محتار بين مستشفى حمد العام وبين المانيا

[limited]

مساء الخير يا اخواني واخواتي بالمنتدى

الموضوع باختصار انه كانت عندي الام بالساق اليمنى من منطقة الفخذ فما اعلى وكانت بدايتها على شكل الام بسيطه تجي وتروح سنة 2007

وكنت ايامها اراجع مستشفى حمد العام وكانوا يصورون ساقي بالاشعه والرنين المغناطيسي ويقولون لي مافيك شي وحتمال تكون شد عضلي


المهم

خذت لي تقريبا سنه ونص كل ما راجعتهم قالوا لي نفس الكلام


في الاونه الاخيره وقبل ثلاث شهور بدا الالم يزيد بشكل رهيب جدا وصرت ماقدر اداوم ولا حتى اتحرك من شدة الالم
وقررت اروح لمركز المستقبل الطبي مقابل اسباير

وكان هناك بروفيسور هندي كشف علي وعمل لي اشعه وقال لي بالحرف الواحد

انت محتاج عمليه عاجله لان عندك نخر بعظم الساق المرتبط بالحوض

ووديت التقرير للمستشفى وبالكاد اقدر اتحرك

وعادو لي الفحوصات وقالو لي نفس كلام البروفيسور الهندي




طبعا مابي اخوض في تفاصيل برود الاعصاب اللي واجهته من الكادر الطبي
ولا في اهمالهم طول الفتره السابقه


لكني ابي نصيحة الاخوان هنا


انا طلبت العلاج بالخارج
وعلاجي هو قص اعلى العظم المرتبط بالحوض وتبديله
وابي اسوي العمليه بالمانيا
بس الجماعه يقولون لي ان العلاج متوفر بمقصب حمد العام




ياجماعة الخير


انا قريت موضوع بالمنتدى يتكلم عن الوضع المزري جدا للحاله اللي وصل لها المستشفى

وكل من واجهت قال لي احذر تسوي العمليه بقطر





الحين................. شنسوي؟؟

سؤال لوزير الصحه


ليش ما تهتم للمنظومه الطبيه؟؟ سواء اداريه او علاجيه؟؟

[حليتان*]

الله يعينك

وما تشوف شر


اذا تقدر على المانيا لا تتردد

[شموخ دائم]

,


,


مرحبا

الله يشفيك ويعافيك

هذا النوع من العمليات تخصص المانيا وشاطرين جدا فيه

وانصحك تروح والله يوفقك

قدم على اللجنه وحاول فيهم

واذا الله ما راد الله يعينك على النفقات

موفق يارب
,

,


اخوك


شموخ دائم

[أم حمد]

الله يعينك

وما تشوف شر


اذا تقدر على المانيا لا تتردد


ماتشوف شر ربي يشفيك

نصيحة بعد الله مالك الا المانيا

وراجع الديوان او ادخل فالجلسه على ولي العهد

اما مجزرة حمد الحذر تسلم روحك لهم !!

[يحفظك ربي]

الله يكون بعونك وماتشوف شر ان شاء الله
مالك بعد الله الا المانيا !

[آلملآزم]

نصيحه لوجه الله أخوي
تحمل تسويها في مستشفى حمد
ماتشوف شر أن شاء الله

[بوحمد111]

حاسب من مستشفى حمد في مثل هذه العمليات ولو سويتها بمستشفى حمد صدقني بيدمرون مستقبلك وفي الأخير بيطرشونك المانيا والجواب من المانيا طبعاً الوقت متأخر وهارد لك لو يسون ما يسون من عمليات ما منهم فايده وخبركم تذكرون سالفة المهيزع الله يرحمة بعد سنتين يتعالج في المانيا وحالته كانت مستقره ورجعوه يشوف عياله وتوفى من ثالث يوم في مستشفى حمد والسبب ما كانوا مقتنعين بعلاج المانيا وغيرو له العلاج على كيفهم والله يرحمه ويسكنه فسيح جناته

حااااااسب من عمليات مستشفى حمد

[حسن]

الله يشفيك ان شاء الله ونصيحه روح المانيا فحص وبعدين قرر وان شاء الله ماتحتاج عمليه يحي العضام وهي رميم

[وحيد-الشوق]

عندك فلوس توكل على الله وروح المانيا علاجهم بعد الله زين

اما اغبياء وحمقى مستشفى حمد خلك منهم لابارك الله فيهم

[حقيقه]

سلامتك ماتشوف شر

استخير وتوكل على الله انصحك في المانيا

والله يكتب لك اللي فيه الخير

[بوسعد الكعبي]

السلام عليكم ورحمة الله وبركاته

أخوي أنصحك بالبعد عن المقصب الالي حمد العام ومثل ماقالوا الاعضاء عليك بالمانيا مدينه هايدبيرغ افضل من المقصب ولو على حسابك الخاص مؤقت وبالمانيا ترسل التقرير بعد دخولك للمستشفى الى السفارة . والله يعينك ويشفيك ويشفى جميع المسلمين .

[Rider]

ياخوي خل اللجنة الطبية يحولونك على اسبياتر

[مهل]

السلام عليكم

اخوي لمتد ماعليك شر ان شاءالله اجر و عافيه

الشيخ المانيا ما انتقدها ابد و هي معروفه في مجال العظام ولا غبار عليها .

سؤال : هل تتقبل او يناسبك العلاج في امريكا ؟
اذا كنت تتقبل اكمل بقيه الموضوع و ان كنت لاتفكر الا في المانيا ،، اقولك اختيارك ممتاز و الله يردك سالم معافا تمشي على رجليك .

بالنسبه للعلاج في امريكا متطور جدا ولكن لا اعلم ما هي تكلفه العلاج للمقارنه مع امريكا .. اما المعيشه و السكن فهي اكيد ارخص من المانيا .

تصتطيع ان تحسم اختيارك للمستشفى عن طريق هذا الموقع المعتمد من الحكومه الامريكيه .

الموقع من هنا (http://health.usnews.com/best-hospitals/rankings)

تقوم بوضع المرض المراد العلاج منه في خانه البحث ... في حالتك تختار عظام وسيقوم الموقع بتصنيف افضل ١٠٠ مستشفى امريكي في علاج العظام .. طبعا افضل ١٠ مستشفيات او ٥ هم من افضل المستشفيات في العالم .

وستجد ارقام داخل مربع اصفر مبجانب كل مستشفى بعد عمليه البحث .. هذه الارقام تشير الى تصنيف امراض اخرى في هذا المستشفى .

يعني مثلا يكون المستشفى ماخذ الاول في العظام و الثاني في الكلى و الاول في الاورام .. الخ الخ

ولاتنسى الاستخاره و اي استفسار انا حاظر بالي اعرفه وهو على قدي

[سويسرا]

مايبيلها تفكير

المانيا على طول

الله يكون في عونك ويشافيك

[المقاول]

اخوي اولا نسأل الله ان يشفيك فالسؤال لغير الله مذله . توجه الى ربك بطلب الشفاء ... واذا اللجنه وافقت على علاجك في المانيا فتوكل على الله وهم المتمكنون بعد الله من علاج العظام...اذا كان العلاج على حسابك فاقترح ان تذهب اولا الى المستشفى الملكي في تايلند هذا المستشفى لم يندم احد على سفره الى هناك .
واستخير قبل وبعد كل شي...

[مكتوم]

انصحك في طب العظام و الاعصاب المانيا
تحمممممممل من مستشفى حمد
حاســــب وتحـــذر


ربي يحفظك وماجوووور ياخووي

[كبريت]

استخير احسن شي

[المريش]

الله يلبسك لباس العافيه

اخي في الله

اعلم ان الشفاء بيد الله وحده ، فاكثر من الدعاء

والحمدلله ان ديننا الحنيف أمرنا بالتوكل على الله واليقين بانه الضار والنافع كما أمرنا بالأخذ بالأسباب

ومن الأخذ بالأسباب البحث عن المكان المناسب للعلاج والذي لا يتمثل أبدا بالمقصب

ابعد وابعد وابعد

وتوكل على الله وحاول العلاج بالخارج ولو على حسابك

فالصحة ما يعادلها شي

[CH Engineer]

اخوي اكيد بيكتبون لك في التقرير العلاج متوفر عندنا واحنا احسن ناس
راتبه 100-200 الف شلون ماتبي يكون عنده العلاج انت ناوي تقطع رزقه!!

اخوي صدقني مايعرفون شالسالفه للحين
تلاقي الدكتور الحين يدور بقوقل شلون يسوي العمليه لك!!
ع العموم اذا تبي تسلم على رجلك كمل معاهم واذا تبي العلاج روح المانيا
واللجنه الطبيه انسى روح بكره البنك واطلب قرض للعلاج او خذلك قرض سيارة وبيعها اذا تبي تقلل الفايدة

الله يعينك يالغالي

[سكرمر]

ماتشوف شـر


اخوي قبل اسبوع بالضبط


فى واحد مسوي لبوه عمليه في المانيا وتبديل ورك صناعي وعمليته ناجحه وسهله


وانا حاليا ً فى المانيا


واللى تبينه من انا جاهز اخوي / لوجه الله


تحياتي لك

[Dana’1]

لا تنسى دعاء الاستخارة
والله يشفيك آمين يارب العالمين

[barod]

طبعا المانيا او الخارج بصفه عامه الخبره والعنايه بعد العمليه افضل

[الخزرجي قطر]

الله يشفيك ان شاالله سؤالك ورده في نفس موضوعك

[Al Capone]

الله يشفيك ان شاءالله ويسهل عليك امور العملية وتقوم بالسلامة
والله ياخوك انا عن نفسي اخذ سلفه واروح على حسابي ولا اني اسويها في المقصب

ضروري اخوي ترد علي وتقولي شنو سبب النخر؟؟ شقالك الهندي عن اسباب النخر ضروري انطر ردك اخوي

[بصمة قطرية]

ما تشوف شر ان شاء الله ..
مثل ما قالوا لك الأعضاء تحمل تسويها في حمد ..
توكل على الله وروح المانيا ..

[هدى السليطي]

اجر وعافيه
استخير وتوكل على الله انصحك في المانيا
احسن لك

[فتى الجود]

ماتشوف شر واسأل الله العظيم رب العرش العظيم ان يشفيك

تحمل تسويها في حمد

وحاول باللجنة الطبية

[limited]

الله يشفيك ان شاءالله ويسهل عليك امور العملية وتقوم بالسلامة
والله ياخوك انا عن نفسي اخذ سلفه واروح على حسابي ولا اني اسويها في المقصب

ضروري اخوي ترد علي وتقولي شنو سبب النخر؟؟ شقالك الهندي عن اسباب النخر ضروري انطر ردك اخوي

والله ياخوك الهندي ما قال لي سبب معين للاصابه لاني ما تعرضت قبلها لاي نوع من الاصابات
لكن كل اللي قاله لي ان الاصابه كانت خفيفه واني انا ساهمت في زيادتها بسب رياضة المشي اللي كنت امارسها يوميا .... (كنت امشي خمسه كيلومتر يوميا بناء على نصيحة مستشفى حمد اللي قالوا لي ان السبب فقط وفقط وفقط هو زيادة الوزن ولا سبب اخر وعليك بممارسة الرياضه )

[limited]

جميع الاخوه والاخوات



الله يعطيكم العافيه


ولا يريكم مكروه باحد لا في انفسكم ولا في غالي عندكم