل أتحدّث كذلك عمّن بيدهم صنع القرار....


ألا يمكن للبلديّة أن تقوم بعمل دوريات تفتيش مفاجأة وغرامات فلكيّة لمن لا يهتمّ بالنظافة مسبوقة بحملات تسويقيّة ودعائيّة "حتى يخاف السلطان من لا يخاف الرحمن" وبالذات بالجريده الانجليزيّة وتلك الناطقة بالأرديّة "على ما أظنّ"....


ألا يمكن للبلديّة عقد تلك الدورات الإجباريّة مثلها مثل "البصمة الشخصيّة" التي تُطلب من كلّ وافد جديد؟؟؟.... ستُكلّف مالاً؟؟؟ من سيدفعها هم العمّل أنفسهم....إن الجانب "الأمني" ليس بأقلّ أهميّة من الجانب "الصحّي" والذي يقتل ببطأ....



بالنسبة للأخوة الذين يقولون أن الدور علينا كذلك: نعم....نحن نتحمّل جزءاً من المسؤوليّة...ليس فقط بنصيحة أصحاب المطاعم....فتلك جهودٌ فرديّة جدواها قليلة....ولكن بإيصال هذا الصوت عن طريق الجرائد وصباح الغير والجهد الإعلامي ومناقشة المسؤولين عن طريق العلاقات الشخصيّة والديوانيات.....وهم لن يُقصّروا أبداً....لأننا جميعاً في سفينة واحدة...وحماية الوطن مسؤوليّة الجميع

[بوعمير]

شوف اخوي علشان موضوعك يلقى أهتمام يجب أن تتوافر فية بعض الشروط مثل :

* ان يكون ذو ميزانية تتجاوز الـ 5 مليار دولار.
* أن يكون له مردود إعلامي كبير خصوصاً في الخارج (زبو - شو).
* أن يشكل العنصر الاجنبية فيه الاغلبية العظمى.
* أن تكون اللغه الانجليزية هي اللغة الرسمية.
* شرط إختياري : يفضل أن يكون المشروع خارج حدود الوطن.

والله الموفق.

[ام عبدالعزيز]

شكثر مطاعم...اكلهم حلو بس مستوى النظافه زيرو


حتى الفنادق ال7ستار النظافه منعدمه

[نفسي عزيزه]

الله كريم

[بوخالد911]

اتصل بقسم رقابة المطاعم
البلدية

[die 4 qtr]

انا مره كلمت صاحب محل وين القفازات قال لي خلصت اللي عنده وبكره بيشتري

[Dana’1]

أنا بعد كم مرة اشوف والله يعين فعلا لازم ما نسكت ونتكلم ونقولهم كنسل الطلب هو بير يكبة وبيخسر اذا كل واحد فينا سوا كذا بيتأدبون شرايكم نسوي هالحملة بهالمنتدى ونكتب أسماء المطاعم ونقول للمدير هالشي وفي وقتها نردهم خصوصا هالوقت حر ووصيف وتكثر الحشرات
أذكر ووحدة طلبت من معصر ويوم جاء الطلب كلت تقول أنا أكل الا احس بشي امضغة غير كأنة غضروف الدجاج المهم تقول يوم طلعت الا هو...أظفر وعع تقول وانتو بكرامة على الحمام رجعت كل شي كلتة أخييية


يعني لازم ناخذ الموضوع بجدية من اليوم وطالع ما نسكت عنهم ونفتخ موضوع بهالخصوص ونقولهم للمدراء ان راح نفضحكم بالمواقع مافي غير الفيس بوك مجمع الشباب و الثورات:) هذا غير انا راح نبلغ عنكم ودائم كذا ومن كل اغلب الناس مع الوقت بيتأدبون

[أبو بكر سالم]

الافضل محد ياكل غير من اكل البيت

[نورالهدى]

الافضل محد ياكل غير من اكل البيت

:victory:

[بو منيرة]

يا جماعة شفايدة القفاز اذا تمو لابسينه طول اليوم

كم مره صارت وشفت الطباخ في حمامات الستي الله يكرمكم ... يطلع ولا حتى يلتفت عالمغسله

[chillis]

يا جماعة شفايدة القفاز اذا تمو لابسينه طول اليوم

كم مره صارت وشفت الطباخ في حمامات الستي الله يكرمكم ... يطلع ولا حتى يلتفت عالمغسله

على الصبح :weeping:

[بوخالد2]

المفروض اسكر المطعم اذا مخالف من سوء الموظفين فيه و اشهر بالمطعم ليكون عبره لغيره

[سراج الروح]

:thumbup1:

[طائر النورس]

رفع الله قدركم ووفقكم لكل خير..

طيب يا جماعه وبشكل عملي: من يقول "تمّ" ويتواصل مع المسؤولين في البلديّة؟؟؟

ومن يقول "تمّ" ويتّصل على برنامج صباح الخير أو وطني الحبيب؟؟؟

[م. عبدالعزيز]

في subway كل مايخلص طلب يشيل القفاز ويستلم الفلوس وعقب مايجيله الزبون الثاني يلبس قفاز جديد