الفرق بين السائح القطري ..... والسائح الاوروبي

[البدع]

ساقول (رايي الشخصي) واتمنى اقرأ (ارائكم)

السائح القطري ... بالنسبة للعائلة همهم براد ومناظر حلوة وانهار واسواق وحشرة مع الناس عيد ...اما الشباب .. فهمه ديسكوات او مراقص شبه محترمة او حفلات غنائية مختلطة طبعا

اما الاوروبي (سواء عائلة او شباب) ... تلاقي همهم اثار ومتاحف وقلاع واماكن رمزية مثل برج ايفيل او غيره ...




السائح القطري من سابع المستحيلات يسافر بطيارة ويكون معاه شنطة اقل من 20 كيلوجرام .. مستحيل ... (بمن فيهم كاتب السطور)

اما الاوروبي ... فيستحيل يشيل اكثر من 20 كيلو .... تلاقيه لابس نفس اللبس لمدة 9 ايام .. وحاط شنطة ورى ظهره



السائح القطري يسافر ومعاه خدامة او يستاجر خدامة في البلد الي يزوره ......

السائح الاوروبي ماعنده خدامه ولايستاجر خدامة




السائح القطري .. مايخطط ... يسافر على المزاج ... ويدور وناسة (كاتب السطور منهم في بعض المرات ولا يخطط)

السائح الاوروبي تلاقيه يخطط ويعرف كل مكان بيزوره



السائح القطري يصرف اكثر 10 مرات من السائح الاورووبي (مرة قابلت بنت صغيرة اسمها لبنى في المغرب ... وكانت تبيع ورد على البحر .. تقول لي انا اعرف السائح الخليجي من غير الخليجي .... قلت لها كيف يالبنى .. قالت السائح الخليجي يطالع البنات .. والسائح الاوروبي يطالع البحر .... وقلت لها انتي تحبين منو يالبنى ... قالت احب السائح الخليجي يعطي فلوس وكريم .. بينما السائح الاوروبي بخيل مايعطي شيء)


السائح القطري يرجع قطر وهو شاري ثياب او عطر هي موجود اصلا في قطر ..... السائح الاوروبي يرجع ومعاه تذكار من البلد الي زاره


السائح القطري مايستفيد من سفرته سواء صرف فلوس ووناسة .... والسائح الاوروبي يستفيد انه تعرف على تراث الدولة الي زارها بدقة غريبة



واسمحولي .. اني صرت مثل السائح الاوروبي الان بعد 5 اشهر من السياحة حول العالم

[بولينجر]

اسلوب السياحة الاوروبي ما يصلح لنا..... يعني لو الشباب سووا مثل الاوروبيين وكل واحد شنطته على ظهره..... مافي مجال تشوف عايلة مسوية نفس المنظر..... حتى لو كان اسلوب عملي..... اما من ناحية الاماكن اللي يتوجه لها السائح فموجود عندنا من السياح اللي يدور الاماكن التاريخية والقلاع وحتى ما يروح السوق...... شفت من اللي وصفتهم وشفت اللي يروحون المتاحف والاماكن التاريخية...... بس منظر الشنطة على الظهر او وزن الشنطة ما يتعدى 20 صعبة......

[المحقق كونان]

عيل انا طلعت اوروبي :)

يوم رحت فرنسا و المانيا زرت متاحفهم

[قطريه ماركه]

يمكن كلامك فيه شي من الصحه ... و لكن

أنا ما عمري سافرت وخذت الخدامة ( مع وجود أطفال صغار ) مستحيل و انت عممت ع السائح القطري انه ياخذ الخدامة
أحس أنه السفر فيه خصوصية لي و لـ عائلتي ....

قلت انه القطري ما يخطط ... هاي يمكن قبل اما الحيين ما شاء الله شوف المواضيع الكل يخطط
حق سفرته تخطيط يومي ...

قلت أنه السائح القطري ما يهتم بالمعالم و الاثار ... بالعكس انا وااايد احب حضارة البلاد و معالمها المشهورة
و متاحفها ...


شكرا ..........

[ANONYMOUS]

الناس اصناف

ولا يجوز التعميم المجحف وجمع الكل في سله واحده

[البدع]

ليس تعميم

هذا الكلام بشكل عام

مرة زرت قلعة الأيوبيين في حلب

قال لي المرشد السياحي الخليجيين نادر مايزورون هذي القلعة ، هم في الغالب يروحون دمشق

هذا الكلام بشكل عام

[المتحدث الرسمي]

ساقول (رايي الشخصي) واتمنى اقرأ (ارائكم)

السائح القطري ... بالنسبة للعائلة همهم براد ومناظر حلوة وانهار واسواق وحشرة مع الناس عيد ...اما الشباب .. فهمه ديسكوات او مراقص شبه محترمة او حفلات غنائية مختلطة طبعا

اما الاوروبي (سواء عائلة او شباب) ... تلاقي همهم اثار ومتاحف وقلاع واماكن رمزية مثل برج ايفيل او غيره ...


كلامك صحيح ياخوي بس بعد ما نعمم
الحريم الله يهداهم اول همهم السوق ولا الشنطة تنترس و ما يفتكرون في المتاحف والاماكن السياحيه في البلد الا من رحم ربي (( لا اعمم على كل النساء ))


السائح القطري من سابع المستحيلات يسافر بطيارة ويكون معاه شنطة اقل من 20 كيلوجرام .. مستحيل ... (بمن فيهم كاتب السطور)

اما الاوروبي ... فيستحيل يشيل اكثر من 20 كيلو .... تلاقيه لابس نفس اللبس لمدة 9 ايام .. وحاط شنطة ورى ظهره


نقطتك في محلها بس ياخوي النظافه حلوة
و هم الله يكفينا الشر سبوحهم في الاسبوع مره :)

السائح القطري يسافر ومعاه خدامة او يستاجر خدامة في البلد الي يزوره ......

السائح الاوروبي ماعنده خدامه ولايستاجر خدامة


مب الكل
ياما ناس سافرت و عندهم كوكش يهال و ما خذو معاهم الخدامه



السائح القطري .. مايخطط ... يسافر على المزاج ... ويدور وناسة (كاتب السطور منهم في بعض المرات ولا يخطط)

السائح الاوروبي تلاقيه يخطط ويعرف كل مكان بيزوره


انا ما كنت اخطط للسفر قبل
بس بعد ما سافرت مع الشباب سفره كانت ملخبطه قمت اخطط و اكتب في اوراق الاماكن و الجدول اللي بمشي عليه

السائح القطري يصرف اكثر 10 مرات من السائح الاورووبي (مرة قابلت بنت صغيرة اسمها لبنى في المغرب ... وكانت تبيع ورد على البحر .. تقول لي انا اعرف السائح الخليجي من غير الخليجي .... قلت لها كيف يالبنى .. قالت السائح الخليجي يطالع البنات .. والسائح الاوروبي يطالع البحر .... وقلت لها انتي تحبين منو يالبنى ... قالت احب السائح الخليجي يعطي فلوس وكريم .. بينما السائح الاوروبي بخيل مايعطي شيء)


للاسف القطري بنك يمشي :secret:
ويرجع بعد الصيف يتحندى ماعندي فلوس (( مب الكل )) :secret:

السائح القطري يرجع قطر وهو شاري ثياب او عطر هي موجود اصلا في قطر ..... السائح الاوروبي يرجع ومعاه تذكار من البلد الي زاره

صحيح :nice:

السائح القطري مايستفيد من سفرته سواء صرف فلوس ووناسة .... والسائح الاوروبي يستفيد انه تعرف على تراث الدولة الي زارها بدقة غريبة

يبي يغير جو ويستانس و بعدها يرجع للغبار و الحر مره ثانيه
وكنك يابوزيد ما غزيت

واسمحولي .. اني صرت مثل السائح الاوروبي الان بعد 5 اشهر من السياحة حول العالم

مسموح اخوي :nice:




....


انا معاك ياخوي في بعض الامور اللي ذكرتها لكن يجوز ان نعمم على جل الشعب القطري

[The Watcher]

مقارنة موضوعية
وفعلاً هذا اللي صاير للأسف

بالنسبة لي انا احبب اخطط قبل السفرة بفترة طويلة
وما احب اروح الاسواق
ونادر ما شنطتي تزيد عن 15 كيلو

[ورقة غار]

هالكلام واقعي واذا ماشمل كل الفئات تقريبا يشمل 90%

[ماجد البدر]

السائح القطري ... بالنسبة للعائلة همهم براد ومناظر حلوة وانهار واسواق
ليش لا وفيه عيب في هذا الشي من كثر الانهار الي عندنا و المناظر الحلوه وتفكر في خلق الله هو نوع من العبادة


وحشرة مع الناس عيد .
ما اعتقد


..اما الشباب .. فهمه ديسكوات او مراقص شبه محترمة او حفلات غنائية مختلطة طبعا
لم ارى هذه النوعيه ولكن سمعت عنهم واعتقد انهم قليلون اذا وصفت شباب قطر


اما الاوروبي (سواء عائلة او شباب) ... تلاقي همهم اثار ومتاحف وقلاع واماكن رمزية مثل برج ايفيل او غيره ...

لانهم بلا تاريخ ويبحث في التاريخ



السائح القطري من سابع المستحيلات يسافر بطيارة ويكون معاه شنطة اقل من 20 كيلوجرام .. مستحيل ... (بمن فيهم كاتب السطور)
كثيرم ن السواح القطريين يشل معاه شي بسيط ولكن العائله صعب ان يشيل خفايف


اما الاوروبي ... فيستحيل يشيل اكثر من 20 كيلو .... تلاقيه لابس نفس اللبس لمدة 9 ايام .. وحاط شنطة ورى ظهره
لانه نجس ولا يفقه في الطهاره ولاستحمام و الجنز الي عليه مايهم كم يوم تم عليه
ولا عنده شي اسمه عائله


السائح القطري يسافر ومعاه خدامة او يستاجر خدامة في البلد الي يزوره ......

البعض

السائح الاوروبي ماعنده خدامه ولايستاجر خدامة
لانه في بيته ماعنده وحالته حاله ومتقشف و منكشح




السائح القطري .. مايخطط ... يسافر على المزاج ... ويدور وناسة (كاتب السطور منهم في بعض المرات ولا يخطط)

بعض من يفعل هذا يتعب كثير في السفر وهذا يسمى سوء تخطيط ويفترض العكس


السائح الاوروبي تلاقيه يخطط ويعرف كل مكان بيزوره
بالعموم نعم وهذا الي يفترض يصير مع الجميع فيغلب عليهم التخطيطي لكل رحله وهو ما افعله دائما



السائح القطري يصرف اكثر 10 مرات من السائح الاورووبي (مرة قابلت بنت صغيرة اسمها لبنى في المغرب ... وكانت تبيع ورد على البحر .. تقول لي انا اعرف السائح الخليجي من غير الخليجي .... قلت لها كيف يالبنى .. قالت السائح الخليجي يطالع البنات .. والسائح الاوروبي يطالع البحر .... وقلت لها انتي تحبين منو يالبنى ... قالت احب السائح الخليجي يعطي فلوس وكريم .. بينما السائح الاوروبي بخيل مايعطي شيء)
لايجوز التعميم ولكن قد يجوز التعميم من ناحية العواطف فهو عاطفي فلماذا كلمت هذه الفتاه هي العاطفه على ما اعتقد


السائح القطري يرجع قطر وهو شاري ثياب او عطر هي موجود اصلا في قطر ..... السائح الاوروبي يرجع ومعاه تذكار من البلد الي زاره
يمكن


السائح القطري مايستفيد من سفرته سواء صرف فلوس ووناسة .... والسائح الاوروبي يستفيد انه تعرف على تراث الدولة الي زارها بدقة غريبة

ما اعتقد


واسمحولي .. اني صرت مثل السائح الاوروبي الان بعد 5 اشهر من السياحة حول العالم
عليك بالعافيه

[البدع]

....


انا معاك ياخوي في بعض الامور اللي ذكرتها لكن يجوز ان نعمم على جل الشعب القطري

ياهلا

محد عمم في المقالة

مثال: قابلت بريطاني جاي الغردقة عشان (يتشمس) وعشان البحر, فهل هذا يعني ان الاوروبي يتشمس ...

بشكل عام البريطاني يحب الاماكن السياحية مثل الاهارم والاقصر وغيره ... بس فيه بعضهم له اهداف اخرى

[البدع]

مقارنة موضوعية
وفعلاً هذا اللي صاير للأسف

بالنسبة لي انا احبب اخطط قبل السفرة بفترة طويلة
وما احب اروح الاسواق
ونادر ما شنطتي تزيد عن 15 كيلو


هالكلام واقعي واذا ماشمل كل الفئات تقريبا يشمل 90%

يعطيكم العافية

كلامكم سليم

بشكل عام هذا الي صاير في مجتمعنا خلال السياحة

ولا اعرف ليش بعض الناس تكابر في الموضوع وتنفيه وهو حقيقة موجودة ودامغة

[night]

حتى فالسياحه في سائح قطري !! اي تصنيف 2011

موضوع عام شدخل سائح قطري وسائح اروبي انزين بعد في سائح اروبي او عائله تنطبق عليهم الصفات المذكوره في السائح القطري على قولتك

وبعدين هاي سفر في ناس تحب الاستطلاع وتحب تزور المناطق الاثريه وفيه ناس عكس تحب المناطق الترفيهه والطبيعه البحر السوق كيفهم يعني !!

والي يبي يروح يتسيح عشان ثقافه كيفه والي يبي يتسيح عشان يتسوق ويستناس بالطبيعه بعد كيفه شالمشكله !!

[وحيد-الشوق]

مايبطون جبدي الا يسافرون ومعاهم خدامة لو علاج لمريضة نقول معليه بس سياحة وخدامة اشحقه انا مادري

للأسف البعض اغلب سفراته عالمزاج وبدون تخطيط اما سالفة العطور والملابس الي موجوده بالدوحة ههههههههههههههههه صارت معاي مره وحرمت اشتري اي شيء موجود في الدوحة

[العقل الحر]

يوجد شي من الصحه في موضوعك

والثقافه والعادات والتقاليد هي التي تحكم السائح الخليجي والاوروبي

ومشكلة السائح الخليجي وخاصه القطري التقوقع على نفسه وعدم الاختلاط والخجل ومعوقات كثيرة مكبل بها منها عادات وتقاليد وامور اخرى

وفي المقابل يوجد بالمثل من السائح الاوروبي وبما انهم من اكثر سياح العالم هم واليابانيين والامريكان ونحن بالنسبه لهم القله القليله

يوجد عند السائح الاوروبي السياحه الجنسية وهم اكثر سياح لها بالمقارنه بهم

وانت حكم على السائح البسيط وهم اغلبهم الذي يضغط على نفسه لكي يذهب ويشاهد برج ايفيل مثلا واما اصحاب الاموال يذهبون الى اكبر واشهر الدسكوات والبارات والكزينوهات
وهذا الامر مشهور لديهم

وفي حقيقه الامر اغلب السياح لدينا رجل عائلة لا يحب السفر وانما بضغط من العائلة والجو البارد يغريه بالذهاب الى الدول البارده وهذا الامر مشهور بين كبار الشخصيات والشيوخ في الخليج ولا يهمهم تاريخ البلد الذي سوف يذهب اليها ومتاحفها

وانا لا اريد التحدث عن نفسي لانه اهتمامي وميولي واضح وهو التاريخ والاثار وثقافه وعادات الشعوب ولا اجد حرج للاختلاط لمزيد من المعرفه

[الـقـاسـي]

والله ياخوي هذي تعتمد على ثقافات الناس وتفكيرهم ..
يعني عندنا نادر ماتحصل احد يهتم بالتاريخ او الثقافات اغلب الناس يسافرون يبون يتمشون ويستانسون ويدورون للبراد والخضار اللي مب موجود عندنا ,,

اما الاجانب مغتثين من البراد والخضار اللي عندهم ف يبون شي جديد ..

[بوشاهين2]

كفيت ووفيت يا (ماجد البدر) .. ياخوي ياراعي الموضوع بالنسبه للي بيسافر مع هله لازم أيسكنهم أحسن الفنادق ولازم أيدلع هله وأيخليهم يشترون ألي بخاطرهم وهذي بالنسه مره خبرك الواحد مايقدر أيسافر مع أعياله إلا وقت ماتنتهي المدارس .. أما بالنسبه لليروح مع ربعه يقدر يسكن بأي فندق وبالسعر ألي بيعجبه ويقدر يصرف بالمصروف ألي يبيه ..

[الـراسي]

الحمد لله ما لي بالسفر

حدي السعودية ما ارتاح للسفر للخارج

ليش مدري مستانس في الدوحه برطوبتها وحرها

[عبدالله 2022]

عيل انا طلعت اوروبي

يوم رحت فرنسا و المانيا زرت متاحفهم

[شمس]

السائح القطري ... بالنسبة للعائلة همهم براد ومناظر حلوة وانهار واسواق


اي والله
بلا متاحف
بلا زحمة
بلا شمس
الله يهدي سر شمسنا بس
صايلتنا الله يهداها

[شمس]

انا ابي اعرف هالعالم ما عندهم عيال كلا يمشي بروحه
على جذيه المفروض بعد100 سنه منقرضين؟

[التيما]

تر كلامك مب مقياس انهم الافضل !!

نرجع لموضوعك :
انا ارتب سفرتي واخطط لها من اول ما رجع من السفر ..
ماحب اسافر بلد فيها خليجين ابدااااااا وحاطه عليها x ولو اضطريت ماروح المدن الزحمة
ماحب الشوبينج الحمد لله ولا اداني المجمعات
سفراتي مع ابونا كلها اثار وحدائق وتمشي لان لنا نفس التوجهات
نحجز سيارة وناخذ جولة في المكان او نركب الترام او القطارات
ممنوع الخدامة او اليهال يروحون معانا .. لليهال سفرة ثانية وطبعا ممنوع الخدامة تجي
شناطنا اصغر مما تتصور واصغر حجم بعد مو توفير بس لاننا وايد نتنقل فتساعدنا صغر الشنطة على سرعه الحركة ..
اكثر تحركاتنا مشي او سياكل لان هالنظام مريح هناك في المدن الاوروبية بالذات .. ولمن نطلع من دوله لدولة او مدينة لمدينة بالقطار او السيارة ..

كان ودي احط سفرتي لاوروبا الصيف الماضي بس للاسف موقع التحميل التابع للموقع انحذف وكسلت احمل من موقع ثاني ..

كلفتني سفرتي الصيف الماضي تذاكر وفنادق وسيارة وفسح واكل كاملة من غير مبالغة حوالي 30 الف ريال قطري .. وانا وريلي في صدد تقليله عالسنه وان شاء الله نقدر .. مع العلم ما كنا مقصرين على روحنا بشي من فسح ولا فندق ممتاز ولا هدايا للاهل وتذكارات من هالدول لقسم التحف في بيتنا .. بس كلفتنا كلها 30 الف ريال مع التذاكر ..

وصديقاتي طالبين مني انسق لهم سفراتهم هالصيف لانهم مب مصدقيني .. ورتبت لثلاث من ربعي نفس الترتيب .. مع العلم اني زرت الصيف الماضي هولندا وبلجيكا وفرنسا وايطاليا والمانيا والنمسا بس ب ثلاثين الف .. والسنه باذن الله بزور امريكا الجنوبية ورغم ان التذاكر والفنادق جاتنا مجانية بحكم شغل ريلي لكنا حسبناها وكاننا احنا الدافعين ومصرين نقلل المصاريف عن الصيف الماضي ان شاء الله ..