تصاميم بيوت قطر

[بن غيث]

انا من فترة حطيت الموضوع في قسم البناء والديكور عن اراء الناس وافكارهم عن تصاميم فلل باشكال جديدة وغريبة منها المودرن والكلاسيك والدمج بين التصاميم

فيه ناس راسلوني ع الخاص وحسيت من كلامهم انهم ضد تغير التصاميم الموجوده في قطر .......؟؟؟

ليش ...؟؟

لهذه الدرجة ما تحبون تغير التصاميم الي مالها معنى ولا شكل
ومكلفة ع الفاضي
قليل الي اختاروا التصاميم الكلاسيكية
والكل رفض التصاميم المودرن
وفيه تصاميم عرضتها عليهم بيوت اوروبية بروح قطرية ونقش اسلامي
فهموني ايش الي يخليكم تتمسكون بالتصاميم التقليدية الي انتهت من سنين وتكلف الملايين

[Thamer_Qat]

وين تصاميمك بارك الله فيك

[بن غيث]

انا اتكلم بشكل عام مب عرض لتصاميم او دعاية وتسويق

[الدمعه]

بالنسبه لي تصاميم البيوت اللي احين مسوينها مب عاجبتي وسوينا تصميم عادي مب مال الحكومه ..

ماله معنى التصميم بصراحه ..بلكونه شكبرها اللي يقول الجو كلش يساعد ..

والغرف جدا صغيره تكفي حق طفل واحد وبدون صاله ..مادري احس اللي سوى

هالتصميم جنه يقول لاهل قطر لاتجيبون عيال .. واذا مب عاجبكم دفعوا اكثر ..

المهم ان التصميم الخارجي والداخلي مب حلو

[بن غيث]

والله العظيم ان احنا قاصين علينا هل المكاتب الهندسية ويبوقون التصاميم من بعض
اللهم انهم يغيروون شويه تفاصيل بسيطه وياخذون بالالاف
وفوق ذي كله يتفقون مع المقاولين نظير مبلغ مادي علشان يمشون شغلهم

[المتحدث الرسمي]

....


الصراحه نادر ما اشوف تصاميم تجذب الانظار في الدوحه

التصاميم دايما مقلده و مكرره


اذا ودك ياخوي في تصاميم مبتكره و حلوة انصحك تروح الكويت

بيوت الكويت تلاقي فيها افكار جميله وممتازه و تحصلهم يبدعون فيها

[.Q a T a R.]

اخوي البن غيث

ياريت تحط التصاميم الي تقول عنها علشان نفهم انت شتقصد

لهذه الدرجة ما تحبون تغير التصاميم الي مالها معنى ولا شكل
ومكلفة ع الفاضي
قليل الي اختاروا التصاميم الكلاسيكية
والكل رفض التصاميم المودرن
وفيه تصاميم عرضتها عليهم بيوت اوروبية بروح قطرية ونقش اسلامي

وهذا كلامك ((

معلش لاتواخذني

انت تقصد الشكل الخارجي ولا تقصد طريق البنيان نفسه (( خرسانه والحديد ))

[المسك1969]

السلام عليكم

أنا ماعندي أبني أو شيء ولكن أحب اشوف ابداعات القطريين... واعتقد أنك منهم أن شاء الله
فأتمنى أنك تحط لنا صور لما تقصده حفظك الله..

فإن كان لديك صور أعرضها فالشيء الذي لا يعجب س سيعجب ص

وفقك الله أخي الكريم

[بوخالد88]

لا بالعكس اخوي بالنسبة لي احب الجديد المتميييز

ياريت لو تنزل اللي عندك

بالتووووفيق

[بن غيث]

الي يحب يرسلي ايميله ع الخاص ويشوف التصاميم الي نبي نغير فيها فكرة البناء التقليدي والي صارت ممله

[المحقق كونان]

بصراحة تصاميم الفلل الجديدة مب حلوه و بارده و اغلبها حق تجارة

الي يبي تصاميم حلوه يشتري مجلات و كتلوجات اجنبية و امريكية

و عطو المهندس التصميم و بيسوي لكم الخارطة

المجلات و الكتلوجات تنباع في مكتبة جرير

[STAR]

ممكن نشوف امثلة للتصاميم اللي مب عاجبتنا؟؟!!:)

[ريم الشمال]

أعتقد قولك جانب الصواب
بس اعتقد المكاتب حتى لو تقدم تصاميم معينه اعتقد أن صاحب الشأن الي هو بيبني له أكبر تدخل في تصميمه
والمفروض يستغل كل شغله ممكن تؤدي للخروج بتصميم يرضيه سواء داخلي أو خارجي
فلا تعتب على المصمميم بقدر أن يكون عتبك على من لا يتدخل في تصميم بيته ويوجه المهندس المصمم الي ما يريحه ويبغيه في بيته
الله يجزاك الخير على التنبيه
بس ممكن أن تكتب موضوع تبين فيه أفضل السبل والتصاميم التي يمكن أن يأخذها ويطلبها الناس كنصيحه مؤجور عليها مع صور وغيرها

ريم الشمال

[شمس]

وليش فيه بنيان ما يكلف (تقصد خشب ولا شنو)

[بن غيث]

بصراحة تصاميم الفلل الجديدة مب حلوه و بارده و اغلبها حق تجارة

الي يبي تصاميم حلوه يشتري مجلات و كتلوجات اجنبية و امريكية

و عطو المهندس التصميم و بيسوي لكم الخارطة

المجلات و الكتلوجات تنباع في مكتبة جرير

وانت مفكر اذا شفت تصميم في مجله ورحت للمهندس وقتله سولي مثله بيصممه ؟؟؟
الظاهر انك توك جديد وما جربت البنيان والتعامل مع هالعالم

[المحقق كونان]

وانت مفكر اذا شفت تصميم في مجله ورحت للمهندس وقتله سولي مثله بيصممه ؟؟؟
الظاهر انك توك جديد وما جربت البنيان والتعامل مع هالعالم

المهندس صمم و المقاول خلص البنيان من زمان و الحمدلله

انا خذت فكرة الفيلا من مجلة اجنبيه

انت الظاهر عندك فكره ان كل هل قطر مايعرفون التصميم

:rolleyes2:

[بن غيث]

المهندس صمم و المقاول خلص البنيان من زمان و الحمدلله

انا خذت فكرة الفيلا من مجلة اجنبيه

انت الظاهر عندك فكره ان كل هل قطر مايعرفون التصميم

:rolleyes2:

شكرا ع مرورك :eek5:

[intesar]

ممكن تحط التصمايم وحنا نحكم

[chillis]

ياريت تحط لنا تصاميمك علشان مثل ماقالت مسك حلو الواحد يشوف شي مميز وابداع بانامل قطريه

[MAZEN37]

وانت مفكر اذا شفت تصميم في مجله ورحت للمهندس وقتله سولي مثله بيصممه ؟؟؟
الظاهر انك توك جديد وما جربت البنيان والتعامل مع هالعالم
اسمحلي كلامك يناقض نفسه
يعني تدري انه مب اي تصميم ينفع عند البلديه
والي هي اصلا مشرفه وحاطه قوانين للاستشاريين,
انا مع القوانين والانظمه ودفاع مدني والارتدادات والمتطلبات الانشاءيه ومراعاة طبيعة المجتمع
كل دوله جو ومساحه ومواد متوفره وووو
لكل مكان وبلد غير
مثال بسيط :- البلكونات ما تصلح عندنا
بينما لازمه في بلاد ثانيه
الارتفاعات لازمه والعماير والشقق في كل مكان بينما بقطر بمناطق معينه
البدروم والبيسمنت ما يصلح عندنا بينما لطبيعة بعض الاراضي في دول ثانيه لازمه
واشياء كثيره ,,
شكرا:victory:

[.Q a T a R.]

اسمحلي اخوي بن غيث

احسك بديت تطلع عن المسار

ترد على الي يعجبك وباقي المداخلات معطيها طناش ,, عيل ليش منزل موضوعك في الحوار العام

احسك تلف ودور على هالشركه الايطاليه الي قاعد اتسوق لها وتقول ان المقاولين واهل المكاتب حراميه

ومستقلينا

ادخل فالموضوع على طول علمنا هالشركه الي قاعد تسوق لها تبني بخشب ؟؟ ولى اب ايش

وتكلفه البنيان اقل من السوق ولا اكثر ؟؟ واذا اكثر ايش الميزه الي اتخلي الزبون يتجه لها

ياريت تكون واضح في ردك من غير لف ودوران

[الأصيلة]

....


الصراحه نادر ما اشوف تصاميم تجذب الانظار في الدوحه

التصاميم دايما مقلده و مكرره


اذا ودك ياخوي في تصاميم مبتكره و حلوة انصحك تروح الكويت

بيوت الكويت تلاقي فيها افكار جميله وممتازه و تحصلهم يبدعون فيها
وحتى بيوت وفلل جده...
بسيطة وفخمة في نفس الوقت راقية..
أما عندنا للأسف التصاميم جدا تقليدية ومافيها روح ولاجمال..

[شمس]

اتوقع الجمال بيكون بالديكور وليس بالبنيان

[شموخ دائم]

,

,


مرحبا

حتى ننتقد البيوت والفلل في قطر لازم نحدد اي نوع من البيوت

الذي نريد انتقاده

قطر مثلها مثل باقي دول الخليج ما شاء الله كل انواع الطراز المعماري موجود

1- فيلا شرقيه

2- فيلا على الطراز التراثي القديم ( نفس سوق واقف )

3- فيلا غربيه ( قرميد احمر بالسقف سطح مائل )

4- فيلا اسلاميه ( تمتاز بالقبه والزجاج المعشق )

5- فيلا تجمع الشرقي والغربي

كل هذه الانواع موجوده في قطر

هذا التنوع الرائع والغني هو ما يميز الدوحه

وما شاء الله كل مناطق الدوحه راقيه وتمتاز بجمال الفلات فيها

ومكسيه بالحجر الطبيعي وبعضها بالحجر الصناعي والرخام

ومصروف عليها والناس تحط مصممين ديكور

ياريت ( نحدد نوع الانتقاد )

مو معقوله كل الانواع مو حلوه بقطر

ولكنها حلوه في بلد او مكان ثاني

:)

البيوت بالكويت يوجد نسخه منها بقطر والسعوديه والامارات

ياريت اخوي تحدد لنا تصميم عاجبك وتحط التكلفه التقديريه له

حتى نقارن ويكون الحوار له قيمه وفائده للجميع

انا اشوف التنوع في قطر جدا ممتاز وكل من يزور قطر اول انطباع ياخذه

هو كثره الفلل وتنوعها وجمالها

انا اختلف معاك اختلاف كلي فيما طرحته

واتمنى الاختلاف يثري الموضوع

دمت بطيب




,

,


اخوك


شموخ دائم

[سهم عتيج]

اسمح لي لاغلاق الموضوع لأنك طارح موضوع في الحوار العام وفي نفس الوقت تقول اللي يبغي يشوف التصاميم يرسل لي على الخاص..

لذلك نرى أن الموضوع دعائي أكثر منه نقاشي رغم الردود الطيبة من باقي الأعضاء..

لذلك نرجو منك ان كان عندك وجهة نظر في الموضوع انك تحط وجهة نظرك كاملة في الموضوع ليتسنى للأعضاء الاقتناع بها من عدمه,, لا أن تطرح موضوعا والباقي على الخاص..