الإطارات.. السبب الرئيسي في انقلاب السيارات

[غزلان]

أكدت إدارة المرور أن انفجار الإطارات السبب الرئيسي في انقلاب السيارات.

وشدد مدير الإدارة العميد محمد سعد الخرجي على ضرورة اتباع إرشادات السلامة المرورية والتحقق من سلامة المركبة قبل قيادتها واتباع إرشادات سلامة الإطارات، خصوصاً خلال فصل الصيف والالتزام بالسرعات المحددة على الطريق، مشيراً إلى أن كثيراً من الحوادث المرورية الكبيرة التي تؤدي إلى انقلاب السيارة تنجم عن انفجار الإطارات، لذلك يجب على قائدي السيارات الاعتناء بها وحسن استخدامها.

وأشار إلى أن فصل الصيف تختلف القيادة فيه عن فصل الشتاء لأن مشاكل المركبات تتزايد في هذا الفصل، الأمر الذي يتطلب من كل سائقي المركبات أخذ الحيطة والحذر واتباع إجراءات السلامة، خصوصاً ما يتعلق منها بإطارات السيارة.

وأشار إديمولاج إيلوري، الخبير بإدارة المرور، إلى أن الإطارات المستهلكة تفقد الثبات سريعا عند القيادة على الأسطح المبللة.








http://www.al-watan.com/viewnews.aspx?n=29A79496-085F-4146-9B73-C8F9F3AF90BC&d=20110723

[na7ees]

شي اكيد ومفهوم ولكل عارفه
والله يعينه كم بترتفع اسعار التواير بعد هالتصريح هههههههه

بخصوص الخبير مشالله عليه اكتشف الذره اعتقد هالمعلومة مايبيلها خبير اجنبي عيونه خضر وشعره اشقر
تراني اتغشمر
الله يحفظ المسلمين. شكرا على النقل

[رُفق المجنّا]

في الولاية اللي أنا فيها

لا توجد مخالفة ع استخدام الهاتف أثناء القيادة .. ولا كاميرات في كل 100 متر .. ولا ع البيلون .. ولا رادار عند برج برزان والتحريّات مسوي نفسه مبنشر :)

ومعى ذلك ملتزمين بالقواعد المروريّة يا الخرجي .. ممكن تفسّر لي أنت والخبير هذا الشئ ؟

[بوطويشم]

السلام عليكم

لين الحين ويعتبرون الشعب متخلف

يعني جابو شي جديد

و لا حب ظهور اعلامي

على العموم مشكورة على الموضوع

[ROSE]

صادق والله

احنا الحريم شعرفنا في هالسوالف


ذاك اليوم انفجر عندي الاطار الخلفي للسيارة وانا بسرعه 120 ع الخط السريع بين ابوظبي ودبي

جان امسك بريك وتلف فيني السيارة ماوعيت بنفسي الا داعمه العمود اللي ع الصوب الثاني من الشارع يعني السيارة لفت من اليسار ووقفت ع اليمين والحمدلله ربي ستر ان كان فيه عمود مسك السيارة ومافيه سيارات مسرعه وراي كان رحت فيها :secret:


بعدين قالوا لي ليش مسكتي بريك كان المفروض تخلين السيارة توقف بنفسها


وانا شعرفني زين :( بعد ماطاح الفاس بالراس تقولون لي



وهذي رسالة مني يابنات ،، شيكوا التواير وغيروها لا تهملون


وثاني شي لو حد لا سمح الله انفجر الاطار عنده لاتمسكون بريك شيلوا ريولكم عن الريس

ولما تخف سرعة السيارة مسكوا يمين ووقفوا :shy:


شكرا غزلان

[تحداني]

^
^
اتصدقين يا روز وبقيه الاخوان والاخوات
مع الايام وسنوات السواقه الطويله غصبا عني تعلمت امور كثيره في السياره
صح اني ما اسويها واخواني الله يحفظهم والوالد ما امقصرين بس اكثر شي تعبني في السيارات الألمانيه توايرهم

ليش ؟؟
اول شي ابسرعه تخترب عندي بالرغم اني اشتريها من الوكاله
امشي في شارع كله حصى ما اوعه الا التاير ملتهب ومنفوخ :)
واسعارها جدا جدا مكلفه كل تاير اغيره يكلفني 1400 اريال هالكلام قبل كمن شهر ما اعرف عنهم الحين


فالتواير تعتبر صمام امام للسياره ان كانت ذا جوده عاليه
واهمالها تسبب خطوره كبيره

الله يحفظج يارب وديري بالج على عمري
مع العلم الخطوط السريعه في الامارات خياليه وجميله ومرتبه
ومحظوظين فيها ما شاء الله


جملك الله برضاه

[بلوتنيوم]

العنوان يقول الاطارات السبب
والموضوع يقول انفجار الاطارات السبب
والمعنى اهمال فحص الاطارات هو السبب
والزبدة كل واحد يهتم باطاراته لانه سلامة اطارات سيارته
من سلامته الشخصية :)

[غزلان]

شكرا لكم على التعليق


000

الحمد لله على سلامتج روز ربج لطف




بعض انواع السيارات فيها تنبيه اذا التاير مبنشر وهالشي وايد زين لكن المصيبه الى مافيها هالخاصيه قليل من الى يسوقون عندهم خبره بسوالف التواير خاصه النساء وبعض الشباب الى توهم يسوقون

وانا مره روز كنا طالعين بالسياره شوي الا تظهر رساله بالشاشه ان التاير بنشر وقف السواق الا يشوف التاير ربنا ستر ولا كان رحنا فيها زين ان بيتنا كان قريب تم يمشي بالعدال ومشغل التنبيه للسيارات اينبهم ان سيارتنا فيها اصابه :p ورجعنا البيت

[قطر دزاين]

اكيد بتكون سبب الحوادث

لو ركبت اطارات صينيه او تيوانيه او تيلنديه او غيرها من الغير اصليه

ركب اصلي وشوف كيف يعيش الاطار عندك

[BoFahed]

اكيد بتكون سبب الحوادث

لو ركبت اطارات صينيه او تيوانيه او تيلنديه او غيرها من الغير اصليه

ركب اصلي وشوف كيف يعيش الاطار عندك

صادق اخوي الواحد يزود كم الف تحميه من مصايب(بعد الله ) لا تتعوض بفلوس الدنيا الواحد لازم ياخذ بالاسباب هذا اللي علمنا دينا

[MAZEN37]

اكيد بتكون سبب الحوادث

لو ركبت اطارات صينيه او تيوانيه او تيلنديه او غيرها من الغير اصليه

ركب اصلي وشوف كيف يعيش الاطار عندك

كلامك صحيح
الا الاطارات ادور احسن ماركه وبلد
ركب مره وانسى 3 سنين ولا يصيدهم شي
وكل سنه اغير اماكنهم جدام وورا على حرف اكس

[قــ502ـطرالعز]

يقولك الفاضي يعمل قاضي وانتو افهموها عاد ههههههههههههههههه قال ايش سواقه الشتاء غير الصيف حسسني انه جاب الاسد من ذيله ... الله المستعان بس

[ذيب ازغوى]

هههههههه يه يه حتى الخوات العضوات اصواتهم ملعلعه في الموضوعه مشاء الله الحريم ماخلو شي حق الريايل

[BoFahed]

هههههههه يه يه حتى الخوات العضوات اصواتهم ملعلعه في الموضوعه مشاء الله الحريم ماخلو شي حق الريايل

ليش لا صار مثلنا يعرفون في البوالين والمياجر وبعضهم يقبض خطوط للشغل يوميا واللي توصل عيالها واللي طول اليوم في الموتر لازم يعرفون :nice::nice:

[aljaber1]

الله يحفظ الجميع والاطارات ليست وحدها سبب رئيسي
حتى الشوارع الي تفتقد الجودة والمقاييس سبب رئيسي
لانواع الحوادث

[Class - Qtr]

حل هالموضوع بسيط ’’

درجه الحرارة خارج السيارة تصل الي 50 درجه في هالوقت , طبيعي الحرارة

في الارض بحكم المواد الموجودة على القار اضعاف درجه هالحرارة ,

يعني المطلوب من السائقين المحترمين والاخوات السائقات يعودون نفسهم

في الصيف السرعه ماتعدي 100 وللضرورة بعد , والله يستر على الكل

[غزلان]

جزاكم الله خير على النصائح

فعلا درجة الحراره ماتصلح للسرعه والله يحفظ الجميع

[20qatar22]

[quote=غزلان;7461526]






وأشار إديمولاج إيلوري، الخبير بإدارة المرور، إلى أن الإطارات المستهلكة تفقد الثبات سريعا عند القيادة على الأسطح المبللة.






سبحان الله ..
براءة اختراع تسجل للسيد إديمولاج إيلوري ..!!!!!!!!!!!!!!
ومن متى عندنا اسطح مبلله ..!؟

[boamir]

اما هالخبير حسسني إنه إكتشف شي جديد

انا اقول لو بدل هالخبر حاطين شوية تعلميات يوعون ويثقفون العالم ابرك لهم

يعني مثلا الهوا لازم الواحد مايعبيه وايد بالصيف يعني افضل شي يخليه 35 - 40

وبالنسبه لأختنا روز اقولها الحمد لله على سلامتج
وزين إنه ماكان التاير إلي جدام لأنه كان ممكن تنقلب السياره

ودايما اي واحد يبنجر عليه وهو يمشي لازم يهد الريس ومايمسك بريك لين ماتوقف السياره بنفسها
وإذا التاير بنجر بس ماإنفجر والواحد ماحس فيه بيسمع صوت ونه قوويه<<صارت معااي ولازم يوقف شووي شووي

والله يحفظنا ويااكم من مخاطر الإطارات إلي قال عنها الخبير !

[Qatarianes]

يعني يبون يفهمونا انه البوالين سبب الحوادث
على اساس انه كل حوادث قطر او 70% منها لاندكروزر مركب بالون
(شوفو الاجانب وحوادثهم وعقب تكلمو)
يبون يرونك انه المياجر امان والله انه كله نفس الشي انا مركب بوالين واشوف بالعكس الموتر اريح ياخي لا شليتو المطبات الي مال امها داعي بنرجع الميجر
وبعدين الناس الهاي( عرفتو قصدي) اصحاب المقناص بينطبق عليهم القانون؟ ولا نفس نظام العازل والمخفي ناس وناس

[الـخـالـدي]

يعطيج العافيه اختي غزلان على الموضوع

وجزاك الله خير يالخرجي على التنبيه

هذا الموضوع في كل وقت لازم الواحد ينتبه عليه مب فالصيف بس حتى فالشتاء

لأن التواير لو كانت تعبانه فالشتا .. تخلي السياره تزلق و تسبب بحادث لا سمح الله وكثير صارت

الله يحفظنا ويحفظ امة المسلمين اجمعين

[بوسلمان 2010]

لا تعليق

[تحداني]

هههههههه يه يه حتى الخوات العضوات اصواتهم ملعلعه في الموضوعه مشاء الله الحريم ماخلو شي حق الريايل




صوتنا وايد واطي ونحترم ارائكم ومداخلاتكم ونتعلم منها
وهالاشياء اعتبرها من اساسيات قياده السياره
لو ما تعلمنها بنموت ناقصين عمر .. والبركه في ارشاداتكم وما نستغنى عنها


الله يرضى عليك ويجملك برضاه

[Qatarianes]

[quote=غزلان;7461526]






وأشار إديمولاج إيلوري، الخبير بإدارة المرور، إلى أن الإطارات المستهلكة تفقد الثبات سريعا عند القيادة على الأسطح المبللة.




سبحان الله ..
براءة اختراع تسجل للسيد إديمولاج إيلوري ..!!!!!!!!!!!!!!
ومن متى عندنا اسطح مبلله ..!؟

الظاهر
مستر اديمولاج ايوري دوغلاس قريقوري هذي خذى له شهادة تقدير وعلاوه ع هالاكتشاف العظيم ههههههههههههههههههههههههه

[Qatarianes]

اكيد بتكون سبب الحوادث

لو ركبت اطارات صينيه او تيوانيه او تيلنديه او غيرها من الغير اصليه

ركب اصلي وشوف كيف يعيش الاطار عندك

البالون الاصلي تايواني فديت خشمك:secret:
الصيني الي تقليد :rolleyes2:

[مهل]

اعتقد ان الخرجي صار له فتره مابين و قال خل اسويلي جو شوي

صارت سالفه التواير هذي .. قواه الله

[كازانوفا]

العنوان يقول الاطارات السبب
والموضوع يقول انفجار الاطارات السبب
والمعنى اهمال فحص الاطارات هو السبب
والزبدة كل واحد يهتم باطاراته لانه سلامة اطارات سيارته
من سلامته الشخصية :)



تعددت الاسباب والهدف واحد


والله اني صرت اخاف لاني مجنونه سرعه :rolleyes2:

[حسن]

السبب الرئيسى للحوادث السرعه الزايده ومن ثم قله الانتباه وبعدين التواير