ويـن راحــت الـتـقـالــيــد الـــــقــــطــــــريــــــة والــســنـــــع؟

[السليطي86]

التقاليد القطرية والعادات الي اغلب القطريين يعرفونها بدت تروح شوي شوي , وكثرة دخول الأجانب الغير قطريين علينا هم سبب في تغيير أفكارنا وعاداتنا وقيمنا في كثير من السلوكيات الي نشوفها , ومنها ملابس المرأة القطرية ومنها السنع عند الرجال والنساء ومنها اشياء اخرى كثيرة , ومن أسبابها كذلك زواج القطري من الغير قطرية و العكس , وما اقول كل الشباب والبنات القطريين غير ملتزمين بالعادات لكن الي طغت على حياته عادات الغير , وشيء يحزن كثير لين نشوف انعدام الثقة والشك والتصرفات الغريبة الي ما كانت موجودة عند اهل قطر , وكذلك شيء يحزن لين نشوف بنات قطر وشبابها يلبسون ملابس غريبه وتم تغيير تفكيرهم وعقليتهم بصورة مخيفة.


وفي الي بالعكس أخذ من عادات اهل قطر والتزم فيها وصار يعرف طبع اهل قطر وتقاليدهم وهذا اقول له (والنعم فيك) وهذي الناس الي تنحط على الراس.


لكن في نظركم من الي غير عقلية الشباب والبنات القطريين؟
هل دخول الأجانب علينا أو زواج القطري من الغير قطرية والعكس أو أسباب ثانيه الناس ما تعرفها؟

[معيوف]

انا اوشف ان هل قطر متمسكين بعاداتنا و تقاليدنا الشباب بثوب و العقال بوكركوشه بعد و الحريم محتشمات على العموم
وهذا ما يلفت نظر الي يجونا من الخليج لو تشف بعض تقارير الي يحبون السفر من السعوديه او غيرهم لابد يذكرون هذا الشي وهم يكتبون عن قطر من النظام و نظافة وتمسك بتقاليد يمكن مب مثل اول ولكن اذا قارنتهم بالغير تقول الحمد لله ان احنا بخير و التقاليد الي تتعارض مع الدين اصلا مانبيها ولازم نحذفها من قاموسنا مثل شوفة المخطوبه كثيرمن الناس تشوف انها عيب ومب من شيمة العرب ومسويها سالفة وهي من السنة و محبوبه على سبيل المثال


و العادات و التاقليد تعليم العيال صب القهوه او اكرام الضيف وغيرها فهي موجوده ولكن الناس تغييرت مع تغير اسلوب الحياه وطابعها ولكن الطيبه موجوده في هل قطر

[الخبير العقاري]

مرحباً أخي السليطي اصيل من أسرة اصيلة تحياتي

وأشكرك جزيل الشكر على مناقشة مثل هذا الأمر الذي يعني بالمواطن القطري في المقام الأول وهو تخاذل البعض في ترك التقاليد القطرية ولاعراف والعادات المتعارف عليها في قطر هذا البلد العربي الأصيل الذي يحضى بكل ما أوتي من قوة في المحافظة على الأعراف والتراث القطري ودليل ذلك توجيهات سمو الأمير وولي عهده حفظهم الله في الحفاظ على المعالم التراثية وحفظ المورث القطري ولك في سوق واقف أكبر دليل والتراث الإسلامي وغيره..

والاهم من ذلك هو إجبار المؤسسات التعليمة على الحفاظ على اللبس الوطني بجميع المراحل الدراسية بالدولة من الصف الأول حتى الثانوية العامة حتى لاينجرف البعض بتقليد الغرب في اللبس والهيئة وهذا دليل الأهتمام من القيادة الرشيدة حفظها الله.


اما الأسباب في التغيرات في الشارع العام فلها أكثر من مؤثر أولاً الاعلام المرئي الذي أنتشر بشكل كبير من قنوات تبث الغث والسمين لجذب جميع اصناف المتابعين فلا هم لها الا الربح ثم أن هناك أجانب وعرب أعتبرهم وجهان لعملة واحدة والفرق بينهم ان هذا يتحدث العربية وهذا أجنبي اللغة إلا أنهما يسيران في اتجاه واحد وهذا ما أثر على الشباب أضف إلا ذلك البلاك بيري الذي يرسل للشباب مقاطع هي أشد ضرراً من ماذكرت سابقاً وخصوصاً على النشئ الذي لايخلو أحدهم من جهاز البلاك بيري دون رقيب أو حسيب بمعنى free وسوف اتحدث عن هذا الجانب بكل صراحة فهذا الشاب أو الشابة يولد بلا خبرة، ثم يبدأ في التأثر بمن حوله، فيأخذ عنهم عاداته وتقاليده، بذلك تنتقل العادات والتقاليد من جيل إلى آخر.
وتظهر العادات والتقاليد في الأفعال والأعمال التي يمارسها الأفراد، ويعتادونها، وتمثل برنامجًا يوميًّا أو دوريًّا لحياتهم.

والعادات هي ما اعتاده الناس، وكرروه في مناسبات عديدة ومختلفة. أما التقاليد فهي أن يأتي جيل، ويسير على نهج جيل سابق، ويقلده في أمور شتى.

نشأة العادات والتقاليد وتطورهما:

ويصعب إدراك نشأة وتطور العادات والتقاليد، ومدى اتساعها، فهي جزء من النشاط الاجتماعي للأفراد في أي مجتمع من المجتمعات، ولا تظهر بين يوم وليلة، بل تأخذ سنوات حتى تثبت وتستقر، وسنوات أطول حتى تتغير وتتحول.
والعادات والتقاليد غالبًا ما تنشأ لوظيفة اجتماعية، ولينتفع بها كل أفراد المجتمع أو بعضهم، وتصبح نمطًا اجتماعيًّا يعمل على تقوية العلاقات الاجتماعية بين أفراد المجتمع، ويؤدي إلى وجود اتفاق في سلوك معين بين أفراد المجتمع.
والعادات والتقاليد سلسلة تنتقل حلقاتها من جيل لآخر، وقد يصاحب هذا الانتقال بعض التغيرات بالزيادة أو النقصان، سلبًا أو إيجابًا، بما يتفق مع ظروف وقيم كل جيل، وقد تتلاشى الوظيفة الاجتماعية للعادات أو التقاليد، أو تنتهي نتيجة تغير الظروف الاجتماعية، إلا أنها تبقى بفعل الضغط النفسي الذي تمارسه على الأفراد الذين اعتادوها، وشعروا أنها تمنحهم الأمن والاطمئنان، وتضمن تماسكهم في مواجهة أية تغيرات جديدة في ظل علومة مسمومه بدأت بها القنوات والتقنيات في آن واحد ولهذا يجب أن نضع بعض الحلول المناسبة بداية من الأب والأم ولاشك أن للمرأة دور هام ومؤثر في بث العادات والتقاليد، وانتقالها من جيل لآخر، نظرًا لدورها الكبير في عملية التربية والتنشئة، ولذلك يقع عليها الدور الأكبر في ضبطها وفق المنهج الإسلامي السديد، قال تعالى: {وأن هذا صراطي مستقيمًا فاتبعوه ولا تتبعوا السلم فتفرق بكم عن سبيله ذلكم وصاكم به لعلكم تتقون} [الأنعام: 153]، وقال سبحانه: {وما كان لمؤمن ولا مؤمنة إذا قضى الله ورسوله أمرًا أن يكون لهم الخيرة من أمرهم ومن يعص الله ورسوله فقد ضل ضلالاً مبينًا} [الأحزاب: 36].

واعذروني على عدم التفصيل الأكبر في الموضوع وسوف اتابع هذا الموضوع لانه يصب في مصلحة أبنائنا وبناتنا في المقام الأول ومايتوجب علينا مناقشته في المنتدى وتطبيقة بين أفراد الأسرة في البيت من أجل الحصول على نتائج موفقة أن شاء الله.

[اسعاف]

اول الاسباب

ضعف التربية الإيمانية


2
تغير نوعية التعليم

وخاصة الذهاب للتعليم الأجنبي الخاص في بلدنا


3
والإنفتاح التكنولوجي (آي فون + بلاك بيري + جوال + نت + سيفرات+قنوات هابطة متوفرة في كل سيفر بدون رقابة )


4
وجود المجمعات التجارية ، وعادة الدوارة فيها بدون مبرر ، والقعدة فيها لساعات للشيشة والتمنظر


5
كثرة السفرات للخارج خاصة بلاد الغرب والشرق حيث التفسخ والإنحلال

[@north_star@]

بنظري انه العادات والتقاليد عبارة عن سلوك اجتماعي يتم غرزه بالأبناء منذ نعومة أظافرهم ومن الطبيعي أن يتمسك الانسان بهالعادات والتقاليد التي تربى عليها وأن لا يفرط بها سواء كان رجل أو امرأة وهناك نسبة من الناس من الممكن أن تتأثر بعادات بعض الشعوب الاخرى وليس بالضرورة التنازل عن عاداتهم الاصلية بل وعلى العكس هنالك الكثير من غير القطريين تأثروا بعادات أهل قطر وتقاليدها
ويعطيك العافية على الموضوع

[<اضرب واشرد>]

لكن في نظركم من الي غير عقلية الشباب والبنات القطريين؟
هل دخول الأجانب علينا أو زواج القطري من الغير قطرية والعكس أو أسباب ثانيه الناس ما تعرفها؟

القنوات التلفزيونية الجديدة اللي اطلعت في السنين الأخيرة ، السينما اللي انتشرت في قطر ، هذي هي اللي تشكل ثقافة المجتمع وتخلي الشباب يتغربون في لبسهم وعاداتهم وثقافاتهم.

[مضاد]

ويـن راحــت الـتـقـالــيــد الـــــقــــطــــــريــــــة والــســنـــــع؟


راحت يوم كثروا الغلفج و زادت نسبتهم على اهل قطر .,
من تجنيس عشوائي وغيره .

[بوحارب]

الله المستعان

ابشرك يالسليطي اكثر الربع ماسكين بالعادات والتقاليد اللي اعرفوها من اجدادهم

والثوب والغتره والعقال مالهم غنى عنه :)

وأن شاء الله بتتعدل الأمور

جزاك الله خير على المووضوع

[تحداني]

كل شي يتغير بداخل الانسان من " سلوك - الى تصرفات - الى اللبس - والمظهر - ولغه الحوار " بإراده الإنسان وبقرار نابع من داخله

لا دخل للأجنبي في الموضوع
ولا أرى في المجمعات التجاريه سبب
ولا حتى للتكنلوجيا مبرر
ولا للتجنيس ذنب

كل شئ كان موجود قبل عشرات السنين وظل البعض محتفظ بالعادات والتقاليد في تلك الأزمنه
والبعض انحرف عنها في السبيعنات والثمانينات

ومازالت نفس الاشياء موجوده ولكن بشكل حديث
وهناك من هو ملتزم بالعدات والتقاليد .. وهناك من خرج منها


هو فكر ونهج وطريقه تربيه واسلوب حياه
ويجب ان نؤمن ان كل اسره تعيش على ارض قطر هو مجتمع منفصل عن الاخر
وعندما يلتقون قد تتضارب توجهاتهم مع توجهاتي
وقد نتفق عليها لانننا متشابهين


جملك الله برضى الرحمن

[ضليع التبريد]

التقاليد والسنع كثيرا منها بتلعها الماكدونالد !!

[abn qatar]

اهم سبب هو الابتعاد عن الدين والركض خلف ملذات الحياه

اما دخول الاجانب وغيره سبب غير مقنع لان تشوف البعض ملتزم في عاداته وتقاليده داخل

قطر اذا سافر تشوف شخص ثاني

[<اضرب واشرد>]

كل شي يتغير بداخل الانسان من " سلوك - الى تصرفات - الى اللبس - والمظهر - ولغه الحوار " بإراده الإنسان وبقرار نابع من داخله

لا دخل للأجنبي في الموضوع
ولا أرى في المجمعات التجاريه سبب
ولا حتى للتكنلوجيا مبرر
ولا للتجنيس ذنب

اختي الانسان يتغير اراديا ولا اراديا حسب البيئة اللي هو فيها.

يعني أنا لو عشت في أمريكا لا اراديا باتغير وباتأثر فيهم.

ولو عشت في خيمة في البر مع بدو باتغير وباتأثر فيهم.

وهكذا اللي يعيش في الدوحة مثلا غير عن اللي يعيش في مدينة محافظة أكثر مثل الدمام ( كمثال ).

سواء رجل أو امرأة.

ومن أكبر المؤثرات في الانسان في هالزمن ( الاعلام وأشباهه : تلفزيون + سينما + مجلات )

بداية بالأقوى فالأقوى : السينما ثم التلفزيون ثم المجلات .. إلخ



ومنها الصحبة ( الربع )


من عاشر قوما 40 يوما كان منهم ..

واللي يعاشر قناة أغاني مثلا وليل ونهار عليها يكون منهم .. واللي 24 ساعة في السينما يكون منهم .. وهكذا الانسان مثل الاسفنجة تشفط ماحولها.


( مثال ) : البنت اللي انولدت قبل 20 سنة عاشت في بيئه غير عن اللي انولدت قبل 40 سنة !!

أول حشمة وعباية ساترة ولا روحات وجيات مثل الحين ..

والبنت اللي انولدت اليوم .. بتعيش في بيئة غير عن بيئتنا.

[Doha Sun]

السبب هي العولمة وتناسي اسلوم العرب ..

[ام السعف]

يعني لو الواحد لبس سبورت او كجوال ضر عاداته وتقاليده ؟

فهموننا علشان انربي عيالنا تربية فيها محافظة على عاداتنا وتقاليدنا :(

اهم شي التغيير هذا ما يمس عقيدة الانسان ولا اتخل بشرط من شروط اسلامه
وتمسكه بدينه ،، والا التغيير سنة الله في خلقه ،، لحد يقول لي ثياب شباب
اليوم نفسها ثياب شباب سنة الطبعة :(

ولا كشخة شباب اليوم بالغترة والعقل هي نفسها كشخة شباب سنة
الغوص :(

فمن جذيه التغيير قادم بأي شكل من الأشكال في المظهر ،،
واللهم ثبتنا على التمسك بالجوهر والمظهر حسب تقاليد ديننا يارب ،،

ام السعف
اكبر مؤيدة للملابس الكاجوال
في المناسبات غير الرسمية

[فتى الجود]

ما راحت مكان وفي كثير من الناس محافظين عليها هذي
اخوي هذا طال عمرك يسمونه الذوبان
إحنا ورآهم في كل شي في اعمالهم وحركاتهم واتباع نهجهم

نفس ما أشار الية الرسول صلى الله عليه وسلم في حديث :

( لودخلوا جحر ظب لاسلكتموه ) الخ 0


فا الخلل الذي يعانيه اى احد من هالسلكويت

ينطبق عليه المثل القائل :


ان كان صاحب البيت بالدف ظارباً فشيمة اهل البيت الرقص


اى ان كل راعي بيت لازم يصلب بناته واعياله

[تحداني]

اختي الانسان يتغير اراديا ولا اراديا حسب البيئة اللي هو فيها.

يعني أنا لو عشت في أمريكا لا اراديا باتغير وباتأثر فيهم.

ولو عشت في خيمة في البر مع بدو باتغير وباتأثر فيهم.

وهكذا اللي يعيش في الدوحة مثلا غير عن اللي يعيش في مدينة محافظة أكثر مثل الدمام ( كمثال ).

سواء رجل أو امرأة.

ومن أكبر المؤثرات في الانسان في هالزمن ( الاعلام وأشباهه : تلفزيون + سينما + مجلات )

بداية بالأقوى فالأقوى : السينما ثم التلفزيون ثم المجلات .. إلخ



ومنها الصحبة ( الربع )


من عاشر قوما 40 يوما كان منهم ..

واللي يعاشر قناة أغاني مثلا وليل ونهار عليها يكون منهم .. واللي 24 ساعة في السينما يكون منهم .. وهكذا الانسان مثل الاسفنجة تشفط ماحولها.


( مثال ) : البنت اللي انولدت قبل 20 سنة عاشت في بيئه غير عن اللي انولدت قبل 40 سنة !!

أول حشمة وعباية ساترة ولا روحات وجيات مثل الحين ..

والبنت اللي انولدت اليوم .. بتعيش في بيئة غير عن بيئتنا.





معاك اخي الفاضل واحترم وجه نظرك ولك كامل التقدير
ما اعرف بس في قناعه نفسي والي اشوفه .. الانسان ابسلوكه وابتصرفاته وبكل الامور الي ذكرتها في مداخلتي السابقه هو عباره عن صفحه بيضاء .. تبدأ تتشكل هالصفحه بناءا على التربيه .. ولما تتشكل في المقابل هناك مجتمع هالمجتمع اما يترجم على شكل " مدرسه او جامعه او بيئه عمل " او عالم خارجي من مجمعات او اعلام

الان انت كولي امر .. وكشخص مسؤول عن مجتمع صغير ابداخل بيتك تبدأ تشكل تربيه ابنائك بالطريقه الي ترضيك هناك حد مسموح به .. وهناك حد ترفضه ..
والرفض ما يعني ان الابناء ما يتخطونه بناءا على التاثيرات الخارجيه ..
الا تلقى انهم يتأثرون .. التأثير هذا ان كان ايجابي ويتناسب مع قناعتك وعاداتك وتقاليدك خليه يكمل فيه .. أما إذا تأثير ترفضه وتشوفه يتعارض مع العادات والتقاليد هناك حد يجب ان يقفوا عنده



هذا ما كنت اقصده .. جيل اليوم هو نفسه جيل الامس وجيل تلك القرون
لكن البعض من اولياء الامور صاروا في طريقه تربيتهم مختلفه وهم من تأثروا اكثر من ابنائهم :)
استخدام البعض منهم لأبجديات الحريه .. وخليهم يستمتعون ابشبابهم .. وخل يلبسون الي يلبسونه .. ووعليه تستحي اتسلم على الاضيوف .. والمجلس مو مكانه .. هالكلمات .. لها تاثير أكبر من البيئه الخارجيه



استغراب ضياع العادات والتقاليد بدأ يظهر على السطح أكثر ووضح أكثر
عندما بدأ الكثير من البعض ممارسه امور لم يتعودوا عليها

لما تسألني ليه تشتغلين في مكان مختلط
وليه اتسوقين
وليه وليه

جوابي انا الوالده كانت تفعل كل هذا قبل 20 سنه
فما ارى انه يتعارض مع عاداتنا وتقاليدنا


لكن لما اسال " س " لماذا تفعلين هذا
تقول تغير الزمن ولازم نتغير معاه
وفي الحقيقه لم يتغير شي سوى فكر الانسان ومبدأه وقناعته


جملك الله برضى الرحمن

[شبح الصمت]

الله يعطـيك العافيـه أخوي السليطي

الحمد لله العادات موجودة والتقاليد موجودة بس في تغير بسيـط من ناحية بعض التدخلات الخارجية من ناحيـة الاختلاط ومن ناحية الزواج من جنسيات أخرى بس في نفس الوقت الرجال أهو الأساس في التربية والعادات ويقدر يتحكم في عادات أهله وطبايعهم ويطبعهم عليها

الملابس والتقاليد !!

الحين لو فرضنا رحت مجلس شيبان ما تقدر تدخله بسبورت !! منقود ونظره مب حلوه .. وفي الأول والأخير تحترم المكان الي أنت فيه مب عشان أنك مب لابس شيء بس لأنه الواحد تعود على الشخص بثوبه وغترته ورزته ومب متعود بالجينز والا تي شيرت وإلا هالوا ماي قرند فاذر هاي ماي فرند وتس آب وتس آب :eek5:

أما لو رحت مجلس في شباب من سناينا عادي بتدخل برياضة بكاجول وحركات لانك متعود على الشباب بس وقت الزيارات الرسميـه وغيرها لازم تحترم المكان الي رايح له !


وتدري اللسان ما يرحم فلان ولد فلان جانا وكذى وشفناه ..

أولا عندك يوم يقلدون ممثل أو ممثـله وحركات نفسـهم

بس صدقنـي صدقني الشباب الي يقلدون الغرب في لبسهم وحركاتهم معروفين أغلبهم مال المدارس الاجنـبيه لانهم تتبعطوا هذولي صج تغيروا مع تغير الأماكن الي فيها ( إلا من رحم ربي ) بس الاغلبية مالهم في نسف الغتره ولا يدري عنها ..

:shy:

[ام ناصر1]

تربية الاهل لابنائهم ومجموعة التقاليد الي يفرضونها عليهم ...

والسبب الثاني اول ...كانت الاسرة ممتده ومحد يقدر يخالف ...الجد أوالجدة أوالاب والام والآخ والاخوات أوالعم أوالخال وابنائهم ينشبون لك ...فالبيئة كانت اجتماعية ومتلاحمة

الحين بالياله يقدر الريال يتحكم والمره توجه .......والباقي متروك للخدم الا من رحم ربي

والسبب الثالث ...العصر
هالزمن ...متطلبات الوظيفية وانظمة العمل ...خربت جزء كبير من التقاليد ...
وانضم للآسف لهم التعليم اداة للتغير وليس لترسيخ التقاليد ...

[برق لمع]

بالفعل هي تداخل المجتمعات مع بعضها البعض
تزايد عدد المقيمين بشكل غير طبيعي وفرض كل شريحة عاداتها ولبسها على المجتمع القطري
الزواج من غير خليجية له بالغ الاثر في تغيير اشكال ولهجة وعادات ابناء قطر الاصيلة
القنوات الفضائية والبرامج والمسلسلات الغير هادفة اضف الى ذلك ضعف الوازع الديني والاتجاه الى تقليد كل ما يراه الشاب او الفتاه حتى لو تعارضت مع فكرنا ودينا للاسف
مع كل الشكر لصاحب الموضوع على الطرح

[NeverLand]

بصراحه مب فاهم شدخل ابتعاد البعض عن العادات والتقاليد نتيجة لابتعادهم عن الدين ولا شدخل عقال بوكركوشه بتمسكنا فيه .. تاخذون من العادات والتقاليد الشكل وتهملون المضمون ياجماعة الخير .. ترى العادات والتقاليد بالنهايه مش آيات قرأنيه نازله من السما .. والتغيير الحاصل نتيجة طبيعية لتغير اسلوب الحياه .. اللي يبي يلبس ثوب وغتره وعقال له احترامه واللي يبي يلبس غيرهم بعد له احترامه بس اكيد بحدود الادب العام باللبس .. وحتى اللي يحب يقول كم كلمة بالانجليزي خله يقول دام هو مرتاح بتوصيل معلومته بهالطريقه .. ما اجدادنا كانوا يستخدمون بعض المفردات الاجنبيه بكلامهم مثل الهوسبيتار اللي جايه من كلمة هوسبيتال وغيره ..

العادات والتقاليد فيها امور كثيره تصلح لكل زمن مثل المعامله الجيده واحترام الكبير وغيرها من الامور اللي اصلا حثنا عليها دينا الاسلامي قبل هالعادات ..

[بوحارب]

يعني لو الواحد لبس سبورت او كجوال ضر عاداته وتقاليده ؟

فهموننا علشان انربي عيالنا تربية فيها محافظة على عاداتنا وتقاليدنا :(

اهم شي التغيير هذا ما يمس عقيدة الانسان ولا اتخل بشرط من شروط اسلامه
وتمسكه بدينه ،، والا التغيير سنة الله في خلقه ،، لحد يقول لي ثياب شباب
اليوم نفسها ثياب شباب سنة الطبعة :(

ولا كشخة شباب اليوم بالغترة والعقل هي نفسها كشخة شباب سنة
الغوص :(

فمن جذيه التغيير قادم بأي شكل من الأشكال في المظهر ،،
واللهم ثبتنا على التمسك بالجوهر والمظهر حسب تقاليد ديننا يارب ،،

ام السعف
اكبر مؤيدة للملابس الكاجوال
في المناسبات غير الرسمية

وشو الكجوال ذيه؟؟

التغيير في اللبس مايضر العاادات والتقاليد ومب حرام

بس المشكلة لما يكون هالشي بشكل مستمر يعني كل يوم طالع من البيت ببدله ولا بشورت او برمودا:omen2:

الصراحة ماله داعي هالشي!!

ولدي عمره سنه ونص واكثر الايام البسه ثوب وفي البيت جلابيه :nice:

[الحال مايساعد]

ترى العادات والتقاليد تنغرس في الطفل "ولد ولا بنت" منذ الصغر
لو راحت ماظنتي بتروح بين يوم وليله!!!!!
وانا أشوفها موجودة للحين ، وتلاحظها اكثر في المناسبات والأعياد

[ثابت]

العادات والتقاليد موجودة لكن لكثرة المحترفين المجنسين لا نراها الا في اماكن معينة

[NeverLand]

ولدي عمره سنه ونص واكثر الايام البسه ثوب وفي البيت جلابيه :nice:

ههههه يحليله .. الله يخليه لك يا بوحارب :o

[بوخالد911]

مجاراة للموضة والعولمة

ولكن الأصيل أصيل معدنه ما يصدي كللش

الله يحفظنا

[ام السعف]

وشو الكجوال ذيه؟؟

التغيير في اللبس مايضر العاادات والتقاليد ومب حرام

بس المشكلة لما يكون هالشي بشكل مستمر يعني كل يوم طالع من البيت ببدله ولا بشورت او برمودا:omen2:

الصراحة ماله داعي هالشي!!

ولدي عمره سنه ونص واكثر الايام البسه ثوب وفي البيت جلابيه :nice:

شدراني معناها بالعربي ،، بس يعني الواحد يلبس ملابس مب رسمية مثل البنطلون والقميص والتي شيرت ،،والشورت اللزم منه ،،


عني يا بو حارب ما عندي مشاكل ابدا يلبس بنطلون او قميص او برمودا او شورت ،، المهم الشورت هذا يكون للركب ،، والتي شيرتات تكون محترمة وما فيها صور بني آدمين ،،
وان كان هناك رسوم جائز الصلاة فيها ،، او فيها شي ملفت ،، بعد احاول اطلب منهم يحترمون المسجد اللي بيدخلونه ،،

من الأساس وهم صغار ما كان عندي مانع بل وشجعتهم على هاللبس وسفراتهم الكثيرة ساعدت انهم يزيدون من هالشي ،، بس هل هذا معناته انه بيروح الجامعة بالبنطلون والقميص او الشورت ؟ هل ممكن يحضر عرس بالملابس هذي ؟ هل ممكن يحضر مناسبة تكريمية بالملابس هذي ؟هل ممكن يحضر صلاة الجمعة بالملابس هذي ؟
طبعا لا ومن غير ما انكلمهم ،، مهما تأثروا بأمور ثانية لكنهم مازالوا عايشين في مجتمع
له عاداته وتقاليده اللي يحبون انهم ينتمون له بملابسهم ،،

واحب
أأكد ان للأسرة دور كبير ،، في توجيه او ترك الأبناء نهائيا ،،
فإذا كنت ما امانع انهم يلبسون اللي يبونه بس هذا ما يعني انهم ياخذون راحتهم دون احترام مطلق للمكان اللي بيروحونه ،، مرة شفت واحد من عيالي لابس الكاب وطالع بيصلي صلاة الجمعة ،، قلت له تعال " وين ؟ " قال لي المسيد قلت له بالشكل ذيه ؟ والكاب على راسك ؟
قال لي ما فيها شي اخف من الغترة والعقال ،، قلت له هذا يوم تتجمل وتتعدل فيه ،، فهل بتجمل وبتعدل بكاب لو عندك اجتماع مع مسؤول كبير ؟

قال لي ما له خص ،، قلت له الا له خص ونص ،، اذكر ربك انت مب مقيم
روح البس غترتك وعقالك وتعال تطيب وتدخن وتوكل على الله ،،وان كنت متأذي من الغترة والعقال ابسطها خل القحفية على راسك او لا اتحط الكاب خير شر ،،

اول امس ولدي نفسه بو الكاب ،، يراويني صورة مصورها مع اخوه في دولة مب عربية
ومسوي شعره سبايكي وحالته حاله ،، قلت له وشو ذيه قال لي حركات افا عليج ،،
طيب هذا اكثر واحد من اخوانه مداوم على صلاته في المسيد ومحافظ عليها ،،
هل تعتقد لما يكبر اشوي بيتم يسوي هالحركات في شعره ؟ وليش سواها هناك ،، وهل لما سواها ترك صلاته ؟ وليش ما يسوويها اهنيه ؟في قطر ،، يخاف مننا مثلا ؟ ،، لو بيخاف ليش يراويني الصور ؟

كثير من الشباب بيمرون مرحلة يحبون فيها التقليد ، لكن بتلقاهم لما يكبرون اشوي
وينضجون من نفسهم بيتركون كل هالسوالف وراهم ،،

فاليوم شاب بو 16 او 20 تعال شوفة لما يصير عمره 24 تلقاه شكل ثاني
غير عن صورته وشكه وهو اصغر بسنين ،، وبتلقاه يصف وياك ويأيدك في كلامك
في الوقت اللي كان يعارضك وهو صغير ،،

[همسه]

وشو الكجوال ذيه؟؟

التغيير في اللبس مايضر العاادات والتقاليد ومب حرام

بس المشكلة لما يكون هالشي بشكل مستمر يعني كل يوم طالع من البيت ببدله ولا بشورت او برمودا:omen2:

الصراحة ماله داعي هالشي!!

ولدي عمره سنه ونص واكثر الايام البسه ثوب وفي البيت جلابيه :nice:






يالبيه يالبيه الله يحفظه لك

آمين يارب

اموت في شكل الصغار بالثياب فديتهم

:)

اخوي السليطي

اعتقد اول شي اثر في العادات والتقاليد الإعلام

وكثرة الاجانب في بلادنا حتى انهم اكثر من القطريين نفسهم صارو القطريين في قطر اقليه

و بصراحه عندي قناعه ان الزواج من جنسيات ثانيه له اثر كبير

اعرف بنات معرفه شخصيه جيرانا اكثر من 30 سنه ابوهم قطري و امهم من جنسيه عربيه

البنات الحين كبار بس لما يتكلمون تقول اما انهم مب قطريين او ان امهم مب قطريه اللهجه كلش و اضحه

بس تدري شنو اللي يرفع ضغطي ؟؟

لما اشوف بنت عرب فيهم خير لابسه عبايه ملونه ملفته للنظر ومفتوحه من قدام وطالع البنطلون الضيق ويد العبايه واسعه كل مارفعت يدها فوق طلع نص الذارع والكعب والمكياج حتى لو كان خفيف وتتمشى في المجمعات لما تنصح امها او اختها الكبيره او اي حد من اهلها يقولون لك خلها تعيش عمرها توها صغيره خل تستانس مانبي نعقدها

:eek5:

صغيره عمرها 19 او 20 ؟؟

البنات من عمر 17 اغلبيتهم يزوجونهم ويصيرون امهات شنو صغيره البنت في سن محاسبه فيه على كل شي

قبل كل شي الدور الاكبر للاهل

[Most Wanted]

السليطي ابشرك هالقطر لين الحي ماسكين عاداتهم والله لا يغير علينا

[سوبر]

وشو الكجوال ذيه؟؟

التغيير في اللبس مايضر العاادات والتقاليد ومب حرام

بس المشكلة لما يكون هالشي بشكل مستمر يعني كل يوم طالع من البيت ببدله ولا بشورت او برمودا:omen2:

الصراحة ماله داعي هالشي!!

ولدي عمره سنه ونص واكثر الايام البسه ثوب وفي البيت جلابيه :nice:


تقول ولدك ....اكثر الايام ثوب ..... صدقتك ......:nice:

[هبوب الكوس]

الحمدلله الاسامي للحين ما تغيرت متمسكين فيها

الخوف بعد كم سنه يطلع لنا جون ومايكل وجاكي شان و توم كروز :rolleyes2:

سترك يارب

[almaf1a]

الحمدلله الاسامي للحين ما تغيرت متمسكين فيها

الخوف بعد كم سنه يطلع لنا جون ومايكل وجاكي شان و توم كروز :rolleyes2:

سترك يارب

حتى الاسامي تغيرت
قمنا نشوف اسامي غريبه وعجيبه خصوصا للبنات
ديما و داليا ورانيه اسامي غريبه عجيبه
انا في خاطري اشوف داليا لو كبرت وصارت جده
ينادونها جدتي داليا

[chillis]

اعتقد احد الاسباب المدارس الاجنبيه والتلفزيون والقنوات الفضائيه والانترنت وغيره وايد

[ام السعف]

الحمدلله الاسامي للحين ما تغيرت متمسكين فيها

الخوف بعد كم سنه يطلع لنا جون ومايكل وجاكي شان و توم كروز :rolleyes2:

سترك يارب

الأسامي هي هي بس القلوب تحجرت :weeping:
فلابد من تغيير الاسامي علشان تتغير القلوب :looking:

[هبوب الكوس]

الأسامي هي هي بس القلوب تحجرت :weeping:
فلابد من تغيير الاسامي علشان تتغير القلوب :looking:

وش عندها ام كلثوم :rolleyes2:

[شبح الصمت]

وش عندها ام كلثوم :rolleyes2:



:funny::funny::funny:

[مستجدة]

يازين فترة الثمنينات كان الولد خوش ولد والبنت خوش بنت تستحي حتى من اخوها
معرف شنو صار في الدنيا

الله هم ياكافي الله يستر على بناتنا وعيالنا من مغريات الدنيا
والله يثبتهم على الدين والاخلاق يارب

[ام السعف]

وش عندها ام كلثوم :rolleyes2:

ام كلثوم هااا ،، اصبر اقرى الرد التالي على الشبح


:funny::funny::funny:

مبسوط أوي يا عم وتضحك ،،، بدل ما اتصلح له المعلومة :omen2:

هذي مب لأم كلثوم هذي للراحلة ذكرى ربنا يغفر لها ولنا جميعا ،،

[شبح الصمت]

ام كلثوم هااا ،، اصبر اقرى الرد التالي على الشبح



مبسوط أوي يا عم وتضحك ،،، بدل ما اتصلح له المعلومة :omen2:

هذي مب لأم كلثوم هذي للراحلة ذكرى ربنا يغفر لها ولنا جميعا ،،


والي يقولج ما يدري شالطبخه والا الومي بس ضحكت جذيه

متملل وزهقان وضحكت

:dance

[هبوب الكوس]

ام كلثوم هااا ،، اصبر اقرى الرد التالي على الشبح



مبسوط أوي يا عم وتضحك ،،، بدل ما اتصلح له المعلومة :omen2:

هذي مب لأم كلثوم هذي للراحلة ذكرى ربنا يغفر لها ولنا جميعا ،،

ادري بس انا معطيج رتبه اعلى :nice:

شبح بس يسمع لشعبولا

[حسن]

انتو صبرو كلها كم سنه بس لما تشفون الدفه في المتحف تقولون او كانو حريم وبنات قطر يلبسونها بنسير نفس المجتمع الشمالي

[ام السعف]

والي يقولج ما يدري شالطبخه والا الومي بس ضحكت جذيه

متملل وزهقان وضحكت

:dance

شكلك بديت تطلع عن العادات والتقاليد :waiting:

[شبح الصمت]

شكلك بديت تطلع عن العادات والتقاليد :waiting:


لا بس العادات والتقاليد تحكمني اني ما اضحـك


اقول بروح البس كاب وبتمشى احسن لي

:victory:

[ام السعف]

ادري بس انا معطيج رتبه اعلى :nice:

شبح بس يسمع لشعبولا

:secret::secret::secret:


انتو صبرو كلها كم سنه بس لما تشفون الدفه في المتحف تقولون او كانو حريم وبنات قطر يلبسونها بنسير نفس المجتمع الشمالي

:eek5::eek5::eek5:

كلش ما في تفائل :secret:

[مكتوم]

فديت شيباني الله لا يخلينَا منهم
والله تعلمنا منهم الكثيررر
ونسأل الله ان يحفظ الوالدين من كل مكروة
ياخوي ماله خص لكن البيت هو الاساس
يوم الحرمة ورجالها يربون بناتهم وعيالهم على الدين والعادات والتراث
مافيه شي يخرب عليهم
اذا قدام عينهم
لكن عندي ملاحظة بخصوص كلمة اجانب
اعتقد بعض اخوانا العرب المقيمين من سنين وبنين يعرفون بالعادات والتقاليد القطرية
*وعلى ماقلت متطبعين فيها
لكن فيه من ناحية ثانية بعض العرب والاجانب يجون لاحيا ولامستحا لا ادب ولادين ولا اي اعتبار
يعني لباس فاضح وسلوكيات ماصخه




موضوعك طيب لله درك ونتمنى كل ام وكل اب
يربون بناتهم وعيالهم على الدين والعادات القطرية الاصيلة

وهذا

[رشدان]

الجهل او تصنع الجهل في أن تقليد الغير في التحلل من كل ماهو محتشم او يمت للثقافة العربية او الاسلامية
من ملبس او غيره هو تمدن او حداثه يجب ان يتبع لمجرد الاختلاف فقط عن الغير المتمسك بكل ماله قيمه دينية او حضاريه واجتماعيه ولايعارض معنى الحداثه ولكن يعارض قشورها فاالاختلاف عنه خاصة في المظهر يعد تقدم

[Najla..]

المشكله مب في الغترة ووالعقال والعباية والشيله

عباياتنا الحين صج مب مثل عبايات امهاتنا

وعبايات امهاتنا مش مثل عبايات جداتنا ..

ونفس الشي بالنسبة للغترة والعقال

كل هذي الاشياء تتغير بتغير الزمان .. وهذا شي عادي

المشكلة الكبيرة الي وصلوا لها الشباب وحتى البنات هي الجهر بالمعصيه

كلهم صاروا يتفاخرون بالامور الحرام الي يسوونها من مغازل وزنا وامور غيرها من الفواحش وما خفي كان اعظم

ويتنافسون على هالشي

واذا بليتم فاستتروا

ليش احنا نشوه صورتنا جدام اهلنا وربعنا

ليش هالشي صار موضع تفاخر بين الشباب وحتى البنات؟؟

الله يستر على عيالنا و الاجيال الجاية

بكرة يمكن البنت تقول حق ابوها يبه انا باظلع اتمشى مع البوي فرند مالي ... والابو يقول لها روحي حبيبتي بس لا تتاخرين

[nor85]

للاسف اختفى الاول لما نطوف الشارع في الاسواق او المجمعات توقف السيارات عشان نطوف لكن الحين للاسف مافي احترام للحريم لين يطفون ومش بس الشباب الصغار حتى الكبار للاسف وثاني شي اول لما في الجمعيه او اي مكان يخلون الحريم قبل لكن الحين للاسف تلقى البنت او الحرمه توقف في طابور مختلط راحت الغيره للاسف ( رفقا بالقوارير)

[معيوف]

يعني لو الواحد لبس سبورت او كجوال ضر عاداته وتقاليده ؟

فهموننا علشان انربي عيالنا تربية فيها محافظة على عاداتنا وتقاليدنا :(

اهم شي التغيير هذا ما يمس عقيدة الانسان ولا اتخل بشرط من شروط اسلامه
وتمسكه بدينه ،، والا التغيير سنة الله في خلقه ،، لحد يقول لي ثياب شباب
اليوم نفسها ثياب شباب سنة الطبعة :(

ولا كشخة شباب اليوم بالغترة والعقل هي نفسها كشخة شباب سنة
الغوص :(

فمن جذيه التغيير قادم بأي شكل من الأشكال في المظهر ،،
واللهم ثبتنا على التمسك بالجوهر والمظهر حسب تقاليد ديننا يارب ،،

ام السعف
اكبر مؤيدة للملابس الكاجوال
في المناسبات غير الرسمية


لبس الرياضة لوقت الرياضة
ولبس الثوب ضروري وهو من عاداتنا و تقاليدنا يعني يعجبج شكل الخليجيين وهم في الوملات او المناسبات كله لابسين رياضة او بنطلون جينز وحالتهم حاله ولا يتناسبم ع السنه في لبس الثوب الابيض
صار عادي في البحرين مثلا في ميالس قاعدين ببنطلوناتهم او حِسّر ماعتقد انه من العادات ولا هي حلوه ان يكونون الشباب جذيه واكيد بيكتسبون اشياء ثانيه مع هذا اللبس

[ام السعف]

لبس الرياضة لوقت الرياضة
ولبس الثوب ضروري وهو من عاداتنا و تقاليدنا يعني يعجبج شكل الخليجيين وهم في الوملات او المناسبات كله لابسين رياضة او بنطلون جينز وحالتهم حاله ولا يتناسبم ع السنه في لبس الثوب الابيض
صار عادي في البحرين مثلا في ميالس قاعدين ببنطلوناتهم او حِسّر ماعتقد انه من العادات ولا هي حلوه ان يكونون الشباب جذيه واكيد بيكتسبون اشياء ثانيه مع هذا اللبس

ما عندي مشاكل يلبسون جينزات ولا غتر وعقل ،، المهم محترمين نفوسهم
لذلك احترم وجهة نظرم وحقك في ابداء رايك ،، مع عدم التقليل من اللي
يحبون يلبسون بواطلين وقمصان ،،

[هبوب الكوس]

ما عندي مشاكل يلبسون جينزات ولا غتر وعقل ،، المهم محترمين نفوسهم
لذلك احترم وجهة نظرم وحقك في ابداء رايك ،، مع عدم التقليل من اللي
يحبون يلبسون بواطلين وقمصان ،،

بس في من اللي يلبس جينز ومنزله من الخلف

يعني قتحة سيارة مثلا

[ام السعف]

بس في من اللي يلبس جينز ومنزله من الخلف

يعني قتحة سيارة مثلا

احنا ما نتكلم عن اللو ويست واظهار الملابس الداخلية ،، وبشكل عام السوق كله
لوو ويست ،، بس انه يتعمد يظهر ان بنطلونه لوويست هذا حتى في الدول
الأوروبية عند الناس المحترمين عيب ،،

فاللي يلبس هالسوالف ربنا يهديه يارب مالنا غير ندعي له بالهداية
وننتقد مثل هاللبس في المجمعات وفي البيوت بعد :telephone:

[الرويـس]

^
في البيت عادي وبما تقتضيه الاحكام المنزلية
حتى لو (ويست لس)
:(

[قطرية فذة]

ازاحمكم الردود لانه في نفس موضوعي اللي افكر فيه

كنت احسبها وشفت بعض الاشياء

منها العمران

هذه لقطه لبيوت قديمه

http://www.maktoobblog.com/userFiles/r/u/rubaanabtawi/images/dscn0363.jpg

http://members.abunawaf.com/fayezdh/2007photo/qatargov16.jpg

http://www.qatargallery.com/arabic/data/media/39/qatmus_2.jpg

http://www12.0zz0.com/2010/11/01/09/835284858.jpg

http://farm1.static.flickr.com/141/407573920_65479e1963.jpg

نزلت لكم صور قديمه عشان نرجع بس بالتفيكر شلون كان اللبس فيها

شكنا نلبس

كانت العيشه بسيطه راس مالنا الاخلاق هي اللي تقوم هيبه الشخص وترفعه

منقود نمد يدنا بالاكل قبل الكبير

منقود تتحرك البنت قبل امها

منقود يتكلم الولد اذا تكلم ابوه

لامن تكلم الكبير سكت الصغير

كان الزمان هذاك لو كان فيه ناس غنيه لكن كانت غنيه بنفسها
واهل البحر اكثر طيبه وليونة عن البدو بالمقارنه مع البيئه

المره لما تمر بالشارع مغطيه بعباتها ( ساتره ) لا مفصله ولا مخصره ولا معطره

والرجال لامن شافوا الحرمه صدو عنها ومن حيائهم عيونهم بالارض

كانت الامور لها تقدير ومعاني كل شي موزون بالدين والايمان والقرآن

حتى من الترابط المجالس ملينانه سواء للحريم ولا الرجال

واذا حد ماجاء افتقدوه ( كالبنيان اللي يشد بعضه بعضاً )

الحين؟

وين القى عذر بالرغم من العلوم والتعليم والافكار الجديده

المفروض انها كانت تصب داخل تحسين اوضاع الحياه

لكنها لم تسلك هذا المسلك

اصبح لدينا جيل اسمه ( كيفي ) ( وشدخل ) ( انا حر بقراراتي ) ( مالنا خص ) ( ومالك خص )

والفلوس كل ماوفرت ترف الحياه ( كلا ان الانسان ليطغى ان رأه استغنى )


الاذان اول يأذن الله اكبر يذكر بالله

الحين صوت الحق مخنوق

يالله نسمع الأذان

واستهتار بالقيم والمعاملات والذمم

لما وصلنا حق هذا الحال

وقفه!

من الاهمال الاسري بحترام الآخرين ببعضهم
سواء الام والاب للأبناء او الابناء لوالدينهم

(( الضياع حتى ضاعت الحقوق ))

وصلنا لوضع " يالله نفسي "

بعد بناء البيوت الجديده

فيها سرر مرفوعة

http://www.shamsmasr.com/gallery/pics/5698.jpg

http://www.dohaup.com/up/2009-07-02/dohaup_845889502.jpg

http://www.mayyar.com/album/data/media/40/NMH0ZTV_mp.jpg?sessionid=5e53432d2def2554dd4fe479a 9f66cef

http://img4.southernaccents.com/i/2008/04/wall-gold-dining-room-l.jpg

و أكواب موضوعة
http://www.toddjohnstonhomes.com/images/models/wilshire/wilshire_livingroom_700.jpg

و نمارق مصفوفة / و زرابي مبثوثة

//

يقولك تتغير الحضاره يتغير اللبس

وارد

من درجه وروده تعدت حدود الدين

حتى داخل البيت البنات غير محشمين امام اهلهم ؛ والحق كلها عورات اوجب لها الستر

لان مجرد استباحه هذه الاشياء تفتح ابواب اخرى غير مرضيه مع الوقت

فما جاء الدين والاسلام الا في العفه البس الجميع لباس الطهر

حتى بمجرد الاعتناء بتعالمينا يكسبنا رؤيه ايمانيه
يقبل عليها غير المسلمين للإسلام

مازال الخير موجود

شكراً لك اخي لموضوعك الطيب

وفقك الرحمن

[السليطي86]

اختي قطرية فذه.....

هذا الرد هز مشاعري هز فيني الغيرة على أبناء الوطن وبنات الوطن , وكل ما ذكرتيه صحيح 100% وكل شيء أختلف , الا القطري الأصيل الا الي صار من أهل قطر وصار الأخ الذي لم تلده أمك.

و وايد قالو الاختلاف والتغير كله مع الزمن لازم واقول لكل من قال هذا الكلام الزمن ما تغير بس اهل الزمن متغيرين , والله يسامح كل من اخذ من أطباع وعادات الغير وغرسها في أبناءه وأولاده وبناته وأهله , وسمح بتغيير أفكارهم وعاداتهم , وين أيام أول وما أقول من فترة طويلة لا من التسعينات وانت نازل يعني هذي الفترة الي صار فيها الاختلاف المخيف وبدأت عقول شبابنا وبناتنا بالتغير شوي شوي , يعني كانت بداية واحنا الي سمحنا بهذي البداية , و الحمدلله في ناس ما تأثرو وحافظو على العادات والي أعرف منهم الكثير.

[ام السعف]

^
في البيت عادي وبما تقتضيه الاحكام المنزلية
حتى لو (ويست لس)
:(

لا مب عادي ابدا ،، وكان هالموضوع مثار بشكل كبير في البيت وخاصة مع واحد من عيالي ،، اللي مثل ما تقول اللو ويست يجبرنا لو قعدنا وراه وهو يلعب سوني وقاعد على الأرض نشوف المستخبي من ملابسه الداخلية ،، فوق انه مب مقتنع ان عورة الرجل للركب ،،

يقول لي انا رجل وما يعيبني شي ،، قلت له بس يعيبنا احنا ان انشوفك بالشكل هذا
يقول لي غضوا البصر ،، قلت له ما ينغض البصر وانت ما تراعي هالشي ،،
وخاصة اني امك وهالشي ينرفزني اكثر من اني اغض البصر عنه ،،

تناقشنا ووصلنا ان نسأل رأي الدين اعترض على الاسامي المقترحة كلها
وقلت له حط واحد انت تثق في كلمته ،، اقترح علي اسم استاذ فاضل
من مركز شباب الدوحة ،، وانبسطت ايما انبساط وفرحت قبل ما اتصل فيه ،،
لأني عارفة انه استاذ فاضل ورايه بيكون في صالح الفكرة اللي حابة يغيرها
ولدي وولد اختي معاه يومها ،،

وكنا في رمضان على الساعة 2 اتصل له ( صج مزعجة ) رد علي متخرع
من هذي اللي متصلة هالحزة والرقم غريب ،، قلت له معاك ام فلان الفلاني
وخالة الفلان الفلاني ،، رحب ترحيب ريحني وقلت له الموضوع وقلت له
العيال يبون رايك ،، خليت التلفون على السبيكر وكلمهم جزاه الله كل خير
وشرح لهم وبين لهم ان مب من العرف ان الواحد يطلع بالشكل هذا
وان كان اساس جسمه مب باين ،، عيب يستعرض بملابسه الداخلية
وان ما كان يقصد بس لأن البنطلون موديله جذيه ،، او الشورت موضته جذيه ،،

حتى لو قعد ( لأن اساس اعتراضي ان لما يكون قاعد ) ،، اشوف الولد قلل
من رفض توجيهنا له ،، ومع الأيام بفضل من الله ومن ثم توجيه الاستاذ
الفاضل صار اكثر مرونة في تقبل التوجيه لو كان يخص شكله او ملبسه ،،

فاللي ينطبق على اللو ويست ينطبق على الصروال اللي من غير ملابس داخلية
ما يصير الشاب يدور في البيت بصروال من غير ملابس داخلية :anger1:

مع هالشي من العادات والتقاليد اللي الواحد المفروض يتجنبها :(


وشكرا لحسن متابعتكم :shy:

[الرويـس]

^
مرافعتج مرفوضة .. ونحيلها للاستئناف
:(

[رحال]

وين ؟؟؟

[رحال]

لازم نواكب التطور

[عقد اللآلي]

بنظري انه العادات والتقاليد عبارة عن سلوك اجتماعي يتم غرزه بالأبناء منذ نعومة أظافرهم ومن الطبيعي أن يتمسك الانسان بهالعادات والتقاليد التي تربى عليها وأن لا يفرط بها سواء كان رجل أو امرأة وهناك نسبة من الناس من الممكن أن تتأثر بعادات بعض الشعوب الاخرى وليس بالضرورة التنازل عن عاداتهم الاصلية بل وعلى العكس هنالك الكثير من غير القطريين تأثروا بعادات أهل قطر وتقاليدها
ويعطيك العافية على الموضوع

أرجوك شيل الصورة اللي في توقيعك . مخيفه جدا !!!

[همسـات]

موضوع مهم
الله يجزاكم خير
والله يحفظ عيالنا

[البوررصة]

الحمدالله عاداتنا من اجدادنا ولين الحين متمسك ثوب وغترة يوميا .. والسنع وتقليط العرب ولايمكن اغيرها دام اني اكبيسي ولي الفخر