المساعد الشخصي الرقمي

مشاهدة النسخة كاملة : المدارس في قطر و سياسة الغنم


الوان
22-09-2011, 09:19 AM
المدارس في قطر و سياسة الغنم

الناس تتطور و احنا نرجع ريوس .. الظاهر ان الجير خربان!!!

قمنا الصبح في اول يوم للمدرسة

و اكتشفنا ان المديرة تغيرت و غيرت النظام بالكامل

ليش محد خذ راي اولياء الامور .. احنا غنم!!

او على الاقل عطونا فكرة عن سياستها الجديدة في المدرسة عشان نتخذ قرار

ان نخلي عيالنا في المدرسة او نغير المدرسة و نخلص من عوار الراس

بنتي من 3 سنين في المدرسة .. و 3 سنين تحب المدرسة ....

اما الحين كرهت المدرسة

من اول يوم المدرسات عشان يفرضون سلطتهم هاوشو الطلاب ...

الظاهر ان متابعين مسلسل تصانيف و يبون يجربون

الصغيرة في صف اول ماسكه في عباتي بس ابي اوصلها الصف ...

نقزت لي وحده المفترض انها استقبال تركض وراي ممنوع ممنوع ...

ليش انا باقعد مع البنت في المدرسه انا باوصلها الصف و باطلع !

كل اللي سمعناه في المدرسة كلمة ممنوع

و افرضوا طابور على البنات

و العام ما كان في طابور بل كانت عندهم نائبة اكاديمية ممتازه

تقعد تلعب البنات الصبح من غير طابور ولا شي البنات يجتمعون حولها

الحين طابور صباحي .. و مدرسة صفا و انتباه

و صفقة الصباح و شغلات وايد

و من المفترض ان الطابور على كلامهم 10 دقايق... ما اظن !!!

و عشان وقت الطابور مددوا وقت المدرسة الى الساعة وحده و نص

ليش احنا غنم ... المديرة تقعد تشرب شاي العصر و تتفكر شتسوي في المدرسة

عشان تثبت وجودها واحنا و اعيالنا نتعذب

اهي المديرة نفسها كانت مديرة الروضة

كنت اروح اخذ بنتي من الروضه احصل الباب مقفول و الطوفه كلها زجاج

اليهال في الساحه يطالعون امهاتهم ما يخلونهم يطلعون لازم يخلصون الوقت

و هم قاعدين في الساحه بدون شغل

و الامهات على الجهة الثانية يطالعون بناتهم مب قادرين ياخذونهم

روحوا المدارس الخاصة شوفوا شلون يلعبون اليهال وقت الانصراف

و الصبح الياهل سيده يروح صفه تستقبله المدرسة و تعطيه معجون يلعب

او ورقة يرسم اما احنا نمشي على سياسة الغنم

اخذوا اليهال و حطوهم في الحوطه و مالكم شغل يا اولياء الامور

لازم اولياء الامور يكون لهم دخل بكل قرار له علاقة بسياسات المدارس

احنا مب غنم

سمو الامير عطانا حرية الانتخاب

و احنا بنمشي على خطاه و بناء على ما نصه الدستور

مب بناء على ما تبيه مديرات المدارس و غيرهم ممن يتخذ قرارات دكتاتورية

مادري ليش نظرة المدارس لأولياء الامور انهم ناس جهله

احنا ناس متعلمين تربويين نخاف الله

و ما نرضى بالغلط على عيالنا

و المدارس انشئت للطلاب

مب لايجاد فرص عمل للمديرات و المعلمات و ابداعاتهم العجيبة

احنا مب غنم

و حسبي الله و نعم الوكيل
الدمعه
22-09-2011, 12:32 PM
معاج في كل كلمه قلتيها ..

من اول مسج جاني قلت الله يستر ..

اصلا المديره اللي قبل ماتنازلت عن المدرسه الا للي تشوفها في نظرها افضل في

تطفيش الامهات ..

اما اللي على الاستقبال .. الله يعيننا عليها داشة جامد ماتبتسم ولا تعطيج وجه ..

3 مرات متواجهه معاها ولا مره ابتسمت .. حتى الصدقه مستكثرتها ..

الله يهديهم .. بس لايفوتج كتاب اللغه العربيه حق صف ثالث .. شكلي بسوي موضوع

يخص كتب المدرسه بالصور والبراهين ..
JN000N
22-09-2011, 12:44 PM
لا حول ولا قوة الا بالله

قلتيها نريوس ولا نتقدم

جني بي اجوف جيل جاهل ياي يركض عقبنا
حسن
22-09-2011, 12:48 PM
والله المشكله الكبرى مهب في المجلس البلاءكله من مديرات المدارس ويعدين كان لمحتي عن المدرسه ولا اسمها اومكانها علشان توضح الصوره للقراء سواء من الاجهزه ولا الجمهور
بايع بايع
22-09-2011, 12:58 PM
اختي المديره عليها مسؤوليات وتحاول تقوم فيها

ومن ضمنها تامين المدرسه من دخول الغرباء فتلاقينها حريصة على الطالبات من خوفها عليهم لانهم امانه عندها الين يجون اهاليهم وياخذونهم

اما سالفة طول الدوام والممنوع والاجراءات والتعليمات الادارية الجديده

احتمال عندها وجدهت نظر وخطة عمل تبي تشتغل من خلالها في تطوير المدرسه والدراسة

ومن عاداتنا نرفض كل جديد لمجرد الخوف من التغيير

أما سالفة الانتخاب والدستور .... ( ؟؟؟؟؟؟؟ )

اما بالنسبة لاستغفال اولياء الامور والنظر لهم على انهم جهله يمكن سببه كثره حرص اولياء الامور على راحة اعيالهم ودلعهم الزايد لهم

والله المستعان
المسك1969
22-09-2011, 01:03 PM
أنا استغرب ليش منع الأم من دخولها مع الطفله للصف؟

من حق ولي الأمر أن يدخل ليتابع عن كثب مايفعل ابنه أو بنته؟ ولما قلت هالشيء لأختي التي هي اداريه... عن استغرابي عن عدم السماح لي قالت:"لازم تطلبين عشان يسوون لج يوم خاص" مادري نسيت شنو سمته

قلت لها:"لا والله.. أنا أبي أشوف وقتها مب كل وحده في اليوم اللي بحضر تتقمص شخصية مب شخصيتها عشان ترويني أنها فلته مثلا"

المشكله في مدرسة الفرقان الخاصة لا يسمحون للأم بدخول المدرسة...يه... انزين لو الأم هذه هي ولية الأمر... وهي مطلقة أو أرمل... وداشة لكل بستر... يابلفيت اللي في المدرسة مايشوفون حريم ومايطلعون خارج سور المدرسة

وانطري الناطور... ونعطل مصالحنا لين حضرة الناطور ايي بعد ساعة إلا ربع:anger1:

أهو الأمر أفضل من الدخول بس أحيانا يريد ولي الأمر انهاء أمر ابنه بسرعه حتى يذهب لقضاء مشاويره الأخرى

أتمنى والله ترجع المدارس حكوميه ... اشفيها ماما وبابا...اشفيها دا دو دي

علمتنا وتخرجنا من أفضل الجامعات... مادري شنو بيضيفون للجيل الجيل من جديد والله المستعان

جزاكم الله خيرا:nice:
المسك1969
22-09-2011, 01:09 PM
[QUOTE=بايع بايع;7642419]اختي المديره عليها مسؤوليات وتحاول تقوم فيها

ومن ضمنها تامين المدرسه من دخول الغرباء فتلاقينها حريصة على الطالبات من خوفها عليهم لانهم امانه عندها الين يجون اهاليهم وياخذونهم

يا بايع حفظك الله... أن كنت أنا كأم وشافت بطاقتي الشخصيه وعقب قالت ممنوع الدخول... قلت لها نادي ولدي ابي اتطمن عليه كان الصبح تعبان.. قالت لا الحين حصة

قلت لها أنا لي من 9:30 اتصل لين 11 ومحد يرد علي أو مشغول فخفت وييت اشوف شسالفه والحين ممنوعه من أني اروح اشوف ولدي أو تنادينه لدقائق:eek5:

زمااان كانت الامهات تدخل المدارس وللصف.. تكلم المدرسة وتسلم عليها وتسالها عن بنتها وتروح...

محد يطلع لا الحين ولا زمان من المدرسة ألا لما يتحققون من شخصية اللي مع الطالب أو الطالبه

بس الحين سياستهم خطأ... فصلوا أولياء الأمور عن المدرسين والمدرسات
بايع بايع
22-09-2011, 01:14 PM
[quote=بايع بايع;7642419]اختي المديره عليها مسؤوليات وتحاول تقوم فيها

ومن ضمنها تامين المدرسه من دخول الغرباء فتلاقينها حريصة على الطالبات من خوفها عليهم لانهم امانه عندها الين يجون اهاليهم وياخذونهم

يا بايع حفظك الله... أن كنت أنا كأم وشافت بطاقتي الشخصيه وعقب قالت ممنوع الدخول... قلت لها نادي ولدي ابي اتطمن عليه كان الصبح تعبان.. قالت لا الحين حصة

قلت لها أنا لي من 9:30 اتصل لين 11 ومحد يرد علي أو مشغول فخفت وييت اشوف شسالفه والحين ممنوعه من أني اروح اشوف ولدي أو تنادينه لدقائق:eek5:

زمااان كانت الامهات تدخل المدارس وللصف.. تكلم المدرسة وتسلم عليها وتسالها عن بنتها وتروح...

محد يطلع لا الحين ولا زمان من المدرسة ألا لما يتحققون من شخصية اللي مع الطالب أو الطالبه

بس الحين سياستهم خطأ... فصلوا أولياء الأمور عن المدرسين والمدرسات

بالنسبة لحالتج وظروف ولدج

رايي رفض المديره يعتبر تعسف منها
ولازم يتم تنبيها لمراعاة ظروف الطلاب الصحيه والسماح لاهاليهم الاطمأنان عليهم ولو مره باليوم
شيزكيك
22-09-2011, 01:56 PM
انا بنتي بعد في الصف الاول ولانها رايحه روضة وتمهيدي قبل قلت اكيد متعوده على جو المدارس

اول يوم قلت بنزلها علشان ادل وحصلت المديرة بنفسها تستقبلهم وتسلم علينا وتبوس البنات ودخلتهم القاعه

الرياضية وسوو لهم حفلة ويابو لهم شخصيات

وخلاص من ثاني يوم بنتي تنزل بروحها المدرسة
Locale
22-09-2011, 02:15 PM
من اول يوم صراخ عالطلاب تخويف وتكريه للمدرسه

كلش ماعندهم اسلوب تربووي
الوان
22-09-2011, 02:40 PM
من اول يوم صراخ عالطلاب تخويف وتكريه للمدرسه

كلش ماعندهم اسلوب تربووي

بصراحه الكلام شي

و اللي اشوفه بعيني و انا اخذ بنتي شي ثاني

اسلوب الصراخ هذا متى بينتهي مادري

شكلي باشتكي في حقوق الطفل

لازم الكل في المدرسة يتعلم شلون يتحكم بنبرات صوته

و ما يرفعها عشان يسيطر على اليهال

الواحد يقدر يطلب من الياهل ان يقعد بدون ما ينطق بحرف
الوان
22-09-2011, 02:43 PM
معاج في كل كلمه قلتيها ..

من اول مسج جاني قلت الله يستر ..

اصلا المديره اللي قبل ماتنازلت عن المدرسه الا للي تشوفها في نظرها افضل في

تطفيش الامهات ..

اما اللي على الاستقبال .. الله يعيننا عليها داشة جامد ماتبتسم ولا تعطيج وجه ..

3 مرات متواجهه معاها ولا مره ابتسمت .. حتى الصدقه مستكثرتها ..

الله يهديهم .. بس لايفوتج كتاب اللغه العربيه حق صف ثالث .. شكلي بسوي موضوع

يخص كتب المدرسه بالصور والبراهين ..

احنا بالنسبة لهم ما نعرف شي

اليوم مسوين اجتماع بس عشان يتكلمون

يادوب عطو كم وحده فرصه يتكلمون

و كله على كلامهم جزء من خطه

مادري شنهي الخطه !!!!

و محد تكلم و بردوا قلبه

بصراحه قررت اني انقل بناتي في اول فرصه

لأن ما اقدر اخليهم في مدرسة نظامها عسكري
الوان
22-09-2011, 02:45 PM
لا حول ولا قوة الا بالله

قلتيها نريوس ولا نتقدم

جني بي اجوف جيل جاهل ياي يركض عقبنا

كل شي في يدنا

نقدر نعترض و نقول لا

مب مجبورين بهالتعليم

ولا التعليم القديم

كلهم غلط

بس لو يعطوني فرصه !!!!
الوان
22-09-2011, 02:46 PM
والله المشكله الكبرى مهب في المجلس البلاءكله من مديرات المدارس ويعدين كان لمحتي عن المدرسه ولا اسمها اومكانها علشان توضح الصوره للقراء سواء من الاجهزه ولا الجمهور

خلنا بعيد عن التشهير

و بعدين كل المدارس فيها نفس المشاكل تقريبا
الوان
22-09-2011, 02:49 PM
اختي المديره عليها مسؤوليات وتحاول تقوم فيها

ومن ضمنها تامين المدرسه من دخول الغرباء فتلاقينها حريصة على الطالبات من خوفها عليهم لانهم امانه عندها الين يجون اهاليهم وياخذونهم

اما سالفة طول الدوام والممنوع والاجراءات والتعليمات الادارية الجديده

احتمال عندها وجدهت نظر وخطة عمل تبي تشتغل من خلالها في تطوير المدرسه والدراسة

ومن عاداتنا نرفض كل جديد لمجرد الخوف من التغيير

أما سالفة الانتخاب والدستور .... ( ؟؟؟؟؟؟؟ )

اما بالنسبة لاستغفال اولياء الامور والنظر لهم على انهم جهله يمكن سببه كثره حرص اولياء الامور على راحة اعيالهم ودلعهم الزايد لهم

والله المستعان

الحين والله لو تجي وحده غريبه و تاخذ بنتي و توقع محد بيسأل هاي امها ولا لا

اي سلامه و أمان الله يهديك

اما عن سياسات المدرسة من حقنا ان يكون لنا راي فيها و بقوة

اما الي ذكرته في اخر سطر

محد ما يبي مصلحة عياله و الناس في قطر مب جهل و الكل اقل شي عنده شهادة ثانوية و فاهم و يعرف مصلحة عياله

هم بس ما يبون عوار الراس

لكنها امانة و بينسألون عنها
الوان
22-09-2011, 02:50 PM
أنا استغرب ليش منع الأم من دخولها مع الطفله للصف؟

من حق ولي الأمر أن يدخل ليتابع عن كثب مايفعل ابنه أو بنته؟ ولما قلت هالشيء لأختي التي هي اداريه... عن استغرابي عن عدم السماح لي قالت:"لازم تطلبين عشان يسوون لج يوم خاص" مادري نسيت شنو سمته

قلت لها:"لا والله.. أنا أبي أشوف وقتها مب كل وحده في اليوم اللي بحضر تتقمص شخصية مب شخصيتها عشان ترويني أنها فلته مثلا"

المشكله في مدرسة الفرقان الخاصة لا يسمحون للأم بدخول المدرسة...يه... انزين لو الأم هذه هي ولية الأمر... وهي مطلقة أو أرمل... وداشة لكل بستر... يابلفيت اللي في المدرسة مايشوفون حريم ومايطلعون خارج سور المدرسة

وانطري الناطور... ونعطل مصالحنا لين حضرة الناطور ايي بعد ساعة إلا ربع:anger1:

أهو الأمر أفضل من الدخول بس أحيانا يريد ولي الأمر انهاء أمر ابنه بسرعه حتى يذهب لقضاء مشاويره الأخرى

أتمنى والله ترجع المدارس حكوميه ... اشفيها ماما وبابا...اشفيها دا دو دي

علمتنا وتخرجنا من أفضل الجامعات... مادري شنو بيضيفون للجيل الجيل من جديد والله المستعان

جزاكم الله خيرا:nice:

لأنهم ما يبون اولياء الامور يعرفون هم شقاعدين يسوون

بس انا مش معاك بالنسبة للمدارس الحكومية

كان لهم مساوئ كبيره
الوان
22-09-2011, 02:53 PM
انا بنتي بعد في الصف الاول ولانها رايحه روضة وتمهيدي قبل قلت اكيد متعوده على جو المدارس

اول يوم قلت بنزلها علشان ادل وحصلت المديرة بنفسها تستقبلهم وتسلم علينا وتبوس البنات ودخلتهم القاعه

الرياضية وسوو لهم حفلة ويابو لهم شخصيات

وخلاص من ثاني يوم بنتي تنزل بروحها المدرسة

انا توقعت هالشي حق بنتي الي في صف اول

بس ما سووا شي

انا الي دخلتها لين فوق و دورت صف اول وين
الـجـنـاحـي
22-09-2011, 03:22 PM
المدارس في قطر و سياسة الغنم



:nice::nice::nice::nice:
فيزيائية
22-09-2011, 06:06 PM
بناتي مع بنتج بالمدرسة
والتغير جا وقريناه بالجرايد من نهاية العام السابق
انا اشوف ان ادارة مدرسة ليس بالعمل السهل
وخصوصا بالبداية لازم ضبط الكثير من الامور
ولازم يصير سوء تفاهم ولخبطة
من حقنا مستوى راق وتعليم مميز ومدرسة مخرجاتها رائعة
ومن حقهم نعطيهم فرصة ترانا ماخلصنا الشهر
انا متفائلة خير والمديرة (المسلم) كانت ضابطة الروضة بطريقة رائعة
واعتقد ان المديرة السابقة لما مسكت المدرسة قيل فيها الكثير
فهل من صبر وهل من فرصة لبنات البلد المتميزات
اما عن تعميم سياسة (الغنم) فنحن لانرضى بهذا المسمى
ولا اعتقد اننا في دوله ترضى بتسمية شعبها هكذا..
وتسييرهم بهذا الشكل...

ودمت بود
QatariFallah
22-09-2011, 06:54 PM
المدارس غنم؟

لو حد زاركم في بيتكم..وتم يتصنع معاكم..لمن طلع قال عنكم غنم..شنوا ردة فعلج؟
هذا وهو تكلم عن عائله وحده..مش عن مدرسه تضم شريحه كبيره من العائلات

اعتقد ان كلنا درسنا في حضيرة الغنم هذي عل قولتج..ف معناها انكم انتو تخرجتوا من مدارس غنم...شكرا سبيتي الكل بمافيهم انتي اولا

ثانيا احيي هالمديره انها غيرت النظام..يمكن شافت بعض الآباء والأمهات الى الان مع الطيبه اللي عاملتهم فيها بس للحين ماقدروا يطورون شي من صفات او اخلاق ابنائهم او اي مكتسبات جديده تفيدهم لمن يكبرون لانهم مايقومون بدورهم كآباء فالبيوت..والطفل يحتاج لدور الأبوين فالبيت + التعليم فالمدرسه..فقررت انها تمشي بنظامكم لمن تقومون باللي عليكم..بتبدأ تقوم باللي عليها ..لان الناس ماراح اتعلم الا بالمثل واذا طاحت فوق راسهم وقررت بعدها اتحول المدرسه من (مدرسة رسوم متحركه ولعب) الى (مدرسه تربي عيال الناس وتطلع اجيال دامهم منشغلين بامور دنيا ولعب ومايربون ابناءهم وتاركين ابناءهم هايتين ويكتسبون القبيح من البيئه) مثل اول
وياريت بعد لو تبدأ اطبق نظام الضرب مثل اول بس ممنوع ضرب الوجه والأقدام..ولاعليها من حد
um3lianny
22-09-2011, 07:48 PM
هاها عجبني التشبيه
صحيح السياسه المتبعه حاليا في معظم المدارس سياسة الغنم
ولدي كان المدرس يلحقه بالعصا
الحمدلله الحين نقلته خاصه فيها احترام لشخصية الطالب و لاهله
بومحمد911
22-09-2011, 08:04 PM
والله كلامج صحيح 100 في ال100

اول يوم وديت فيه ولدي الصف الاول انا بنفسي حسيت جو المدرسة كئيييب جني داخل معسكر للجيش

تعلموا يا اصحاب التراخيص من المدارس الخاصة
الوان
22-09-2011, 10:34 PM
بناتي مع بنتج بالمدرسة
والتغير جا وقريناه بالجرايد من نهاية العام السابق
انا اشوف ان ادارة مدرسة ليس بالعمل السهل
وخصوصا بالبداية لازم ضبط الكثير من الامور
ولازم يصير سوء تفاهم ولخبطة
من حقنا مستوى راق وتعليم مميز ومدرسة مخرجاتها رائعة
ومن حقهم نعطيهم فرصة ترانا ماخلصنا الشهر
انا متفائلة خير والمديرة (المسلم) كانت ضابطة الروضة بطريقة رائعة
واعتقد ان المديرة السابقة لما مسكت المدرسة قيل فيها الكثير
فهل من صبر وهل من فرصة لبنات البلد المتميزات
اما عن تعميم سياسة (الغنم) فنحن لانرضى بهذا المسمى
ولا اعتقد اننا في دوله ترضى بتسمية شعبها هكذا..
وتسييرهم بهذا الشكل...

ودمت بود

ولا انا ارضى ان حد ينظر لنا بهالنظره

بس المدارس فاصلين اولياء الامور عن المدرسة

احنا في نظرهم لازم نستقبل اوامرهم بالطاعه

و لازم نرضى باللي يقدمونه

ولو بنكلمهم محد بيسمع
الوان
22-09-2011, 10:42 PM
المدارس غنم؟

لو حد زاركم في بيتكم..وتم يتصنع معاكم..لمن طلع قال عنكم غنم..شنوا ردة فعلج؟
هذا وهو تكلم عن عائله وحده..مش عن مدرسه تضم شريحه كبيره من العائلات

اعتقد ان كلنا درسنا في حضيرة الغنم هذي عل قولتج..ف معناها انكم انتو تخرجتوا من مدارس غنم...شكرا سبيتي الكل بمافيهم انتي اولا

ثانيا احيي هالمديره انها غيرت النظام..يمكن شافت بعض الآباء والأمهات الى الان مع الطيبه اللي عاملتهم فيها بس للحين ماقدروا يطورون شي من صفات او اخلاق ابنائهم او اي مكتسبات جديده تفيدهم لمن يكبرون لانهم مايقومون بدورهم كآباء فالبيوت..والطفل يحتاج لدور الأبوين فالبيت + التعليم فالمدرسه..فقررت انها تمشي بنظامكم لمن تقومون باللي عليكم..بتبدأ تقوم باللي عليها ..لان الناس ماراح اتعلم الا بالمثل واذا طاحت فوق راسهم وقررت بعدها اتحول المدرسه من (مدرسة رسوم متحركه ولعب) الى (مدرسه تربي عيال الناس وتطلع اجيال دامهم منشغلين بامور دنيا ولعب ومايربون ابناءهم وتاركين ابناءهم هايتين ويكتسبون القبيح من البيئه) مثل اول
وياريت بعد لو تبدأ اطبق نظام الضرب مثل اول بس ممنوع ضرب الوجه والأقدام..ولاعليها من حد

محد قال ان طلاب المدارس غنم

ولا قلت ان احنا غنم

و هذا اساسا اعتراضي

ان احنا مب غتم

مب مثل ما ينظرون لنا اصحاب القرار في المدارس

انا اشوف ان من حقي المشاركة في اختيار المناهج

و المواد التعليمية

و من حقي اختيار وقت المدرسة

و من حقي اني ادخل المدرسة و اشوف اللي صاير

و بعدين هاذي المدرسة اللي تدافعون عنها

كل يوم يشغلون رسوم متحركة لبنات صف اول

ليش هم رايحين يدرسون ولا يطالعون التلفزيون

غير ان في الاجتماع المديرة نوهت ان اذا احنا بنعامل بناتنا بدون احترام و بنصارخ عليهم

و بنضربهم بتشتكي علينا عند حقوق الطفل

و انا بعيني لما ظلعت من الاجتماع

شفت المدرسات او الضابطات مش عارفه

قاعدين يصارخون على البنات

يعني في هاي الحالة اشتكي على المدرسة عند حقوق الطفل ؟

و بالنسبة للضرب

لا تقول كلام انت ما تعنيه

و ما اعتقد ان عندك عيال في سن المدرسة

لأن لو عندك عيال ما كنت رضيت عليهم بالضرب و الاهانه

و ما اعتقد ان هذه تربية

و ما ضرب محمد صلى الله عليه وسلم احدا قط

لا طفل ولا امرأة ولا خادم

عمر الضرب ما كان وسيله

و الله المستعان

و بالنسبة للمدارس اللي تخرجنا منها

ما شوفها خرجت اطباء و مهندسين و غيرهم الا عدد قليل ينعد على الاصابع
الوان
22-09-2011, 10:45 PM
هاها عجبني التشبيه
صحيح السياسه المتبعه حاليا في معظم المدارس سياسة الغنم
ولدي كان المدرس يلحقه بالعصا
الحمدلله الحين نقلته خاصه فيها احترام لشخصية الطالب و لاهله

الله يبارك في ولدك

انا الحين بإذن الله بانقل بناتي من المدرسة

ان شاء الله القى مدرسة مناسبة
الوان
22-09-2011, 10:46 PM
والله كلامج صحيح 100 في ال100

اول يوم وديت فيه ولدي الصف الاول انا بنفسي حسيت جو المدرسة كئيييب جني داخل معسكر للجيش

تعلموا يا اصحاب التراخيص من المدارس الخاصة

فعلا عسكرية

قالتها المديرة في الاجتماع

لازم الكل يلتزم بالزي المدرسي و الجوتي الاسود

عشان محد يكون مختلف

وين الفردية خلاص يبون يطمسون شخصية الطفل

الله المستعان
sho_sha
22-09-2011, 11:11 PM
اولادي واحد منهم في مدرسة مستقلة والصغير دخلتة مدرسة خاص (فرق السما عن الارض)
المستقلة: ممنوع اوصلة لين الصف - ماعرف من مدرساتة -لين رحت اخذه الظهر كل مدرسة تصارخ في صوب- مدرسة الانجليزي غيروها واحنا تونا في بداية الدوام والله يعلم كم مدرسة بتتغير بعد-في هالحر طابور(مبناهم قديم والمدرسة مفتوحه)-ماتعرف شنو جدولهم الدراسي-حاطين لهم بيبان نفس اللي في السجن (صج غنم ) احنا نتم ربع ساعه في الشمس ننطرهم وهم من خلف القضبان واقفين ينطروونا وزحمه وذبححححه عند الباب ..ليش؟؟؟؟ اول يطلعون الباصات وعقب انطلع عيالكم . العام على اخر السنة سوا لنا درس معايشة عشان اذا عندكم ملاحضات على طريقة التدريس (اشعقبة).
المدرسة الخاصة: سوا للاهالي اجتماع قبل الدوام بيوم وعرفنا اعيالنا في اي صف ومن مدرساتهم وشنو الاكل المسموح والممنوع وشنو نوعية الشناط والاحذية المطلوبة- كل يوم اوصلة لين الصف واخذه الظهر لا ممنوع ولا خرابيط- مع انه توه في pre-school لكن عنده جدول- مافي شي اسمة طابور-المكان هدووء ماشفت حد من المدرسات يصارخ-
دروب
22-09-2011, 11:15 PM
لا نرضى بالضرب ولا نرضى بالتعامل الجاف والقاسي .. خلنا نحبب الطلبة بالعلم ونعاملهم معاملة راقية جدا .. ونتبع معاهم أسلوب الترغيب والترهيب ..

القول اللين والأسلوب المهذب في التعامل مع الطالب وولي الأمر يحقق الكثير
دروب
22-09-2011, 11:18 PM
اولادي واحد منهم في مدرسة مستقلة والصغير دخلتة مدرسة خاص (فرق السما عن الارض)
المستقلة: ممنوع اوصلة لين الصف - ماعرف من مدرساتة -لين رحت اخذه الظهر كل مدرسة تصارخ في صوب- مدرسة الانجليزي غيروها واحنا تونا في بداية الدوام والله يعلم كم مدرسة بتتغير بعد-في هالحر طابور(مبناهم قديم والمدرسة مفتوحه)-ماتعرف شنو جدولهم الدراسي-حاطين لهم بيبان نفس اللي في السجن (صج غنم ) احنا نتم ربع ساعه في الشمس ننطرهم وهم من خلف القضبان واقفين ينطروونا وزحمه وذبححححه عند الباب ..ليش؟؟؟؟ اول يطلعون الباصات وعقب انطلع عيالكم . العام على اخر السنة سوا لنا درس معايشة عشان اذا عندكم ملاحضات على طريقة التدريس (اشعقبة).
المدرسة الخاصة: سوا للاهالي اجتماع قبل الدوام بيوم وعرفنا اعيالنا في اي صف ومن مدرساتهم وشنو الاكل المسموح والممنوع وشنو نوعية الشناط والاحذية المطلوبة- كل يوم اوصلة لين الصف واخذه الظهر لا ممنوع ولا خرابيط- مع انه توه في pre-school لكن عنده جدول- مافي شي اسمة طابور-المكان هدووء ماشفت حد من المدرسات يصارخ-
هذا يدل على أن الإدارة فاشلة في المستقلة .. ويدل على أن إدارة المدرسة الخاصة منظمة وناجحة ولديها خبرة
دروب
22-09-2011, 11:21 PM
يا أيتها المدارس المستقلة نريد أن ننمي شخصية الطفل ولا نريد العلم فقط ..
بـــاروود
22-09-2011, 11:42 PM
ماقول غير الله يذكر ايام وزارة التربيه والتعليم بالخير
شمس
23-09-2011, 12:02 AM
اختي الوان اشوفج وايد منفعله الامر راجع لج تخلين عيالج تطلعينهم
بس الافضل تخلينهم وتحاولين تنصحين الاداره بالحل للمشاكل الي تواجها
بـــــــنت النوخـّــــذه
23-09-2011, 12:44 AM
اختي ألوان

هل قدمتي اقتراحات للمديره ؟؟؟

اقصد هل ناقشتي المديرة بالسلبيات ألي لاحظتيها ؟؟؟؟؟؟؟
alzbara_qa
23-09-2011, 10:53 AM
لا حول ولاقوة الا بالله

كل ماظنيت ان الوضع انصلح : تبلغنا شواهد بالعكس
الدمعه
23-09-2011, 02:53 PM
من بدايه الدراسه احين اسبوعين .. رحت المدرسة 3 مرات عشان اكلمهم عن

موعد الخروج .. اللي هو 1ونص ..

ماالاقي رد الا انتظروا الاجتماع وبتلاقون الرد..

ليش ينفرض علينا فرض ..

انا مش ضد التغيير في المدرسه .. انا مااشوف الاقوانين ولازم احنا نطبقها بدون نقاش ..

يوم تحط الوقت هل راعت ظروف الاهالي .. هل راعت المدارس اللي حواليها وموعد

خروجهم عن تفادي الزحمه والازمه اللي تصير ...

يوم الزمت الناس بهالموعد هل فكرت بقدرات هالطالب ..

صح هي زيدت الوقت 20 دقيقه يمكن في نظر البعض انها ماتأثر ..

هل كان فيه دراسة والا تخبط من غير اساس ..

وننتظر الاجتماع يوم الاحد وبنشوف .. وانا متأكده انها بتقول انتظروا شوي

وبتشوفون النتيجه عالطالبات ..

ليش مافي تنسيق بين المدارس عالاقل يكون فيه انسيابيه بالطريق ..
ابوالكلام
24-09-2011, 01:27 PM
احنا عندنا في الدوحة كل جهة تدور في فلك بروحه ولاحد داري عن الثاني وكل مكان له قوانيين ولاحد يبي يسمع من الثاني ومسويين نفسهم متعلميين وين التعليم كل واحد منغلق على نفسه الله يستر
تربوي
24-09-2011, 02:14 PM
هناك مشكلة لدى بعض القيادات وهي الاعتقاد بأنه لا يكون قائد او مدير الا اذا انتقد من قبله وغير ما كان عليه من قبله.

وهذه مشكلة المدير بذاته ومن داخله، فعلى سبيل المثال المدرسة التي نتحدث عنها والتي طرحت في الموضوع كانت المديرة السابقة تطلب المديرة الحالية في الاجتماعات، وكانت المديرة الحالية تؤيد اجراءات المديرة السابقة وسياساتها واسلوبها الذي بلغ بالمدرسة لتكون من المدارس الناجحة بل والتي جعلت للمدرسة مناهج خاصة ومميزة بالتعاون مع مدارس خارجية.

وعندما تسلمت المديرة الجديدة زمام الامر قامت بتغيير ترتيب الصفوف !!!، والية تكوين الصفوف !!! والغت بعض المناهج القديمة لتأخذ مناهج مدارس اخرى مستقلة !!! وغيرة بعض افراد الادارة فقد نقلت موظفيها من الروضة الى المدرسة بحجة تميزهم !!!

علما بأن هذا التغيير وهذا التبديل تفاجئ به الكثير من المدرسات والاداريات في المدرسة لعدم علمهم .... فهل تنتظرين منها اخذ راي اولياء الامور وهي لم تأخذ راي من سيقوم بتدريس المناهج ؟ ولم تأخذ راي من سيقوم بتطبيق السياسة!!

اذا كان التغيير والتطوير مطلوب فان خطة التطوير والتغيير ايضا مطلوبة فالتغيير المفاجئ تكون سلبياته اضعاف ايجابياته

وقد استقالة السكرتارية وبعض الاداريين مع استقالة المديرة السابقة ولكني لم اعرف السبب الا بعد انتظام الدراسة في المدرسة

وهذه رسالة للمديرة الحالية وغيرها

ان التغيير من اسهل الامور كما ان من اسهل الامور سن القوانين والاجراءات ... الخ من هذه الامور ولكن من اصعب الامور اقناع المجتمع المدرسي بتطبيق هذه القوانين باقتناع وحب، والمشاركة في هذا التغيير بحيث يكون الطالب والمعلم وولي الامر جزء من هذا التغيير ...

وليس هم جزء خارج هذا التغيير

الله يوفقها ويحيطها بالناصحين الخييرين .... فما اهلك القيادات سوى البطانة المنافقة التي تمدح امامك وتذم من خلفك ...
تحياتي
ريم الشمال
24-09-2011, 03:53 PM
فما اهلك القيادات سوى البطانة المنافقة التي تمدح امامك وتذم من خلفك ...
هذا مربط الفرس ..... هذا البلاء الذي اصاب التعليم في قطر
والقيادات الي تحب تسمع صوتها وصوت من يطبل لها ....
تسمعون بالمثل الي يقول من عمره ما تبخر تبخر وحترق ... هذا ينطبق على بعض الفئات

ريم الشمال
الدمعه
26-09-2011, 12:04 PM
صح كلامج اختي ريم الشمال ..

بخصوص الاجتماع صار مثل ماتوقعت ..

وعن سؤالي ليش بعض المدارس دوامهم 1 ومدرستكم دوامها 1ونص ..

كان الرد بانهم مخالفين للقانون ..

رديت وقلت طيب هالمدرسه كانت 1 و10 قالت بعد كانت مخالفه ..

احين كل المدارس الابتدائيه اللي حولنا مخالفه وهالمدرسة بالذات هي اللي مش

مخالفه القانون ..

العتب مب عليهم .. العتب على المجلس المدمر اللي ماحط قوانين تشمل كل المدارس ..

المفروض تكون ثابته هالامور ..

وبالنسبه للكتب قالت انهم ملزمين بها من المجلس الاعلى ..

وبنشوف السنه وبعدها بقرر استمر معاهم او اغير المدرسه ..كنت متمسكه فيها على

اساس مناهجها في نظري تناسب الطالبات لو فيها صعوبه شوي بس عاجبتني ..

ودام احين المجلس الزم المدارس بكتب معينه فمافرقت اذا نقلتها بيكون التعليم موحد تقريبا..
بن مفتاح
26-09-2011, 03:20 PM
للأسف الكثيرين من اصحاب الترخيص الجدد يعمل على تغيير النظام السابق لمن سبقه .. حتى ولو كان ذلك التطبيق صحيح .. هو او هي يحب ان يُثبت للآخرين انهُ افضل ممن سبقه .. وذلك قد يكون على حساب المدرسة بمن فيها ..

ليتنا نأخذ الصواب ونطوره اكثر .. ونحاول ان نتجنب الإخطاء السابقة فلا احد منا معصوم .. ولا نحاول ان نُبين اننا نحن الوحيدون على صواب وغيرنا كلهم على خطأ .. بالعكس كلنا مكملون لبعضنا البعض وعلينا ان نواصل مسيرة من سبقنا لنصل الى ما نصبوا اليه جميعاً بإذن الله ..

حفظكم الرحمن ووفقكم ورعاكم ..
الروقي
27-09-2011, 06:02 PM
اخواني فعلا هذي المدرسه شكل المديره تطبق فيها نطام جامد عسكري بحت مادري ليش حتى على المدرسات كل شي بالقوه كل شي صارم عندها ترى بعد المدرسين بشر مثلها مثلهم ولكن التعسف مب زين الواحد يتواضع ويخلي عنه التسلط حتى يكسب الكبير والصغير لان هذا اذا يفكرون انه احسن للهيئه التدريسيه والطلاب غلط بغلط لان معظم المدرسات مستغربين من النظام العسكري الي صاير والله يعينهم ويصبرهم هذا اذا ماقدوا استقالاتهم في القريب العاجل
وانتي اختي الوان لو منج انقل بنتي على طول واقول الاسباب بعد عشان اذا ماتعرف تتفطن على الاقل ان فيه شي مب صح في هالمدرسه .
ومشكوره على انج تطرقتي للمدرسه هذي لاني كنت بكتب موضوع مشابه
الوان
29-09-2011, 06:11 AM
بصراحة اول ما كتبت الموضوع

كنت احسب اني الوحيده اللي تشوف ان في شي غلط صاير بالمدرسة

بس لما شفت الردود حسيت اني مش بروحي

انا الحمدلله نقلت بناتي

و لما رحت اخذ ملفاتهم حصلت وحده رايحة تاخذ ملفات بناتها بعد

و لنفس الاسباب

و لما رحنا المدرسة الجديده حصلت بنتي كم وحده بعد ناقلة من المدرسة

الله يصلح مديرة المدرسة

يمكن هي ممتازة من نواحي بس كثرة القوانين لها مفعول عكسي

على الطالب و على المعلم و الضغط يولد الانفجار

الله المستعان
qatar.syria
29-09-2011, 08:21 AM
سبحان الله