شوفوا المقاول شسوا معانا ؟

[w.qatar]

السلام عليكم مساء الخير علجميع
ابغي اخذ رايكم بموضوع المقاول مادري هل اللي سواه صح ولا مو من حقه
احنا زدنا على دفعات بنك التنمية 120 الف ريال فقط و باقي من دفعات البنك 400 ألف ويخلص المقاول شغله كنا ناوين نعطيه ال120 بعد ما يخلص الاعمال كلها لان المطبخ احنا اللي بندفع فلوسه مب على بنك التنمية قلنا يخلص كل شي ونعطيه فلوسه اللي علينا المهم هو رفض هالشي و يبي فلوسه الحين مع ان الفيلا عظم حاليا واستلم من البنك 600 ألف لا بلاستر ولا شي و عطانا كتاب ايقاف العمل
دلونا الحين هل هو على حق ولا لا ؟ احنا نخاف يستلم كل فلوسه قبل ما يخلص اللي عليه و نشوف شغله شلون ؟؟ يعني لي ضمن كل فلوسه في مخباه يمكن يستهتر في باقي الشغل
انتو شرايكم الحين نعطيه كل الفلوس و لا لا هل نقدر نخليه يكتب تعهد يضمن حقوقنا اذا بنسلمه ولا ما يصير وهل بنك التنمية ممكن يتدخل في هالامور و يخليه يخلص شغله و لا مالهم خص ؟؟

[w.qatar]

ومشكورين مقدما على المساعدة

[مهل]

والله مالي ذيك الخبره ... بس اضن ان الدفعات و طريقه الدفه تكون موضحه بالعقد

[قطري قديم]

مرحبا يفترض ان العقد يكون ملزم للطرفين ويوجد في العقد جدول يوضح الدفعات وكل دفعه متىاستحقاقها ارجع ياخوي للعقد وتشوف الشروط هل انت علي حق او المقاول علي الحق والله يوفقكم انشاء الله .

[قناص 787]

اول شي من حق المقاول ياخذ المبلغ اللي متفق عليه في العقد لا اكثر ولا اقل

ثاني شي مايقدر انه ياخذ المبلغ ومايكمل الشغل اللي باقي عليه لانه في عقد يلزمه

ثالث شي المفروض تمشون معاه على نظام الدفعات يعني لا تسبقون الدفعات

ومادري هل هذا اللي تقصده ياخوي لان هذا اللي فهمته من سؤالك

[حمد 2002]

على حسب العقد الي بينكم اذا ال 120 الف انت متفق معاه بالعقد انه اتسلمها اياه في نهايت البناء فأنت على حق ، اما اذا انت متفق معاه بالعقد على شي ثاني فهاذا امر اخرر

[khaldoon]

ما تعطوه فلوسه وهو مب مخلص شغله لانه ما راح يكمل لكم الشغل و بغلبكم كثير

من حقكم تعطوه فلوسه لما تكونوا راضيين عن الشغل فعلا من حيث جودة العمل ..اما لو انتم رافضين الشغل و معطينه فلوسه فرفضكم ما له اي قيمة

لو افترضنا انه كان طيب معاكم و اشتغل بعد ان قبض فلوسه و هالشي صعب فكيف برأيك راح يكون مستوى العمل؟...ايش اللي بخليه يشتغل بمستوى جيد و فلوسه بجيبه...مثل الطالب اللي نجح وترفع على صف اعلى و بعدين قلت له تعال ادرس وقدم الامتحان مره ثانيه و هو بجميع الاحوال تم ترفيعه فتعتقد انه بيدرس او بيهتم بالنجاح مره ثانية؟!

لو ما كمل شغله فراح تضطروا تلجأوا للمحاكم او انكم تخلوا مقاول ثاني يكمل شغله و سعر المقاول الثاني تقريبا من مره و نصف الى مرتين على الاقل خاصة انه الشغل المتبقي مب كبير ومب مغري لاحد انه يكمله لو ما كان فيه مكسب حلو

[باتريوتP]

ارجع للعقد المبرم بينكم
وهل له دفعه مستحقه الحين ولا لا
لان كل عقد بناء فيه مراحل الدفعات وتسلسها
اذا كانت له دفعه مستحقه يعني لازم تسلمونه الدفعه بموجب سند قبض موقع ومختوم
واذا بالعقد مايستحق دفعه لاتسلمونه دفعه ويحق لكم اجباره بأستكمال العمل غصب عنه
واذا رفض يعتبر هو المتسبب بالتأخير وتحسب عليه الغرامه الماليه ويحق لكم اللجوء للقضاء
ولكن
لنفرض له دفعه ويستحق , فبهذة الحاله انصحكم عمل جلسة صلح بين بعض واتفاق على دفعه جزئيه
وليست دفعه كامله بشرط اعفاء المقاول من فترة التأخير عشان يتطمن
لان اغلب المقاولين يخلصون العقد ويسلمون البناء ومحد يرد لهم الدفعه الاخيره
قد يكون المقاول خايف من هالشي
ولكن اذا رفض الحل فواجب عليكم تسليمه الدفعه
مع العلم ان لو ترك الشغل بعد اخذه لدفعه يمكنكم اللجوء الي قضية مستعجله ( اثبات حاله) مدتها بالكثير شهر ونص او اللجوء الي مركز قطر الدولي لتوفيق والتحكيم وان شاء الله تنحل المشكله
ولكن اذكركم ان العقد شريعة المتعاقدين
والسلام عليكم ورحمة الله وبركاته

[بايع بايع]

اذا خلص شغله ... سلمه فلوسه
اذا ماخلص شغله ... لاتسلمه فلوسه

وبس

[أبو البنات]

وين الاستشاري ؟؟؟

احنا دلعنا هالاستشاريين مع ان من مهامهم إنهم يشيكون على كل دفعة وبقولون لكم هل الدفعه مستحقه أو لأ

[بن مشهور]

بالتوفيق

[قطري عصامي]

هذي مسؤوليـــة الاستشاري ، إرجع حق الاستشاري وخله يقبض المقاول من إذنه ، لأنه شغل متابعة الاعمال هي مسؤولية الاستشاري وعلى هالاساس انت تدفع للاستشاري

[فنجان قهوة]

خاطري اعرف ايش جنسية هالمقاول ... اذا كانوا من الي في بالي؟