علامات استفهام على شغل المقاول

[Miss WoW]

لو سمحتوا فيه امور ابي افهمها بخصوص بناء بيتي انا ما اتابع مراحل بناء منزلي بسبب ظروفي بس من فترة لفترة امر المهم مريت عليهم لقيت مرحلة الدفان وشفت الدفان بحجااار كبيرة جدا بعضها نصف متر ومتر كلمت المقاول قلت له صح انا ما افهم في البناء بس اشوف الاحجار وايد كبيره قال خلاص بمر واشوف المهم انا ما قدرت امر عليهم واليوم مريت عليهم لقيت صابين الصبية وبعد ما اعرف لقيت حصا صغيروايد في الاسمنت وشقوق في الارضية والاسمنت المستخدم في طابوق الطوف الرمل وايد جزاكم الله الف خير فهموني شغله صح او مافيه مشكله او شغله غلط واذا غلط لازم شنو اسوي والحين هو صب الصبية الله يعطيكم العافيه فهموني

[بويوسف]

وين الاستشاري اختي ؟

[السكتون]

المفروض ان الاستشاري يعاين !

[badarameen]

الله يعينك اذا بدايتها جذي

[almaf1a]

وين الاستشاري؟؟ راقد!!

[بايع بايع]

قوليلة يوقف الشغل الين تشوفين الاستشاري
لان احتمال يعيد اللي سواه

لان في مرحله جدا مهمه في الدفان وقبل صب الاسمنت وهي دك الدفان
حتى مايصير هبوط في الارضيات او تشققات في السراميك مستقبلا بسبب العشوائية والسرعه في الصب
وتداركين المشكله الحين اهون واسهل من انها تصير مستقبلا
والله المستعان

[A.L.I]

هاي شغل الاستشاري المفروض

[Miss WoW]

اخواني جزاكم الله الف خير على ردكم بس المشكله انا مآخذه الاستشاري عن طريق مكتب المقاول هو نصحني فيه وسئلت عن مكتب الاستشاري وايد ناس قالوا مكتب زين وقالولي خلاص انتي بتآخذين الشغل ممتاز واعتمدي هذا بذمتنا لما كنت اوقع العقد ووكلت امري لله وعليهم بس لما مريت وشفت الشغل كنت ابي اعرف شغلهم صح او غلط عشان جذيه سئلتكم اخواني

[أسير الاسهم]

نصيحة الاستشاري لازم يكون مب عن طريق المقاول .. لازم ما يعرفه كلش ويكون استشاري حازم ومعروف عنه بالصدق والامانه .. هذا اهو اللي بيخليك تنامين مرتاحه ولا تحاتين

[barod]

اختي هل كلام ما ينفع بما انك ما عندج خبره بالبنيان لازم تاخذين وياج حد يقرب لج عنده خبره وهو يتفاهم مع الاستشاري الي شكله مضبط اموره مع المقاول وتداركين الاغلاط من الحين والله يعينج

[السد]

ويكون استشاري حازم ومعروف عنه بالصدق والامانه
هل يوجد بالدوحة تطبيق لهذا الاستشاري
لا اعتقد :anger1::anger1::anger1::anger1::anger1::anger1::a nger1:

[Miss WoW]

المشكلة ما عندي حد انا معتمدة على الله ثم على نفسي يعني تشفون شغلة غلط ان الصبية تكون مافيها حصا صغير ؟؟؟؟؟؟؟؟؟؟

[بو خليفه 123]

1 ارفقي لنا صور من الموقع

2 أنا لو مكانك , الغي عقد المقاوله مع المقاول

3 الغي عقد الاشراف مع الاستشاري


و ابتدي من اول و جديد على ان يتحمل المقاول الحالي تصليح او اعادة صب الخرسانات مره اخرى اذا الاستشاري الجديد لم يوافق عليها ..

هدديه باللجوء الى القضاء

عطيهم العين الحمرا يا "واو" !!

[khaldoon]

لو سمحتوا فيه امور ابي افهمها بخصوص بناء بيتي انا ما اتابع مراحل بناء منزلي بسبب ظروفي بس من فترة لفترة امر المهم مريت عليهم لقيت مرحلة الدفان وشفت الدفان بحجااار كبيرة جدا بعضها نصف متر ومتر كلمت المقاول قلت له صح انا ما افهم في البناء بس اشوف الاحجار وايد كبيره قال خلاص بمر واشوف المهم انا ما قدرت امر عليهم واليوم مريت عليهم لقيت صابين الصبية وبعد ما اعرف لقيت حصا صغيروايد في الاسمنت وشقوق في الارضية والاسمنت المستخدم في طابوق الطوف الرمل وايد جزاكم الله الف خير فهموني شغله صح او مافيه مشكله او شغله غلط واذا غلط لازم شنو اسوي والحين هو صب الصبية الله يعطيكم العافيه فهموني

افضل دفان للبيت يعني اللي ندفن فيه الغرف هو التربه الطبيعيه نفسها اللي كانت موجوده نعيد دفنها بعد ان نغربلها و نشيل منها الاحجار الكبيره اللي تكون اكبر من 20 سم في اتجاهين (يعني لو انها كبيره ب 20 سم او اكثر باتجاه واحد فتكون مثل الشريحه فما مشكله يمكن نستخدمها)

طبعا التربه لازم ما تحتوي على مواد عضويه و املاح ولا طين و وحل و نفس الشي بالنسبه للماء المستخدم في الدفان و الدك لا يحتوي على املاح ولا مواد عضويه ولا ملون من مصبغه

علشان تعرف كم طبقة دفنتي و سماكة كل طبقة قسمي الارتفاع من الجسر الارضي و الطابوق اللي تحته كل 15 سم و اكتبي على كل قسم رقم 1و2....فتعرفي كم طبقة لازم تدفني

طبعا تقسيم الطبقات كل سم هو الافضل بس ما احد يلتزم فيه بس على الاقل اجبري المقاول انه يدفن كل 30 سم وتقدري تراقبي بنفسك هالشي لو كررتي زياراتك خلال الدفان فتعرفي ايش الرقم اللي كنت تشوفيه و الحين اختفى ...يعني كنت عند رقم 2 و الزياره الثانيه صرتي عند رقم 7 يعني معناته دفن 5 طبقات اي 75 سم و هذا شيء غير مقبول

و كل طبقتين يدكهم و يجيب الدك 95% من قيمة البروكتر للتربه

الحين صار دافن فخلاص الموضوع انتهى و الدفان مب صحيح و الشغل مب مقبول بناء على وصفج


بخصوص الاسمنت في الصبيه فلازم يكون من شركة ردي ميكس معتمده و لازم يكون في مكعبات للتأكد ان هذه الخرسانه راح تجيب القوة المطلوبه و تفحص بمختبر معتمد غير تابع للمقاول ولا لشركة الردي ميكس يعني طرف ثالث و الحصى لازم يكون متدرج و اكبر حجم للحصى هو 2سم اما لو كانت كل الاحجار صغيره جدا فلازم يكون في سبب لهالشي كالصب في اماكن ضيقة جدا جدا كالاعمدة و الحوائط و بنفس الوقت حتى لو كان الحصى صغير فلازم خلطة الخرسانه تجيب القوة المطلوبه منها بعد 28 يوم او 75% من قوتها بعد 7 ايام في جميع الاحوال

الشقوق في الارضيه نتيجة عدم رشها بالماء بعد الصب فحدثت الشقوق و ايضا ربما سوء مصنعية خلال الصب و تسوية سطح الخرسانه


بخصوص الخلطه او المورتار لتركيب طابوق الحوائط فلازم تكون 1اسمنت الى 3 رمل يعني كل كيس اسمنت يقابله 3 كيس رمل من نفس الحجم

اي سؤال اخر الحين؟

[captin]

باين أن المقاول من مقاولين الشارع
بو بيك اب وجوال وشكله ماعنده مكتب ولا معدات ولامهندسين
ولا هو مصنف والمتر تشطيب عنده بـ 1700 وعظم بو 900 ريال.

أولا ما من شك أن التربة الخاصة بالدفان يجب أنها تكون مغربلة ومزال منها الحصى وبعض المواد الأخرى بحيث يتم دكها وماتكون فيها فراغات عشان مايصير هبوط في المستقبل لما تلين الأرض بعدين.
والشروخ مثل ذكروا الأخوان بسبب عدم رش الماء على الخرسانة وخصوصا احنا في فصل صيف وحار جدا السنة هاذي .

ثانيا بالنسبة لتعيين استشاري من طرف المقاول فهذا أكبر خطأ لأن الإستشاري
لازم يكون طرف محايد وله استقلالية تامة ليكشف العيوب الفنية
في التنفيذ وما يكون من طرف المقاول ليتستر على عيوب التنفيذ.

عموما لتلافي أية أخطاء فنية أقترح انج تطلبين من المقاول يوقف
العمل مؤقتا وكذلك توقفين الاستشاري عن تقديم خدمة الاستشارة الفنية.

تشوفين لج استشاري آخر تتفقين معاه على مبلغ مقطوع فقط لتقييم العمل
يقيم لج العمل اللي تم تنفيذه لحد الآن وإذا تبين
وجود أخطاء تطلبين كتاب رسمي من الاستشاري المحايد بالأخطاء وترسلين كتاب
للمقاول تطلبين منه إصلاح العيوب وإذا ما استجاب ترفعين عليه قضية تعويض
وتجيبين لج مقاول ثاني يكمل وتوقفين العمل فورا مع الاستشاري السابق.

مشاكل البنيان ما تخلص والسبب وجود شركات رخصية وعمالة غير ماهرة
ياريت الدولة تتدخل وتسكر هالشركات كلها.

بالتوفيق والله يسهل امرج

[Miss WoW]

يا اخواني انا لو اجيب استشاري ثاني من يضمن لي انه يخاف الله وما يتلاعب ابي مشورتكم هل ممكن الآقي قطري يخاف الله وعنده فكره عن البنيان وهو يراقب المقاول والاستشاري وادفع له اشراف مو لازم عنده مكتب او مهندس المهم يفهم في البنيان واذا لقيته كم تعتقدون المبلغ حق اشرافه ويقولي اذا لقى اخطاء في البناء

[Miss WoW]

اخواني بوخليفه وخلدون وكابتن مشكورين على التوضيح بس المقاول ما سوى هذي المراحل في البناء مثل ما قلتوا وعن المقاول مو من الشارع له شركه كبيره ومصنفه وانا سمعت يقولون احسن شيء يكون قطري في اختيار شركة المقاولات عشان جذيه اخترت الشركة مديرها قطري وقبل لا اخذها ناس رشحوها لي من هذا الموقع وللامانه صج لقيت مديرها وايد محترم بس اعتقد هو ما يدري عن عماله شلون يشتغلون وشكل العمال لما لقوني مراه وما امر عليهم لعبوا لعبتهم وثاني شغله يمكن عشان مديرهم مسافر لاني اتصلت على الشركة لما شفت الدفان قالوا مسافر وبعد شركة الاستشارات مديرها قطري وربي تضايقت ما ادري شنو اسوي ما لقيت حل الا اشوف واحد يفهم في البناء ويمر ويشوفهم ويفهمني اذا فيه غلط شرايكم

[khaldoon]

لو البيت في الوكره اقدر اساعد

[Miss WoW]

تسلم يا اخوي خلدون جزاك الله الف خير بس البيت في الدوحة ورى دحيل

[بوخالد911]

هلا

الله يعيينكم

لازم الاستشاري يكون مثل العظم ببلعوم المقاول