كل شي عن إسبانيا وبالأخص برشلونة ... !! ...

[M!ssy]

السلام عليكم ورحمة الله وبركاته


انا والعائلة نخطط بأن نقوم برحلة للمدينة الساحره برشلونة
ان شاء الله في شهر سبتمبر
وهذي ال مره نروح فيها اسبانيا
بس بغيت استفسر عن أفضل الفنادق الي تنصحونا بها في مدينة برشلونة
وأي معلومات ممكن تفيدنا في رحلتنا

وبخصوص ان احنا نفكر نروح لسرقسطة بالقطار وعقب الى مدريد
كم بتكلفنا الرحله
وشنو أحلى واحسن الفنادق في مدريد ؟؟

وأي معلومات أخرى ياليت تفيدونا

وبالنسبة لاول مانوصل المطار هل تنصحونا نستخدم تاكسي من المطار للفندق؟

أي حد ممكن يفيدنا بهالموضوع بليز

وشكرا

[بدوي]

نصيحة

في برشلونة لاتسكنين في الفنادق اللي عالبحر ، انا سكنت في W

حلو وراقي وروووومنسي ولكن مشكلة السيف ( البيتش ) مفاصيخ (ربي كما خلقتني) :rolleyes2:

ومشكلة المكان انه اقرب محطة اندرغراند هي تقريباً عند فندق ART وهو بعد عالبحر ولكن يمتاز بقرب المحطة

حواليه المطاعم والقهاوي عالمارين ، وانا انصحج تسكنين في شارع غارسيا لأنه بجانب شارع الرامبلا ( شارع المشاه)

وميزة غارسيا اهدا من الرامبلا وهالشارعين اغلب المحلات فيهم ومحطات القطارات

وارشح فندق ( ماجستيك ) في شارع غارسيا لأن سعر السويت عندهم تقريباً نفس سعر الغرفة في W تقريباً 400 يورو وشي

على فكرة شهر سبتمبر في العادة يكون كل شي مولع في برشلونة لأني السنة اللي فاتت هناك وشفت هالشي بعيني

اعتقد عندهم مناسبة هناك وكذلك يصادف بداية الدوري الاسباني واجازة العيد فتلقين الفنادق محجوزة اغلبها

فديت برشلونة وبس ..... عساهم دوووووم فايزين يارب :victory:

مدريد حلوة وميزتها انج تلمسين فيها الطابع الاوروبي في المباني اكثر من برشلونة لكن ما اظلمها لأني مادرت فيها عدل

لأن روحتي للمدينتين فقط للمباريات وكللللللله لعيون برشلونة (ميسي ورونالدينيو) الله يذكره بالخير :weeping:


الله يوفقكم

[the engneer]

مرحبا توني جاي من برشلونه وصار لى يومين من وصلت اي استفسار عن اسبانيا حاضرين

[بن درهم]

ولاتهون اخوي عطنى مخطط عن اسبانيا مدريد وبرشلونة وكيف التنقل من مدريد الى برشلونة بالقطار وطيران احسن سمعت لانها بعيدة

[عندليب قطر]

بالتوفيق

[M!ssy]

بدوي

احنا ان شاء الله اقامتنا الاساسيه بتكون في برشلونة بإذن الله
طبعا انا نفسك اعشق هالنادي حتى النخاع واذا في اكثر بعد
ومخططين انا والاهل نحضر مباراة اتلتيكو مدريد باذن الله ان الله يسر
في ناس راحوا لمدريد يقولون حلوه بس نفس ماقلت تعتبر نفس باقي مدن اوروبا
بس برشلونه يمدحونه اواجد
وبخصوص شهر 9 ان كل شي مولع يعني غالي واجد يعني اوفر والا اوكى؟
وبخصوص ماجستيك حلو وخدمتهم زينه؟ لان في ناس مدحوا لي فندق رينا صوفيا او الملكه صوفيا
وفي ناس قالوا لي عن فنادق NH Hotels


the engneer

الحمد لله على السلامه اخوي
انا بصراحه اول مره بروح اسبانيا وماعرف وش الي ممكن اسويه ووش الي ماقدر اسويه
مدرستي اسبانيا تقول لي ان في اسبانيا المطاعم والمحلات وكل شي يسكر متاخر
بس انت رايك ان نقعد برى متاخر وخصوصا احنا عائله عادي والا لا؟
وبخصوص الامان شلون هناك؟ واذا في فندق ممكن ترشحها لي ومطاعم ومحلات
وبعد في شي بخصوص خدمة البلاك بيري اي شركة تنصحني فيها ؟ لاني ناويه اطلع لي رقم اسباني
وبخصوص التنقل من برشلونة لسرقسطه ل مدريد بالقطار قالت لي المدرسه ان القطار افضل واسرع

وبعد في شي تنصحوني اذا بروح مدريد وفالنسيا وسرقسطه اني احجز الفنادق من الدوحه قبل اروح والا اذا رحت هناك احجز ؟

وأسفه جدا على الاطاله ويعطيكم العافيه ماتقصرون

[قلبى طيب]

بالتوفيق

[ولدQTR]

مرحبا أخوي انا هالصيف رحت برشلونه وقعدت فيها 3 ايام ..

البلاد حلوة وفيها مجمع المريمغنوم وهذا مجمع حلو في نهاية الرامبلا تقطع الشارع تلقى جدامك بحر وجسر تعبره تلقى المريمغنوم على يسارك..

وفيها مطاعم تقدم الاكل الحلال مثل مطعم راجا الباكستاني تلقاه تقريبا في نهاية الرامبلا واحذاه مطعم تركي وكذلك في مطعم لبناني اسمه اريبيا قريب من شارع لويس غارسيا ..

بخصوص الفندق ومن واقع تجربه انصحك بفندق اوليفيا بلازا بحكم موقعه الاستراتيجي مقابل ساحة كاتلونيا

وتطلع منه تلقى الساحه بوجهك على طول وعلى يمينك شارع لويس غارسيا ويسارك الرامبلا ..

اتمنى اني قدرت افيدك ..

[M!ssy]

اشكرك اخوي ولد قطر على المعلومات المفيده
وفعلا اطلعت على فندق اوليفيا بلازا في الانتر نت وبصراحه فندق شكله راقي
واهم شي موقعه واجد حلو على ساحة كتالونيا وقريب من كل شي

[~ عاشق قطر ~]

بالتوفيق اختي وبصراحة انا افكر اروح برشلونة لكن مو الحين بعد فترة ان شاء الله

[بن درهم]

اخواني حد عندة فكرة عن الطريق من مدريد الى برشلونة

[خالد77]

بالتوفيق

[M!ssy]

اخواني حد عندة فكرة عن الطريق من مدريد الى برشلونة

انا ان شاء الله رحلتي بتكون
مدريد - فالنسيا - برشلونة

انت متى ناوي تروح؟
اذا عقب شهر 9 راح افيدك بكل شي عقب مارجع من السفر ان شاء الله

[أبي أربح]

ابي استفسر عن التأشيرة كم يبيلها لين تطلع من سفارتهم ؟

[بن درهم]

التاشيرة من اسبوع الى عشر ايام والله يعينك

[Amigo]

اخواني حد عندة فكرة عن الطريق من مدريد الى برشلونة

بالنسبة للمترو
من مدريد الى برشلونة 700 كيلو
في مترو سريع تبلغ سرعته 300
كيلو متر بالساعة بمعنى 3 ساعات
بالكثير انت موجود في برشلونة طبعاً المترو هناك اكثر من واحد
لكن الأسعار تكون عالية شوي
والباصات رخيصة
والطائرة لو حجزت بدري ممكن تحصل اسعار حلوة عندك
Ryanair
Vueling Airlines
Air Europa

[ع.م]

فندق الدبليو وبسسس !!

يجنن شوفيه في يوتيوب..