مع او ضد فكرة البطاقه الشخصيه للاعراس ؟

[MAZEN37]

السلام عليكم
ليش الناس تسوي بطاقات شخصيه للمدعويين على افراحهم يعني الحين اهم مسويين لمة لمشاركة الناس فرحهم او مسويين اجتماع مغلق على عدد معين من الناس, بصراحه انا استغرب من تحديد المدعويين لحد يقولي علشان العشا محسوب
مب منطق , يعجبوني الناس الي دخول اعراسهم مفتوح وفي ناس يحطون بالجريده دعوه عامه ( والله والنعم فيهم)
حتى الفرح نحسب حسابه , قديما الافراح مفتوحه ولا بطايق ولا يحزنون يعني الناس الي تغيروا مب الدنيا.
= الدعوه للمشاركه عامه=

[سهم طويل الأجل]

أيام أول الناس شوي وكنا كلنا عيال قرية وكلن يعرف أخيه

لكن هالأيام مع زيادة أعداد الوافدين وأخص بالذكر منهم اللي مايستحون
ويغرفون العشاء من قدام المعازيم في أكياس ، فلا بالله تحديد المدعوين أفضل لضمان
التنظيم وما يتحول العرس لطبق خيري .

[الأصيلة]

السلام عليكم
ليش الناس تسوي بطاقات شخصيه للمدعويين على افراحهم يعني الحين اهم مسويين لمة لمشاركة الناس فرحهم او مسويين اجتماع مغلق على عدد معين من الناس, بصراحه انا استغرب من تحديد المدعويين لحد يقولي علشان العشا محسوب
مب منطق , يعجبوني الناس الي دخول اعراسهم مفتوح وفي ناس يحطون بالجريده دعوه عامه ( والله والنعم فيهم)
حتى الفرح نحسب حسابه , قديما الافراح مفتوحه ولا بطايق ولا يحزنون يعني الناس الي تغيروا مب الدنيا.
= الدعوه للمشاركه عامه=

تقصدون رجال وإلا نساء..
إذا رجال عادي الدعوة عامة..
لكن نساء ...ياساتر ...

[طماطه]

انا ضد الدعوات الشخصيه ..

وتسبب شوية زعل خاصة لو كان في بيت فيه ثلاثه مثلا وحاطين دعوتين .. ^_^

حلاتها عامه ونفتك من العباله ..

[عزيزوف]

الحين اختفت البطاقات كل الناس مسج ع الجوال

[MAZEN37]

الحين اختفت البطاقات كل الناس مسج ع الجوال
وين اختفت ؟ في تفتيش على باب الصالات بعد:rolleyes2:

[الـخـالـدي]

عليكم السلام و الرحمه

هذا الشي يرجع لهل العرس .. و اهم براحتهم

اسباب وضع البطاقات كثيره

ولو كانت عامه .. ماراح تفرق كثير .. العرس قايم قايم فبطاقات ولا بدونه

[@north_star@]

صعب تحدد الاسباب لانه في ناس فعلا ميزانيتهم ما تسمح انهم يعزمون كل اللي يعرفونهم فتلاقي الحفلة ملمومه ومقتصرة على المقربين .......وزمان أول غير على الاقل كان في بركة بكل شي

[بـــــــنت النوخـّــــذه]

حتى بطاقه الاعراس؟؟؟؟



وبالنسبه للمحدوديه طبعا " لازم يحددون من يعزمون تخيل وحده داخله عرس حريم ماتعرف من وشسالفتها وتطلع وراها بلوه كبيره 00 ولا عرس الحريم مفتوح للجميع بل الطاولات بتيزي من ولا من لالالالا مستحيل

اما انتوا الريايل عادي ممكن يكون المجال مفتوح اكثر وبدون بطاقات ^_^

صراحه مع البطاقه اذا كانت المناسبه على مستوى وكبيره كالافراح 00

[عندليب قطر]

الحين للاسف الناس اذا ماجات الدعوه باسمائهم مايجونك العرس

[كازانوفا]

انا ضد البطاقات
بس اوقات تصرف الناس العجيب هو اللى يجبرنا انحدد عدد المدعويين ومن يكونو ...
لان اوقات نكون متعمدين ما نعزم ناس معينه ونستغرب من وجودهم ؟؟؟؟!!!!!!!!
والكل فاهم ايش اقصد ...

[بو الجوري]

أكيد قصدك عرس الرجال :..:)

لأن عرس الحريم لازم دعوه :.. و إلا بتصير فوضى و مشاكل :..
خبرك حريم :.. :secret:

لكن عرس الرجال :.. الدعوه عامه :.. طبعاً لازم بطاقات :.. لكن اللي يعرف المعرس :.. حتى لو ماجاته بطاقه لازم يروح يبارك :..:)
يمكن نساه بالغلط :.. أو سقط سهوا :..:telephone:

[بولينجر]

مع الدعوة الشخصية للنساء علشان ما يدخلون رجال متغطين ويتكشفون على الحريم .... كذلك دخول نساء راعيات مشاكل..... اما بالنسبة للرجال فالدعوة عامة ......

[الـراسي]

بالنسبة للرجال يا مرحبا ويا مسهلا

وبالنسبة للنساء لاوالله لابد من البطاقات وهذا شي ضروري

في هالوقت الواحد يقول الله يستر

على فكره تراكم معزومين على عرس ولد عمي غانم يوم الجمعه خلف نادي الغرافة

يا مرحبا ومسهلا بالجميع

[شيزكيك]

الصراحه ان مع البطاقات

اذا كان في البيت اكثر من ثنتين ممكن نعطيهم بطاقة عائلية

واذا ام وبنتها بطاقتين

ولا الحين في بطاقة طفل

وبطاقة خادمه وذيلين حق القراب

في عرس اختي الصراحه وزعنا بطاقتين على ناس معارف وتفاجئنا بالعيله كلها يايه وعادي رحبنا فيهم

وناس ماعطيناهم بطايق ح بناتهم ويابوهم والمشكله هم بناتهم الي تموا يناقزون على المسرح

[شيزكيك]

تدرون من زمان رحت عرس واخر العرس وحده قامت تلقط البتيفور وعلب الفاين من على الطاولات بس شكوها اهل العرس وفشلوها ولا لابسه بعد لبسنا

[الخيالة]

أنا مع البطاقات لأسباب كثيرة ومن ضمنهم ان في ناس ميزانيتهم محدوده وحاجزين فندق لعدد معين قد الفلوس اللي عندهم ولازم يعزمون ناس علي عدد الكراسي اللي حاجزين لان مب حلوه يعزمون اكثر ويجون ناس يوقفون في العرس ومايحصلون كراسي فعادي ومفروض الناس مايزعلون بعد اللي عندهم خير وعادي يقدرون يدفعون خل يعطون كل اللي يعرفونهم بطاقات عائليه بس اللي حاجزين قاعه مثلا حق ٣٠٠ مب اكثر مع كراسي الاضافي اللي من الفندق ويعطون كل الناس بطاقات عائليه ويجون الناس اكثر من العدد شيسوون عقب بيتوهقون يضطرون يشترون كراسي إضافيه ويمكن يتوهقون لان الميزانيه ماتسمح

[حسن]

المفروض يلغون حفله الحريم ويكنسلونها من الاساس الحفله تقتصر على الرجال وبس ووبيفرون مئات من الالوف اللي مالها داعي بتاتا

[clouds]

اولا بتصير فوضى وكل من بيجيب عياله وجيرانه وخداماتهم
ثاني شي في ناس تحب خراب البيوت والمشاكل فماتدرون ايش ممكن يسوون لما يحضرون العرس
ثالث شي بتشوف الجايلات ماعندها شغله الا التفرفر في الفنادق يلقطون اكل وفلوس النقوط هم وبناتهم وربعهم واهلهم

[بصمة قطرية]

مع البطاقات الشخصية وبقوة ..

[بنت شيوخ]

البطاقه الشخصيه افضل

[قهوة الضحى]

يه حتى في ذي بعد مع او ضد

اكييد مع البطاااقات الشخصية خاااصة بالاعراس النسائية الاغلب قاموا يحطون 3 بطاقات واظنها كافية

لانه الطاولات تكون على حسب المعزومين والا بتصير زحمة وبعضهم تجيب معاها عيالها الصغار حشى مابيصير عرس روضة

وغير الخدامات اللي يستولون عالطاولات وهي احق للمعازيم


بصراحة البطاقة الشخصية افضل واحسن من جميع النواحي ليش يحضرون ناس مالهم خص بالعرس

ينخاف من هالشي كل واحد يعزم اللي يعرفه والعدد اللي يبيه مب السالفة سالفة عشى لا

السالفة القاعة تكتفي بعدد معين طبعا هالكلام بالنسبة للاعراس النسائية

وبعدييين من ذي اللي قوية عين تروح عرس وهي مانعزمت ولا تبي بالغصب تنعزم وتودي جماعاتها معاها

اما الرجالية فاظن كل واحد يقدر يدخله حتى الهنود اللي بالشارع

عادي اخوي تقدر تدخل معااااهم بدون عزيمة او بطاقة شخصيةهههههههههههههههه