بغيت اعرف الشروط اللي المفروض تنحط في عقد درايش الالمنيوم

[r07]

السلام عليكم

بغيت اعرف الشروط اللي المفروض تنحط في عقد درايش الالمنيوم مثلا مدة التسليم كم تكون؟؟؟ ...
غرامات عل التأخير وكم تكون الغرامه؟؟....
اذا في نقاط ثانيه يا ليت تذكرونها لي

مشكورين

[captin]

مرحبا اخوي

العقد شريعة المتعاقدين تقدرون تتفقون على الشروط اللي تناسبكم
كطرفي العقد مثل مواصفات العمل وكمياته والمدة والدفعات وغيرها من شروط

إذا كانت الشركة اللي بتتفق وياها شركة قوية ومعروفة ولها سمعة طيبة اطلب من عندهم
عقد نموذجي وشوفه وإذا حبيت تضيف او تعدل فيه اطلب منهم يضيفون لك الشرط اللي تبيه


أهم شي أن العقد يتكون من الأجزاء التالية :

أولا : المواصفات الفنية للالومنيوم مثل النوع والسماكة اللون نوع الزجاج
التشكيلة او الديزاين والكميات بالأمتار .

ثانيا : مدة التنفيذ تحطون مادة تقول أن مدة تنفيذ هذا المشروع مثلا أربعة أو ستة أسابيع من تاريخ توقيع العقد وإستلام الدفعة الأولى .

ثالثا : الدفعات المالية إذا المشروع صغير فيلا أو فلتين جرت العادة في قطر بمعظم ورش الألومنيوم أن تكون الدفعات على مرحلتين 50% عند توقيع العقد و50% بعد التركيب والتأكد من عدم وجود عيوب تصنيع أو كسر بإحدى النوافذ او خدوش وأن الفتح والغلق سهل بجميع النوافذ وأن التنفيذ تم حسب المواصفات.

رابعا: الجزاءات أو غرامات التأخير , تحط مادة تجيز لك خصم مبلغ عن كل أسبوع مادام ذكرت أن مدة الإنجاز في كذا أسبوع فإذا كان العقد قيمته 40,000 ريال وباقي للشركة 20,000 ريال عندك وتأخرت أسبوع أو أسبوعين تقدر تخلي غرامة الأسبوع تكون مبلغ 2000 ريال . وتعتبر دخول ثلاثة أيام من الأسبوع التالي أسبوع غرامة إضافي.


خلاصة الكلام حجم وكبر المشروع هو اللي يحدد مكونات العقد بس انت يمهمك تضمن العقد الأربع أجزاء الأساسية اللي ذكرناها وموفق في مشروعك إن شاء الله.

[r07]

كابتن
جزاك الله خير كفيت و وفيت...

[ahmed jasim]

نسبة مؤوية تدفع بعد التنفيذ حتى لو كانت 10%
مبلغ عن كل يوم تأخير حتى لو ريال باليوم

وأحسن إذا يتم الأتفاق بعد ما يركب شباك واحد كنموذج

[فويرط]

مرحبا

من اي شركة ناوي تركب درايش المونيوم ؟؟

[khaldoon]

اخوي ما راح اتكلم بالعقد....راح اقول شي عن المواصفات وهي انه لازم الشبابيك يتم فحصها ب water test علشان تتأكد انها ما تسرب ماي خلال المطر

ايضا ما في فترة ضمان انه لون الالمنيوم ما راح يتغير بسبب الشمس مثلا و على الجاسكيت ما يتشقق و الاكسسورات و المفصلات ما تصدي و ما تخرب.....الخ (طبعا ما في ضمان على سوء الاستعمال)

[بو نايف]

ما هي.
افضل الورش للنوافذ الالمونيوم