ليش الناس ادور الارخص

[بن غيث]

يا ليت اتفهموني ليش دايما ادور الارخص وما ادور الاحسن بالسعر الانسب
والله اني مستغرب من هذه الظاهره ؟؟؟
لان الارخص دايما يخترب بسرعة ويرد يشتري واحد غيره وهكذا
انا اتكلم بشكل عام عن اي سلعه او منتج او في البنيان بما ان عندي شركة مقاولات واشوف هذه الشغلات قدامي كل يوم
:confused::confused::confused::confused::confused:

[حسن]

الصراحه انه توني مخلص بيتي اتصدق انصدمت لما شفت البضاعه الموجوده حاليا واقول وين هيئه المواصفات والمقاييس ليتات كشره وفي اكبر المحلات كله من ازبل الصناعات الصينيه واللي ممنوع دخولها للدول الاوروبيه
اوالسبوت لايت عندنا 35 في الرياض اخوه ب5 ريال والله نهبه واقول الله يكون في عون الشباب اللي بيبنون اللحين انشهد الكثير بيروح ضحيه ولا فيه حد يحميه لاقانون ولاشي

[الكبير الله]

الناس يدورون الاحسن بس من وجهة نظرهم والاحسن هو اللي في المتناول

ولا يدرون ان الغالي احسن

[كازانوفا]

صدقني كل واحد على قد حاله
مستحيل بيكون رب العالمين منعم عليه ويدرو رخيص
هذا للاسف بيكون بخيل والبخل ما له حل

[eXpert*]

هذه سياسة التوفير الخاطئة .

زميل لي جاء مستانس لقى فيلا كبيرة بسعر 2 مليون ريال .

ويقول لي رخيصة وما إلى ذلك رحنا نشوف الفيلا ،، التشطيب كله تجاريّ تمسك مقبض الباب تلاقيه في يدك يسلم عليك ،، تفتح أدراج المطبخ تلاقي الخشب طايح ،، إلى آخره .

المهم الحبيب مقتنع إن صاد له صيده (لؤطه) على قوله أخوانا المصريين ،، بس بعد فترة أضطر أنه مب يبدل المقابض وبس الإ الأبواب بكبرها وأشياء كثيرة طلعت عيوبها .

يعني اللي وفره في البداية رجع دفعه تصليح وترقيع !!

موضوع جداً مهم .

[بن غيث]

الناس يدورون الاحسن بس من وجهة نظرهم والاحسن هو اللي في المتناول

ولا يدرون ان الغالي احسن

مب شرط ان الغالي احسن
بس لازم نشوف ايش الافضل والي يعيش معانا

[بن غيث]

صدقني كل واحد على قد حاله
مستحيل بيكون رب العالمين منعم عليه ويدرو رخيص
هذا للاسف بيكون بخيل والبخل ما له حل

طيب يا الشيخ ما الي راح يدفعه مره واحده اوفر من الي راح يدفعه اضعاف مضاعفه على مراحل

[مرحوم قطر]

هلا اخوي اسمحلي اتكلم ابشكل خاص

و يكون كلامي نصيحه للشباب


الي يبنون او يشطبون او حتى يسوون صيانه لو كانة صبغ


لا تدورون الارخص ترى الفري فيزا يصبغون المتر من 7 لين 10 ريال

و الشركات تصبغ من 10 لين 15 و بعض الشركات تصبغ من 10 لين 35

على حسب الشركه و على حسب المطلوب ديزان او عادي او او او


لا تاخذون فري فيزا على اساس ان ارخص خذلك شركه و اظمن شغلهم

لان الشركه بتعطيك ظمان و بعد ما يخلصون تقدر ترجع لهم اذا في مشكله


و اذا العمال تاخرو في الشغل تقدر تحاججهم بالعقد

لا يقصون عليكم الفري فيزا على اساس انهم ارخص لان وايد منهم حراميه و اصلا شاردين من كفلاهم

فمايهمه بتعطيه العربون و بيشرد

او بيشتغلك و بيطنش او بيسوي اي كلام او او او و القائمة تطول



فنصيحه نصيحه نصيحه

خذو الشركات حتى لو كانت اغلى بريال او ريالين

و اظمنو فلوسكم ولا تعطونها فري فيزا و تندمون




و اشكرك يا صاحب الموضوع

[ثابت]

يا ليت اتفهموني ليش دايما ادور الارخص وما ادور الاحسن بالسعر الانسب
والله اني مستغرب من هذه الظاهره ؟؟؟
لان الارخص دايما يخترب بسرعة ويرد يشتري واحد غيره وهكذا
انا اتكلم بشكل عام عن اي سلعه او منتج او في البنيان بما ان عندي شركة مقاولات واشوف هذه الشغلات قدامي كل يوم
:confused::confused::confused::confused::confused:


اخوي كلامك صح بس تراء مو معنتها غالي انة زين لا والله انا بضرب لك مثال:-

خياط وديت لة طاقة بفصل ثياب قال لي 150 الثوب رايح لة عن طريق واحد فصلت ثوب عندة والله انة فاشل
و اكتشفت انة الخياط يفصل الثوب عند خياط ثاني ب 20 ريال يعني صايد العالم بزاوية
رحت للخياط بو 20 وقلت لة ابي تحط لي كرل الماني كامل حتى الجيب واليد وتفصيل محترم صح والله انة الثوب الي مفصلة عندة من العيد العام بلبسة حق هذا العيد

يعني جودة ورخيص لكن المحلات بعضهم لا ذمة ولا ضمير نصاب ياخذ فايدة دبل عشر مرات

[بن غيث]

رد على اخوي eXpert*
واخد من ربعنا راح يشتري فيلا واخذني معاه
قسما بالله ان الفيلا يبيلها ضعف قيمتها علشان تعدل الاخطاء الي فيها
بسبب توفير العماله الرخيصة وتوفير في المواد الرديئة .

[حسن]

المشكله انك دور الجوده في السوق انسى انك تلقاها كلها زباله وعند اكبر المحلات واذا لقيت للك مثل ليتات حلوه وتبيه حق الغرف يقولك عندي كمن حبه وماتكفي حق منزل واحد اتصدقون ياجماعه وصلو التجار لهذا الحد والكل بضاعته من دبي اتمني من بروه انها تقوم بانشاء سوق كبير خاص بمواد البناء من جميع الللوازم ويكون فيه افضل الماركات وباسعار معقوله مثل اسعار دبي لانها ماتدفع ايجار وتضرب هذولا اللي قاصين على الناس ياليتني صاحب قرار

[@north_star@]

اللي يدور الرخيص علشان يوفر بيدفع اضعاف مضاعفة
والمشكلة أنه غالبية الناس ما تعرف بجودة المواد أو الفرق بين الاصلي والتقليد خاصة بمواد البناء وعلى سبيل المثال السيراميك في اسباني وايطالي وطبعا السيراميك الزين بحدود 65 ريال وفوق للمتر وفي بعد ايطالي واسباني رخيص على 35 ريال تقريبا بس اللي اغلب الناس ما يعرفونه هو الجودة لانه بنفس المصنع في نخب أول ونخب ثالث والفرق بين السما والارض لانه النخب الثالث عبارة عن سيراميك فيه عيوب مصنعيه ................

واسمحولي على الاطالة ويعطيك العافية يا راعي الموضوع

[بن غيث]

صحيح كلامك
انا من فتره رحت الجابري للاضاءة علشان اخذ من عندهم ليتات لنهم افضل شركة في قطر عن تجربه سنين
وقالي ان الكمية مش متوفره وانتظر لين ما توصل

[بوسلمان 2010]

المعرض الصيني وما ادراك ان كل شي فيه مايسوى ساويه الشباب يروحون ويصرف مبالغ كثيره على الليتات


الثريات البيبان الجمات واخرتها مادور السنة ولا كله تبديل ليش لانها بضاعه حصلت من يشتريها وهي ماتسوى


وتقول اخوي بيتعضون سلامتك واتعيش الي يومك هذا والعالم اتحمل من السوق الصيني

[المسك1969]

السلام عليكم

صراحة عن نفسي فانا ابحث عن الافضل والاكثر جودة وعن السعر المناسب وان ووجدت ذو الجودة سعره ارخص فطبعا سأشتريه

ولكن هناك بعض الناس من لا تكون المادة متوفرة بيدها فهي تريد ان تمشي حالها لفترة إلى أن تتيسر أمورها فتأخذ ماهو اقل جودة وأقل سعرا

جزاك الله خيرا على الطرح

[المسك1969]

المعرض الصيني وما ادراك ان كل شي فيه مايسوى ساويه الشباب يروحون ويصرف مبالغ كثيره على الليتات


الثريات البيبان الجمات واخرتها مادور السنة ولا كله تبديل ليش لانها بضاعه حصلت من يشتريها وهي ماتسوى


وتقول اخوي بيتعضون سلامتك واتعيش الي يومك هذا والعالم اتحمل من السوق الصيني


بصراحة المعرض الصيني مب كل شيء يكون فيه زين وناخذ منه... بس أمور مثل أمور الزينه وبعض الاثاث...وبعض اللبسات ولكن كثير من بضاعتهم كما ذكرت ليست بتلك الجودة

[بن غيث]

انا امس كنت مع عيالي الصغار اشتريلهم ثياب جديده فزوجتي قالت لي ان هذا المحل ارخص وبضاعته زينه
قتلها لاتستعجلين بنروح محل ثاني وقارني بينهم وفعلا رحنا المحل الي عقبه بشوي حصلت الي تبيه وبضاعه فرنسية وبسعر المحل الاولي الي بضاعته صينيه .. لا .. ومسوي خصومات


............ الفكره انك لا تستعجل واجتهد ودور على الافضل والاحسن وبالسعر الي يناسب ميزانيه كل بيت ويعمر معاك ................

[التيما]

انا اقولك ليه ؟؟ لان صار الممتاز و الجيد والرخيص كلهم غاليين .. فصرنا ما نعرف الزين من الشين .. ونشوف صناعة صينية وبذاك المبلغ .. وصناعة المانية بعد بذاك المبلغ .. فصرنا ندور الأرخص بدل ما ندفع وايد على شي يطلع في الأخير تجاري .. لان كل الباعة زبايين ويطلعون بضاعتهم الأفضل و الأحسن .. لو عندنا مواصفات دقيقة وكل تاجر يحسب السعر عليها ساعتها بيبين الفرق والزين .. لكن صار الغالي والرخيص يتنافسون في الاسعار واحنا اللي ضعنا في النص ماعدنا نميز بينهم ..

[بن غيث]

وليش ما نسأل اصحاب الخبرة في الي نبي نشتريه
اكيد في شخص راح يفيدك

[المزن الرياني]

دام الموضوع تطرق للبناء

حد عنده فكره وين أحصل مواد الاناره مثل السبوت لايت والاناره المخفيه للجبس بس بجوده عاليه
السوق كله صناعه صينيه

[hamoor4ever]

امركم عجيب ، حد بيكون عنده سعر الغالي وبيحط رخيص

[بن غيث]

دام الموضوع تطرق للبناء

حد عنده فكره وين أحصل مواد الاناره مثل السبوت لايت والاناره المخفيه للجبس بس بجوده عاليه
السوق كله صناعه صينيه

انت من الناس القليلة الي يدورون على الجوده العالية
ان شاء الله الناس كلها تحسن الاختيار في المستقبل ودور على الشي الزين
وبسنا صناعة صينية غير مطابقة للمواصفات واسعارها نفس الاوروبية

[حسن]

دام الموضوع تطرق للبناء

حد عنده فكره وين أحصل مواد الاناره مثل السبوت لايت والاناره المخفيه للجبس بس بجوده عاليه
السوق كله صناعه صينيه
نصيحه للك يالدرويش ولا روح دبي هناك اكيد بتحصل والسوق كبير وجميع الماركات وارخص من هنيه اكثر من 50% وبالتوفيق