المصداقية في البيع

[المحقق كونان]

السلام عليكم

خاطري اعرف ليش مافي مصداقية في البيع ؟؟

شفت فكسار 2011 معروض للبيع و ممشاة شوي و راعية يقول بس فيه ضربه في الرفرف اليمين قدام و انه بدل الرفرف في الوكالة

فحصت الموتر عند الطاير .. طلع مدعوم من قدام يمين لين باب العبري و الشنطة و الصدام الخلفي

و الجامبيلات يبيلها تغيير

و عقب هالفحص ..راعيه مصمم ان الموتر مافيه شي إلا الرفرف اليمين

اخر شي قال بنزل 2000 ريال

:anger1:

الموتر الثاني بعد فكسار 2010 مخمل و انا اشيك على الموتر سمعت صوت غريب في الشنطة حسيت ان الشنطة مب طبيعية ..

و راعية يقول ابد الموتر مافيه شي وكالة

خذت الموتر لكراج في الصناعية و قلت له شوف لي سالفة الشنطة ..

يقول البنغالي "مدير .. هذا شنطة في دعم و فيه صبغ"

راعيه قال مادري و سكت ولا تكلم عقبها

[وكر الذيب]

صدقت انا مرة كنت بشتري هوندا للبيت وقالي راعيها ابد مافيها الا الصداديم يوم فحصت الموتر طلع الموتر كلة مصبوغ عدا الباب الخلفي يمين والسقف مادري لين متى هالضاهرة بتنتهي وشلون يرضون بفلوس حرام والله يهدي كل مسلم يغش في البيع والشراء

[سكر زياده]

السلام عليكم
يالربع ما ادري شقول لكم
بس ترا يمكن السالفه صج والريال مايدري عن الموتر اذا فيه صبغ او لا
1- لانه ساعات حتى لو الموتر من الوكاله تلاقي الموتر نزل من المركب وفيه زلق عاد يصبغونه الشركة ويصرفونه
وفالحالة البايع ماله ذنب لانه قال اللي هو يعرفه

2- ساعات اذا أخذت موتر وتروح تفحص يقولك الموتر نظيف عقب فترة تيي تبي تبيع الموتر يقول نفس الفحص اللي فحصت عنده قبل الموتر فيه صبغ يا ابن الحلال غير بدل الموتر ما دعمت فيه ولا صار فيه شي
اذاً فالحاله ما له شغل البايع لانه ما يدري
3- يكون البايع خراط وهاي الشي في ذمته
والله يبعد عنا الحرام

واذا بغيت نصيحتي لاتفحص الصبغ في طريق سلوى
افحص في كراجات احسن لك
لانه الصبغ ما يصيده لك الا الصباغ
والله يرزقك اخوي بموتر نظيف ان شاء الله
واسمح لي عالاطاله

[الواصـل]

مرحبا اخوي ..

وانت كلامك صحيح ..

وانا مع اخوي سكر زيادة في كلامه ..


واحياناً فيه ناس ايكونون صادقين انه مافيه الا رفرف او مافيه الا باب


وبعطيك مثال >>> واحد من الربع يبغي يبيع موتره وايقول مافيه الا رفرف لان الحادث ماتعدى الرفرف .. والمشكلة جات فالكراج صبغ له الرفرف وفرق اللون شي بسيط راح راعي الكراج وصبغ له الباب عشان يعميه ولا ايشوف ان فيه فرق بين الباب والرفرف وهذي الحركة ايسونها اللي مايخافون الله وايتفاجئ عند البيع والفحص ايقول باب بعد مصبوغ .. والمسكين راعي الموتر ماعنده خبر ..والمشكلة ان السالفه صار لها كم سنه يعني الصبغ في 2008 والفحص كان في 2011 ..

وفيه ناس مايخافون الله ايقولك مافيه شي واذا رحت الفحص طلع في صبغ واجد وبلاوي

[الخاطف]

عليكم السلام

اذا تبغى الصدق ،، احلى فحص شفته في الكويت ..

يجي البايع والمشتري ، والفحص يسأل البايع شنو في الموتر ؟ ويقول له كل شيء

ويقول للمشتري اذا طلع خلاف هالامر ، البايع هو اللي يتحمل الفحص

وبكذا بصراحه الواحد يرتاح ، لان كل ما جينا نشتري سيارات مستعمله ، بصراحه نتبهدل مع الفحوصات وكلها تروح الفلوس في مهب الريح ..

والله يهدي كل واحد يقصر في حق اخوه المسلم ..

[بوخالد88]

اخوي بالنسبة للموضع هاي الكل يتبهدل فيه لما تفكر تشتري موتر اقل شي يطير منك ١٠٠٠ او اكثر احيانا علي الفحص كل واحد يقولك مافي شي الارفرف واخر شي يطلع الموتر كامل مصبوغ مايندرا الذنب ذنب من !!!

بس اخوي انا صادني موقف مع شركة التويوتا وكان عندي موتر لؤلؤي والدعمة في الشنطة ورا دخلت الموتر عندهم وماجيتهم الابعد ماجهز الموتر وبعد فترة قررت ابيع الموتر وديتة المعرض ابيعة قالي الموتر مصبوغ شنطة + الرفرفين يمين ويسار + الباب قلت لا مافي غير الشنطة وديتة فحص ثاني وقالي نفس الكلام ورجعت حق الشركة وقالو اي احنا صبغناهم لك علشان مايبين مع تعديل الشنطة قتله اي حلو علي كفيكم هو ولا حد بلغني انكم تبغون تصبغون.
وشرجعت الموتر لهم وعطوني سعر اكثر من السوق ب ٢٥ طبعاً عقب ماعفستهم عفسية
كلهم و شرشحتهم لك عدل .

واتمني من باقي الاخوان ينتبهون علي هالنقطة ، ورجعت اعتذر لراعي المعرض عن اللي صار وانه غلطة الشركة وماكان عندي خبر.*

[ابن مانع]

هذي السالفه تتكر واجد وخاصه من بعض اهل المعارض الي ماعندهم ذمه
وانا عن نفسي شريت 3 مواتر طالعه من الوكاله اصفار ووقت البيع يطلع فيها صبغ
والي يبي يتاكد يروح حوطة التويوتا الي في الصناعيه ويفتر على المواتر الي واقفه لازم يلاقي موتر او 2 مدعومين وبيتصلحون وبينباعون على انهم جداد
ومره كنت في الوكاله في الصناعية شفت الدريول مريوس على لكزسس ودعم جي اكس ار في الرفرف اليسار وطعجه والموتر راعيه المسكين جايبه يبي يصبغ الصدام ويوم سالت احمد مدير السمكرة قال عادي بنسمكرة ونعطيه اياه ولاهو بداري
هذا الكلام موجود في وكالة التويوتا
يمكن اهل المواتر صادقين مايدرون عن شي

[Me&OnLy]

مره جيت ابي اشتري موتر من اهني من احد الاعضاء الله يهدي قالي الموتر ورده قلت بفحصه قال على راحتك ابد سوى اللي يعجبك وهنا كنت باخذ الموتر وعقب قلت لازم افحصه يوم فحصته طلع مدعوم من ورى ومن قدام ومن الجنب ويقول لا مافي دعمات ومصر على نفس السعر يعني اخوانا هذيلا مايدرون ان فيه اخره وجنه ونار وخالق يعلم مايسر وما يعلن سبحان الله شي غريب

[مخطط قطري]

انا شريت سياره جس اكس ار 2008من 3 سنوات تقريبا وقالي الرجال ترا فيه صبغ خفيف وركزو في خفيف في الباب الخلفي من الشركه منزلين السياره من على السطحا وانشمخ الباب واصبغوه قلت اذا هذي علته الامر بسيط قلت له ابد مايحتاج فحص انا شاري كلامك وقالي المعرض انه في واحد فحص السياره وعندي اوراق الفحص وسالته قالي الباب الخلفي نفس الكلام واالسياره نظيفه وماعليها كلام واكياس الشركه فيها والسعر الي باعني اياه سعر السوق للموتر النظيف الي خالي من الدعمات
بعد كم شهرعرضتها للبيع وقلت للرجال الي شراها نفس الكلام الي اعرفه عن السياره وراح مسكين وفحص و
قالي لالا كلامك مب صحيح السياره جنب كامل جايها الصبغ ومصلحينها في الوكاله بحادث رقم كذا وشركه التامين الفلانيه
انا انصدمت والله وزين عندي رقم جوال الرجال الي شريت من عنده السياره ويوم سالته
قالي اي صحيح ونسيت اقولك :)
حلوه هذي نسيت اقولك والله عجبتني منه مع انه هذا الشخص الي باعاني السياره زميل لنا في المنتدى بس والله ماهمني يعني هالشي الفلوس تروح وتجي بس ياخوي اتق الله ويشهد الله لااني الي غلطت عليه ولا الي عاتبته لين اليوم....
ولا الي كلمته اصلن في الموضوع من الاساس بس سكرت وقلته جزاك الله خير انك علمتني وانك تذكرت
بس يوم شفت موضوعك تذكرته وحبيت اني اشاركم بالقصه العجيبه هذي‘‘‘ والي شرى السياره شراها بنفس راس مالها الي انا شريت فيه السياره بعد استخدام 4 او 5 شهور تقريبا وهذي توافيق من رب العالمين

[فتى الجود]

ديماً هذي الامور ترجع لذمة صاحب الموتر

والذمه تختلف من شخص الى اخر