وين أفضل مكان لبيع شاشاة السيارة ؟ ووين افضل مكان للتركيب ؟

[N203]

السلام عليكم

سمعت ان شاشات Kenwood من افضل الانواع للشاشات السيارة بحيث تمتلك جميع الخصائص من Navig و كاميرا ووووو. الخ

من وين اقدر اشتري احدث موديل من هذه الشاشات ؟ ووين افضل مكان يقوم بتركيبها مع جميع الادوات الاخرى من كاميرا وسماعات ووو الخ؟

اذا كان مكان البيع والتركيب مكانين مختلفين ماعندي مشاكل . بس ابي مكان مجرب ومضمون وشغله نظيف في التركيب !!

وللvxr 2007 سمعت انه يجب ان يكون هنلك كفر معين يركب للموتر ؟ لان الموتر بدون شاشة اصلا !!! من لديه خبره ارجوا يفيدني في هذا الموضوع !!




وجزاكم الله خير

[ن.سهيل]

بالتوفيق

[aljaber1]

ارشح لك محل صدى صوت في الغرافه
واذا فيه افضل ان شاء الله يفيدونك بقية الاعضاء
وموفق خير ،،

[N203]

بالتوفيق

وياك ان شاء الله. تسلم على مرورك.



ارشح لك محل صدى صوت في الغرافه
واذا فيه افضل ان شاء الله يفيدونك بقية الاعضاء
وموفق خير ،،

اشكرك اخوي على رايك وتسلم .

وننتظر باقي الاراء والنصائح.

[FCB 123]

وأنا عندي نفس الإستفسار والله

ننتظر رد الشباب الي عندهم خبرة


بالتوفيق للجميع

[عــيــون قطر]

موسيقى السيارات عند محلات الزينه شغلهم نظيف ومرتب وسعرهم معقول

[falsaadi]

السلام عليكم

سبق وان تكلمت عن الموضوع هذا

انا مجرب (صدى الصوت) و (هاوس كار) و (دلع سيارتك) و (كار سيت) فالتيسير بسلوى و (محلات الزينه في سنا..بالتحديد الشيباني)

وجربتهم كلهم واحد واحد

وان شاء الله تستفيد من تجربتي اللي هي ..

1- قرر شنو تبي تركب؟ باختصار (أصلي) وللا (تجاري) ؟

2- بتركب تجاري، عيل مايهم اي مكان اتركب فيه..بس للمعلوميه..المحلات التجاريه اللي فالغرافه مالت الزينه اسعارهم اعلى ب 400 الى 600 ريال عن الموجوده في شارع الزينه ب سنا فالدوحه..

باختصار اذا بتركب تجاري..كل مارحت لواحد ارخص كان افضل بغض النظر عن الشغل لان بصراحه التجاريه ماراح تستانس فيها..ماراح اقولك خرابات وغيره..بس فيها اوبشينات وايد تخترب..ومش فاضي كل مره ترجعها له..وفوق هذا..اذا بتحط فلاش يو اس بي او اغاني وغيره..التحميل يبيله وقت..وشوف بنفسك وراح تكرهها من اول يوم.

(انتهينا بخصوص التجاري)

3- كار سيت اللي في محطة التيسير اللي بسلوى

من ناحية الشاشات مش اصليه بعد اكثرية الشاشات اللي يجيبها..واخر دفعه جابها اسمها كول دي في دي..ومتوفره بكل مكان بأي محل وبسعر ارخص بكثير
هالمحل اللهم شغله حلو نظيف..اذا عندك شاشه ودها له وجيب الكتيب مالها وياك خله يقراها ويشوف التوصيلات ويركبلك..وماياخذ اكثر من 300 او 350 ريال.

4- محل (دلع سيارتك) بطريق المطار التجاري وانت جاي من صوب المطار بتلاقيه بنص الشارع يمينك
المحل هذا ماعجبني شخصيا، ويمكن ناس حبوه..الله اعلم..بس غالي بعد..سعره تقريبا نفس صدى الصوت بالغرافه..ويمكن اكثر من صدى الصوت ب 200 ريال..خصوصا اذا شاف موترك جديد وانت انسان صامل..وماعرف اذا كان له خبره صج بالتركيب وللا لا
مثال: اذا صدى الصوت ب 5000..هو 5200..واذا بست راسه مب اقل من صدى الصوت بعد ب 200 ريال. كلش مافرقت..عالاقل صدى الصوت شغله 100%.

5- محل صدى الصوت في الغرافه (اشارات الغرافه):
المحل هذا ماراح اعلق عليه لان اكيد معظم شباب الدوحه يعرفونه..وحتى اللي ماعنده شاشه او مايبي يركب بس يعرفه وسمع فيه
المحل شغله غير قابل للنقاش..بما معناه..ان شغله نظيف بصراحه..ويسويلك اللي تبي..انت قوله..وهو بيربع ساعه بيجهزلك الاوراق التقنيه اللي لها علاقه بتوصيل نوع شاشتك مع نوع موترك وبيقولك اذا يصير او لا وشنو تتوقع النتيجه بعد التوصيل. يعني 100%.
ومن ناحية شاشاته اصليه. وتقدر تحتار اللي تبيه وبيقوك شنو الفرق بينهم..بس معظم شاشاته المتوافره حاليا اعتقد كنوود وبيونير اذا صار يجيب منها الحين او لا..الله اعلم

ف باختصار صدى الصوت روح ركب عنده..وفي امكانيه انه يخلصها لك بنفس اليوم بس جيبها له الظهر او العصر..والحلو فيه ينطرك لنص الليل مايسكر لمن تخلص سيارتك اذا وعدك.

العيوب اللي فيه اثنين:

-سعره شوي غالي.
-السيارات الامريكيه مثل الجمس تحتاج وصله زياده اتركب عشان الصوت للتنبيهات فالموتر والحزام والاشارات وغيره ماتفصل صوتها..ف يقولك بيركبلك جهاز اضافي مع سماعه بيخشها لك تحت او بيشبكها مع سماعاتك..المهم وصله اضافيه بتكلفك حول ال 1200 ريال..وبصراحه..مابي اركب اي شي اضافي واسوي لعمري زحمه حتى لو بيخشها لي وابي صوت اشارات موتري والتنبيهات وكاله مثل ماهي.

هالعيبين اللي لاحظتهم فقط

6- المحل الاخير اللي هو (هاوس كار): طريق سلوى - وانت رايح جسر الصناعيه خذ اللفه الفرعيه يمينك قبل لاتوصل للجسر..قبل الجسر يعني ب 4 او 6 امتار بس..وعقب اول لفه يمينك ادخلك عالمحلات..بتلاقي دوار صغير كمله سيده وعقب الدوار الثاني يمين عشان تقدر ادش عالمحلات من ورى .. لان مثل ما انت عارف الشارع مكسر جدام ومافي مداخل
المهم..واحد من هالمحلات اسمه هاوس كار

هالمحل بتلاقي فيه اثنين..مهند و محمود..مهند مسافر الحين وباقي محمود

الشباب مرحين وبيساعدونك صج تختار اللي تبيه

يعني بتجي بتقوله (ابي شاشه اسمها شاشه..مابي ارجعلك ابد مره ثانيه..ابي انساك من بعد ما اركبها) ههههههههه .. وقوله تبيها سريعه لا بطيئه ولا ابي انتظر تحميل ملفات وغيره

بيقولك..عندي تجاري نظيف..بس اذا تبي شاشه صح..بطلبلك وحده وبتشوف..والكاتالوج عنده واختار اللي تبيه

انا عن نفسي..اخترت شاشاه اصليه من عنده واوصلت ب 4 ايام..ورحت وركبتها..
بصراحه..والله اني مستانس عالشاشه...اللي تبيه فيها..اللي تبيه صج فيها
وفوق هذا مركبلي 3 كاميرات
والحين عنده سيستم جديد اربع كاميرات..بس ماركبته لاني مابي احفر الموتر جديد بس ركبت 3 كاميرات بالفوكسي..هاي شي يثبت الكاميرا مثل الصمغ بس لا حفر الموتر ولا خرابيط..بس الفوكسي كله ايي داخل يعني مايضربه هوا

المهم..الشاشه فيها كل شي بصراحه..وتشغل كل شي..وفلاش .. وميموري..ونافيقيشن..والنافيقيشن بعد فيه ميموري 2 جي بي وبكل اللغات حتى لو تبي عبري في عبري لوووول والخرايط جديده 2010-2011..والشاشه اتسجل الاذاعات والافلام وتسجل بعد الكاميرا الشارع..ووصلت اي بود واي فون ووصلت يو اس بي للافلام..واضاءات 3 درجات وتحكم بالمقود وغيره وغيره ..

بس اللي صج خلاني ارتاحله..ركبلي كل شي واصوات السياره مثل ماهي ماتغيرت وكاله..لا جهاز زياده ولا سماعه تحت ولا يخشلي شي ولا مايحزنون...هالشغل اللي احبه..ركبلي اللي ابيه وبس لاتضيفلي خرابيط

وسعره ماقولك غالي..بس صج ارخص من صدى الصوت..يعني لو صدى الصوت ب 7000..هو ب 5000 الى 5700

عيبه الوحيد انه يتأخر .. والسبب انه ينطر عمال فنيين بيوصلون قريب ف ماعنده الحين الا اثنين..فني ومساعد بس
وبعد بصراحه الشباب عنده وايد..واذا ماشفت حد عنده انطر نص ساعه وشف الشغل هههههههه

ف توقع انه يقولك خل السياره واستلمها بكره او بعد يومين او حتى اسبوع..بس الشغل بيعجبك
لكن اذا شغلتك بسيطه وسريعه بيقولك وبيخلصها ومع السلامه

وايضا يشتغل على جميع انواع المواتر..وقطعه ارخص من الموجوده بالسوق فالمحلات الكبيره مثل صدى الصوت وكار سيت وسيتي كار وغيره

اعتقد المحل هذا (هاوس كار) هو المحل المنافس حاليا ل صدى الصوت


**تعبت وانا اعصر مخي**

السموحه اذا نسيت معلومه وللا شي مني وللا مني خخخخ

والله يوفقكم للخير ويسهل دروبكم

فمان الله

[N203]

وأنا عندي نفس الإستفسار والله
ننتظر رد الشباب الي عندهم خبرة
بالتوفيق للجميع

في الانتظار :) .


موسيقى السيارات عند محلات الزينه شغلهم نظيف ومرتب وسعرهم معقول


مشكور اخوي.





كفيييت ووفييت اخوي ، والله يعطيك ألف عافية على هذه المساعده ، ريحتني كثير وسهلت على السؤال والبحث. الله يجزاك خير ان شاء الله ويجعله في ميزان حسناتك. وكثر الله من امثالك.

[المحقق كونان]

صدى الصوت ممتاز و معاملتهم طيبه و شغلهم نظيف

المها لزينة السيارات صوب محطة الوعب ممتاز بس شوي غالي

الله يوفقك

[عضو قديم]

نصيحة اذا موترك من موديل 2008 وطالع ركب شاشة رود روفر صج غالية بس قود كولتي وسعرها 2500 ريال وبتحصلها في محل زينة اللي في محطة بترول الوعب وترا سعرها في دبي نفس الشي انا ماخذها من دبي ومركبها على الستاندر وصار لها سنه عندي وتركب على سكان الفسكار بعد

[N203]

صدى الصوت ممتاز و معاملتهم طيبه و شغلهم نظيف

المها لزينة السيارات صوب محطة الوعب ممتاز بس شوي غالي

الله يوفقك

مشكور اخوي على النصيحة .


نصيحة اذا موترك من موديل 2008 وطالع ركب شاشة رود روفر صج غالية بس قود كولتي وسعرها 2500 ريال وبتحصلها في محل زينة اللي في محطة بترول الوعب وترا سعرها في دبي نفس الشي انا ماخذها من دبي ومركبها على الستاندر وصار لها سنه عندي وتركب على سكان الفسكار بعد

تسلم يالغالي بس الموتر 2007 و2006 .


اذا اموتر موديل 2007 و2006 . على ما اعتقد لازم اركب كفر وبعدين اقدر اركب الشاشة ، وين احصل هذا الكفر ؟ لان ما ابغي يطلع شكل الموتر مرقع ... ابغي الكفر مرتب او شبيه بكفر الوكاله ..

[A.L.I]

صدى صوت في الغرافه

[FCB 123]

السلام عليكم

فمان الله

الصراحة بيض الله ويهك وماقصرت :victory:

[falsaadi]

***** تجديد واضافه *****


في شاشه اسمها كول دي في دي .. اكيد ا لكل سمع عنها..تجاريه مش اصليه

اللي بيروح دبي..يسأل عن النوع الجديد منها...مش متوفر في قطر..ويسمونها جيرمن..ماعرف ليش

الشيباني اللي في سنا يعرف عنها بس للحين ماجابها

شنو الميزه اللي فيها عن ال كول دي في دي العادي..الثنتين hd led ماشاءالله بس النوع الجديد يفرق انه:

ان شاشتها اوضح من العاديه ورزليوشن ادق
احلى خاصيه فيها (فيها يو اس بي من الخلف)..يعني اللي يركبولك وصلات اي بود واللي يشبكون ال يو اس بي مالك من برع بوصله لان ال يو اس بي بالشاشه صغيره فيركبون لك وصله خارجيه يو اس بي عادي عشان تشبك اي فلاش يو اس بس..واللي بعد عنده يو اس بي وكاله فالمواتر الجديده (مثال: جمس 2011) فيه يو اس بي كبير وكاله بطبلونه .. المهم..هالشاشه النوع الجديد من غير اي اضافات ولا زياده خارجيه ع طبلونك وشاشتك..ممكن تشبك اي يو اس بي مال وكاله من خلف الشاشه من داخل وتشتغل ولا كانه في شي..ومن غير لا تستخدم اي مخارج اضافيه من شاشتك..وتوفرها حق اشياء ثانيه وترتاح

هذي مثل ماقلت اسمها كول دي في دي جيرمن..واذا انا كنت مغلط بالاسم..عيل كول دي في دي النوع الجديد اللي فيها بالخلف منفذ يو اس بي كبير منها وفيها
متوفره في دبي...في قطر الى الان (على حد علمي) مش موجوده

والسلام عليكم

بالتوفيق

[khalid 88]

الشيخ القطعه مالت الشاشه انا مركبها من صدى الصوت 800 ريال هالكلام في سنة 2006
والموتر عندي اذا تبي تشوف شكل القطعه (( شركه ))

المحل فناااان ويشهد الله على ما قوووول صح شوي غالي بس 100%

ماترجعله تشتكي

يمكن ترجع وتجيبله زباااين

ركبت القطعه + الليتات تبعت جي اكس في الستاندر اللي فوق فالتندا من داخل

توكل على الله ولاتستشير

[falsaadi]

صح كلامك..والحمدلله انا هاللي ذكرته عن المحل..واعيد اكرر..قلت ان المحل شغله حلو وفنان..ويشتغلك ع طول وماقلت ان فيه عيوب الا انه يضيف شي في بعض المواتر عشان يحافظ على ميزات معينه (اشارات, صوت, تحكم ستيرينق) ولكن في محلات ثانيه من غير لاتضيف تسويلك اللي تبيه..مو احسن؟ ومن غير فلوس..بس هو بيدفعك صدى الصوت..واصلا ليش اضيف دام غيره يسويها ومايضيف !!!
وبعد مثل ماذكرت انت ان سعره غالي شوي بس الشغل اوكي

ف الحمدلله اللي قلته انا صح وحبيت الاخوه بس يستفيدون من تجربتي ويقرون كل اللي قلته قبل وهم بنفسهم يقررون وبكيفهم

وفي شي نسيت اقوله لك..انواع الشاشات في هاوس كار اكثر بوايد من صدى الصوت...واذا في فبالك نوع معين بيجيبه لك ب 4 ايام..لو حتى وكاله

الله يوفق المحلين واصحاب المحلين للخير والشغل الطيب ومايرد زبون لهم الا وهو راضي
والله يوفق اللي بيتعامل معهم بعد

[falsaadi]

جبتلكم ارقام المحلات المعروفه بتركيبات الزيادات والاكسوسيريز والشاشات وغيره

اللي مايدل للحين او اللي ماله خلق يضيع وقت وينصدم مايلاقي اللي يبيه عندهم..عيل يتفضل يتصل ويشيك معهم وعقب يقرر

1- صدى الصوت للسيارات
تقاطع اشارات الغرافه، الغرافة - 44881214

2- سيتي كار لاكسسوارات السيارات
بجانب مطعم نجمة الهند، شارع المرخيه، المرخيه - 44888416

3- كار سيت للاكسسوارات
محطة التيسير، شارع سلوى - 44692621

4- هاوس كار لاكسسوارات السيارات
في اخر شارع سلوى قبل جسر الصناعيه (يمين) - 44116426

5- الشيباني لزينة السيارات
محلات الزينه قرب دوار سنا - 44357752

واسمحولي لعدم تزويدي لكم لارقام جوالات اصحاب المحل او اللي يدير المحل..لان ممكن يكون برع او مش موجود فالمحل بالوقت اللي تطلبه فيه..بس ماقدر الا بإذن منهم

بس ان شاء الله كلهم متواجدين في ساعات العمل المعتاده في قطر لكل المحلات

وانشالله تفيدكم..فمان الله

[Bin hamad77]

صدى الصوت مشاءاللة ترتيب فالويرات حق الكيمرا وطريق الخبق فالصدام


يعنى مشاءاللة شغلهم حلو وفوق هاي كله اعتقد يعطيك ضمان ع الشغل سنه

[N203]

جزاكم الله الف خير، وتسلمون على المعلومات والنصائح.

بس انا اغلب الناس نصحوني بشاشة kenwood صحيح انها غالية شوي. بس تستاهل على كلام الشباب .

[Marka-Boutique]

موفق ان شاء الله

[FCB 123]

ماشاءالله عليكم

[N203]

الله يوفق الجميع. والف شكر للجميع على النصيحة وابداء الرأي و المرور :)

تحياتي