(ماعاش من يخليك خادمة يا يمه)

[سهم طايش]

هذي قصيده مؤثرة لأم تشكي حالها بعد ان وداها ولدها (الله يهديه) للمصحه (دار العجزه) او كما يقااال ( دار النسيان) والبيت أعلاه يبكي حتى القلب القاسي

اترككم مع القصيده

وين انت يا حمدان امـك تناديـك .. وراك مـا تسمـع شكايـا وندايـا

يا مسندي قلبي على الدوم يطريـك .. ما غبت عن عيني وطيفك سمايـا

هذي ثلاث سنين والعيـن تبكيـك .. ما شفت زولك زايـر يـا ضنايـا

تذكر حياتي يـوم اشيلـك واداريك . . والاعبـك دايـم وتمشـي ورايـا

ترقد على صوتي وحضني يدفيـك .. ما غيرك احدٍ ساكن فـي حشايـا

واليا مرضت اسهر بقربك واداريك .. ما ذوق طعم النوم صبـح ومسايـا

ياما عطيتك من حنانـي وبعطيـك .. تكبـر وتكبـر بالأمـل يـا منايـا

لكن خساره بعتني اليـوم وشفيـك .. واخلصت للزوجه وانا لي شقايـا

انا ادري انها قاسيـه مـا تخليـك .. قالت عجـوزك مـا ابيهـا معايـا

خليتني وسط المصحه وانا ارجيك .. هذا جزا المعروف وهـذا جزايـا

يـا ليتنـي خدامـة بيـن اياديـك .. من شان اشوفك كل يوم برضايـا

مشكور يا ولدي وتشكر مساعيـك .. وادعـي لـك الله دايـم بالهدايـا

حمدان يا حمـدان امـك توصيـك .. اخاف من تلحق تشـوف الوصايـا

اوصيت دكتور المصحه بيعطيـك .. رسالتـي واحروفهـا مـن بكايـا

وان مت لا تبخل علـي بدعاويـك .. واطلب لي الغفران وهـذا رجايـا

وامطر تراب القبر بدموع عينيـك .. ما عـاد ينفعـك النـدم والنعايـا

(حسبي الله ونعم الوكيــــــــــــــل)
الله يكون فعونها آميــــــــــــــــن

[ابوعلي اليافعي]

قصيده رائعه ومؤثره ...يعطيك العافيه اخوي سهم طايش

[خاربه خاربه]

روعه والله يهدي الجميع وماينسون يوم لك ويوم عليك

[الراهب]

مشكور على القصيده ... انا سمعت بهذي القصة واظن ان العجوز توفت واتصلو المستشفى بالولد
علشان ياخذ امه يدفنها لكن للأسف ما رد عليهم واندفنت العجوز عن طريق المستشفى ..هذا والله أعلم

[بدور]

أختيار ونقل رائع

[الرميحي]

لكن خساره بعتني اليـوم وشفيـك .. :anger2: واخلصت للزوجه وانا لي شقايـا

انا ادري انها قاسيـه مـا تخليـك . :anger2: . قالت عجـوزك مـا ابيهـا معايـا

[ROSE]

وان مت لا تبخل علـي بدعاويـك .. واطلب لي الغفران وهـذا رجايـا

وامطر تراب القبر بدموع عينيـك .. ما عـاد ينفعـك النـدم والنعايـا


:eek3: قلب الام مهما قسي الابن عليها تدعي له بالهداية


تسلم اخوي سهم طايش بالفعل قصيدة تبكي لها العين والقلب

[سهم طايش]

http://www.charous.com/uploads/8ac17a1c96.gif

للجميع

[لمت داون111]

تدري واحد من اعيال فريجنا مودي امه العجزه !!!!

والله اتذكرها وانا صغير علي افعالها الطيبه وكثر صبرها علي اعيالها الي مايعرفون ولا يقدرون معني ( الام ) وكنت مقهور علي فعلته لدرجه اني تلاغيت معاه لحد ماوصلت السالفه لشبك الايادي

والله العظيم انه عيني دمعت علي هالقصيده وانا اتذكر هالعجوز وكنت ازورها كل اسبوع مره وماطلع الا بخاطرها كل الي تبيه بس ولدها جاب امر منع زياره من الشرطه للمستشفي عشان ماروح لها لا انا ولا اي حد من عيلتي وقرايبي

حسبي الله ونعم االوكيل عليه

تسلم يالغالي علي القصيده :)