أول درافت لخرايط البيت... آراؤكم.. خبراتكم... نصايحكم

[(عبدالله)]

السلام عليكم ورحمة الله

ولله الحمد... سويت أول درافت لخريطة البيت

بغيت منكم نصايحكم وآراءكم .. والله يجزيكم خير

للعلم... الأرض 1200 متر (30 × 40) ... موقعها في زاوية فريج...

يعني من الجهات الأربعة بيوت.. ما عدا جهة الجنوب في الزاوية تحت عاليمين فتحة 10 متر على الشارع


.::: الدور الأرضي ::.

http://im7.gulfup.com/2011-07-13/1310540721401.jpg (http://www.gulfup.com/)

.:: الدور الأول ::.

http://im7.gulfup.com/2011-07-13/1310540722862.jpg (http://www.gulfup.com/)

بانتظاركم

[@north_star@]

ما شاء الله تصميم مب معقد وبسيط وبالتوفيق ان شاء الله

[badarameen]

التصميم حلو
بس الزوايا وايد وراح تاكل من البيت وراح تتلعوز مع الاثاث وضيق المكان

[khalid.qtr]

تصميم حلو بالتوفيق

[MeMe MoOoON]

ماشاءالله حلو بس الزوايا ماكله البيت

[(عبدالله)]

الله يعطيكم العافية ماقصرتوا

موضوع الزوايا بحطها في الاعتبار

ياليت اذا ممكن تفيدوني بملاحظات تفصيلية واقتراحات اكثر

[المسافره]

لو عملت بسمنت يكون حلو

كان بمخطط زوجي يعمل بسمنت وتخصصه للمطبخ والاستور والخدم وغرف لعب اطفال وتسغل المساحه اللي مخصصه للمطبخ والستور وكل ماتبتعد عن الزوايا يكون افضل لانك بتحط حديد زياده وبتصير تكلفه اكثر

[r07]

منزل مبارك ان شاء الله والتصميم حلو...وعندي بعض الاقتراحات ... حاول تحرك البيت لليمين و لتحت شوي عشان تكسب مساحه زياده في الحديقه بس عشان تسوي هالشيء لازم تغير في رسمة الملحق و المجلس الخارجي...
بالنسبه للمطبخ الداخلي(لو كان تحضيري فقط) لو تفتحه عل الفاملي دايننج بيكون اشرح...ولو تحط المطبخ مكان غرفة الشغاله واللوندري بيكون افضل لأنه راح يطل على الحديقه وتفتح لك باب من المطبخ على الحديقه على طول...والاحسن انك تشيل غرفة الغسيل والخادمه من الدور الارضي و تحطها في البنت هاوس... بما ان البيت راح يكون فيه مصعد ليش ما تخلي المصعد يكمل للبنت هاوس وتسوي لك عل السطح حديقه (عشب صناعي) وجلسات واضاءه حلوه واطلب من المهندس انه يرفع لك سور السطح ل180 سم آمن ..ولأن 30 سم منها بتروح في العازل...هذا اللي في بالي الحين وبالتوفيق

[سهم قطر]

الزوايا بتكون سبب في زيادة القواعد والاعمدة
وسيكون تكلفة البناء دبل
انا مجرب هالشي

[فويرط]

ما شاء الله عليك يا (عبدالله)
تصميم حلو

الله يوفقك في بنيانه ويتمم لك على خير

[بو الجوري]

مادري شلون الـ 4 جهات بيوت !!!! و بس 10 متر عندك :.. !!!
لو في مجال تحط مخطط الأرض :..

المهم في كذا نقطه :.. و في نقاط لو راويتني مخطط الأرض و الأراضي اللي جنبك :.. يمكن أفيدك أكثر :..



أولا :.. الزوايا :
بتلعوزك :.. من حيث التكلفه و الأثاث :.. و الضيق :..

ثانيا :.. المجلس الخارجي :
أحسه وايد بعيد عن المدخل :.. يعني كاشف البيت :..
و الـبانتري غلط مكانه عند الحمام :..

ثالثا:.. الملحق :
المطبخ لازم ينفتحله باب يكون مقابل باب المطبخ الرئيسي :..
أو قريب منه :.. لسهولة التنقل بين المطبخين :..
و هل إنت محتاج ستورين :.. ؟ ؟

رابعاً :.. الفيلا
(الدور الأرضي) :
الحمام تكرمون و المغاسل لازم تكون عند غرفة الطعام :.. مب المجلس :..
إلا إذا كان ورا الـدايننق حمام و غسيل :.. ( لأنه مش مكتوب ) :..

(الدور الأول) :
تقريبا التوزيع تمام :.. لكن الزوايه :.. متعبه و بتتحسف :..
الغرفه اللي فوق الـدايننق :.. أعتقد لو تكون فتحة الدريسنق من داخل الغرفه بتكون أفضل :..
و ياريت لو تستغل المساحه اللي فوق موزع المجلس اللي تحت :..
تخليها سيتينق لوحده من الغرفتين ( يا اللي فوق المجلس او اللي فوق المطعم ) :..

و أخيرا :..
أحس إنه مساحة الأرض ضايعه :.. و كان بالإمكان إنك تستغل و تكبر الحوش :..
يعني تصميم البيت إنه شبه حرف L:.. و مكان المجلس :.. ماكلين من الأرض على الفاضي :..

يعني تقدر تسوي تصميم أحلى و تستغل المساحات :.. عشان يكون عندك حوش مرتب :.. :nice:


و السموحـه طوّلت :.. لكن شبه فاضي :.. فقلت أبدي رايي :.. :secret:

[فويرط]

و هل إنت محتاج ستورين :.. ؟ ؟


انت ماتدري ليش ستورين !! :D:D :ok::ok:

[بو الجوري]

و هل إنت محتاج ستورين :.. ؟ ؟


انت ماتدري ليش ستورين !! :D:D :ok::ok:

:rolleyes2:
ليش إنت تدري :..

[(عبدالله)]

الله يجزيكم خير يا اخوان ويا أخوات على مشاركاتكم

أنا على متابعة للموضوع لكن ما قادر أحصل وقت مناسب حتى أرد على كل رد بشكل كافي ووافي

وخاصة رد بوالجوري... جزاك الله خير ما قصرت أفدتني وايد.. :victory:

وبقول لك عن سالفة الستورين مع فويرط :omen2:

برجع لكم واحد واحد بإذن الله

:: عبدالله ::

[(عبدالله)]

:: المسافره ::
فكرة البسمينت رائعة.. حتى إذا ما احتجه الآن أو السنوات القليلة الجاية يمكن أحتاجه على المدى الطويل... باستفسر كم التكلفة التقديرية إذا حطيت بسمين وبشوف... جزاج الله خير

:: r07 ::
يا مرحبا أخوي.. الله يبارك فيك ويجزك خير..
الملحق الخارجي والمجلس محتاج أخليهم بنفس المساحات.. بس بحاول أطلب من المصمم يعيد تصميم مساحات كثيرة في الدور الأرضي ضايعة وغير مستغلة.. وعلى هالأساس بكمل الحديقة إن شاء الله..
فكرة تبديل المطبخ التحصيري بمكان اللاندري وغرفة الخدامة جيدة.. بشوف في حالة إعادة ترتيب التصميم هل ممكن أسويها ولا لا وبحيث إن المطبخ التحضيري يكون قريب من مطعم الضيوف ومن الفميلي دايننق..
المطبخ التحصيري مفتوح الداينينغ مع الداينينق كرغبة شخصية مادري ما أحس إني أميل لهالستايل... بقرر بهالشي قريب بإذن الله بعد ما أطلع على تجارب الآخرين..
أنا أفضل حركة الخدامة تكون في الدور الأرضي لذلك خليت اللاندري والغسيل تحت.. وجودها في الدور الأرضي بيكون عملي أكثر بالنسبة لنا.. وخاصة إن المصعد بخليه للمستقبل وليس من الآن.. وحتى الجلسة على السطح أحس إني ما باستخدمها إلى بشكل محدود وقليل جداً ولو إن الفكرة رائعة... وارتفاع الحاجز بحطه في الحسبان..

والله يرحم لي والديك ما قصرت

[(عبدالله)]

الملفين مرفقين مرة ثانية لتعطل عرضها في أول الموضوع

الملف الأول: الدور الأرضي

الملف الثاني. الدور الأول

[(عبدالله)]

:: سهم قطر ::

صادق والله... ومعظم اللي شاروا علي نصحوني بتجنب الزواي والتقليل منها
لذلك هذا من ضمن توصياتي بتكون للمصمم إنه يعيد صياغة الواجهة ويبسطها
بما أن البيون بي من كل الجهات فما له داعي أتفنن في الواجهة الخلفية
جزاك الله خير

:: فويرط ::
تسلم بابوعبدالله عيونك الحلوين طال عمرك :omen2:
ما باستغني عن شورك بعد يبي لي أمر عليك... جهز نفسك :victory:

[مهل]

ماطلعت لي الصوره ... لي عوده ان شاءالله

[(عبدالله)]

:: بوالجوري ::

الملف المرفق بيوضح لك وضعية أرضي المتواضعة

أولاً: الزوايا
صادق نعم... وهذا من الأمور الجوهرية اللي بطلب من المصمم يقللها لي ويعيد
التصميم على أساس التقليل وحذف الزوايا.. وإذا استهبل علي ما بطول معاه بغير مكتب التصميم ... لهالدرجة..

ثانياً: المجلس الخارجي
البانتري بالغيه لأني غالباً ما بحتاجه.. وبحط مدخل المجلس إلى جهة الجنوب (تحت) مع استقبال مظلل ويمكن يكون هناك البانتري على جنب إذا في مجال أو احتجته
الاستقبال بيغطي شوي عن البيت.. وفي كل الأحوال.. الواجهة الرئيسية... غرفة السايق بيغطي على المدخل.. وخاصة إن الواجهة الرئيسية للبيت هي في الأساس صورية أكثر من انها استخدام يومي...

ثالثاً: المطبخ الخارجي
أنا ناوي يكون بابه من جهة المطبخ التحضيري بس جنوب (تحت مب غرب يسار)... والمنطقة اللي بينهم كلها مظللة لسهولة التنقل بكل أريحية..

رابعاً: الفيلا
(الدور الأرضي)
صح.. المغاسل والجحمام تكرم موجودين ورا المطعم ومش مكتوب عليهم مثل ما تفضلت.. اما اللي ورا المجلس فما لهم خص به وهم لاستخدام البيت واليهال..

(الدور الأول)
رايي من رايك من التوزيع وإزعاج الزوايا.. من واقع تجاربي مع غرف الفنادق فعلاً الزوايا مزعجة وغير عملية..
فتحة الدريسنق يبي لها مع الغرفة أفضل نعم..
الفتحة اللي فوق موزع المجلس.. المصمم ماوضح لي في الخريطة كيفية الاستفادة منها بما انها مفتوحة من تحت لين فوق... بشوف ايش سالفة المصمم معاه..


عن مساحة الأرض .. بيني وبينك وبعد ما تطلع على وضعية أرضي... وصلت لهالمرحلة... بحيث إن أسوي المجلس بهالطريقة والبيت على شكل l
لكن ممكن تكون في طرق ابتكارية أفضل بتطلع مع الوقت..

التصميم الله يسلم بخلي المهندس يعيد تصميم المساحات الضايعة فيه داخل البيت.. شكله ماخذ راحته إن الأرض كبيرة... بالإضافة إلى التقليل من الزوايا والعمدان..

[(عبدالله)]

و هل إنت محتاج ستورين :.. ؟ ؟



قصة الستورين مع فويرط الله يسلمك.. أن احنا اهتماماتنا وحدة وتفكيرنا دايماً متشابه... لما كنا نسولف عن تصاميم بيته وبيتي.. كل واحد منا كان حاظ فكرة ستورين في البيت من الأساسيات.. ستور لتموين وأغراض البيت ... وستور ثاني خاص لأغراض الرحلات :victory:

وعلى كل حال... بنقل ستور الرحلات لين الزاوية تحت يسار بحيث توصله السيارة.. والستور اللي فوق بكبره وجزه من مساحته بدمجه مع المطبخ... :nice:




و السموحـه طوّلت :.. لكن شبه فاضي :.. فقلت أبدي رايي :.. :secret:



بالعكس... لك مني كل الشكر والتقدير على وقتك وملاحظاتك القيمة... وإذا مافي تعب عليك.. خذ راحتك وشاركني برايك وخبرتك في تصميم بيتي..
الله يجزيك خير ويرحم لي والديك ويجعله في ميزان حسناتك

:: عبدالله ::

[(عبدالله)]

ماطلعت لي الصوره ... لي عوده ان شاءالله

السموحة.. مركز التحميل فيه مشكلة... بكلم الإدارة إذا يقدرون يخدموني ويعيدون تحميل الملفات في الرد الأول

عموماً انا أرفقك الدرافتين في ردي رقم 16

جزاك الله خير

[مهل]

السموحة.. مركز التحميل فيه مشكلة... بكلم الإدارة إذا يقدرون يخدموني ويعيدون تحميل الملفات في الرد الأول

عموماً انا أرفقك الدرافتين في ردي رقم 16

جزاك الله خير

بوعبدالله ،،، طلعت الصور
التصميم ما اقدر افتي فيه خبرتي محدوده و الشباب هنا وحوش ماشاءالله عليهم

ملاحظتي وحده .. توزيع البيت و الملاحق و المجالس يبيله اعاده تاهيل .. الارض مزدحمه بالبنيان ،، ضيق شوي و ارضك كبيره مب صغيره
اعتقد والله اعلم لو ان تصميم الفله مربع او مستطيل كان بيكون ارتب و افضل للتوزيع

اعانك الله و بالتوفيق

[المعنى88]

منزل عامر انشالله ......... راي ان غرفة الغسيل والكوي مدخله مع المطبخ الداخلي مش جيد
والبيت ما يحتاج 2 درج للصعود والنزول لللطابق الأول وماخذ مساحة ....... وعلى ما اعتقد
انك بتسوي مصعد في البيت ....... وعدد الحمامات زايد في الطابق الأول بدون داعي ....
انا عندي الأرض نفس مساحتك لكن فضلت نصها للأولاد مستقبلا ... ممكن تقولي مساحة البنيان؟

[(عبدالله)]

:: مهل ::

أفا عليك حتى إذا ماعندك خبرة... تخيل نفسك عايش بيت بناءاً على مخيلتك لهالتصميم وعط ملاحظاتك... والشباب بالفعل مب مقصرين..
للعلم... وضعية أرضي مثل ما تشوف في المرفق... لذلك تصميم الفيلا كحرف l وتوزيع الملاحق أفضل وضعية لها.. وما بتنفع الفيلا إذا مستطيلة أو مربعة إلا إذا في حركة ابتكارية ما مرت علي...

جزاك الله خير




بوعبدالله ،،، طلعت الصور
التصميم ما اقدر افتي فيه خبرتي محدوده و الشباب هنا وحوش ماشاءالله عليهم

ملاحظتي وحده .. توزيع البيت و الملاحق و المجالس يبيله اعاده تاهيل .. الارض مزدحمه بالبنيان ،، ضيق شوي و ارضك كبيره مب صغيره
اعتقد والله اعلم لو ان تصميم الفله مربع او مستطيل كان بيكون ارتب و افضل للتوزيع

اعانك الله و بالتوفيق

[(عبدالله)]

:: المعنى88 ::

يا هلا والله أخوي

غرفة الغسيل والكوي مدخله مع المطبخ الداخلي .. بعيد النظر في هالنقطة مع المصمم..
والبيت ما يحتاج 2 درج للصعود والنزول لللطابق الأول وماخذ مساحة... الدرج اللي في وسط البيت هو لاستخدام البيت اليومي.. اما الدرج الثاني فهو اسمه درج الخدمة.. في حالة إذا عندي عمال أو صيانة لأي شغلة (كهرباء، ستلايت، بايفيتر، مكيف، تنظيف...إلخ) فالعمال طالعين ونازلين عليه بحرية بدون ما يدخلون البيت.. وسبب ثاني.. في حالة إذا عندنا ضيوف حريم في البيت.. وأنا بغيت أطلع فوق.. ما له داعي أتصل وأطلب درب لي عشان أدخل ودرب عشان أطلع... درج الخدمة بيكفي وبيعطيني حرية الحركة... والسبب الثالث.. في حالة الطواري حريق مثلاُ لاقدر الله.. فهذا بيكون منفذ جانبي أسرع للخروج من البيت..

المصعد للمستقبل.. لين وصلنا الشيب الله يعطينا ويعطيك والجميع الصحة والعافية..

الحمامات في الدور الأول كثيرة لأن مع كل غرفة نوم.. (غرفة ملابس + حمام)..

في النهاية مساحة البنيان الكلية بتطلع تقريباً 1050 متر

الله يجزيك الخير نورت الموضوع بمشاركتك



منزل عامر انشالله ......... راي ان غرفة الغسيل والكوي مدخله مع المطبخ الداخلي مش جيد
والبيت ما يحتاج 2 درج للصعود والنزول لللطابق الأول وماخذ مساحة ....... وعلى ما اعتقد
انك بتسوي مصعد في البيت ....... وعدد الحمامات زايد في الطابق الأول بدون داعي ....
انا عندي الأرض نفس مساحتك لكن فضلت نصها للأولاد مستقبلا ... ممكن تقولي مساحة البنيان؟

[بو الجوري]

الصراحه أخوي عبدالله :.. أول مره أشوف أرض مثل أرضك :.. :omg:

شدهوه ماعطينك أرض محوّطه من كل صوب :.. !!!:eek5:

الله يعينك الصراحه :..

[(عبدالله)]

الحمدلله رب العالمين :)




الصراحه أخوي عبدالله :.. أول مره أشوف أرض مثل أرضك :.. :omg:

شدهوه ماعطينك أرض محوّطه من كل صوب :.. !!!:eek5:

الله يعينك الصراحه :..

[3aba681]

تصميم حلو وغريب، بس لي بعض الملاحظات :
1/ بعض المساحات تحتاج الى اعادة نظر مثل :صالة الجلوس الخاصه بالماستر روم.
2/ التصميم به عدد كبير من الزوايا مما يزيد من القواعد وبالتالي سيكون مكلف في مرحلة البناء من ناحية وستجد صعوبة في التأثيث من ناحية أخرى.

الاقتراحات:الغاء صالة الجلوس الخاصة بالغرفه الرئيسيه واستغلال مساحتها في توسعة باقي غرف النوم وتوسعة غرف التبديل وبالاخص غرفة الملابس الخاصة بالغرفه الرئيسيه لانها تحتاج مساحه معقوله .
الغاء بعض الزوايا ..

وبالتوفيق يارب.

[(عبدالله)]

:: 3aba681 ::
يا هلا والله أخوي العزيز

جميع اللي ذكرتهم مشمولين ضمن قائمة الملاحظات اللي بعطيها المصمم ويعيد التصميم على أساسها..

أما عن صالة الجلوس في غرفة المساتر.. بعد إادة التصميم بشوف.. لكن مهم بالنسبة لي تكون عندي صالة واسعة..

جزاك الله خير نورتنا :victory:

[نور الحور]

أخوي عبدالله ما شاء الله تبارك الله .. الله يبارك لك ويوفقك ..
بالنسبة للتصميم عندي بعض الملاحظات عليه ..<< حسب اللي شفته مع انه بحاجة لمزيد من التوضيح

طبعاً مثل ما أجمع الكل على التقليل من الزوايا و الأضلاع ..
بعد بالنسبة لحمام الماستر أكرمك الله مع اني حاولت اشوف المساحات لكن الخط موواضح بس مبين انه واااايد صغير
نفس الشي بالنسبة للحمامات أكرمك الله عموماً
وكذلك غرفة الملابس الماستر
بعدين فيه شي مو واضح .. في الدور الأرضي حاط غرفة للأطفال وغرفة للضيوف << مثل ما فهمت .. مع إن الغرفة ما لها مدخل أساساً !!!!..
عندي اقتراح ثاني لك .. إذا ما يجونك ضيوف وايد ممكن تخلي غرفة الضيوف 2 في 1 يعني غرفة العاب ولما يجونك ضيوف يكون فيها سرير مدمج مع الدولاب أو الطوفة ..
بلنسبة للملاحق ممكن تدمجها مع البيت أحسن و أقرب للاستخدام أو تدمجها مع المجلس وتلغي في هالحالة البنتري الصغير في المجلس

أخوي عبدالله أعتقد إنك ممكن تطلع بمخطط أحلى وأكثر عملية من هذا المخطط حتى ولو كانت أرضك بهالشكل ...
حدد احتياجاتك ومساحاتك التقريبية والأفكار اللي تبي تنفذها وعلى أساسها ممكن تغير للأفضل ..
وإذا محتاج أي مساعدة فأنا حاضرة :)

[بوخالد911]

الله يوفقكم

[r07]

اخوي اسمحلي اعطيك راي اضافي اعتقد انه بيعطي البيت وسع اكثر لأان الحوش بيصير اكبر...
اول شي موقع البيت..لو تخلي الزاويه اللي فيها المدخل الرئيسي مكان الحديقه الخلفيه وتخلي الارتداد اللي ورا مترين بس مب اكثر وهالمساحه تضيفها للحديقه الاماميه والمدخل الرئيسي للفيلا طبعا ما راح يكون في الخلف ..بس راح ياخذ مكان احدى الغرف المضلعه(لأنك راح تعكس)...وممكن تغير الغرف الثانيه وتشوف اي الغرف تبيها تطل على الحديقه واي اللي تبيها في الخلف انا رايي ان اهم شي جلستكم اليوميه والفطور وغرفة العيال تخليها تطل على الحديقه ...

بالنسبه للملاحق والمجلس الخارجي...
شفت مكان البوابه الخارجيه اول ما تدخل الحين تحس ان الملاحق على طول في الوجه ومضيقه الحوش
اقتراحي انك تحط الملاحق والمجلس بحيث تكون على يسارك اول ما تدخل البيت وغرفة السايق عادي تكون مكان المجلس السابق بس خل دريشة الغرفه والباب مشاهدين الشارعشان ما يكشف البيت...
والمدخل مثل ما اتخيله انك اول ماتدخل من جهة العشره متر اللي تحت تدخل على ساحه صغيره على يسارك المجلس وقدامك غرفة السايق ماحذه حيز صغير والمساحه ما بين غرفة السايق والمجلس هذي تخليها البوابه الرئيسيه من بعدها تدخل على حديقة البيت..(ممكن في الساحه الصغيره تحط لك شلال صغير على الطوفه وزرع بسيط)
هذا اللي عندي والله يوفقك وتحمل تخلي الاستشاري يضغط عليك عشان تطلع الموافقات من البلديه وكهرماء وغيره لين ماتقتنع اكيد انك ما راح تغير شي...