استفسارات ضروريه في بناء المنزل ( حياكم ياخبراء افيدوني)

[غير البشر]

السلام عليكم ورحمه الله وبركاته

عندي كم استفسار واتمنى انكم اتفيدوني
والف شكر لكم مقدما :nice:

1- لمايخلصون من القواعد هل بالضروره يحطون طابوق بين القواعد قبل الدفان .

2- كم عدد رشات المبيدات ضد الارضه والحشرات ؟ ومتى ( في اي مرحله )

3- متى يجب على المقاول وضع النايلون المقوى

4- ياريت اذا حد جرب او عنده خبره في البيبات المخفيه تحت الارض لعمليه لرش المبيدات تحت الارض مستقبلا

5- ممكن حد يرشح لي استشاري ممتاز ووتكون مواعيده مضبوطه

6- نصايح عامه ( اي حد عنده نصيحه في هذي المرحله يقدر ينصحني فيها:nice: )


وتقبلوا تحياتي :victory:

[صمت 1]

السلام عليكم ورحمه الله وبركاته

عندي كم استفسار واتمنى انكم اتفيدوني
والف شكر لكم مقدما
ان شاءالله اخوي اقدر افيدك انا بادي من تو في البناء كل خطوه استشير فيها الاستشاري

1- لمايخلصون من القواعد هل بالضروره يحطون طابوق بين القواعد قبل الدفان .
ج -مش ضروري خساير على الفاضي فقط حول الفله والملاحق

2- كم عدد رشات المبيدات ضد الارضه والحشرات ؟ ومتى ( في اي مرحله )
ج - اعتقد مالها داعي لانك بتغطي الدفان بنايلون وشبك ونظافه والمبيد الحشري تتوقع كم مدة صلاحيته شهر شهرين ثلاث انا شايل فكرة المبيد

3- متى يجب على المقاول وضع النايلون المقوى
النايلون يحطونه قبل مرحلة الدفان بعد وضع القار
على القواعد والسورالبين القواعد وبعد الدفان تحت الشبك الحديدي
4- ياريت اذا حد جرب او عنده خبره في البيبات المخفيه تحت الارض لعمليه لرش المبيدات تحت الارض مستقبلا
اعتقد مالها داعي

5- ممكن حد يرشح لي استشاري ممتاز ووتكون مواعيده مضبوطه
اخوي الاستشاري شغله معروف مش كل وقت يكون في الموقع اوقاته قبل صب القواعد وقبل كل صبيه

6- نصايح عامه ( اي حد عنده نصيحه في هذي المرحله يقدر ينصحني فيها )
اهم شي انك تكون مقتنع من الخرايط اللي مسويه وانك اذا حاب تركب حجر لا تعمل بلاستر خارجي للفله وانا انصحك انك تلغي الكرانيش وتخلي البيت
ساده وتمدد بيبات ازياده احتياطيه للكهرباء وانك لاتدخل في شغل المقاول

[قطري قديم]

السلام عليكم ورحمه الله وبركاته

عندي كم استفسار واتمنى انكم اتفيدوني
والف شكر لكم مقدما :nice:

1- لمايخلصون من القواعد هل بالضروره يحطون طابوق بين القواعد قبل الدفان .
صحيح اخوي الدفان يكون بين القواعد قبل الدفان امر ضروري

2- كم عدد رشات المبيدات ضد الارضه والحشرات ؟ ومتى ( في اي مرحله )
رشه وحدة اساسيه واذا حبيت تزيد انت ومجهودك
3- متى يجب على المقاول وضع النايلون المقوى
النايلون بعد مايصف الطابوق بين القواعد يرش قار اسود داخل وبرا وبعدين يغطيها بنايلون مقوي4- ياريت اذا حد جرب او عنده خبره في البيبات المخفيه تحت الارض لعمليه لرش المبيدات تحت الارض مستقبلا
انشاء الله يفيدونك الاعضاء

5- ممكن حد يرشح لي استشاري ممتاز ووتكون مواعيده مضبوطه
عندك مكتب الريم للاستشارات الهندسيه مواعيدهم مضبوطه 100%
6- نصايح عامه ( اي حد عنده نصيحه في هذي المرحله يقدر ينصحني فيها:nice: )
اهم شي ياخوي يرشون الطابوق الي بيصفونه بين القواعد بالماء رش يومي حتي يقوي الاساس .
وتقبلوا تحياتي :victory:
الله يوفقك اول وتالي يالغالي .

[khaldoon]

السلام عليكم ورحمه الله وبركاته

عندي كم استفسار واتمنى انكم اتفيدوني
والف شكر لكم مقدما :nice:

1- لمايخلصون من القواعد هل بالضروره يحطون طابوق بين القواعد قبل الدفان .

اخوي في ناس تحط الطابوق تحت الجسور الارضيه الخارجية فقط للمبنى و يكون المبنى من الداخل كأنه قطعة واحده بحيث انه لابد ان يكون الدك للدفان جيد تحت الجسور الارضية الداخلية

و في ناس تحط الطابوق تحت كل الجسور الارضية و الخارجية منها

و في ناس ما تحط طابوق نهائيا و تقوم بدك المبنى بشكل جيد و لازم الدفان في جميع الحالات انه ينجح و يجيب فحص كل طبقة 95% من قيمة البروكتور الخاص بالدفان...يعني الدفان يؤخذ منه عينات عشوائية و يتم فحصها لتحديد هذا البروكتور و كل طبقة 15سم بس ما احد يلتزم بهذه السماكة للاسف الشديد

2- كم عدد رشات المبيدات ضد الارضه والحشرات ؟ ومتى ( في اي مرحله )

بصراحه ما عندي علم بعدد الرشات بس اهتم اني احصل على شهادة رسمية بالرش من شركة متخصصة بالرش و معتمدة من الدولة و لا تسمح بصب الارضيات الخرسانية لبيتك قبل الحصول على هذه الشهادة و اهمية الرش انه ان شاء الله تضمن ان بيتك ما يجيه نمل ابيض في المستقبل و فكرة انك تخلي البايبات بحيث انك ترش بواسطتها مستقبلا تفكير ذكي و جيد

3- متى يجب على المقاول وضع النايلون المقوى

النايلون المقوى اسمه بوليثين شيت و يكون 1000 جيج و لا يمكن قطعه الا بالسكين يعني ما تقدر تقطعه بيدك المجردة و لازم يوضع على جميع الاسطح الخرسانية المدفونه تحت الارض من قواعد و رقاب اعمدة و جسور ارضيه و الصبيات الارضيه ....يعني اي جزء من الخرسانه فيه حديد لحماية الحديد انه يصدي من الرطوبه بسبب الماء اللي في الدفان او في الارض لو ارتفع منسوب المياه

انتبه انه النايلون او البوليثين شيت اللي يكون 500 جيج تقدر تقطعه بيدك بسهوله ولا تخلي المقاول يغشك و يركبه لانه كثير منهم يسوي هالشي للاسف الشديد بحجة انه النايلون 1000 جيج غير متوفر مع انه هالشي غير صحيح

اما لو اضطريت تسمع كلامه فخليه يركب طبقتين 500 جيج و انتبه دائما على overlab يعني الوصلات بين النايلون بحيث انها ما تقل عن 30 سم و تتأكد انه كل الاسطح الخرسانية مغطية تماما بعد عزلها و قبل الدفان مباشرة

4- ياريت اذا حد جرب او عنده خبره في البيبات المخفيه تحت الارض لعمليه لرش المبيدات تحت الارض مستقبلا

5- ممكن حد يرشح لي استشاري ممتاز ووتكون مواعيده مضبوطه

6- نصايح عامه ( اي حد عنده نصيحه في هذي المرحله يقدر ينصحني فيها:nice: )

اسأل و انا بجاوبك ان شاء الله...اما سؤال عام ما اقدر الصراحه
وتقبلوا تحياتي :victory:

بالتوفيق ان شاء الله

[MAZEN37]

ايش تفضل اخ خلدون يكون الطابوق بين القواعد قطعه وحده ؟
بعد اذن صاحب الموضوع

[khaldoon]

ايش تفضل اخ خلدون يكون الطابوق بين القواعد قطعه وحده ؟
بعد اذن صاحب الموضوع

والله يا اخوي هو في توفير جيد في الطابوق تحت الجسور الارضيه

ما في اي مشكلة لو سويته بس تأكد انك دكيت الدفان بشكل جيد جدا

لو بغيت تراقب الطبقات من حيث السماكه فالافضل تسويه لكل غرفه و لو ما سويته لا يعتبر خطأ




افضل دفان للبيت يعني اللي ندفن فيه الغرف هو التربه الطبيعيه نفسها اللي كانت موجوده نعيد دفنها بعد ان نغربلها و نشيل منها الاحجار الكبيره اللي تكون اكبر من 20 سم في اتجاهين (يعني لو انها كبيره ب 20 سم او اكثر باتجاه واحد فتكون مثل الشريحه فما مشكله يمكن نستخدمها)

طبعا التربه لازم ما تحتوي على مواد عضويه و املاح ولا طين و وحل و نفس الشي بالنسبه للماء المستخدم في الدفان و الدك لا يحتوي على املاح ولا مواد عضويه ولا ملون من مصبغه

علشان تعرف كم طبقة دفنت و سماكة كل طبقة قسم الارتفاع من الجسر الارضي و الطابوق اللي تحته كل 15 سم و اكتب على كل قسم رقم 1و2....فتعرف كم طبقة لازم تدفني

طبعا تقسيم الطبقات كل سم هو الافضل بس ما احد يلتزم فيه بس على الاقل اجبري المقاول انه يدفن كل 30 سم وتقدر تراقب بنفسك هالشي لو كررت زياراتك خلال الدفان فتعرف ايش الرقم اللي كنت تشوفه و الحين اختفى ...يعني كنت عند رقم 2 و الزياره الثانيه صرت عند رقم 7 يعني معناته دفن 5 طبقات اي 75 سم و هذا شيء غير مقبول

و كل طبقتين يدكهم و يجيب الدك 95% من قيمة البروكتر للتربه

[غير البشر]

اخوي الغالي صمت1 واخوي الغالي قطري قديم
الله يجزاكم خير على الافاده الحلوه الله يوفقكم دنيا واخره يارب

اخوي خلدون جزاك الله خير على التوضيح الواضح والمفيد جدا

وان شاء الله بتواصل معاك

اخوي مازن خذ راحتك الشيخ الموضوع موضوعك