مع أو ضد

[love life]

مبارك على جميع حلول شهر رمضان المبارك
وحبيت أعرف رأيكم مع أوضد إن بعدالحادث المفروض انتم في المكان الحادث لحد ما اتجي الشرطه أوانروح وانص السياره في مكان ثاني لأن أمس سويت حادث بس الله ستر وتمين واقفين في نفس مكان الحادث من ساعه 11:30 لحد 2 الظهر:telephone: والشرطه ما جات وأخرتها قالوا تعالوا المركز رحنا المركز وشافوا السياره وخذ الشرطي ورقه وقلم وقام يرسم علشان نشرح له بس أحس لو اتجي الشرطه في نفس مكان الحادث أحسن ما ادري شنو هاي القانون الجديد مع العلم يوم تميت واقفه ما كنت ادري إن فيه مخالفة علشان عرقلة السير لأني توني ماخذه اليسن بس الحمد الله عدت على خير بس أحس اسلوبهم مب حلو ما يجيون مكان الحادث ويشوفون بس السياره في المركز ونشرح لهم بالرسم شنو رأيكم أنتو مع أم ضد

[شبح الصمت]

أنا ضد وبقوه صــراحه

المرور يفتــقر للمحقـقين ..

صدقت في التاخير حدث ولا حــرج ..

ذاك اليوم شفت حادث عند مستشفى الاهلي مواتر معتفسه تصدق الاسعاف وصل والمرور ولا احد منهم كان موجود ينظم السير ..

[ثابت]

نعم اختي وهذا اعتبرة قمة التقصير من ادارة المرور خاصة ولازم المسؤلين هناك يلتفتون لهذا الموضوع ويحللون رواتب موظفينهم

شي مخجل والله عيب الي يصير يا ادارة المرور هذا الوضوع غير حضاري ولا انساني بعد انة اشخص مسوين حادث ويبلغون ويخيسون بمكانهم ولا احد يجيهم وبعدين بقمة السخافة يقول الشرطي ارسموا لي الحادث عيب والله الي يصير

[رآعي موآجيب]

الحمد لله على السلامه

أنا ضد الوقوف في الشارع طبعاً

المفروض بعد الحادث كلن يروح للمرور وتنتهي المشكله

وفيه شي افضل من هذا كله لاحظته في السعوديه ، شركة التأمين هي اللي تجي تعاين الحادث وتعطيهم ورقة تصليح وموافقة دفع للكراج وهذا كله في اقل من 10 دقائق

أهم شي سواء عندنا او عندهم ان السياره تتحرك بعد الحادث

[فــلان]

أول شي الحمدلله على السلامه أختي ومبارك على الجميع الشهر الكريم.

بالنسبه للحادث كان في أي منطقه؟ وتوجهتي لأني قسم؟ وشلون صار الحادث؟

لأن في حال وقوع حوادث بسيطه وواضحه تُقييم من قبل المحققين بعلم ضباط التحقيق يتم تحريك
الحادث للقسم وهالشي يصير في حاله وحده وهي كثرة وضغط الحوادث ذيك الساعه وعلى ما يوصل دورج إتكونين إحترقتي فالشمس أو ضاع وقتج.

بالنسبه للمحقق مايحرك الحادث من المكان إلا بعد مايسأل الطرفين فيما إذا كانوامتفاهمين وغير ذلك بيكون خطأ من المحقق.

مثل على الحوادث البسيطه و الواضحه الي يسمح فيها تحريك الحادث :

1- الإصطدام من الخلف.
2- الرجوع إلى الخلف.
3- الإصطدام خلال الوقوف.

الحمدلله محققينا من الكفائات العاليه جدا ً ومدح المحقق أو ذمه ما راح يغير في نتيجة التحقيق و ماننسى إن المحققين بعد بشر وموظفين حال أي بشر بينهم الممتاز و بينهم الجيد وبينهم الضعيف و الحمدلله وزارة الداخلية مب مقصره المميز تشد على إيده والضعيف يتابعونه ويشرفون عليه لين يتحسن.

أنا من المعارضين و بشده توجيه اللوم دائما ً على وزارة أو جهة معينه لأن هاذي كلها أحوال و مواقف تصير شخصية في نهاية المطاف مثل ما أي أحد فينا يرتاد مكان معين,مره بيصادف موظف هب ريح و مره بيصادف ثاني مب نفس المستوى وهذا شي طبيعي! ومثل ما ذكرت سلفا ً هذا ما ينفي جهود الوزارة المستمره في تطوير أداء منتسبيها وتقويمهم.

أنا حاضر لأي إستفسار و خطاكم الشر مره ثانيه

[ANONYMOUS]

اذا متفاهمين من الغلطان

خلاص على طول المرور

بدون انتظار اي دقيقه

[khaldoon]

أول شي الحمدلله على السلامه أختي ومبارك على الجميع الشهر الكريم

انا مع حضور الشرطه حالا خصوصا اذا اثبات الحادث ممكن يكون صعب شوي او الانتظار يسبب عرقلة للسير

[ALRAYYAN]

الحمد لله على السلامه اول شي وخطاج الشر

بشكل عام اذا الغلط معروف على من ماتوقفون ولا دقيقه
تروحون للمركز اللي تابع له موقع الحادث وتخلصون الموضوع

اما اذا كان في اختلاف او عدم فهم للقانون فمن حقكم تطلبون دوريه
ويجونكم مكان الحادث غصب مب طيب لان فيها حقوق ممكن تضيع

بس الشهاده لله أنا اشوفهم مب مقصرين والحين وين مانروح الفزعه والدوريات في كل مكان ومايتاخرون في حالة طلبهم عن طريق العمليات ٩٩٩

لكن يمكن نتيجة ضغط حوادث او شي يتأخرون لكن مو دايم
وقواهم الله على هالجو الحار *

[MAZEN37]

اذا متفاهمين من الغلطان

خلاص على طول المرور

بدون انتظار اي دقيقه
وان طلع بزر عند محقق المرور - صارت وايد وصارت معاي
انا الحين شسوي ارجع شوي وتك تك تك
بالكاميرا واقوله الوعد الساعه 5 في المرور
وحط دي وانت رايح escape
تبيني اقعد انطر 3 ساعات الظهر اخرتها مروا علينا الشيخ المرور ان شاء الله خير:)

[pinky-qtr]

هالمرور ما يعرفون يسون شي أصلا - بس فالحين يحطون ستكر المخالفات ...

[ANONYMOUS]

وان طلع بزر عند محقق المرور - صارت وايد وصارت معاي
انا الحين شسوي ارجع شوي وتك تك تك
بالكاميرا واقوله الوعد الساعه 5 في المرور
وحط دي وانت رايح escape
تبيني اقعد انطر 3 ساعات الظهر اخرتها مروا علينا الشيخ المرور ان شاء الله خير:)

هذي مشكله

بس حاول وانت تكلم المرور تسجل اعترافه

او توقعه ع اورقه انه غلطان ههههههه

والله مادري يخوك

بس اعتقد رمضان مافي حد بيكذب :p

[love life]

الله يسلم الجميع
الحادث كان عند تويز ال قبل ما ادش على رامز والبنك الوطني رحنا مركز معموره والضربه كانت من جنب
الي فات مات وادري ان المكتوب ما أحد يقدر يغيره بس انقهرت قعدونا في الحرأكثر من ساعه واتصلت 4 مرات على 999وأخرتها تعالوا المركز وانقهرت اكثر من طريقتهم بالرسم على الورق

[Frosty]

خطاآج الشر -
اذا الطرفين متفقين على من الغلطان، تروحين لـ أقرب مرور..