توني راد من الامارات

[مرحوم قطر]

السلام عليكم و رحمة الله و بركاته


حبت اطرح عليكم موضوع عن سفرتي الامارات


يالربع طلع كلام البلاك بيري صحيح هلمره


موظفين الفندق على التكاسي على العاملين في المحلات كل اجنبي يدري اني قطري

يحاول يظبط معاي و و يمدح نفسه على امل ان ممكن اطلع له فيزا يجي قطر




من فتره وصل برودكاست في البلاك بيري و حطو في الجرايد ان الامارات قامت تفنش الاجانب

و تطردهم في الامارات و فعلاً فنشة عدد كبير


و اهل قطر كنه الي كانو يفاولون عن نفسهم يقولون في البلاك بيري فنشوهم اكيد بيبونهم قطر


حتى اهني في المنتدى نفس الشي

و يوم رحت اهنك تفجأت ان فعلا الكل يطلب فيز و يقولون بنجي على قطر و الي يقولي مقدم

على وظيفه عن طريق النت

و الحمالي مال الشنط يقولي الكل يقدم استقالته قبل لا يفنشونه و كلهم يروحون قطر

و المستقبل و الفلوس الحين في قطر و دبي ما عاد منها فايده :omg:



و خبركم اهني ربعنا حمالي الشنط ممكن يسونه رئيس قسم الامن في فنادق قطر ماعندهم مشكله

:tease:


الله يستر من الجاي و الظاهر في موجة اسويين على اثيوبيين على فلبن على افارقه


مطرشين حق اهاليهم بودكاست الدوحه درب السلامه :omen2:



الزحمه في دبي خفة وايد عن قبل انا اخر مره رحت دبي و قعدت فيها 2006

كانة الزحمه خياليه الحين اطلع من الفندق في الشارقه و اوصل لين امارات مول في اقل من نص ساعه


و الي شفته ان نقدر نقول نص الموجودين في الامارات سعوديين


الفنادق ارخصة وايد انا حجزت عن طريق الانترنت كانت وايد رخيصه عن قبل وايد



اللهم المستعان و ان شاء الله يستر من الجاي ترى الاجانب الي عندنا وايد مب ناقصين زود

[MAZEN37]

اغلب الشركات العالميه والمحليه مقرها دبي يخططون لفتح فرووع بقطر
وانشاء اعمال لهم وهالكلام من واقع تجربه معاي وفي وايد فتحوا
قطر حاليا مطمع للعديد بحكم الاقتصاد القوي والحمدلله

[فيصـــل]

الله يستر من الجاي ويحفظ بلادنا

هالعماله الاسيويه والاجانيب بيعفسون البلاد

قبل ماكنا نسمع عن حالات سرقة مثل الحين .. الله المستعان

والحمدلله عالسلامه

[بطل الفريج]

مافي زحمة علشان الحين صيف الاجانب مسافرين نفس اللي عندنا في الدوحة.

[FCB 123]

الله يستر من إلي جاي

[كازانوفا]

الحين احنا موسم صيف يعني الكل مسافر لاهله
لا تحكم ان البلد هناك صارت فاضيه عشانهم تفنشووو
يعني لا تفتى من نفسك ...

الله يستر بس

[مرحوم قطر]

الحين احنا موسم صيف يعني الكل مسافر لاهله
لا تحكم ان البلد هناك صارت فاضيه عشانهم تفنشووو
يعني لا تفتى من نفسك ...

الله يستر بس

هلا اخوي

انا ما افتي من نفسي

و الموضوع مب موضوع الزحمه انا ضفت هلشي كاضافه


اما موضوع التفنيش انت شكلك ما قريت الموضوع كامل

لان حاطين في الجريده مب بس كلام فاضي

و كاتبين في الجرايد ان الامارات تستغني عن موظفينها الاجانب

و سمو هذا الشي ( امرته )


فا الكل كان يتكلم كامزح ان الحين بيجون قطر


و لما رحت اهناك شفت ان فعلا الكل يتكلم انه يبغون يجون قطر و مظبطين امورهم


يعني بالعربي في عماله في الامارات قاعده تلم شناطها و جايه الدوحه

و في ناس اذا يشوفون قطريين يكلمونهم عن الفيز مثل ما صار معاي



فا انا ما افتي من عندي ولا اطلع من مخي انا اتكلم ابواقع شفته مب فتوه من المخ

:)

[جاسم القطري]

الله يستر علينا

[Frosty]

الله يعين... والله والي لهم عين...

[Emarati]

القرار نفذته أبوظبي قبل دبي

أحلى خطوة من الحكومة تقليل عددهم ، اللي مامنه فايدة ماله لزمة بصراحه

بخصوص الزحمة مسافرين اجازة :)

[مضاربه]

الناس للاامام واحنا للخلف في الكويت بعد ماجربوا الاختلاط في المدارس شافو انه فاشل بدوا يفصلون الطلاب عن بعض وفي الامارات بعد ماشافو الاجانب يكثرون شافو ان اهل البلد اولى واحنا امعه يالسين نقلد طيب ليش مانستفيد من تجارب غيرنا شالفايده من كثره الاجانب الا انتشار الامراض والزحمه وعدم الامان

[كازانوفا]

هلا اخوي

انا ما افتي من نفسي

و الموضوع مب موضوع الزحمه انا ضفت هلشي كاضافه


اما موضوع التفنيش انت شكلك ما قريت الموضوع كامل

لان حاطين في الجريده مب بس كلام فاضي

و كاتبين في الجرايد ان الامارات تستغني عن موظفينها الاجانب

و سمو هذا الشي ( امرته )


فا الكل كان يتكلم كامزح ان الحين بيجون قطر


و لما رحت اهناك شفت ان فعلا الكل يتكلم انه يبغون يجون قطر و مظبطين امورهم


يعني بالعربي في عماله في الامارات قاعده تلم شناطها و جايه الدوحه

و في ناس اذا يشوفون قطريين يكلمونهم عن الفيز مثل ما صار معاي



فا انا ما افتي من عندي ولا اطلع من مخي انا اتكلم ابواقع شفته مب فتوه من المخ

:)



للاسف اني قريت الموضوع كله
لو اني مش قريته كله كنت قلتلك معاك حق

وزين ما طلعت مفتي

اختك كازااا:)

[بوسلمان 2010]

الله يرحمنا برحمته الحين مافي اشغال حق القطرين وعقب مايغزونا مصاصين الدماء الحال وين بيوصل


سترك ورضاك يارب الله المستعان

[mohd89]

هذا الكلام مش عند الهنود بس.
كل الاجانب الحين موجهين الانظار للدوحه بدل دبي
انا ادرس في استراليا وكثير يقولون بنروح قطر منهم اجانب ومنهم عرب حاملين جنسيات استراليه
يقولون اول ما نخلص دراسه بنروح نشتغل في قطر
كأس العالم لفت الانظار لقطر وهذا شي طبيعي

[محمد]

الي يسمعكم يقول تعال وخذ فيزه هندي ولا مصري بسهوله :)

الفيز اغلبها موقفينها !!

[مرحوم قطر]

الي يسمعكم يقول تعال وخذ فيزه هندي ولا مصري بسهوله :)

الفيز اغلبها موقفينها !!



هلا اخوي

المشكله الحين مب بس هندي و مصري جنسيات وايد


بعدين المصريين فاتحين عادي ماعليك من الكلام

و الهنود اذا دخلت على اللجنه يعطونك عادي الي تطلبه

البنقال يعطونك بصعوبه و البلوش انسى الموضوع


اما العرب الي مايعطونهم السوريين و الاردنيين و الفلسطينيين و اللبنانيين مسكرين عليهم و بقوه



اما باقي الدول عادي

الاثيوبيين الافارقه الاسيويين و الانقليز حدث ولا حرج


مساعه اسولف مع الشباب و بينهم اثنين توهم معوديين من بريطانيه

واحد فيهم يدرس في الجامعه و يشتغل معانه في نفس الوقت

يقول ان اهني في الجامعه دكاتره يقدمون على وضايف في قطر و الكل يطالع قطر

على انها صندوق مبطل و اييون يغرفون فلوس منه :weeping:

[ازغوىAAA]

بصراحه انا اتمنى يسير ماسار لدبي ونرجع على ايام الغوص ابرك والدنيا بسيطه احسن من دنيا معقده والناس تكد ليل نهار ومب موفيه حق عيشتها

[سكرمر]

الله يستر من التضخم وعقبها الانهيار بعد 2022

[كان فيه وخلص]

طيب ممكن أستفسار بسيط ،،

صاحب الموضوع يقول حتى الحمالية في المطار ، والعمال وسواقين التكسي ،

وهل هذي وظائف يعمل فيها أهل البلد؟؟؟ ، حتى لو جائوا لقطر هل هي وظائف يتنافس فيها القطريين مع الأجانب ، ؟؟؟

أشوف الموضوع فيه شوية تهويل ،

وشكرا على الموضوع وتقبل مروري ،،

[clouds]

فعلا انا فلبيني كان يبيع في محل واول مادرى اني من قطر شال لي الاكياس لين السياره يقول لي لو عندكم شركه انا ابي اجي قطر لاني كنت فيها 4 سنين وعقب جيت دبي فكرت مستقبل احسن والحين ابي ارد قطر وانه مقدم ومحد رد عليه ..بس ماعطيته ويه وقلت له لاعندي محلات ولاشركات

وخفت زحمه دبي لان حطو جسور ووسعوا لشوارع لو انتبهتي ان 6 مسارات في الشارع فالسيارات تمشي ومافي زحمه اما بيسوون مثل قطر مسارين واحد مكسر وواحد الناس تمشي فيه وعقب يصلحون واحد ويردون يكسرون الثاني لين نموت ولاخلصو ولاصلحو ونتم على مسار واحد

[الموضوعي]

من باب الفضول قدمت انا وشخص هندي أعرفه على قطر للبترول وشهاداتنا وحده مع فارق ان عندي خبرة وهو ماعنده رفضوني وقبوله ، يعني مدري متى نشوف رجــــــــــــــــــــــــــــال قطري في منصب يصب السمن على يمناه يوظف اهل قطر ويساعدهم اعتقد مافيه لين يموت هالجيل اللي يقدس الاجانب واكثرهم مواليد الخمسينات والستينات والسبعينات وان شاء الله اذا جت الدعوة في مواليد الثمانينات والتسعينات راح تسنع قطر

[العقل الحر]

من باب الفضول قدمت انا وشخص هندي أعرفه على قطر للبترول وشهاداتنا وحده مع فارق ان عندي خبرة وهو ماعنده رفضوني وقبوله ، يعني مدري متى نشوف رجــــــــــــــــــــــــــــال قطري في منصب يصب السمن على يمناه يوظف اهل قطر ويساعدهم اعتقد مافيه لين يموت هالجيل اللي يقدس الاجانب واكثرهم مواليد الخمسينات والستينات والسبعينات وان شاء الله اذا جت الدعوة في مواليد الثمانينات والتسعينات راح تسنع قطر

انا متفائل بهذا الجيل جدا

[مرتبش]

ما ادري
الصراحة رحت دبي بداية الشهر وعمار يادبي الحركة فيها نشطة جدا كالعادة وحتى المجمعات مليانة من القطريين والسعوديين والعمانيين وحتى البحرينين ولاننسى الكويتين وغيرهم من السياح
كل مكان زحمة المطاعم السينمات والشوارع ..الفنادق عمرانه وكله تمام التمام

ولا واحد قالي ابي شغل في قطر ..

فما ادري

[نتفـه]

هاي اللي كان ناقصنا بعد .. كفايه الواحد بالشارع يتلفت مايلقى الا الاجانب ونادر لو نشوف قطريين وهاي بعد يبون يجون؟؟؟؟؟؟؟؟؟؟؟؟؟؟؟؟؟؟؟
كملت ,,

[(بوطلال)]

هناك 300الى400الف عامل ومهندس بيدخلون البلد خلال ال4سنوات القادمه لانهاء استحقاقات كاس العالم من بناء جسور وانفاق وشوارع وملاعب وغيرها .الامر طبيعي لعدم وجود عماله محليه تسد والعمال الموجوده غير كافيه

[بوالبيض]

الله يستر مو بس الي في دبي يبي يجي قطر لا حتي الي في الدول الثانيه خبرك فلوس وكل يوم اعلان قطر الاولي في السياحه والاولي في مادري شنو اااا خ المهم الكل يطمع في قطر ويبي ياخذ نصيبه والي يستر علينا وعلي اهلنا من العماله الخارجيه

[المسك1969]

السلام عليكم

خلو اللي ايي ايي مب هو ياي عشان شغل وبياخذ راتب شنهي المشكله.... ومحد بيدش بدون موافقه من الجوازات فليش حرقة الاعصاب غير انه محد بياخذ رزق احد ...

انا بعد توني راده من الامارات ورحتها لأكثر من اربع مرات هالسنه ومع ذلك محد قال لي ابي اشتغل في قطر ولقيت الكل في شغله...

صحيح قد تكون هناك تفنيشات بس لاحلال الاماراتي مكان الاجنبي وهذا هو الحال هنا في قطر

والزحمة زحمة في كل مكان

جزاكم الله خير

[R 7 A L]

خلهم يجون احسن
اجواء الزحمة حلوة وتبعد الضيقة الى حتى اصلاً مو جاي لها مجال الواحد يزهق او يتضايق وهو يشوف هالناس والعالم :tease:

ويقول المثل ( جنه بليا ناس ماتنداس ):)

[clouds]

بقولكم هالسالفه اللي سمعتها من شوي من عربيه تشتغل في مجال كلللله اجانب تقول مديرها امريكي ومعاشه 200 الف او حولها تقريبا وعنده سكن طبعا في كمباوند والكمابوند مجهز للمداراء والموظفين بدرجات عاليه في هالمكان المهم تقول لو شفتي الملاعب والفلل والنادي ووووو تقول ولو طلبتي برغر يجيج برغر امريكي اصلي اكس لارج حجمه وب10 ريال بس ..تقول شي ولاتحلمين فيه من الفاسلتيز عندهم..المهم تقول وكل ماجوه قطريين مايسمع لهم وساعات يقول لها لاتدخلينهم علي تقول ويتم يشتم في القطريين وفي بلادنا الصحراويه وفي جونا ووووو وان احنا نبي كل شي بالواسطه وغيره من الامور تقول كلمته ووقفته عند حده تقول له انت تنكر ان هالبلد عطتك معاش وعيشه ماتحلم فيها في بلادك؟قالت له انا وانت واحد وانا جيت هني ادور رزقي وماراح القى هالعيشه في بلادي ولا انت وخيرهم عليك وايد
وحلفت لي ان كل واحد يجي يجيب ربعه وبسهوله ومعارفه ويشغلهم
الصراحه انبطت جبدي بس ماقدرت اتكلم لانها مب قطريه بعد ويمكن تتحسس من الموضوع بس يالله شنسوي هاي بلادنا حاطين الاجنبي فوق راسهم حتى هي تقول هني عندكم عقده الانجليزي لو واحد تكلم له كلمتين صار مدير ومسول كبير ولو مايعرف يدبر شي

[إينشتاين]

غريييييبة !!!!

من الي يقول دبي مافيها زحمة ؟؟؟

انا اليوم راجع منها وفي مول دبي ماتقدر تمشي من زحمة الناس وقبل السفر باسبوع أدور شقة غرفتين أو ثلاث مالقيت كل السفريات يقولون الشقق مليااانه وماراح تلاقي وبعد الزور لقيت شقة في آخر الدنيا.

[مرحوم قطر]

طيب ممكن أستفسار بسيط ،،

صاحب الموضوع يقول حتى الحمالية في المطار ، والعمال وسواقين التكسي ،

وهل هذي وظائف يعمل فيها أهل البلد؟؟؟ ، حتى لو جائوا لقطر هل هي وظائف يتنافس فيها القطريين مع الأجانب ، ؟؟؟

أشوف الموضوع فيه شوية تهويل ،

وشكرا على الموضوع وتقبل مروري ،،



هلا اخوي

الموضوع مش موضوع مهول و حنى ما نتنافس على هلوضايف

بس اخوي تعداد قطر الحين 1700,000 نسبة القطريين بينهم يالله نوصل 13%


اذا جو زياده شبنسوي

اهني الموضوع يعني بالعربي الفصيح كفايه اجانب خلاص اكتفينه و امتلينه

ثاني شي اخوي هذولا جايين من الامارات وتعرف ان في الامارات الاجانب شيوخ

و يتكبرون على اهل البلد و ابسبب قانون الامارات صار ماعندهم اي احترام ولا يفتكرون في اهل البلد


عرفت يعني ما يخافون نفس الي عندنا فا اهني بتزيد المشاكل اكثر و اكثر

عرفت الحين

؟.؟

[مرحوم قطر]

فعلا انا فلبيني كان يبيع في محل واول مادرى اني من قطر شال لي الاكياس لين السياره يقول لي لو عندكم شركه انا ابي اجي قطر لاني كنت فيها 4 سنين وعقب جيت دبي فكرت مستقبل احسن والحين ابي ارد قطر وانه مقدم ومحد رد عليه ..بس ماعطيته ويه وقلت له لاعندي محلات ولاشركات

وخفت زحمه دبي لان حطو جسور ووسعوا لشوارع لو انتبهتي ان 6 مسارات في الشارع فالسيارات تمشي ومافي زحمه اما بيسوون مثل قطر مسارين واحد مكسر وواحد الناس تمشي فيه وعقب يصلحون واحد ويردون يكسرون الثاني لين نموت ولاخلصو ولاصلحو ونتم على مسار واحد



بخصوص الشوارع و الجسور


يالربع انا مارحت دبي من 2006 الى صد ورد من بره لين بره و لين ابوظبي و ارجع في نفس اليوم


بس صراحه شوارعهم مالها حل 6 و 7 مسارات في الشارع و جسر فوق جسر فوق جسر


ليت حكومتنه تتعض من الي سووه الاجانب في الامارات و شلون دمروها و خربوها

و ما تغلط هلغلطه

و تتعض من التطور في شوارع الامارات شنو الصعب في ان يسوون شارع 6 مسارات


بس لا يسوون جسورهم الي يفتر مخك النفيقيتر يسويلك لف يمين بس عندك 3 لفات على اليمين و ماتدري اي لفه فيهم

وان لفيت لفه غلط لازم عشان ترجع تاخذ لفه على دبي كلها
:tease:

[مرحوم قطر]

غريييييبة !!!!

من الي يقول دبي مافيها زحمة ؟؟؟

انا اليوم راجع منها وفي مول دبي ماتقدر تمشي من زحمة الناس وقبل السفر باسبوع أدور شقة غرفتين أو ثلاث مالقيت كل السفريات يقولون الشقق مليااانه وماراح تلاقي وبعد الزور لقيت شقة في آخر الدنيا.


هلا اخوي اينشتاين

كان دخلت على موقع بوكنق booking

انا خذت 3 سويتات في فندق 5 نجوم حق 6 ايام طلع علي 5500

و الشقق و الفنادق وايد

و الزحمه كتبت اغلبيتهم سعوديين

[saryalia4u]

صح كلامك اخوي
صادفت هندي في السوق الصيني
يوم درى اني من قطر شهق
وقال انا باجي اشتغل في قطر قريب

[رجل مثالي]

الله يحفظ بلادنا قطر من كل سوء

[Emarati]

هلا اخوي

الموضوع مش موضوع مهول و حنى ما نتنافس على هلوضايف

بس اخوي تعداد قطر الحين 1700,000 نسبة القطريين بينهم يالله نوصل 13%


اذا جو زياده شبنسوي

اهني الموضوع يعني بالعربي الفصيح كفايه اجانب خلاص اكتفينه و امتلينه

ثاني شي اخوي هذولا جايين من الامارات وتعرف ان في الامارات الاجانب شيوخ

و يتكبرون على اهل البلد و ابسبب قانون الامارات صار ماعندهم اي احترام ولا يفتكرون في اهل البلد


عرفت يعني ما يخافون نفس الي عندنا فا اهني بتزيد المشاكل اكثر و اكثر

عرفت الحين

؟.؟


غلطان اخوي ، قصدك شيوخ بفلوسهم وعلى نفسهم مب على المواطن ،
مب معناته خذ له سيارة والا بيت يعني شيخ على المواطن لووول
شكوى بسيطة من المواطن للحكومة ياخذ حقه سواء من وزير والا من غفير ،،
نقطة حبيت اوضحها لك بما انك ماشاءالله
توضح وتحلل

[Emarati]

غريييييبة !!!!

من الي يقول دبي مافيها زحمة ؟؟؟

انا اليوم راجع منها وفي مول دبي ماتقدر تمشي من زحمة الناس وقبل السفر باسبوع أدور شقة غرفتين أو ثلاث مالقيت كل السفريات يقولون الشقق مليااانه وماراح تلاقي وبعد الزور لقيت شقة في آخر الدنيا.

الزحمة من السياح ولكن الموظفين مثل كل سنة بهالفترة اغلبهم خارج الدولة
وزحمة دبي مستمرة لفترة ما بعد عيد الأضحى وراس السنة !
2011 استثنائية للإمارات في مجال السياحة والسبب الثوارات والمشاكل في بعض
الدول العربية

[المسافره]

مانبي هالخبر ولا نبي محبه ولا تعلق يكفي الللللي عندنا :(

[قــ502ـطرالعز]

الصراحه فرحتني مخطط اروح في العيد واحاتي الزحمه وحشره الاجانب وشكلي بحجز فندق في الشارقه بعيد عن زحمه دبي وكل مابي بنزل دبي ابرك