شاب قطري يطلب !!

[قطري 2099]

السلام عليكم ورحمة الله وبركاته

كل عام وانتم بخير ورمضان كريم

ماعرف وين احط موضوعي في اي قسم .. اخترت العام والسموحه اذا كان مكانه غلط

الموضوع الله يسلمكم انا شاب قطري عمري 28 سنه ابحث عن سكن

وعزوبي غير متزوج .. ابحث عن سكن لظروف خاصه صعب اني اشرحها

لكن مشكلتي هي كل ماحصل مكان (( للعائلات فقط )) والي ماسكين هالاماكن اجانب

وان قلتلهم عطوني رقم صاحب المكان قالولي شيخ ومانقدر نعطيك رقمه >_<

والله قاعد يذلوني في بلادي مب عارف اكلم من

بس ناس قالولي عن هالموقع ان الكل بيقرى موضوعك وبتحصل من يساعدك

انا مادور مساعدات ماليه كل الي ابيه مكان اسكن فيه

المراد الي عنده مكان قريب مدينة خليفه - الدفنه الريان الناصريه الغرافه

يعطيني خبر الله يجزاكم خير

وحاليا ساكن في بيت خالي يعني الوضع سيء جدا عندي فاتمنى من اصحاب العقارات والبيوت لو يحصلون لي مكان وبسعر مناسب لي يسوون خير

انا لااقدر اتزوج ولا اقدر اتحمل اجار شقه في احد العماير الي تتعدى 3 الاف ولا اربع الاف

شغال في البلديه ومعاشي على قدي

الي يقدر يساعدني بهالشي ياليت يراسلني عالخاص يرسل لي رقمه علشان اكلمه

لاني اعتقد ماقدر ارد عليه رساله خاصه الا عقب 50 مشاركه >_<

[خليفـة]

والله يالغالي ما اعرف شقول لك
باين من كلامك ان وضعك صعب
الله يوفقك وتلاقي مبتغاك .. والله ييسر امرك ان شاء الله

خليفــة

[البحار00]

الله ييسر لك امورك

وتلقى مبتغاك

[alfahad1]

الله المستعان ياخوي انشاءالله الشباب يقوموا بالواجب

[البدع]

عندي لك نصيحة

جرب جريدة (الوسيط) الأسبوعية

تلاقيها مجانا في المحلات

شقق كثيرة للإيجار

الاحظ المعروض زاد هذي الايام

والله يوفقك

[al-obaidly]

با لتوفيق

[قطري 2099]

والله اذا عالجريده ماراح احصل الا في اخر خريطة قطر ومكان الله لايوريك مكسر وسقفه مشلوخ لا وغالي بعد

الوسيط ماخليه اتصل فيهم واحد واحد يا مثل الي قلتلك عليه ولا مكان حق عوائل فقط

انا ماجيت هنا الا لانه اخر الحلول

[مستر قطر]

الله يوفقك وتنال مرادك

[تحداني]

عندنا في العائله الله يزيدهم يارب ابيوت اجار وعمارات وشقق في مناطق متعدده
منها البعيد من وصفك ومنها القريب لكن المشكله الاساسيه مو السعر
فسعرك ماهو وايد خيالي 3000 ريال على شقه فيها غرفتين ومطبخ وحمام الله يعزك
ممكن نلقى لك لكن الي يخلي طلبك وايد صعب " انك اعزوبي "

يمكن صاحب العماره او صاحب العقار ما عنده مانع
لكن راح اتشوف الاعتراض كبير من السكان
جرب الوالد مره حق شاب اعزوي وليته ما جرب
افضحونا في كل مكان الا بومحمد جايب لنا اعزوبي
الا جايب لنا شاب
الا جايب واحد وامسكنه ابواسطه لان العماره عماره جماعتهم


فهنا المشكله الاكبيره


ودي اساعدك بس ما اعرف اشلون :(


الله يفرجها عليك يارب
ويرزقك عيال الحلال الي يفكون ضيقتك

اللهم آمين

[قطري 2099]

ويوفق الجميع ان شاءالله

[آخر الفرسان]

والله ياخوك انا تعبت قبلك

ويالله وبالموت لقيت شقة صغيرة وللحين انا فيها

وبواسطة احد الاخوة ( المقيمين )

لاااا وقالوا لي عائلة ولا اذلف قلت لهم لا عائلة

ويوم سكنت لقيت اللي ساكن يمي ( عزاب ) !!!!!

سالت وقلت شلون سكنتوهم تدري شنو قالوا لي !

قالوا هذول مقيمين اخوان محترمين !

ولا كان للحين وانا احووووووس

مدري شاقول لك بس الله يفرجها عليك يارب

[Dawn]

للرفع

بالتوفيق ان شا الله

[قطري 2099]

صح كلامك اكثرهم يتشكى وياليت يتشكى من شي لا ازعاج ولا غيره بس يشوفون عزوبي في حاله

كلوه بثيابه قطري ولا غيره

يعني والله مب عارف ويش اسوي

توني طالع من سكن عوائل سوداني متوسط لي >_< والي ماسك الاجار هندي

وعقب حب خشوم سكنت فيه وطلعت لان البيت بينهدم

[روح الاطلس]

الله يعينك

[hamoor4ever]

عندك مشكلتين وكل وحده محتاجه حل ، الاول انك عزوبي فغالبا ماتلاقي وثاني مشكله انك قطري بصراحه بعض المأجرين اذا قلت لهم قطري يخافون بعد . الله يفرج عليك والله مساكين اهل قطر

[Aigner]

اخوي شيك ع الخاص

[قطري 2099]

الانجليزي عندي 80% يعني اقدر اتفاهم معاهم

بس يبيلي امارس الانجليزي واصير 100%

وين المكان ؟؟

[هبوب الكوس]

للرفع

بالتوفيق ان شاء الله

بالتوفيق

[&بوشهد&]

الله يكون في عونك
ويسمح دربك

[قطري 2099]

آمين .. اجمعين ان شاءالله

[سعود العمادي]

الله يكون في عونك اخوي

وان شاء الله الشباب ماراح يقصرون وياك

[رآعي موآجيب]

وثاني مشكله انك قطري بصراحه بعض المأجرين اذا قلت لهم قطري يخافون بعد . الله يفرج عليك والله مساكين اهل قطر


مع ان اللي مطلع عين راعي العقار الأجنبي !!

أغلب الربع اهل العقارات يقولون الأجنبي الحين هو اللي يسحب فينا

والجنسيات المرغوبه عند اصحاب العقارات اليوم هم الشرق آسيويين مع أنهم يخالفون ويبالغون في عدد الأسر اللي تسكن شقه واحده

يعني شقه فيها 3 غرف نوم وحمام كرمكم الله وصويله صغيره ومطبخ يسكن فيها 3 عوائل وممكن 4 عوائل بأستخدام الصاله غرفه !

ومع ذلك هم المفضلين من قبل اصحاب العقارات والسبب لأنهم ملتزمين وغير مزعجين !

الله يكون بعونك و يوفقك ان شاء الله

ماجربت تشوف شقق بروه ؟

[المسك1969]

الله المستعان... صاروا الشباب القطريين برع بيوتهم يدورن بيت

الله يعينك

[شبح الصمت]

اخوي حاول انك تاخذ لك سكن في أزدان ..

وما عندهم مشكلة في الجنسيــة ..

في سكن صوب الوكره على كلام واحد من الربع غرفة ومطبخ وحمام على 3 آلاف

والله يعينـك

[KHALID J]

الله يفك كربتك ويسر لك امووورك
امييييين

[NeverLand]

شي يزعل والله .. الاجانب متنعمين بهالبلد واهل قطر حالتهم كسيفه ومب لاقيين لهم سكن ومعاشهم على قدهم .. هذا واحنا عددنا شوي مب وايد

الله يوفقك ياخوي ..

[بيرق_المجد]

فيه قسم العقارات في المنتدى نفسه مكاتب عقاريه ممكن يفيدونك ان شاء الله والله يوفقك

[بوخالد911]

الله يسهل علييك

[راسي براسك]

قطـري و عـزوبي ومعاشـك مايسـدك وتـدور لـك سكــن ؟!

صراحـه لاتعليــق

الله يسهـل لك أمرك ويوفقــك

[المليونير الفقير]

الله يعينك انشاءالله ولاتنسى الدعاء وربك كريم

[الفا برافو]

اخوي شيك الخاص.. ارسلت لك رقم مدير مكتب عقارت حق اخ قطري عنده سكن في العزيزيه كله عزاب بس عاد مدري اذا عنده شقق فاضيه او لا .
اذكر الشقه عنده غرفه وحمام ومطبخ بالف وخمسميه .

وبالتوفيق انشالله

[الراقيه سبشل]

الله يساعدك ويهون عليك

لو كان شي بيدي كان ساعدتك

:)

[NeverLand]

الله يساعدك ويهون عليك

لو كان شي بيدي كان ساعدتك

:)

افرح لما اقرا مثل هالردود :o .. يكفي بس نيتج الطيبه اختي ..

وماقصروا كل اللي ساعدوا الريال .. فيكم الخير والله :victory:

[برشلوني قطر]

اخوي شيك الخاص.. ارسلت لك رقم مدير مكتب عقارت حق اخ قطري عنده سكن في العزيزيه كله عزاب بس عاد مدري اذا عنده شقق فاضيه او لا .
اذكر الشقه عنده غرفه وحمام ومطبخ بالف وخمسميه .

وبالتوفيق انشالله


شي طيب اذا ف شي بـــ 1500


الله يوفقك اخوي ويسهل امورك

[cavok]

الله يفك كربتك يا رب

[STAR]

الله يكون في عونك....

جرب تشوف لك ملاحق.. اتوقع ارخص..

حاول تنزل موضوع في قسم سوق العقارات...

[نتفـه]

الله يسهل عليك و يساعدونك الاخوان ان شاء الله ,,

[قطري 2099]

الله يعطيكم العافيه

والله كريم لحد الحين مافي شي

بعض الاخوان ماقصروا الي عطاني رقم مكتب والي دلاني على مكان بس اجاره 4500

غالي وايد >_<

اتمنى احصل شي على قدي ومناسب .. وادري ان الاخوان الي في قسم العقارات ماراح يقصرون

بس اتمنى يستعجلون في موضوعي لاني صدق في موقف لايحسد عليه

انا مابي سكن مجاني .. انا بدفع بس ابي ادفع شي معقول وعلى قدي ابي غرفه مع حمامها وانتوا بكرامه

حتى المطبخ مابيه اذا بيزيد السعر

[قطري 2099]

الظاهر ان الموضوع صعب للغايه

الله يعطيكم العافيه يالي حاولتوا تساعدوني بارقام المكاتب ولا بالدعاوي

جزاكم الله خير .. وان شاءالله احصل شي من الاجانب لان الصراحه الي

ماسك هالمجال وبيده كل شي الحين الاجنبي .. الله كريـــــم،،

[qatari 111]

الله المستعااان

اخوي دام انك شغال في البلديه ليه ما كلمتهم يوفرون لك سكن ترى ملزومين يوفرون لك ..

الله يسهل امورك ويعينك

[al7amadi]

صباح الخير

الله يفرجها عليك انشاءالله

اخوي هذا رقمي 77700074 كلمني وانشاءالله خير

الله المستعان

[عيون الدوحة]

الله يكون بعونك
جرب تشوف شقق أزدان الي صوب الكورنيش أسألهم عن العقود الطويلة
أن شاالله تحصل السعر الي يناسبك

[d.romance]

بالتوفيق

[ع.م]

الله يوفقك ويرزقك ويزوجك يارب..

مافي شي مستحيل إذا مشكلتك مع الإيجارات الغالية خل نجرب ندور لك وظيفة راتبها أعلى.. أنت دارس لين أي صف؟ وشنهي قدراتك يعني مثلاً كمبيوتر،لغة، أي شي..

و ربك كريم..


إن شاء الله كل شي يتيسر، وهذا كله بيصير ماضي عقب :)

[ع.م]

شيك الخاص بارك الله فيك..

[آلملآزم]

ياليت باليد شي ونقدر نخدمك
الله ييسر لك أمورك وتحصل اللي تبيه

[Store]

بالتوفيق ان شاءالله

[قطري 2099]

الاخوان الي ارسلوا لي ولا رديت عليهم

انا عقب اخر رد لي مادخلت المنتدى

لكن بفضل الله سبحانه الامور تيسرت ولله الحمد

الله يعطيكم العافيه جميعا ماقصرتوا ..