ابي باب المنيوم للميلس .. مشورتكم في المحلات لاهنتوا ..

[بوعلي-Qtr]

السلام عليكم ورحمة الله وبركاته

الميلس ان شاء الله قيد التجديد وابي اغير الباب
بابي حاليا خشب تيك كامل وعريض اللي يجي بابين ..
وابي اركب المنيوم لان الخشب تظربه الشمس وصبغه يخترب مع الوقت يعني مايتم حتى سنه ومافي فايده لكن الخشب باقي الحمد لله من سنة 91 لين اليوم مافيه شي اللهم الصبغ لان الشمس تظربه من الصبح لين بعد العصر بشوي

المهم ناوي احط المنيوم
فياليت اللي عنده محلات معينه شغلهم حلو ومرتب وشي عدل
السعر مايهم المهم الباب شكله حلو وجوده عاليه

واللي عنده صور لبيبان مركبهم او شافهم في مكان بعد يكون افضل عشان نوسع مجال الاختيار

ومشكورين مقدما :)*

[أخو من طاع ربه]

اخوي بوعلي الله يوفقك

شيك على الفلكر عندي وشوف ابواب الالمنيوم وبضيف ابواب المنيوم للمياليس

[Store]

بالتوفيق ان شاء الله

[فويرط]

مر على الدوحة يو بي في سي - طريق سلوى
عندهم اشكال حلوه واسعارهم معقولة مقارنة مع باقي المحلات

[ahmed jasim]

ألمنيوم مشغول
عندك درابزين بلازا وحدادكو فى السد
ودرابزين بلازا فى المطار أو عند مركز المنتزه الصحي
والأبواب الملكية فى الغرافة
والسلامة فى نجمة

أهم شىء الفريم 8 سنتيمتر
وإذا تبى زجاج من الداخل ومن برع أو الشيزان (بلاستيك)

http://www.haddadcoqatar.com/home.htm

[السد]

تبي المنيوم من واقع تجربة محترم وشغل نظيف
المنيوم الحسن ( سوق الحراج )
الباب بيكلفك حوالي 4500 ريال قطري

[ok_ok]

يعطيكم العافيه

[بوفهد555]

درابزين

[ZURICH]

تبي المنيوم من واقع تجربة محترم وشغل نظيف
المنيوم الحسن ( سوق الحراج )
الباب بيكلفك حوالي 4500 ريال قطري

مرحبا السد

ماقلت لنا نوع الالمنيوم .. من سعر التكلفة واضح انه يو بي في سي

[غروب الشمس]

ابعد عن حدادكو بيت اختي كله صدأ

[هارودز]

بالتوفيق و استفدنا من بعض المعلومات

[ahmed jasim]

ابعد عن حدادكو بيت اختي كله صدأ
وين موقع الباب
على السور أو على الفيلا

[غروب الشمس]

بيتها كامل سوته السور وباب الخارجي وباب الصاله حتى لونه طار وزوج اختى ماعطاهم المبلغ كامل لين يصبغونه من جديد ومطنشينهحدادكو

[غروب الشمس]

نسيت اقول لك تونا رايحين درابزين بلازا صاحبه ايراني وله فرعين المطار والمنتزه واخترنا من عنده 4 بيبان ودرابزين الدري الخدمات ووالداخلي ب 45 الف وماعجبنا قال مستعد انزل لكم وناويين ناخذ من عنده بس قلنا نثقل شوي عليه حتى الرجال خدمنا جاب لنا ناس يسوون لنا درايش البيت ومحل خشب يسوي على الدرابزين

[ahmed jasim]

بيتها كامل سوته السور وباب الخارجي وباب الصاله حتى لونه طار وزوج اختى ماعطاهم المبلغ كامل لين يصبغونه من جديد ومطنشينهحدادكو

أنا مركب من 10 سنين من نجمة
باب السور صار حلي والصبغ يتغشر لأنه معرض مباشر للشمس
أما الدرابزين وباب الصالة ماصار عليهم أي تغيير

بالنسبة لدرابزين بلازا
مهم تحطين كل التفاصيل فى العقد
هو أرخصهم بس شرطه يستلم فلوسه قبل التركيب

[بوفصول]

شوف لك بنغالي قطاعي .. يشتغل بدون ورشة .. كان عندي واحد رهيب للأسف ضيعت رقمه
اسعارهم مناسبة وشغلهم نظيف
بالتوفيق..


وبالنسبة للمحلات اسعارهم دبل ..الله يعينك عليهم

[السد]

مرحبا السد

ماقلت لنا نوع الالمنيوم .. من سعر التكلفة واضح انه يو بي في سي

الشيخ المنيوم
سبب التكلفة لانه الباب لون خشبي مش ابيض
دبل غلاس
فيه تشكيلة - زينة داخل الباب لون ذهبي

[بوعلي-Qtr]

الله يرحم والديكم جميعا وماقصرتوا
بمر درابزين وباقي المحلات .. وابي شي يضمنلي شغله ويكون كوالاتي ومثل ماث
قلتلكم مب مهم السعر .. ابي شي يتم مب كل سنه اغيره واصبغه

الدرويش عنده المنيوم ولا بس خشب ؟

[بوعلي-Qtr]

مريت يو بي في اس .. ديزايناته محدوده .. ٨ او ٦ بيبان
عموما الاشكال لطيفه ؛)
والاسعار متفاوته حسب اللون .. الابيض ارخص شي والباقي كل لون له سعر

ورحت حدادكو قالي بسويلك الباب ب٨٠٠٠ ريال .. عسا ماشر

درابزين اسعاره زينه لكن ديزايناته دفشه وماعنده زجاج لازم اجيب من برع
شكلي بروح عن يو بي في اس .. حد عنده فكره عن محلات شغلهم قريب من يو بي في اس ؟ يعني شي سمبل ..*

[.Q a T a R.]

اخوي بوعلي

اذا تبي المنيوم لا يعلا عليه

عليك بالاختصاصي للالمنيوم شارع سلوى

ركبت شبابيك وبواب المنيوم حق عماره عندي من 2001 والحمد الله الى الان الشغل 100%

والي ركبته من المحلات الباقيه يابوعلي في العماير والله سنه ويحتاج صيانه

عندي فلل الان بركب المطابخ من عنده ولاكن الشبابيك خلصت مع الكويتيه لل يوبي في سي

ولاكن للامانه المنيوم عنده وانت مقمض سعره غالي لاكن ايعيش ويفكك من الصيانه

[بوعلي-Qtr]

والله واحد من الشيبان وصاني عليه يقول ٢٠ سنه الباب ولين الحين تمام
المشكله رحت سلوى وماحصلته .. وين بالظبط مكانه؟

[A.L.I]

انصحك بل يو بي في سي اخوي

[almaf1a]

جيبلك نجارين مصرين
يحكون لك الباب ويزينونه بقطه ومقابض جديده
وان شاء الله بيتم الين 2021

[بوعلي-Qtr]

علي
يو بي في سي ماعندهم الا ٨ موديلات تقريبا .. هم حلوين بس مجال الاختيار ضيق نوعا ما
عموما شكلي بستقر عليه

..

المافيا
الخشب مايتم ياخوي .. الشمس تظربه مباشرةً .. الصبغ على طول يخترب

[.Q a T a R.]

يالضبط ماني بعارف اي دوار هو

ولاكن ونت جاي من قبله رايح شرق عند قبل بنك الدوحه الاسلامي

علامته زرقا مكتوب عليها الاختصاصي

الله يوفقك ان شاء الله

[PGR]

اخوي بوعلي

اذا تبي المنيوم لا يعلا عليه

عليك بالاختصاصي للالمنيوم شارع سلوى

ركبت شبابيك وبواب المنيوم حق عماره عندي من 2001 والحمد الله الى الان الشغل 100%

والي ركبته من المحلات الباقيه يابوعلي في العماير والله سنه ويحتاج صيانه

عندي فلل الان بركب المطابخ من عنده ولاكن الشبابيك خلصت مع الكويتيه لل يوبي في سي

ولاكن للامانه المنيوم عنده وانت مقمض سعره غالي لاكن ايعيش ويفكك من الصيانه

انا رايي من راي اخوي الاختصاصي مشهور وشغلهم ما شاء الله نظيف والله يوفقك

[بوعلي-Qtr]

بس حصلت فرع النصر .. والله شغلهم مظبوط
تسلمون وماقصرتوا وان شاء الله بتوكل علئ الله

[خبير صيانة]

مر على الشرق - قرية بروة طريق الوكرة
عندهم اشكال حلوه
واسعارهم معقولة
وخبرة كبيره
مقارنة مع باقي المحلات
ت 44151544

[بو الجوري]

بس حصلت فرع النصر .. والله شغلهم مظبوط
تسلمون وماقصرتوا وان شاء الله بتوكل علئ الله

أخوي تقصد الإختصاصي و إلا ؟
و وين مكانه فالنصر

[راشد1]

يا أخوان والله شي غريب... إدارة المنتدى يسمحون لبعض الأعضاء بوضع اسم ورقم شركات يسولهم دعاية وبعض الأعضاء يكنسلون مشاركاتهم إذا نصحو بشركة ويوقفون عضويتهم بعد ؟!! حد عنده إجابة ليش...؟!!

[الســـهم]

عزيزي راشد1 ..

أولا :-
في قسم للشكاوي تقدر تحط شكوتك واقتراحك فيه , وراح تلقى شكوتين مني عليك بنفس القسم , واذا عندك اي اعتراض على شكوتي تقتدر تشتكيني عند الادارة ..

ثانيا :-
بما انك غير قطري , فما في اي داعي تتكلم بالعامية القطرية وانت ماتتقنها , وخلك بلهجتك العامية وبنكون مستوعبين كلامك , لأني لاحظت كثرة اخطائك بالكلمات العامية ..

ثالثا :-
تبي تقنعني من مشاركتك بأنك تعاملت مع الشركة وتنصح الناس فيها ومب قصدك الدعاية , اول مرة اشوف شخص ينصح بشركة ديكور والموضوع يتكلم عن مشكلة في بوكسات الكهرباء وصاحبها يبغي يعرف هل فعلا هي المواصفات اللي تفرضها كهرماء ..

رابعا :-
بالإسلوب اللي تتعامل فيه حاليا بالمنتدى والكم الهائل من الدعاية , تأكد إنك انسان فاشل جدا فالتسويق , وتأكد انك تنفر الناس عن شركتك اكثر من انك تجذبهم ..

وأخيرا :-
استخدام اكثر من معرف مخالف لقانون المنتدى , وعليه اشوف مكانك مش بينا في المنتدى , والامر متروك للادارة تتخذ فيك الاجراء اللازم ..