تجاربكم : في بناء بيت العمر شاركونا تجاربكم خطوه خطوه فيدنا واستفيد

[خشوف]

http://i127.photobucket.com/albums/p143/UmmBashayer/house.jpg


الموضوع : تجاربكم : في بناء بيت العمر شاركونا تجاربكم خطوه خطوه فيدنا واستفيد:nice:
نصائح + تجارب + تحذيرات + اخطاء

هذي اسئله يمكن باالاجابه عليها تفيد غيرك واذا عندك اي سؤال حطه هني :nice:

1- بعد كم سنه من تقديمك على طلب الارض طلعت ارضك ؟؟:omen2: سؤال يعور القلب:(

2- خطوات تسجيل الارض والبيانات المطلوبه ؟

3- كم مساحة ارضك ؟؟

4- بعد ما استلمت ملكية الارض مالخطوات الي سويتها ؟؟

5- عند من صممت الخرايط وكم كلفتك ؟؟ هل هي تصميم جاهز او اختيارك ؟؟

6- اي شركة مقاولات بنيت بيتك ؟؟

7- كم خذ عليك الاستشاري ومن احسن استشاري برايكم ؟؟

8- كم كلفك بناء البيت عظم ؟؟كم شهر تم بناء العظم ؟؟

9- كم شهر تم بناء البيت ؟؟ ووكم كلفك الاجمالي ؟

10- تشطيب البيت كم كلف ؟؟ ومن وين ؟؟

11- اللفتات المصاعد اي شركة احسن من ناحية الامان والشكل والسعر ؟؟

12- ديكور البيت الداخلي الجبس وغيره منى جربت وش احسن شركة ؟؟

13- المطابخ والمغاسل السراميك الرخام الكهرباء الطبيلات ارضيات الحوش الحجر كل شي داخل وخارج البيت نبي اراكم وتجاربكم من وين خذتوهم ؟؟ وكم كلفكم ؟؟

14- الابواب الداخليه والخارجيه والشبابيك الاحسن ونصايحكم ؟؟

15- الاضاءات الداخليه الخارجيه ؟؟

16- الكراسي غرف النوم والديكور الداخلي واكسسورات البيت ؟؟

17- الحديقه وترتيبها ؟؟


وكل سؤال وتجربه في بالك اسدحها هنا ومنكم نستفيد ؟؟؟:nice:

[مضارب دوسري]

انا بجاوب على بعض الاساله مب كلهم

1 ابوي قدم لي على الارض سنه 2000 واستلمتها سنة 2008 وكان عمري حزتها 20

2 الله يخلي الوالد ويطول بعمره هو اللي كمل الاجراءات

3 مساحتها 1200

4 تميت الى ان ملجت شهر 6 سنة 2010 وقدمت على طلب القرض شهر 11 سنة 2010

5 الحين قاعد اصممها عند مكتب الاندلس وهي تصميمي الخاص
لان قلت له ابي كذا وكذا وحطيت المساحت اللي ابيها وخليت عليه الباقي
طلب مني 7000 ريال

6 قاعد اتفق الحين مع شركه

انا وصلت الى هذي الخطوات والباقي اشياء مستقبليه الله يسرها ان شاء الله

[Qtr.Girl]

موضوع مهم ومفيد


في انتظار التجارب

[خشوف]

انا بجاوب على بعض الاساله مب كلهم

1 ابوي قدم لي على الارض سنه 2000 واستلمتها سنة 2008 وكان عمري حزتها 20

2 الله يخلي الوالد ويطول بعمره هو اللي كمل الاجراءات

3 مساحتها 1200

4 تميت الى ان ملجت شهر 6 سنة 2010 وقدمت على طلب القرض شهر 11 سنة 2010

5 الحين قاعد اصممها عند مكتب الاندلس وهي تصميمي الخاص
لان قلت له ابي كذا وكذا وحطيت المساحت اللي ابيها وخليت عليه الباقي
طلب مني 7000 ريال

6 قاعد اتفق الحين مع شركه

انا وصلت الى هذي الخطوات والباقي اشياء مستقبليه الله يسرها ان شاء الله

يعني يصير تقدم قبل لا تملك :(

[خشوف]

Up up ip

[AL-ANSARI]

موضوع حلو وحاضر لكم اذا في اي استفسار

[مضارب دوسري]

يعني يصير تقدم قبل لا تملك :(

هذا كان القانون القديم

بعدها نزل قانون محد يقدم الا لما يكون متملك وعمره لازم يكون فوق ال22 سنه

[بوخالد911]

هلا

المساحة 1200م

وتووني بديت بالحفر

والله يسهل

دعوااتكم

[Abdulla86]

مساحه الارض ١٠٠٠ + ١٢٠٠ تحت الموافقه

وحالياً في مرحله صب السقف للدور الاول

[Chambray]

1- بعد كم سنه من تقديمك على طلب الارض طلعت ارضك ؟؟ سؤال يعور القلب
قدمت عليها 2001 استلمتها اعتقد في 2005 او 2006 مب متذكر

2- خطوات تسجيل الارض والبيانات المطلوبه ؟
سالفه طويله عريضه نشف ريجي وانا اراكض

3- كم مساحة ارضك ؟؟
1069

4- بعد ما استلمت ملكية الارض مالخطوات الي سويتها ؟؟

والله ما اتذكر بس رحت عند اكثر من استشاري لتصميم الفيلا وتميت 3 سنين اعدل في هالخرايط ، حتى يوم بنيت قمت اعدل على ارض الواقع خخخخخخخ

5- عند من صممت الخرايط وكم كلفتك ؟؟ هل هي تصميم جاهز او اختيارك ؟؟
مكتب الريان ب 10 الاف ، لكن خذ مني 2000 ريال عند اضافه المجلس الخارجي يعني 12 الف
والتصميم من اختياري

6- اي شركة مقاولات بنيت بيتك ؟؟
شركة فهد ( فهد الدرويش )

7- كم خذ عليك الاستشاري ومن احسن استشاري برايكم ؟؟
1500 كل شهر لين وقفته من كم شهر بس لانه ياخذ فلوس على ولا شئ
استشارته نفس وجهه

8- كم كلفك بناء البيت عظم ؟؟كم شهر تم بناء العظم ؟؟
مليون بالضبط ( علشان اكون صادق اكثر 980 الف ) بدون تمديد لا كهرباء ولا ماء

9- كم شهر تم بناء البيت ؟؟ ووكم كلفك الاجمالي ؟
شهر 10/2009 ولين احين ماخلصت ، لاني اكتشفت ان البلاستر في بعض الاماكن محتاج تغيير بسبب زيادة الرمل عن الاسمنت ، فخليت المقاول هو الي يغير البلاستر مرة ثانيه ..


10- تشطيب البيت كم كلف ؟؟ ومن وين ؟؟
والله لين احين احنا تونا في التشطيب
والله يعينا
انا شريت بلاط الحمامات من الرياض
صراحة اشكال روعه غير متوفره هنا
لكن المشكلة اذا نقص علي شئ
باقعد اطق صبع خخخخخخخخخ

11- اللفتات المصاعد اي شركة احسن من ناحية الامان والشكل والسعر ؟؟
والله انا خلصت مع شركة موتسبيشي
لكن وقعت في فخهم خخخخخخخخخ
لان في بعض الامور لازم انا اسويها هم مالهم خص فيها
مثل : صقالات خشب في المصعد
افصل حديد حق بعض الاماكن ودرج للصيانه
اجيب كرين واشيل المصعد اوديه فوق السطح
هاي كله علي ومكتوب في العقد لكن انا ماعرف انجليزي فوقعت وانا مادري شسالفه

12- ديكور البيت الداخلي الجبس وغيره منى جربت وش احسن شركة ؟؟
والله سألت اكثر من 4 - 5 شركات
اسعار متفاوته
من 55 الف - 145 الف !!!

13- المطابخ والمغاسل السراميك الرخام الكهرباء الطبيلات ارضيات الحوش الحجر كل شي داخل وخارج البيت نبي اراكم وتجاربكم من وين خذتوهم ؟؟ وكم كلفكم ؟؟
والله جاري البحث عن الافضل والاقل سعراً

14- الابواب الداخليه والخارجيه والشبابيك الاحسن ونصايحكم ؟؟
جاري البحث حتى الآن

15- الاضاءات الداخليه الخارجيه ؟؟
الداخليه راح اشتريها من فرنسا ان شاء الله
عندهم اشياء حلوه واسعارها معقوله وكواليتي

16- الكراسي غرف النوم والديكور الداخلي واكسسورات البيت ؟؟
اثاث البيت ان شاء الله بتكون لي زيارة للصيـــــن ..

17- الحديقه وترتيبها ؟؟
لحد الآن مافكرت فيها ،

[فتى الجود]

1- بعد كم سنه من تقديمك على طلب الارض طلعت ارضك ؟؟ سؤال يعور القلب .

قدمت بــ 2002
على ايام القانون القديم بدون زواج تطلع لك الارض

واطلعت لى بــ 2006

وبنيت بــ 2009


2- خطوات تسجيل الارض والبيانات المطلوبه ؟

خلصت مع التخطيط العمراني في الحصول على أرض

وبعدين دفعت 300 ريال
وبعد اسبوع مريت على السجل العقاري واستلمت صك الأرض .




4- بعد ما استلمت ملكية الارض مالخطوات الي سويتها ؟؟


طبعاً خلصت مع الأسكان " كتاب الى البلدية التابع لها "

وصممت خرايط خاصة

وخذت رخصة البناء

والى الأسكان مرة اخرى

وبعدين حولونى على بنك التنمية



5- عند من صممت الخرايط وكم كلفتك ؟؟ هل هي تصميم جاهز او اختيارك ؟؟

التصميم خاص وبا أختياري
والتصميم كان بالمكتب القطري للأستشارات الهندسية ببمعيذر
+ القوس للأستشارات الهندسية لبعض الأختام

6- اي شركة مقاولات بنيت بيتك ؟؟


لحد الدور الأرضي
كان عند شركة عمالتها عرب وبهدولنى
ولله الحمد تم فسخ العقد وأفتكيت منهم ومن راعي الشركة الكذاب


وعقب كملوا بتان " باكستانين " لحد التشطيب وتنظيف البيت .


7- كم خذ عليك الاستشاري ومن احسن استشاري برايكم ؟؟

بالنسبة لى "وهذا خطأ منى ":
اللى صمم واحد
غير عن اللى ختم واحد غير
عن اللى أشرف ميدانياً


اللى صمم الخرايط خذ 12000


و اللى كان يختم لي بــ 500 ريال

اى بمجموع 7500 ريال

واللى أشرف ميدانياً بــ 1000 للشهر



8- كم كلفك بناء البيت عظم ؟؟كم شهر تم بناء العظم ؟؟

تكلفة بناء العظم : 1050.000 تقريباً

المده : 8 شهور



9- كم شهر تم بناء البيت ؟؟ ووكم كلفك الاجمالي ؟

تقريباً سنتين

2700.000 تقريبا


10- تشطيب البيت كم كلف ؟؟ ومن وين ؟؟


1650.000
تقريباً

من وين صعب اجاوب لان من كذا محل ومن كذا شركة


11- اللفتات المصاعد اي شركة احسن من ناحية الامان والشكل والسعر ؟؟

بنيت غرفة للمصعد لكن ماركبت المصعد


12- ديكور البيت الداخلي الجبس وغيره منى جربت وش احسن شركة ؟؟


ورق الجدارن والستائر : من شركة ستائر الجميل

الجبس من محل عادي عماله من بنجلاديش وشغله مب ذاك الزود


13- المطابخ والمغاسل السراميك الرخام الكهرباء الطبيلات ارضيات الحوش الحجر كل شي داخل وخارج البيت نبي اراكم وتجاربكم من وين خذتوهم ؟؟ وكم كلفكم ؟؟

الرخام والجرانيت :

من شركة شوش للرخام عند الدور المجنون .

المغاسل والرخام وبلاط الحمامات واكسسوارت الحمامات:


للحمامات التى يستخدومنها الخدم والحمامات التى لاتستعمل من انصار ستى .

للحمامات التى نستخدمها من : كافود .


14- الابواب الداخليه والخارجيه والشبابيك الاحسن ونصايحكم ؟؟

الأبواب من منجرة بالصناعية أنوار الدوحة:التكلفة تقريباً 80 الف

نصيحتي من المحدة للأبواب أحسن


الشبابيك وأبواب المداخل : الأختيار الألماني عند فيلاجيوا .

النصيحة : قطر للــ upvc أحسن لكن يتاأخر وأغلى

الأبواب الخارجية والدرابزين : حدادكوا


15- الاضاءات الداخليه الخارجيه ؟؟

الصالحية
و
الجابري

16- الكراسي غرف النوم والديكور الداخلي واكسسورات البيت ؟؟

غرف النوم :

" كبتات و تسريحة كمودينات " من نابكو

أمــــــا الأسره من كنج ويل

الصالة والمجلس

تفصيل من الدوحة ومفروشات الأمارات


17- الحديقه وترتيبها ؟؟

مزراع عادي كان عند جارانا وجبته

وفي أشياء انا والصبيان زرعناها


وأتمنى انك تستفيدي من تجربتي





وهذي اقتباس لمشاركة قديمة لى
لكن الحين اكيد تغييرت بعض الاجراءات ومقدار الدفعات



بسم الله الرحمن الرحيم

والصلاة والسلام على سول الله والحمدالله رب العالمين

أمــــــــــا بعد . . . ،

اللى دفعنى عن كتابة هذا الموضوع
وهو مالاحظتة أن كثير من الأخوان يكثر السؤال ولايلقى رد شافي

متى تنزل الدفعة ؟
أيش أسوى الكهرباء ولاالتبيط ؟
متى أركب العازل ؟
متى أدخل الفيترى هل قبل الكهربائي ولابعد البلاط ؟

طبعاً ماننسى نقطه مهمة أن تقريباً أعمال كل العمال مكمله لبعض
الفيترى له مرحله من العمل ويوقف ويكمل البلاط وبعدها يرد الكمل
وهكذا

المهم
با أحاول أجزل تقريباً كل التفاصييل أن شاء الله تعالى
وذلك للرد على كل الأستفسارات وتكون شافية وكافية ووافيه بأذن الله


وبتكلم عن القرض الأول لان القرض الثاني توزيعات الدفعات
تختلف من شخص لأخـــــــر
بمقدارها ووقت نزولها

طبعاً بنتكلم بعد مايسلمنا المقاول البيت عظم
يعنى مراحل التشطيب
الدفعة الأولى – لم يبدأ العمل ويطلب دفعه مقدمه

المبلغ ( 120.000) وتكون عباره عن دفعتيين من القرض الأول
" فتتقلص الدفعات من 10 دفعات ألى 9 دفعات "

طبعاً تنزل بعد التعاقد بين الطرفيين وتحاول تشوف لك مقاول يبني لك عظم مع تمديدات بايبات الكهرباء فقط
والتشطيب علييك وبالنسبة للكهربائي لازم شركة تتعاقد معاهم على تسليم كرت الكهرباء

وشيئ ظرورى ظرورى
لازم يكون في أستشارى يشرف
" لازم يكون عنده ذمـه وضميير"
عشان ماتصير اللعبة


الدفعه الثانية ( 60.000 ) من القرض الأول - الأنتهاء من صب الجسور الأرضية وعمل الدفان

أعمال المقاول

الدفعه الثالثة ( 60.000 ) من القرض الأول الأنتهاء من صب سقف الدور الأرضـــــــــي .

أعمال المقاول

الدفعه الرابعة ( 60.000 ) من القرض الأول الأنتهاء من صب سقف الدور العلوي .

أعمال المقاول

الدفعه الخامسة ( 60.000 ) من القرض الأول الأنتهاء من صب أسقف الملاحق وبناء السور .

أعمال المقاول

الدفعه السادسه ( 60.000 ) من القرض الأول الأنتهاء من البلاستر الداخلي والخارجي .


ومن هنا تبدأ المرحله اللى أشوي فيها صعوبة لانه يبي لها حركة
عموماً نقول بسم الله ونقول :
(( اللهم لا سهل إلا ما جعلته سهلا و انت تجعل الحزن إذا شئت سهلا ))


طبعاً هنا ندخل في مرحلة التشطيب
سواءً بتركب حجر خارجي أو بلاستر فالأمر نفس الشئ
وبهاذي المرحلة :

01 يدخل البيب فيتر ( السباك ) ويعمل التمديدات الداخلية اللى بحوائط الحمامات
وطبعاً لازم تكون عارف وين بيكون المرحاض والمغسلة والشاور .

02 يطلع السباك ويدخل البلاط
ويبلط جدران الحمامات وعند أخر بلاطه .

03 بيكون شغل البلاستر على الأرضيات .

04 تدخل شركة العازل وتركب العازل بالحمامات بعد البلاستر

05 وبعدها يدخل الفيتر ويكمل عمل شبكة الصرف الصحي

06 وبعد ذلك عمل الحجر أو البلاستر الداخلي و الخارجي

07 وبعدها يكمل الكهربائي تمديداته الأرضيه للبيبات الكهرباء



الدفعه السابعة ( 60.000 ) من القرض الأول الأنتهاء من تركيب البلاط .

وبها المرحله تبليط البيت من الداخل وذلك بعد دفنه
نصيحه الدفان الداخلي لايكون بودر أبيض
أحسن شي رمل عادي
وتبليط المدخل

الدفعه الثامنه ( 60.000 ) من القرض الأول الأنتهاء من تركيب بلاط الحمامات والمطابخ والأطقم .

تبليط الحمامات كامله والمطابخ وتركيب اطقم الحمامات

الدفعه التاسعه ( 60.000 ) من القرض الأول الأنتهاء من أعمال الألمنيوم والنجاره .


01 تركيب المطابخ .

02 النوافذ ( الألمونيوم وافضل اليو بي في سي ) .

03 جبس .

04 صبغ داخلي .

05 صبغ خارجي ( أذا كنت مركب حجر ماتحتاج حق هالمرحله ) .

06 تركيب السوكتات والليتات
( طبعاً الليتات بعضها ماتقدر تركبها ألا بعد أتمام الباء ودخول الكهرباء بالبيت )

07 الأبواب والخزانات ( الكبتات ).

08 أعمال تبليط الحوش الخارجي .

09 أعمال الحديد المشغول للدرج الداخلي والأبواب الخارجية .

10 أعمال لحماية بالدور الأول الأرضي خاصة ( ضرورى )

11 صبغ السور والملاحق .



مبروك

خلص البيت روح الحين ومر على بلديتك وخذ رخصة أتمام البناء
وبعدها عطها مقاول الكهرباء عشان يجيب لك موافقة ادخال الكهرباء




الدفعه العاشره : تم ألغاءها وذلك لدمجها مع الدفعه الأولى .



وأى أستفسارات أو مشاركات بناءه نرحب بها




أعداد وجمع فتى الجود
من شبكة الأسهم القطرية

http://qatarshares.com/vb/showthread.php?t=327085