مررت باسوأ تجربه مع الخطوط الجويه القطريه .. وين اشتكي ماعرف !!!

[ديمقراطي]

السلام عليكم ..

باختصار القضيه انا في بريطانيا و اشتريت اميال على اساس اعمل ترفيع الدرجه من السياحيه الى رجال الاعمال ولكن ماحجزت لين اعرف اتاكد من الرحله الي عليها كراسي الاميال .. اتصلت فالموظف وقالي الرحله الفلانيه عليها كراسي فحجزت عليها وبعدين ماصارت عملية الترفيع اتصلت عليهم وخبرني موظف ثاني انه اصلن هل رحله ماعليها كراسي اميال.

وانا غصب عني لازم اسافر في هل يوم ما اقدر حتى اجل الرحله ..

اتصلت فالموظف وخبرته انا ما شريت اميال الا بعد ما انت اكدت لي قالي والله انا اسف ما اقدر اسويلك شي ارجع كلم مكتب الدوحه كلمت مكتب الدوحه نفس الشي ما اقدر اسويلك شي .. يعني انا شريت اميال على الفاضي ولا اعتذار موظف مكتب لندن انا وين اوديها.

انا ماسويت ابجريد الا لانه عندي وزن زائد وابي وزن رجال الاعمال ومعاي طفله واسباب كثريه ..

اشتكي لمن ؟؟؟

[hamoor4ever]

الشكوى لغير الله مذله الشباب شاطرين مسوين حمله ضد كيوتل ، اما القطريه محد يقدر عليهم لاتشتكي ولاتعور راسك انسى الموضوع ودبر امورك

[alsahran]

akbar@Qatar.net.qa

[عين قطر]

لا حياة لمن تنادي .. في القطريه

[ديمقراطي]

والله من الصبح وانا اتحسب فيهم

[بيانو]

الله يعينك
المشكله كثرة المشاكل ولا يوجد حلول

[المريش]

الله يعينك اخوي

ويش ما تسوي يعطونك الأذن الصمخة الله يهديهم
مرة كنت في كولالمبور وراجع الدوحة وكان الموظف اسلوبه تعبان وتجادلت معه في بعض الاشياء ما اذكر بالضبط وقلت له هذي القطرية وين المعاملة وخاصة أني قطري، قال لي هذا عندكم بالدوحة بس ، ووقفته وقلت له ابي اكلم السوبر فايزر، هذاك هدا الوضع وهذا وانا على درجة رجال الاعمال

أشتكيت عليه ولا حياة لمن تنادي
مااقول الا حسافة على هالاسم عليهم*

[ديمقراطي]

مره كنت في مكتب القطريه في فرنسا وقلت له ابي اغير الحجز وكان فرنسي الي جالس على المكتب ولابس البدله العنابيه مالت القطريه المهم خبرته ابي اغير الجحز قالي لازم تدفع مبلغ قلتله مكتب قطر قالولي عندك تغير بلاش حذف التذكره في وجهي ومع كلمة خل مكتب الدوحه يغيرونها .. وانا واقف مع حرمتي وعيالي ماتحملت الموقف صرخت عليه وخليته يجيب التذكره الي طاحت على الارض وكان ودي اضربه لكن ام العيال هدتني .. اول مارجعت الدوحه اشتكيت عليه باسمه وحاولت اتابع الشكوى لكن ماصار شي واكيد انه لين الحين مرتز على المكتب

[نبض القلم]

ههههههههه والله أنتو مصدقين انها قطرية هذا اسم تجاري والقطريين هم اكثر ناس مستغلتهم
الأسعار للقطري اعلا من اي جنسية ثانية
جرب تحجز من اي بلد علي الدوحة ولاتقول انك قطري وشوف السعر وروح المكتب تاخذ التذكرة وقولهم انك قطري وشوف فرق السعر الي عليك

[المدير]

الشكوى لغير الله مذله

انت قطري ... يعني انت حديد .... ومدام انك حديد فستحمل كل شي ... لاتقول التذاكر غاليه لاتقول مديون لاتقول تبي شي لاتقول العيشة غاليه لاتقول لاتقول .... انت دخلك اعلى دخل .... انت غني وماعليك قصور انت قطري يعني راتبك اخر الشهر يزيد مالايقل عن 20 الف توفرها !!!!!!!! وليش يعني ماياخذون عليكم الخطوط القطرية اكثر من غيركم ،،، يعني جات عليهم بس ..... ما الكل قاعد يتفرس ابنا ولا قلنا شي
كل اللي يقدر يقوله الواحد حسبي الله ونعم الوكيل
الفرج قريب بذن الله

ماقول غير حسبي الله ونعم الوكيل

[الوان]

الله يعين ... حاول / حاولي في المطار تدفعين الفرق و تنتقلين لدرجة رجال اعمال ..

[R 7 A L]

مره كنت في مكتب القطريه في فرنسا وقلت له ابي اغير الحجز وكان فرنسي الي جالس على المكتب ولابس البدله العنابيه مالت القطريه المهم خبرته ابي اغير الجحز قالي لازم تدفع مبلغ قلتله مكتب قطر قالولي عندك تغير بلاش حذف التذكره في وجهي ومع كلمة خل مكتب الدوحه يغيرونها .. وانا واقف مع حرمتي وعيالي ماتحملت الموقف صرخت عليه وخليته يجيب التذكره الي طاحت على الارض وكان ودي اضربه لكن ام العيال هدتني .. اول مارجعت الدوحه اشتكيت عليه باسمه وحاولت اتابع الشكوى لكن ماصار شي واكيد انه لين الحين مرتز على المكتب

:omg:

[Bin.Yousef]

حسبي الله ونعم الوكيل .. الله يكون بعونك

[شميرام]

روح حق واحد اجنبي خل يكتب لك خطاب شديد لهجه بالانجليزي وطرش إيميل حق اكبر وكم مدير عندهم

[مساهم فنان]

من سنتين حصل لي موقف معاهم ... وصلت مكتب القطرية وعطيتهم التذكرة ، قالوا لي مافيه حجز لك على الدرجة الأولى ؟ ليش ؟ قالوا اسمك موب ع السيستم ... انتظر على الويتنج ليست . في نفس اللحظة اتصلت ع القطرية في الدوحة وأكدوا لي الحجز موجود ، عطيت الموظف الموبايل عشان يكلمهم ... كلمهم ولكن أصر مافيه حجز ولازم انطر لين يشيكون كل الركاب .
فنطرت وأخذت اسم الموظف ويوم ركبت الطيارة شفت كرسي خالي غير كرسيي.
في الدوحة كلمت القطرية اشتكي الموظف وقالوا طرش شكواك عن طريق الإيميل ... بعد شهرين أرسلوا لي إيميل وقالوا إنهم حققوا مع الموظف ...
والله أعلم بهم .

[مساهم فنان]

الله يعين ... حاول / حاولي في المطار تدفعين الفرق و تنتقلين لدرجة رجال اعمال ..

الفرق كبير مالايقل عن 14000أربعة عشر ألف .

[مابدل العادات]

الشكوى لغير الله مذله

الله يعينا على تصرفات موظفين القطريه خارج الدوحه
والي في امريكا تعاملهم ممتاز ولاكن تنقصهم الخبره في بعض الأشياء فايقولون لك لازم تتصل الدوحه

بس يالربع اشلون اعرف وش هي الرحله الي عليها كراسي الأميال ؟؟؟

[العقل الحر]

اخي ديمقراطي

يبدو انك ذو ثقافه عاليه جدا في فن التعامل وتعرف مالك وماعليك

واحس بمعاناتك بما شاهدته لك من مواقف ومداخلات ومواضيع

واتمنى التوفيق لك ولهدفك

[التيما]

انا نقعت مرة مع هلي في المطار 8 ساعات لانهم ركبوا لاعبين مكانا ولا عبرونا ! تهاوشت وصارخت ونادولي الشرطة في المطار وكلن يقولي عندج ياهم وفي الأخير دفعوني فرقية استخراج تذاكر ثانية والغلطة مب غلطتي ؟؟

موضوع انهم يحطون لنا سعر وللغير سعر ثاني ما يهمني مب مشكلتي هالموضوع .. اللي يهمني حقي كمسافر اتساوى فيه المفروض مع الجميع مو لو هندي كلهم وقفوا معاك ولو قطري طنشوك ..

[التيما]

ونسيت اقول اني لمن رجعت من السفر وديت البوردينغ اللي معاي للمكتب الرئيسي ولا سوولي شي .. ولالالالالا شي .. فصرت أحكر لهم لمن أحجز ما اعطيهم مجال أبدا يسوون فيني هالموقف ..

[غير البشر]

الله يكون بعونك اخوي

المشكله الواحد مايعرف وين يشتكي في مثل هالامور سواء القطريه او غيرها

الله المستعان

[بو خليفه 123]

اخي الكريم الي انا اعرفه في خطوط الطيران ان الكراسي الشاغره للأميال لها مواسم و لها كراسي و اوقات ..

يعني اذا هو قال لك هناك كرسيين شاغرين في درجة رجال الاعمال احتمال 90% يكونون تحت التذكره العاديه و ليس عن طريق الاميال ..

[درع الوطن]

وعليكم السلام أخوي ديمقراطي

الله يعينك .. ويعوض عليك ...

أخوي ... إذا بتشتكي وأنت معاك حق أرفع قضية عليهم .. خلك أنت الأول وشوف كم واحد راح يرفع عليهم قضية بسبب جورهم وظلمهم وتمييزهم للركاب ...

وبعدين سو مثلي .. أنا أعلنت مقاطعتي للخطوط القطرية وأصبحت أستعمل طيران البلد اللي أبي أزوره ... وإذا هالبلد ماعندة شركة طيران .. أستعمل شركة البلد اللي جنبة ...
وصدقني راح تحصل السعر أرخص والمعاملة أفضل .. بإعتبار انك أجنبي ومعاملتك راح تكون ممتازة ... جرب وشوف ... وخل عنك اللي يقول هذي شركة وطنية .. هم قاعدين يعزفون على هالوتر .. ولا ترى مافيه علاقة أبد طالما المواطن مو حاس أنه راكب على شركة وطنية ...

[ورقة غار]

وعليكم السلام أخوي ديمقراطي

الله يعينك .. ويعوض عليك ...

أخوي ... إذا بتشتكي وأنت معاك حق أرفع قضية عليهم .. خلك أنت الأول وشوف كم واحد راح يرفع عليهم قضية بسبب جورهم وظلمهم وتمييزهم للركاب ...

وبعدين سو مثلي .. أنا أعلنت مقاطعتي للخطوط القطرية وأصبحت أستعمل طيران البلد اللي أبي أزوره ... وإذا هالبلد ماعندة شركة طيران .. أستعمل شركة البلد اللي جنبة ...
وصدقني راح تحصل السعر أرخص والمعاملة أفضل .. بإعتبار انك أجنبي ومعاملتك راح تكون ممتازة ... جرب وشوف ... وخل عنك اللي يقول هذي شركة وطنية .. هم قاعدين يعزفون على هالوتر .. ولا ترى مافيه علاقة أبد طالما المواطن مو حاس أنه راكب على شركة وطنية ...






مؤيده لهذا الراي

[راعي طموح]

السلام عليكم و رحمة الله و بركاته


انا من سنة 2005 مقاطع القطريه .. و كله اسافر عن طريق الاماراتيه .. ما اسافر بالقطريه اله لما تجيني تذكره من الشغل او اكون معزوم من احد الاهل

السبب

انا عميل احب ان "احترم" .. و اللي ما يحترمني فالبديل موجود .. و ما راح اتعامل اله مع اللي يحترمني .. مشكلتنا نشتكي من شركه انت مب مجبور تتعامل معاها .. هل انا مجبور اسافر على القطريه؟؟ هل انا مجبور اشتري سيارة من تويوتا عبد الغني؟؟ هل انا مجبور اخذ خط جوال من كيوتل؟؟

((انا مب مجبور))

جاء في الأثر أن الناس في زمن الخليفة الثاني عمر بن الخطاب -رضي الله عنه - جاءوا إليه وقالوا :
نشتكي إليك غلاء اللحم فسعره لنا ،فقال: أرخصوه أنتم ؟
فقالوا : نحن نشتكي غلاء السعر واللحم عند الجزارين ونحن أصحاب الحاجة فتقول : أرخصوه أنتم ؟ وهل نملكه حتى نرخصه ؟وكيف نرخصه وهو ليس في أيدينا ؟
فقال قولته الرائعة :اتركوه لهم..

و قد حدث انه في فرنسا ارتفعت اسعار اللحم بشكل مفاجئ .. و فرنسا معروف عنها بلد الاضرابات .. الناس ما صار عندهم مشكله .. اللحم غالي .. اوكي ناكل دجاج و سمك ((مب مجبورين))

ثلاث ايام اله اسعار اللحم ترجع مثل ما كانت .. لانها خاست عندهم


احنا ارتفع عندنا البيض .. اللي ما ياكل بيض جى في خاطره ياكل بيض و يبي يشتريه


اتمنى الكل ينمي ثقافته و يكون مستهلك مثقف و عارف حقوقه و ما ياخذ البضاعه اله اللي تستاهل قيمتها .. لانه في قطر خصوصا الواحد صار ما يقيم اللي ياخذه و الفايده اللي بتجي منها


اخوكم

راعي طموح

[الحال مايساعد]

قريت الردود كلها وشد انتباهي ان كل شخص تعرض لموقف مع القطرية كان يشتكي لنفس الشركة إلى هو على خلاف وياها ، ومافي أحد فكر يلجأ للقضاء!!!! الحين بالله عليكم الشركة بتنصفكم ولا بتنصف موظفينها؟؟؟
واحد من الربع رفع قضية عليهم وخذا تعويض حوالي 36000 ألف ريال عشان اسمحوله يسافر على دولة ممنوع يدشها بدون تأشيرة والموظف ماشيك ولا شي ويوم رجع رفع قضية وحط محامي
وأنا أشوف أي شخص عنده مشكله وياهم ، حلها ترى مب بس إيميل ولا رساله ولا شكوى ، عندك القضاء موجود وانت لو على حق راح تاخذه

[abn qatar]

اذا قطر بكبرها اصبح القطري المواطن فيها غريب اشلون القطريه اكيد نفس النهج

نقطه اضافيه شكلكم ماعرفتو السالفه والخطه تبغي تزدهر يكون لك اسم لازم تدوس على القطري وتركض خلف الاجنبي لان اذا قدمت له خدمات حلوه بيمدحك في اعلامه الكل بيتلكم عليك وين كانت القطريه على ايام الشيخ اول ماتم انشائها وين اوصلت الحين

خصوصا عند الاسيوييين والاوربيين لان القطري اذا امدحك بتكون محسوب عليهم ولا في احد بيصدق لانك قطري اكيد بتوقف مع شركتك حتى لو كانت فاشله عكس الاجنبي اذا شاف الشي الزين امدحك ورفع اسم الشركه فوق

[ماجد البدر]

مشكلتك مافيها شي مثبت على اوراق فقط وعد بعمل شي وببساطه قال لك اسف لو اشتكيت رسمي قد ينفي ماحصل بالمره وليس تقديم اعتذار بتالي موقفك ضعيف ناهيك عن شروط تحت السطور قد لاتلاحضها بين شروط الرحله او الاميال
لذلك تحسب واسترجع قل حسبي الله و نعمل الوكيل لاحول ولاقوة الا بالله انا لله و انا اليه راجعون

[captin]

نظام الأميال والحجز عليه في القطرية
مو مضبوط وفيه مشاكل كثيرة واحيانا تحس
عندهم توجيهات قد ما يقدرون يخلون الراكب
ما يقدر يستخدم الاميال بكثير من الأعذار الواهية.

انا حاولت ارفع درجة السفر باستخدام الأميال المجانية من مكتبهم في امريكا
وقالوا ما يصير لازم تسوي هالشي من الدوحة
اتصلت الدوحة وطرشت شخص راح لهم مكتبهم قالوا مايصير خل المسافر يجينا
يسوي الترفيع بنفسه ببطاقته الشخصية قال لهم شلون يجيكم الدوحة وهو الحين في امريكا
شي غير منطقي وما يدخل العقل وحاولت اسوي الموضوع من خلال الموقع وماصار.

سالفة استخدام الأميال تحتاج لآلية ونظام أكثر دقة والأفضل يصير الموضوع كله اونلاين
المسافر يدخل على حسابه يشوف كم ميل عنده ويختار الرحلة ويشوف اذا فيها كراسي للأميال ولا لا إذا كان فيه يدخل يسوى الحجز ويختار الكرسي وبعد ما يخلص العملية ويحجز ويخصمون الضريبة من بطاقته الائتمانية يرسلون له ايميل بالحجز والمتبقي عنده من أميال.
اعتقد هالشكل أفضل لا تتصل بفلان ولا علان .

[بوخالد88]

الله يعينك علي القطرية

[Engineer]

akbar@qatar.net.qa
ههههه شكله فاضي يشييك على الايميل
ولو فاضي اي ايميل من قطري مصيره التراش وانتوا بكرامه:)

[ALRAYYAN]

والله ياجماعه انا من بداية ٢٠١١ لين اليوم مسافر على القطريه ١٠ مرات

الكل يحن علي خذ بطاقة القطرية ( الأميال ) واستفيد من الأميال وخصوصا ان اكثر رحلاتك درجة اولى

أقولهم ماااابي .. لأني ادري أني بواجه لف ودوران ولوعة جبد وانا شخص ماحب اتنرفز في السفر

حتى الخصم ٢٥ ٪ اللي موفرته لي الدوله ما اسأل عنه لأني ادري أني مب مستفيد منه شي وانتوا عارفين ليش

عندي ادفع سعر تذكره كامله بسافر .. ماعندي بقعد في البلاد

انا أسافر على القطريه لان خدمتها أوكي واسطولها يروح كل مكان وبس

اما سالفة وطنية ماوطنيه هذي مب داخله مخي