حد جرب يسوي مخطط البيت في السعودية؟

[مواقف النجادة]

السلام عليكم..

نظراً للارتفاع الصاروخي في اسعار المكاتب الهندسية .. و صرنا نسمع عن اسعار مثل 40 الف وخمسين الف .. انا شخصياً اعرف واحد من الربع مسوي مخطط بيته بـ 70 الف ريال .. لا والتصميم يوم رحت شفته ..طلع عادي ولا فيه شيْ يبرر هالسعر!

الزبدة ..
افكر اصمم بيتي في السعودية .. ولكن احاتي اختلاف معايير البناء عندنا وعندهم .. حد جرب يسوي هالشي؟ .. وهل صادفته اي مشاكل ؟

[[vip]]

الي اخبره أغلى سعر هو 11 الف

وفي مكاتب تسوي المخططات على 5000 ريال


اما بالنسبه اذا سويته برا بترد تختمه عند مكتب استشاري بمبلغ وقدره عشان يعتمد لك في قطر

[The_Be$t]

اعتقد شروط البناء تختلف من دولة الى دولة

انصحك تسويه في الدوحه

[فريج النجادة]

أخوي الكريم لا تستهين في سعر خريطة البيت

هل تعلم كم مهندس يحتاج بيتك يشرف على الخريطة

1- مهندس معماري

2- مهندس أنشائي ( للحديد)

3- مهندس كهربائي

4- مهندس ديكور

5- مهندس للحديقة

لا تستهين في سعر الخريطة فهي اساس البيت

في السعودية وصل سعر خريطة البيت على 90 الف

ليش ؟ فيها كل ما يخطر على بالك

وليس سلق بيض مثل ربعنا

[ورقــة أمــل]

شدعوه

في مكاتب وايد في قطر ما ياخذون هالاسعار اللي انت ذاكرها

احنا مسوين خريطة بيتنا ب 12 الف وفي مكاتب اقل وفي مكاتب اكثر بس 70 الف

[aljaber1]

معقول 70,000 خريطة البيت !!!!
انا مسويها عند مكتب 13,000 ريال

[almaf1a]

مكاتب الدوحه مش حالك الصراحه
يسويلك الخريطه من خريطه سابقه حق واحد
ويوديها للخدمات وعلى كيفه ومايتصلك علشان تقعد تحدد نقاط الكهرباء ومكان الدرام
وكل شوي تقعد وراه تغيير ويقولك ادفع

افشل مكاتب للخرايط في الشرق الاوسط مكاتب قطر

[فريج النجادة]

مكاتب الدوحه مش حالك الصراحه
يسويلك الخريطه من خريطه سابقه حق واحد
ويوديها للخدمات وعلى كيفه ومايتصلك علشان تقعد تحدد نقاط الكهرباء ومكان الدرام
وكل شوي تقعد وراه تغيير ويقولك ادفع

افشل مكاتب للخرايط في الشرق الاوسط مكاتب قطر
مع الاسف كلامك صحيح

[badarameen]

ان مسوي خريطة البيت بـ 20 الف صج غالي
بس ما خلاء شي ما حطة بالضبط حتي توصيلات الماي والكهرباء والتلفون ووين مكانها بالضبط
وكم متر احتاج
واي واحد اشتغل عندي كان يقول كل شي موجود عندك في الخريطة

هالشكل في مكاتب تكون غالية لانهم يحاولون ما ينسون اي شي في البيت

[captin]

ما ينفع تسوي خرايط في السعودية لأن التخطيط العمراني
يعتمد فقط مكاتب هندسية مرخصة في قطر لعمل تصاميم

والتصميم ليس فقط تصميم معماري بل هناك مخططات أنشائية
تشمل الأسقف والاعمدة والجسور
ومخططات خدمات الكهرباء والماء والصرف الصحي والهواتف وغيرها
من مخططات

ممكن تجيب تصميم معماري من السعودية اذا عاجبك شي وتخلي مكتب
تصميم في الدوحة يسوي لك مثله
لكن لازم تمر بجميع مراحل التصميم والتراخيص في التخطيط العمراني من خلال مكتب مرخص


أترك الرخيص جدا واترك الغالي جدا

عليك بالوسط
من 15 إلى 20 ألف بتسوي أحسن مخطط
في مكتب هندسي مصنف.

[مواقف النجادة]

مشكورين يالربع على الردود الكريمة .. واحد واحد كلن بإسمه ..

بارك الله فيكم وما قصرتوا

الله يعيني و اياكم على مكاتبنا .. خلاص بسوي في الدوحة..

ترى سالفة الـ70 الف صج.. و صارت حق واحد من الربع ..قالوا له بنصمم لك الفيلا تصميم كامل شامل الديكورات ..ونسويلك عرض 3d مع الديكور و بنحطه لك في CD.. والاخ غشيم مايدري على باله شيء يسوى و عطاهم المبلغ !
و في النهاية سوو له فيلا عادية ما فيها اي شيء زود عن الفلل العادية!