شالحل مع الهارد دسك الخارجي اذا تعطل ؟ شوركم وتجاربكم

[SAP]

السلام عليكم

عندي هارد دسك فيه حصيلة 3 سنوات من الملفات والصور الخاصه

وفجاه ضرب علي صرت اشبه مايشتغل جربت على اكثر من كمبيوتر نفس الحاله غيرت الكيبل نفس الشي

الزبده مااايشتغل رغم ان فيه بور

المهم الحين وش الدبره ؟ ماقدر اوديه محل واخليه عندهم لان مثل ماذكرت فيها ملفات خاصه

وش الطريقه حد صار له نفس هالموقف وقدر يصلحه واذا راح محل اتمنى يذكره لي

[بو منيرة]

عظم الله اجرك اخوي :( ... انا عندي نفس المشكله واتوقع الهاردسك الي عندك هو wd

اشبكه بالكمبيوتر وحط اذنك عليه اذا سمعت تك تك تك يكون غالبا ذراع القرائة ضرب وفي هالحالة صعب جدا تصليحة .... انا احتمال اطرش مالي امريكا لان في بعض الشركات عندهم خبرة بالتعامل مع هالمشاكل بس بعد يقولون لك ان مافي شي مضمون فالنهاية ...

جرب حاول تسمع الصوت ورد علي

[Frosty]

انا صارتلي نفس السالفة فـ الهارد دسك مالي ، والمشكلة انه فيه أبحاث وبرامج واشياء ضرورية مخزنها فيه ، عيزت وديته كل مكان محد عرف يصلحه، الا مكان واحد والرجال قالي برجعلك البيانات بـ 1500 ريال، يحسبني غشيم لوول، ادريبه مايقدر يصلحه لان هاي حال الهارد ديسكات، و بس سحبت عليه وحذفت الهارد ديسك في المخزن..
عشان جي لازم يكون عندك هارد ديسك احتياطي، واشتر اغلى واحسن هارديسك عشان ما يعذبك عقب

[Almossafer]

مرحباااااااااااااا

انا عندي هارديسك وكل شي فيه

يعني تقول سنيييييييييييييييييين اللي نزلته بالهارديسك

ضاع

وديته السوفيتيل في هندي حاول فيه كان يطلع صوت لكن بعد مافتح الهارديسك وماقام يطلع صوت

لكن محل واحد وهو معروف بقطر

وكل الشركات تتعامل معاه

وديته عنده وقالي شنو في الهارديسك اذا لشركه بيطلب وايد

لكن قوله هارديسك عادي بس عطه هارديسك جديد علشان يتزلك اللي عليه فيه

بصراحه فنان وعنده اجهزة خاصه للتصليح و رجع الهارديسك كله بس الهارديسك قالي مايتصلح بس ممكن يتصلح ع حسب

المحل بالريان

خلف مطعم الحمره

اعتقد اسم المحل ماتريكس جنب محل لبيع ادوات الصيد (( المحل لاصق بمحل بيع ادوات صيد الاسماك ))

السعر ع حسب الهارديسك يعني اذا طلع البيانات اللي فيه بياخذ منك حساب التصليح اما اذا ماقدر ماراح ياخذ منك شي

من 1000 واكثر ع حسب الهارديسك

في حركه ثانيه تقدر تسويها تشتري هارديسك نفس الماركه ونفسه بالضبط وبيشوفون اي قطعه خربانه ويركبونها في العطلان ويشتغل طبعا بتوفر اكثر

[يراعٌ فراتي]

هل الهارد مع بور ولا يو اس بي بس

يعني لازم تركبه بالكهرب ولا بس يركب على اليو اس بي

عموما
اذا حاب اشوفه لك عطني خبر

احتمال مشكلتك في الكيس نفسه
او في البورد

اما اذا مشكلتك في الهارد نفسه

يعني في البوردة الداخلية للهارد مب البوردة الخاصة بالكيس
احيانا ينفع تشتري نفس الهارد ونفس الحجم والنوع والاصدار واحيانا تضبط واحيانا تحتاج لرفع اي سي من القديم وتركيبها على الجديد كي يتعرف على القرص

بالتوفيق