استفسار : بغينا جدول سياحي لـ تايلند رحلة شبابية

[فيصـــل]

السلام عليكم ورحمة الله وبركاته

صبحكم الله بالخير جميع ..

باذن الله رايحين تايلند سياحه في سفره شبابيه ..

فبغيت من اللي راحوا تايلند من قبل يرتبون لنا جدول سياحي لـ عشر ايام

يعني خاصه الرحلات والامور هذي اللي فيها اكشن ..

والله لايهينكم على كل حال

[Rashid554]

مرحبا اخوي فيصل

تايلند لو تقعد فيها سنه ماتخلص

بما انكم شباب فـ التسوق اعتقد بعيد عنكم ومو ضمن جدولكم ..

الذهاب دايركت الى بانكوك عن طريق اي خطوط تبونها واخذ طيران اقتصادي الى بوكت قضاء 4 ايام و 3 ليالي تذهبون فيها الى (جزيره جيمس بوند ) او ( بي بي ايسلاند ) مع اني افضل جيمس بوند عن بي بي ايسلاند ..وبتقضون نص يومكم هناك اعتقد من 7 الصبح الى 4 العصر ...

واليوم الثاني تخلونه فنتازيا شو ( انصحك فيها للامانه اذا انتو من محبين العروض المسرحيه الرائعه والليزر ) وهي تبتدي من 6 الى 10 مساءً ويكون عندك الصباح فري تروحون رالي السيارات بالاضافة الى لعبه المسدسات الملونه ..

اليوم الثالث خلوه فري دورو فيه في (3) مجمعات في بوكت مرتبطة ببعض وتدشون المجمع عندهم تشوفون السينما 3 دي طبعا مو فلم ولكن مثل ( سينما الخيال ) الي في علاء الدين ولكن جميله الصراحه ، وكذلك مسدسات الليزر ..
مع ان فيه رحلات وايد في بوكت ولكن معظمها بحريه

تاخذون طيارة من بوكت الى شنغماي وتكفيكم 3 ليالي في شنغماي

اليوم الاول : تروحون كامب الفيله عروض رائعه من الفيله بالاضافة الى السفن النهريه الخشبيه

اليوم الثاني : تروحون اعلى قمة في تايلند ( مع ان الرحله متعبه وايد وايد ) بحكم ان كان معاي عوائل ولكن حلوه ومشكلتها طويلة بالوقت

اليوم الثالث : خلوه فري تدورون بشوارع شنغماي وفيه عروض وايد لشنغماي تقدمها شركات السياحه تقدر تختار الي تبيه

بعدها تاخذون طيارة الى بانكوك ومن بانكوك بسيارة الى بتايا ( ساعتين تقريبا ) مع ان بتايا ماعجبتني كلش لكن فيها ( الغواصه ) وللاسف ماحالفني الحظ اركبها ، بعد عندك عالم تحت الماء ، عندك الرياضات البحريه

وباقي عندكم يوم اقضوه في بانكوك في مدينة العاب سيام بارك من اروع مدن الالعاب الصراحه وانصحك تروح لها بيوم عادي بتقضي احلى ايامك فيها من اروع المدن
وبعد عندهم مدينة العاب دريم بارك لكن ماتتقارن مع سيام بارك

كذلك في شركة تعاملت معاها في اخر سفره لي شركة عربية تتعامل معاهم ع النت ويحجزون لك كل شي يعني توصل المطار بتحصل سيارة تنطرك تطلع من الفندق عشان ترد المطار السياره تنطرك
ويحجزون لك كافة الرحلات السياحيه الي انت تبيها والباصات توصلك بعد يحجزون لك الفنادق والطيران الداخلي اذا ماتبي تحجز ولكن نصيحتي احجز الطيران الداخلي والفنادق بنفسك بحكم انه بيكون ارخص اكيد وخل الرحلات السياحيه والمواصلات عليهم

رحله موفقه

[فيصـــل]

الله يجزاك خير ورحم الله والديك

انا عن نفسي مفكر اقضي 3 ليال في شنق ماي و 5 ليال في بوكت .. الايام كافيه حق كل منطقه ولا ؟

واستفسار بخصوص الرحلات .. شلون اقدر ارتبها ؟

او لو تقدر تعطيني موقع الشركه السياحيه لاهنت ..

[Rashid554]

3 ايام شنغماي و 5 ايام بوكت كافية وزيادة لكل منطقة وهي بالاخير تعتمد على الاماكن الي بتروح لها بكل منطقة

وهذا موقع الشركة السياحيه http://thai-trips.net/newboard/ تحط موضوع في قسم طلبات الحجز

[مـــحـــمــد]

اول شي جزيرة بوكيت وفي مكاتب سياحيه في الجزيره تنظم لك رحلات بحريه
5 ايام تقعد في الجزيرة وعقبها ترجع بتايا تقعد يومين واخر 3 ايام تقعد في بانكوك حق المشتريات
وترجعون بالسلامة ..
وهذا رقم رجال تونسي عندة محل تنظيم رحلات في جزيرو بوكيت
اسمة بوحليمة (0897315053) (0896504760) كلمة وبظبط لك كل شي ..

[فيصـــل]

بيض الله وجيهكم جميع والله لايهينكم

[السكين]

وعليكم السلام

أنا رحت تايلند العام بفبراير و قبل اسبوعين بعد كنت هناك راجع .. شوف بكلمك عن تجربتي وانت تقدر تشوف اللي يناسبك لانه أهواء الشباب تختلف أيضاً ..

شانغ ماي حلوة ( جوها بارد بالليل لأني كنت بشهر فبراير ) البلد حلوة وأحب اقولك عن ملاحظة الأخ راشد حديقة الفيلة ( إيليفانت بارك ) رااااائعة تدخل بالانهار وتطلع مسافات وانت راكب الفيل وتركب القوارب من جذوع الشجر لمسافة 2 كيلو يمينك ويسارك فيه مناظر خلابة وبعدها ترجع نفس المسافة .. ميزة رحلات شانغ ماي إنها مطولة .. وفيها بعد الرحلة اللي قالك عنها الأخ راشد والجبل اسمه ( الهاي ماونتن ) أعتقد ارتفاعه 2 كيلو ونص ويوقف فيك في 9 محطات وفيه شلالات خرافية وسط زهور وأماكن يمكن ما تشوف لها مثيل وبالنهاية تلاقي معبدين فوق شيء لا يصدق تصميم وحدائق مزروعة بشكل روعة ..يعني جهز كاميراتك ..وطالما شباب ما رح تتعبوا ان شاء من عناء الرحلة لانها تستاهل .
فيه رحلة بعد اعتقد لنهر اسمه بنق ريفير او شي من هالقبيل بعد حلو لانه هذا اللي اذكره بشانغ ماي .. لا تنسى النايت بازار لانه فيه شغلات غريبة شوي وحلوة ..

==

قبل اسبوعين رحت بتايا لأول مرة .. طبعاً الكل بيقولك فساد وأنا اقولك مثلهم ..بس اللي يدور الفساد بيروح واللي يدور النزهة بيلاقيها .. وانا لاحظت بتايا ماخذة من بانكوك ومن شانغماي ومن بوكيت .. بصراحة حبيتها .. فيها بحر وين ما تروح ..
فيه عندك الميني سيام حلوة ومناظر حلوة .. حديقة عجيبة وفيها مجسمات لأشهر معالم دول العالم ..ولما تروح بتعجبك ..
فيه عندك السيلفر ليك ( البحيرة الفضية ) ويسمونها مزرعة العنب ..وبجانبها عندك جبل البوذا الكبير يعني بتكسب رحلتين .. هالحديقة حلوة جداً وفيها مكان لبيع عصائر العنب) باي درجة 100% أو 60 أو أقل ..وطعمه روعة ..تقدر تلفها بالقطار او التوك التوك الخاص بالحديقة .. أو تتمشى فيها ..

فيه ايضاً عندك ساها فارم ويسمونها ( تشيكن هاوس ) أو بيت الدجاج .. الاسم ما يشجع بس لو تروح تشوف المكان والقصور المذهلة بتغير رايك وما بتطلع منها .. وهي ضيافة الملك أعتقد ويسمح لك تدخلها وتلف فيها على كيفك وتشوف الفخامة وتشوف صور الرؤساء فيه ومن ضمنهم أبو مشعل وحرمه والملك عبد الله وتشوف الفن اللي مسوينه من حدائق وبذخ في المعمار تتعجب .. انا رحته وما كنت حاب اطلع منه عبارة عن ثلاث قصور اتوقع ..

==

عندك بعد برج بتايا تنزل من الطابق 56 بالحبل أو نفس طريقة التلفريك بس عمودي وتشوف كل بتايا وانت فوق .. غير الألعاب المائية تحت ..

بالنسبة للاماكن المشبوهة ( الووكنج ستريت ) أو شارع جهنم بعد 11 بالليل .. ما انصحك تروح له مع انه فيه محلات ومطاعم حلوة بس تقدر تروحه تخلص وتطلع كله بارات وخمور ومناظر خادشة ..

==
وبالنسبة لرحلة عالم تحت الماء حلوة وفيها تدخل نفق كله من زجاج والاسماك حولك وفوقك بكل الأحجام والمكان مكيف وبارد وجميل جداً لا تفوته ..

ايضاً عندك حديقة المليون سنة ومزرعة التماسيح وهي بنفس المكان تحصل فيها عروض عجيبة وتطعم التماسيح بالعصا والسنارة ..وتطعم النمور عن طريق البندقيه تضرب على اهداف متحركة ولما تصيب الهدف تطيح اللحوم للنمور تحت .. غير عروض التماسيح وتقدر تتصور مع النمور والدببة وتركب على التمساح بوجود المدربين طبعاً ..وغيره ..

عندك معبد الحقيقة .. كله من الخشب .. حتى المسامير الكبيرة من خشب ..بس خشب قوي مثل الرخام ..وتقريباً صارلهم شغالين فيه 30 سنة وما خلص من كثر الدقة .. ولما تدخله تلبس على راسك خوذة المهندسين .. لانه فيه اعمل بالاسقف والجوانب ما خلصت ..هالمعبد غريب جداً من كثر المنحوتات اللي فيه ..
وفيه بعد معبد صيني رحته ..بس ناسي اسمه بس ممكن تبحث عنه بالنت ..

لو ما رحت بانكوك وحاب تروح محل يشبه ام بي كي خاص بالجوالات والالكترونيات لا تنسى تروح توك كوم مبنى احمر عليه علامة الانترنت اكسبلورر فيه كل شي بس اهم شي يعجبك الالكترونيات . اي واحد يدلك عليه ..

وصدقني بتايا نظيفة واحلى من تلوث بانكوك حتى شعبها الطف وبياعينهم بالاسواق احسن .. ولا تنسى وانت رايح المطار على خط بتايا السريع فيه اكواخ او اكشاك تبيع عالطريق .. اشتري من عندهم عسل بـ 200 بات اصلي اصلي الغرشة حجمها كبير وطعمها ادعيلي :nice: بس ..

هذا اللي عندي بحكم تجبربتي المتواضعة .. واترك لك الخيار .. بالنسبة لي كنت انام بدون ما يكون عندي اي برنامج اقوم الصبح اركب اي تاكسي واقرر وانا بالتاكسي واروح .. لاني قلت لك الناس تختلف في كل شيء .. بس ارجوك لو رحت بتايا لا تضيع حديقة العنب والساها فارم ..
ولو مخصص لك يوم كامل للتسوق .. بقولك على رحلة تاخذ منك يوم كامل ..بس تقضي كل أغراضك .. بابخس الاسعار ..

والله يوفقكم ويرجعكم بالسلامة