علاج التاتاة

[the_end]

السلام عليكم اخواني وخواتي
حبيت استفسر في حد عنده فكرة عن دكتور في قطر لعلاج التاتاة
انا اعمري 22 واعاني من هالمشكلة من صف رابع ابتدائي
وكملت معاي لي الجامعة
وشكلتلي مشاكل واحراجات كثيرة فحياتي
جاتلي فترة كنت اتعالج عند الاستشارات العائلية بس ماحسيت باي تحسن
فاي حد يقدر يساعدني ويدلني على دكتور متخصص بعلاج هالحالات

ويعطيكم العافية :shy:

[بوخالد88]

ان شاء الله الاخوان ولاخوات ماراح يقصرون وياج

والله يشافيج ويعافيج وان شاء الله سهلة

اذا الله عطانا عمر وياج لين بكرة راح اعطيج اسم دكتور

بالتوووووفيق

[المخفي]

قرأت مرة انه تلاوة القرآن تساعد في العلاج

[Dawn]

انا كان عندي طالبات وطلاب عندهم هالمشكله ولكن لما كانوا يقرأون القرآن اراهم لا يتأتؤون ابدا ،،، استغربت من هالشي صراحه ... وفيه منهم خفت عندهم التأتأة بشكل ملحوظ مع اهتمامهم بالمشاركة في مسابقة حفظ القرآن ... فاعتقد ان قراءة القرآن سبب لتحسن حالتهم والله أعلم ...

ما تشوف شر ان شا الله ... وعليك بتجربة حفظ اجزاء من القرآن ...

[بوسلمان 2010]

الله يشفيك ويعافيك ويشفي مرض المسلمين يارب

[مشتاقة لقطر]

الله ييسر امورك وابحث بالنت وان شالله تلقى الحل

انا ولدي كان السين والشين والجيم والذال او القاف كلللش خربوطة كلامه وبالتدريب امي تركز له على كل كلمه وباللعب تعدلت مناطقه كاملة تبارك الله

[the_end]

بوخالد88
مشكور اخوي ماقصرت
في انتظار اسم الدكتور ...

المخفي - dawn
مشكورين اخواني وماقصرتوا
بالفعل انا لمن اقرا القران بالتجويد الحمدلله ما اتاتا واحس بطلاقة
بس مشكلتي فالمحادثات خصوصا اذا كانت مع اغراب
وانا على ابواب تخرج واحاتي هالناحية في الوظيفة

[the_end]

بوسلمان
مشكور اخوي عالدعوة الطيبة ويعطيك العافية

مشتاقة لقطر
مشكورة اختي عالرد انا مشكلتي فبداية الكلام احس الكلمة تغص وماتطلع مني
فاحس الدكتور ممكن يساعدني ويوجهني فكيفية الكلام

وعلى فكرة انا بنت مب ولد -_-

[الجسراوي]

روح حق الشيخ عقل في سوق واقف واساله ان شاء الله بتحصل عنده استشاره حلوه وربي يوفقك ويشافيك والقران له دور كبير وفرصتك حجه وحاجه ورمضان قرب

[بودحوم]

بوخالد88
مشكور اخوي ماقصرت
في انتظار اسم الدكتور ...

المخفي - dawn
مشكورين اخواني وماقصرتوا
بالفعل انا لمن اقرا القران بالتجويد الحمدلله ما اتاتا واحس بطلاقة
بس مشكلتي فالمحادثات خصوصا اذا كانت مع اغراب
وانا على ابواب تخرج واحاتي هالناحية في الوظيفة

اول شي ياخوي ألله يوفقك أن شاء الله وتتخرج وتتوظف بالوظيفة اللي أنت تبيها

ثاني شي أتمنى انك ماتنحرج بسبب التأتأة . وأن لا يحول الأحراج بينك وبين اهدافك وطموحاتك اللي أنت مخطط لها . بل على العكس تماماً .

ومثل ماذكروا الأخوان ان قراءة القرآن تساعد على التخلص منها
ولا تنسى أن لك أجران وليس اجر واحد لتلاوتك القرآن
يعني أجر عظيم وعلاج في نفس الوقت .. ( كم انت كريم يا رب )

ولا عندي لك سوى الدعاء بالتخلص من التأتأة التي لا أراها مشكله كبيرة
وأن يوفقك الله ويسهل دروبك ان شاء الله

[FCB 123]

ماتشوفون شر .... والقران خير معالج

[Web-Master]

التاتأة حالة دارجة بكثرة هالايام . وهي تختلف من شخص إلى آخر .. وانا اعرف الكثير من الاشخصا اللي كانوا يتأتأون لكن مع الزمن سبحان الله صرت اشوفهم يتحدثون بطلاقة احسن من غيرهم.
دائما يكون العلاج عن الشخص نفسه
أهم شي الثقة بالنفس .. وهناك أطباء متخصصين في هذا المجال
اسال الله لكي الشفاء

[شيط ويط]

تفضل العلاج واالله يشفيك

http://www.safeshare.tv/w/CVOmHEoVjJ

[رجل الجزيرة]

نعم فيه أخصائيين وأخصائيات بالنطق في مستشفى الرميلة بس لازم تحويل من الطبيب المعالج.

[روح الاطلس]

سمعت في برنامج من دكتور في الطب البديل ان فيه طريقة فعاله لعلاج هالمشكلة

وهي وضع حجر فيروز تحت اللسان

[the_end]

الجسراوي
مشكور اخوي ماقصرت
بس انا حبيت اتعالج عند دكتور نطق لانه بيكون ادرى بحالتي وبالي انا محتاجته
وانا جربت الاستشارات العائلية وماشفت النتيجة المرضية لانهم مب متخصصين لعلاج مثل هالحالات


بودحوم
مشكور اخوي عالرد وعالدعوة الطيبة
الحمدلله انا احاول كثر مااقدر اني مااعتبرها مشكلة
بس انا خايفة من الوظيفة والتعامل مع الموظفين والعملاء اخاف انها تسببلي عائق
وخصوصا اني فمواقف معينة ينربط لساني ومااقدر اتكلم نهائيا

FCB 123 - web-master
مشكورين عالرد اخواني وماقصرتوا

شيط ويط
مشكور اخوي عالرابط
انا شفت الفيديو من فترة وفعلا الكلام صحيح لمن اتكلم مع احد بنفس الوقت
او اتكلم بمكان فيه ازعاج تخف التاتاة بشكل كبير
بس هذي تقنية مااقدر استعملها بكل وقت يعني في مواقف معينة مثل اذا طلب مني تقديم برزنتيشن
فاتوتر بشكل كبير وهالتوتر يزيد من التاتاة عندي ويصير صعب على اني اخذ نفس وابدا الكلام بشكل سلس


رجل الجزيرة
مشكور اخوي بس وين اقدر احول لرميلة

[the_end]

سمعت في برنامج من دكتور في الطب البديل ان فيه طريقة فعاله لعلاج هالمشكلة

وهي وضع حجر فيروز تحت اللسان

انا سمعت عن وضع الحجر تحت اللسان بس مافهمت الطريقة
بس انا افضل انه العلاج يكون تحت اشراف طبيب مختص
لانه التدريبات اذا كانت بطريقة خاطئه ممكن انها تضر بالحنجرة

مشكور اخوي عالرد

[Right]

ما تشوف شر ... والله يشفيك بإذنه تعالى

[رجل الجزيرة]

الجسراوي
مشكور اخوي ماقصرت
بس انا حبيت اتعالج عند دكتور نطق لانه بيكون ادرى بحالتي وبالي انا محتاجته
وانا جربت الاستشارات العائلية وماشفت النتيجة المرضية لانهم مب متخصصين لعلاج مثل هالحالات


بودحوم
مشكور اخوي عالرد وعالدعوة الطيبة
الحمدلله انا احاول كثر مااقدر اني مااعتبرها مشكلة
بس انا خايفة من الوظيفة والتعامل مع الموظفين والعملاء اخاف انها تسببلي عائق
وخصوصا اني فمواقف معينة ينربط لساني ومااقدر اتكلم نهائيا

FCB 123 - web-master
مشكورين عالرد اخواني وماقصرتوا

شيط ويط
مشكور اخوي عالرابط
انا شفت الفيديو من فترة وفعلا الكلام صحيح لمن اتكلم مع احد بنفس الوقت
او اتكلم بمكان فيه ازعاج تخف التاتاة بشكل كبير
بس هذي تقنية مااقدر استعملها بكل وقت يعني في مواقف معينة مثل اذا طلب مني تقديم برزنتيشن
فاتوتر بشكل كبير وهالتوتر يزيد من التاتاة عندي ويصير صعب على اني اخذ نفس وابدا الكلام بشكل سلس


رجل الجزيرة
مشكور اخوي بس وين اقدر احول لرميلة

من المركز الصحي التابع لكم وإسم القسم

Speech Therapy

وهذا القسم تابع للتأهيل في مستشفى الرميلة.

[بوخالد88]

مرحب اختي والسموحة علي التأخير

اول واحد دكتور طارق في مستشفي رميله

والثاني دكتور الخولي في الصحة

والله يوفقج لج ان شاء الله

بالتووووفيق

[ماجد]

اختي ادخلي هالرابط للدكتور محمد عبد العليم

http://www.islamweb.net/consult/index.php?page=listing&pid=920

الدكتور اخصائي نفساني في مؤسسة حمد

وان شاء الله تستفيدين

[00soma00]

الله يشفيك ويعافيك ويشفي مرض المسلمين

[dremar]

السلام عليكم ورحمة الله وبركاته

اخي العزيز

انا عندي بنت عمرها 7 سنوات جاتها حالة التلعثم في الاربع سنوات وفي مدرستها كان اخصائي نطق وتحسنت والحمد لله ولكن رجعت لها في سن السادسة ورجعنا لأحد الاختصاصيين والحمد لله تحسنت كثير

البنت التأتئة عندها متصل بضعف بسيط في عضلة اللسان ولكن مع التدريب على مخارج الحروف ومد بعضها تحسنت .

وشفت حالة عندة لمريض توحد الام ظاهره تبكي والوالد فرحان يوم سألت الدكتور اجاب بأنه الولد نطق كلمة نسيتها والله .

المراد ، اخصائي النطق افاد البنت وانا الصراحه استفدت من طريقة اخراج بعض الحروف

ارجوا اني افدتك

[بنت قطريههه]

لازم يكون عندك شخص مقرب تتكلم معه كثير انا اعرف ناس تزوجو والحمدالله مابين هالشي فيهم لانها مهاره شد عضلات مع الوقت تختفي باذن الله ترى مافي شي مستحيل وانصح بالتمر التمر مفيد كثير

[بنت قطريههه]

السلام عليكم ورحمة الله وبركاته


وعندي طريقة معروفة عندنا

:

يُحمس البن ويكون ثقيل شويه أثقل من الحمس العادي - مثل قهوة جداتنا

زمان لما يحمسونها في البيت -

وتُعمل القهوة بالطريقة المعروفة والهيل يكون قليل و ممكن تناول التمر

وتُشرب في الصباح


وبالشفاء

[بن موسى]

عليك بطب الاولين
يمدحون الفار المشوي
كانوا الاولين اذا تسبب لهم احد بالازعاج بكثرة الكلام يقولون لة ( عز الله ما تحتاج يشوى لك الفار )

[تغلبية]

سلامتج أختي وماتشوفين شر ..

تعايشي مع المشكلة الى حين التغلب عليها إن شاءالله .. لان التأتأه إما سبب يكون عضوي في عضلة اللسان .. أو نفسي .. كالتعرض لموقف مخيف في الصغر يعرض الانسان للتأتأه ..
الثقة بالنفس والتدريب مع شخص ترتاحين له وتتكلمين معاه بأريحية له عامل كبير في التغلب على المشكلة.

أكثري من دعاء سيدنا موسى عليه السلام حيث كان يدعو به وهو مصاب بالتأتأه وهو امتحان كبير من رب العالمين لسيدنا موسى

"ربِ اشرح لي صدري ويسر لي أمري واحلل عقدة من لساني يفقهوا قولي"

[the_end]

snyder
مشكور اخوي عالدعوة الطيبة

رجل الجزيرة
مشكور اخوي وبحاول اراجعهم باقرب فرصة

بوخالد 88
مشكور اخوي تسلم فميزان حسناتك انشالله

ماجد
مشكور اخوي بحاول اقرا النصايح الموجوده فيه وانشالله اقدر استفيد منها

soma
مشكورة اختي عالدعوة الطيبة

dremar
الله يشفي بنتكم انشالله بس ممكن اسم الدكتور الي تعالجتوا عنده

بنت قطر
مشكورة حبيبتي انا احاول قد مااقدر اني اخالط الناس والحمدلله نفسيا تحسنت كثير
بس المشكلة فمخارج بعض الحروف احصل صعوبة فنطقها فاحس الدكتور ممكن يساعدني بطريقة النطق الصحيحة

بن موسى
لاتعليق

تغلبية
مشكورة اختي الحمدلله انا مستمرة عالدعاء وانشالله يارب القى حل لمشكلتي

[Qatari]

السلام عليكم

هذي المشكله ليس لها علاقة باللسان نهائيا ...هي مشكلة متعلقة بالتنفس وقت النطق او اطلاق بعض الحروف

انصحك بمستشفى رميله والمتابعه معاهم والتحويل مثل ماقال اخوي رجل الجزيره عن طريق المستوصف الصحي

اهتمي بالمواعيد والمتابعه وبتكون امورك طيبه :ok2:

والاخصائيين ماراح يقصرون معاج

انا عندي ناس اعرفهم يتعالجون عندهم والحمدالله تحسنت حالتهم كثير كثير بفضل من ربي وبمساعدتهم

[the_end]

Qatari
مشكور اخوي جزاك الله خير
انا من خلال اطلاعي وقراءاتي في هالموضوع فعلا المشكلة غالبا تكون في التنفس
والتاتاة تصير اذا ماكان فيه تنظيم بين التنفس والبدا بالكلام
فيه تمارين بالنت بس انا افضل انه يكون باشراف طبيب مختص

رجل الجزيرة
ماقدرت ارد عليك عالخاص لانه مشاركاتي ماتسمح
مشكور اخوي وفميزان حسناتك انشالله


وانشالله ماراح انسى كل واحد رد علي بالدعاء
جزاكم الله خير

[رجل الجزيرة]

qatari
مشكور اخوي جزاك الله خير
انا من خلال اطلاعي وقراءاتي في هالموضوع فعلا المشكلة غالبا تكون في التنفس
والتاتاة تصير اذا ماكان فيه تنظيم بين التنفس والبدا بالكلام
فيه تمارين بالنت بس انا افضل انه يكون باشراف طبيب مختص

رجل الجزيرة
ماقدرت ارد عليك عالخاص لانه مشاركاتي ماتسمح
مشكور اخوي وفميزان حسناتك انشالله


وانشالله ماراح انسى كل واحد رد علي بالدعاء
جزاكم الله خير

اللهم آمين وجزاك الله خير وبغيت شيء فأنا حاضر.

[the_end]

مشكوراخوي وماقصرت فميزان حسناتك انشالله