تصدقون انقال عني حقيرة ومو متربيه قدام المول ! [الأرشيف]

أوركيدهـْ ~

23-09-2011, 01:01 PM

السلام عليكم ..

من كم يوم زارتني بالبيت صديقتي من دولة الإمارات .. تشتغل بنفس مجالي بالعمل

بعدها قررنا نروح المول لأنه قريب من بيتي

صادني موقف بصراحه انحرجت منه قدامها وحبيت اكتبه اهني مع الاقتراح

كنت ادور موقف من قدام المول صوب السلام والا شفت واحد يريوس

وقفت جنب الموتر بالضبط وعطيت اشاره علشان اصف ..

ولمحت وحده بموترها بعيده شوي خايفه تدخل الشارع لانه بعكس اتجاه السير

و داشه اللفه بالغلط ( بالعكس ) وبعيده شوي ولا معطيه اشاره اصلا

قمت انا اخذت الموقف .. إلا اشوي نسمع هرن متواصل بشكل مزعج

حتى جاني اتصال من العمل وقعدت اتكلم معاهم ومو قادره اسمعهم

والهرن مازال متواصل ..

نزلنا من السياره انا وضيفتي وإلا ماتم هندي متجمع حول المكان من الازعاج

طلعت البنت اللي بالموتر ( اللي داشه عكس السير ) هي اللي تهرن بشكل متواصل

قفلت موتري ومشيت ابي ادش المول ..

فتحت شباك موترها وقالت لي بصوت عالي :

صج انج حقيره ومامتربيه .. الحين انا ابي اخذ الموقف وتجين تاخذينه على الجاهز !!

قلت لها انا كنت ورا الموتر وداقه اشاره وداشه صح .. انتي وقفتج اصلا غلط ..

قالت لي : حقيره وقوية عين .. تفووووه عليج وحفصت وراحت !!

جاني هندي ( شكله دريول ) قال لي ... مدام انا يسجل رقم سياره

سوي تلفون شرطه .. قلت له شكرا .. انا ارقى من هالسوالف !

...

من بعد هالموقف اللي صار لي .. عندي اقتراح وياريت اشوف رايكم ..

* ياريت يكون بالمجمعات عند مواقف السيارات كابينه يكون فيها شرطي

للحالات اللي مثل هذي علشان يسوي اللازم ويحد من المشاكل

واللي تشوه صورتنا عند الاخرين وياخذون عنا انطباع مو حلو

لكن للاسف اغلب المجمعات فيها موظفين حمايه ..

اغلبهم نيباليه ومابيدهم شيء / احسهم مجرد ديكور ويس

لا يهش ولا ينش !

فارس الميدان

23-09-2011, 01:04 PM

بس ما قلتي لنا ويش رديتي عليها

فاطمه55

23-09-2011, 01:06 PM

هالاشكال الرد عليهم خساره تبين الصج المفروض حتى ماتردين عليها من البدايه تحقرينها وتروحين احسن لج وهي بتموت قهر

Charisma

23-09-2011, 01:06 PM

تصرفج صحيح اختي انج مارديتي عليها بمثل اسلوبها وترفعتي عن هالاشكال .. وياليت لو كنتي خذيتي رقم السياره واشتكيتي عليها

لان التصرف اللي قامت فيه محد يرضى به ولانرضى لحد به والله ياليت لو كنتي اشتكيتي و حتى عطيتي الرقم لواحد من اخوانج واهو يتصرف

غايه الطواش

23-09-2011, 01:06 PM

عيون الدوحة

23-09-2011, 01:07 PM

أوووووف لو منج على طووول أشتكي عليها
بعد تتفل واسكت عنها

المليونير الفقير

23-09-2011, 01:10 PM

يمكن انتي ماخذه حقها فالموقف ماظن هالسب كله بدون سبب اكيد انتي استغليتي انها داشه عكس السير وخذتي موقفها

ريتويت

23-09-2011, 01:11 PM

في بنات جذي فيهم دفاشه وقله ادب عيني عينك لا متناهيه

عنيــــد

23-09-2011, 01:11 PM

غلطانه

شلون تطلبين كابينة شرطة حق هالامور و انتي كنتي تقدرين تسجلين الرقم و تشتكين للشرطة ؟

هالاشكال ما ينفع معها الا الشرطة تسنعها ..

cavok

23-09-2011, 01:13 PM

والله حاله

U Welcome

23-09-2011, 01:15 PM

يمكن انتي ماخذها حقها فالموقف ماظن هالسب كله بدون سبب اكيد انتي استغليتي انها داشه عكس السير وخذتي موقفها

هذا اللي يصير غالبا
تحصل واحد منتظر موقف بس جاي عكس السير
فالعالم يجون ويصفون ويبررون موقفهم بانه جاي عكس السير

حسن

23-09-2011, 01:15 PM

وسعي صدرك ولاتشتكين ولاشي عادي تحصل في احسن العائلات بعدين وينها الي تبي يخصصون مواقف للنساء :telephone:

عيون الدوحة

23-09-2011, 01:15 PM

مخالفة عكس السير 6000 ريال على ما أظن
لو منج والله أشتكي وأخليها تتحسف على اليوم الي دشت فية عكس
وعلى الاسلوووب الخايس

chillis

23-09-2011, 01:18 PM

ما عتقد السب يجي بدون سبب وتتفل عموما ماشوف ان الموضوع له اهميه ان ينحط هني ولو كانت صج بدون سبب اشتكي عليها

وطن

23-09-2011, 01:19 PM

اسمحي لي اختي انتي غلطتي لانج ما اشتكيتي عليها

هالأشكال ما ينفع معاها الا الشرطة
ياخذون حقج ويأدبونها ويعلمونها تحترم الآخرين

انا تنرفزت شلوووووووووووووون تتركين حقج شلوووووووون

intesar

23-09-2011, 01:19 PM

هذا اللي يصير غالبا
تحصل واحد منتظر موقف بس جاي عكس السير
فالعالم يجون ويصفون ويبررون موقفهم بانه جاي عكس السير

ماعندك سالفة.. لو جاي عكس السبر تستاهل حبس.. اشلون تاخذ موقف وتصارخ وانت مخالف.. صج شر البلية ما يضحك..
:eek5:

اللورد

23-09-2011, 01:22 PM

هالالفاظ تبين لناان اللي قالتها انسانة لاتحترم نفسها بالمقام الاول ولاتحترم الاخرين. ،،،ندعوا لها بالهداية

halcrow

23-09-2011, 01:29 PM

لو انا ولقيت واحد من الشباب جاي عكس السير وواضح انه متعني عشان يدخل الموقف اكيد بلتمس له العذر وخليه يصف. دام طبعا كان قبلي. دايما في شي اسمه روح القانون مو كل حاجه لازم اصير فيها قانوني برايي الغلطه غلطتج ولكن مو معناته اني معاها في الي قالته

£عبدالعزيز£

23-09-2011, 01:32 PM

جاني هندي ( شكله دريول ) قال لي ... مدام انا يسجل رقم سياره

سوي تلفون شرطه .. قلت له شكرا .. انا ارقى من هالسوالف !

الحل كان بيدج .. كنتي تقدرين تتصلين وتشتكين عليها وانتهى الموضوع

وبما انج ما سويتي الشي اللي المفروض يصير .. خلاص محد بيسوي لج شي فالمنتدى

وكل اللي بتحصلينه مجرد ردود لا تسمن ولا تغني من جوع

فكان من الافضل انج تبلغين

ولا الصراحة الموضوع ماشوف منه اي فايدة

..

واسمحيلي اختي على صراحتي

al_Caesar

23-09-2011, 01:41 PM

اصابعج مب سوى

وكلً على تربيه هي قالت كلمة ( انتي مب متربيه ) لكن الواضح كان العكس

لذلك الكلام سهل . والواقع شي ثاني

اما موضوع انهم يحطون شرطي ( انا اشوف سكرتي يكفي )

الدوريات ماتقصر في كل المجمعات تتواجد

وهاي المواقف ماتكرر وايد

ودمتي بحفظه

سوووووووير

23-09-2011, 01:41 PM

شدعوه ترا ماغلطت البنت لما قالت لكم السالفه

رجل مثالي

23-09-2011, 01:44 PM

عندي مداخلة بخصوص الكلام الغير لائق التي قالته للاخت التي كان لها الحق في الوقوف وكانت الاخرى جات عكس السير المفروض تفوض امرها الى الله في اخذ حقها لان الوقوف

كان من حقها والعلم عند الله

الباحثة

23-09-2011, 01:58 PM

والله صديقتي صار لها موقف شبيه بهالموقف واحد من الشياب وكبار السن غلط عليها بالشارع وهي تسوق وماكتفى بالغلط قاام وشمخ سيارته بسيارته وهي سيارتها لكزس يعني لو بتوديها الوكاله بيصلحونها بشوي وشويات المهم قام وسرع عشان ماتلقط رقمه المهم الحقته وكتبت رقمه واشتكت عليه

جابو الشرطه وحلف ان هي الي داعمته للعلم هو قطري بس الله فوق جابو مرته وشهدت ضده وقالت المره هي الي شمخها
وصارت محكمه صديقتي بنت عز بس قالت ابي يتادب ويحرم يغلط عالناس والمفرووض انتي تادبينهاااااااااااا بس وتعلمينها تتتربى البنت المتربيه اصلا ماتبطل الدريشه وتقعد تسب خلق الله والله شكلها هي هيلقيه وماعندها لا اصل ولا فصل وتربيه شوارع بعد

وبعدين لا تقولين انا مارديت عشان انا ارقى وما ارقى اهم شي اترجعين كرامتج وماتخلين ناس يتعدون عليج ويغلطون ولا تقولين ترفعت لا يبه في هالمواقف مافيه ترفع انسان يسبني ارد عليه عشر

الخيالة

23-09-2011, 01:59 PM

صارت نفس الشي مرة يوم كنت طالعه مع رفيجتي عاد هاذيج انزلت وجات وقفت عند السياره وتكلمت بنفس الطريقه هالاشكال بصراحه مومتربيين وماعندهم ذوق الحين عشان موقف تجي تتكلم بهالطريقة؟؟؟ حمدالله والشكر والله مادري شلون بعض الناس

بـــــــنت النوخـّــــذه

23-09-2011, 02:00 PM

اوركيد

اولا " اتمنى ضيفتج ماخذت فكره سلبيه عن الشعب القطري من خلال تصرف الي سبتج الهيلقيه قولي لها كل مجتمع في تصرفات والفاظ سوقيه نابعه من تربيتهم وبيئتهم وهذي نموذج منهم 000

بالنسبه لموقفج لو انا منج ما ألتفت لها اخليها تنبح مثل (0000) مهب خوف او ضعف لعدم المواجهة ولكن ترفع عن بعض المستويات السوقيه 00

وهالنوعيه حتى لو يوجد مركز شرطه كامل عند المجمع الي السانها سوقي بيتم سوقي 00

من كلامها يبين انها من حبايبنا اهل الديره قطريه يختي مادري اشفيهم متعنطزين اهههه زايده العنطزه فيهم فشلونا الله يفشلهم كلش مافي ذرابه ورقي

لاتزعلين عمرج ياما بتشوفين من التصرفات السوقيه الي بتضطرين تلقائيا" بعد التعود اعطاهم الاذن الصمخه لان المناقشه معاهم ضايعه وترفعا" منج عن هالاسلوب00 اذا كلش كانت مؤذيه كان خليتي السيكيورتي ياخذ رقم سيارتها مهب انتي اتروحين وعطيتي الرقم لحد من محارمج يقدم شكوى بالشرطه بوجود هيلقيه تعتدي على الناس بالفاظ سوقيه00 وكملتي مشوارج مع ضيفتج بدون لاتكدرين عمرج ^_^

khaldoon

23-09-2011, 02:01 PM

يا جماعة استغرف من بعض ردودكم ....اللي يدخل في عكس السير ما له حق قانوني بأخذ الموقف لانه لو افترضنا انه كان في شرطي مرور واقف في المكان فهل يقدر يسوي هالشي حتى لو انه الموقف قريب منه و الا انه بيتركه و بيمشي حسب السير...والله لو سواه و اخذ الموقف الا بيتخالف و الموقف من حق راعية الموضوع و بس في هذه الحالة

و الا انه بيصير من حقه بس لو الشرطي مب موجود؟ ...وين مراقبة النفس و مراقبة الله عز وجل له في كل حركاته و سكناته

حتى لو كانت صاحبة الموضوع اخفت شي من الحقيقه مثلا و قامت المرأة الثانية قالت هذه الالفاظ النابية فأيضا ما لها عذر تقول هالكلام مهما كانت الاسباب...هي خذت منها موقف و الا اخذت ميراثها؟...ولا تقحص بعد

انا ضد صاحبة الموضوع انها ما اشتكت عليها

Locale

23-09-2011, 02:02 PM

الحمدلله والشكر

مو متربيه وتهرن ويشوفونها خلق الله ولا وتتفل واخر شي تخمس
مايبيلها فيلسوف ايي ويقول انتي اكيد سويتي شي
لان هالتصرفات ماتطلع الا من بنات الـ.....

الله ياخذ حقج منها

دااانة قطر

23-09-2011, 02:08 PM

مخالفة عكس السير 6000 ريال على ما أظن
لو منج والله أشتكي وأخليها تتحسف على اليوم الي دشت فية عكس
وعلى الاسلوووب الخايس

:nice::nice::nice:

.Q a T a R.

23-09-2011, 02:15 PM

مع احترامي لج انتي الغلطانه

الموقف لها سواء عكس السير ولا غيره فيه مرور يحاسبها

اما تاخذين موقفها وتقولين هيه داخله عكس السيرهذا مب شغلج

او انج ضاربه اشاره هذا مايعطيج الحق تعدين على دورها

بوحارب

23-09-2011, 02:17 PM

قلة عقل وقلة ادب وقلة تربية

وش نقول بس :)

حسن

23-09-2011, 02:20 PM

البت اللى سبتك لها لون معين

فارس قطر

23-09-2011, 02:21 PM

مستحيل

تتصرف بنت الاصل والفصل بهذة التصرفات

لاكن الساقطات في الاخلاق اكثرو

عسى الله يخلف.

لاجل QT

23-09-2011, 02:32 PM

بالعكس زين رفعتى نفسج عن هالاشكال الواطية

وحدة تسب وتفل على موقف الحمدالله والشكر

ياما خذو منى باركنغ والامور طيبة عادي ماوصلها انى احقر الناس

بصراحة بعض الحريم بالذات اللى يسوقون يفتقرون للذوق في السواقة لاتعطى طريج في الشارع..والباركنغ غصب تاخذة عكس الرجال ذوق بصراحة

£عبدالعزيز£

23-09-2011, 02:35 PM

قاام وشمخ سيارته بسيارته وهي سيارتها لكزس يعني لو بتوديها الوكاله بيصلحونها بشوي وشويات

:telephone:

ليش البوليش مالهم بكم ؟

40 الف ؟ :telephone:

وطن

23-09-2011, 02:40 PM

يا جماعة

البنت ذكرت في الموضوع انها واقفه عند السيارة اللي بتحرك من الموقف قبل اللي جات مخالفه

وذكرت ان البنت اصلا كانت متردده تدش مخالف ولا لا
يعني بعيد عن السيارة اللي بتطلع

يعني هي ما عليها غلط في اخذ الموقف

alzbara_qa

23-09-2011, 02:48 PM

الله يرحم جدتي كانت تقول
مش كل ما نبح كلب طقوه بعصاه
التقاضي عن بعض الامور نعمه

هدي اعصابك وفكري : بالنهايه من خذ الموقف ?
: اما اذا خليتها تعصبك بحيث تكتبين لها موضوع ماله فايده الا ان نشاركك مشاعر,وهذا الغرض دوما من كلام النساء ,مشاركة مشاعر

وفي النهايه لن يصل لتلك ايه عقوبات

الخزرجي قطر

23-09-2011, 03:00 PM

المفروض تجاهلها من البدايه وعدم الرد عليها او الالتفات نحوها

JN000N

23-09-2011, 03:09 PM

مممممممم :con2:

بعض من النص مفقود :nice:

المدفع

23-09-2011, 03:21 PM

زين سويت جذيه
هذه النوعيه ما ينفع معاها لا التطنيش
وبعض الاعضاء الله يهديهم ردودهم مش ولابد
وشلك خص كتبت في المنتدى ام لا مش عاجبك لا تدخل الموضوع
والمسؤولين عن المنتدى اعلم بالمصلحه العامه

جرير

23-09-2011, 04:21 PM

إِذَا كَشَـفَ الـزَّمَـانُ لَكَ القِنَـاعَا
وَمَدَّ إِلَيْـكَ صَـرْفُ الدَّهْـرِ بَـاعَا
فَـلاَ تَـخْشَـى المَنِيَّــةَ وَالتَقِيْـهَا
وَدَافِـعْ مَا اسْتَطَـعْتَ لَهَـا دِفَـاعَا

أوركيدهـْ ~

23-09-2011, 04:21 PM

بس ما قلتي لنا ويش رديتي عليها

كنبت ردي عليها اقراه مره ثانيه

هالاشكال الرد عليهم خساره تبين الصج المفروض حتى ماتردين عليها من البدايه تحقرينها وتروحين احسن لج وهي بتموت قهر

والله كلامك عين العقل

تصرفج صحيح اختي انج مارديتي عليها بمثل اسلوبها وترفعتي عن هالاشكال .. وياليت لو كنتي خذيتي رقم السياره واشتكيتي عليها لان التصرف اللي قامت فيه محد يرضى به ولانرضى لحد به والله ياليت لو كنتي اشتكيتي و حتى عطيتي الرقم لواحد من اخوانج واهو يتصرف

هالاشكال حتى لو اشتكيت عليهم بكل سهوله بينكرون

وبعدين معاي ضيفه وكنت مشغوله معاها وانا ارقى من هالشاكله اللي يفشلون سمعة البلد

الي اهلهم ماربوهم الحكومه تربيهم. روحي واشتكي ......
الموضوع بالمنتدي مراحل يربيها او يحل المشكله....
اذا كل مو قف نتعرض له مراح نأخذ حقنا بالقانون الكل راح يتجرأ ......الطيبه والمسامحه ماتنفع مع كل الناس

المشكله اللي مامتربيين وايد .. واحيانا الشكوى مجرد تضييع وقت

نروحين ويجيبون واسطه وبالنهاية يخلونج تتنازلين .. فالاولى اننا نسكت عن هالشاكله

أوووووف لو منج على طووول أشتكي عليها
بعد تتفل واسكت عنها

يعني ارد واتفل عليها ؟؟؟ والله ماتربيت على هالتصرفات ابد

ولاتنسى معاي ضيفه مو لحالي

يمكن انتي ماخذه حقها فالموقف ماظن هالسب كله بدون سبب اكيد انتي استغليتي انها داشه عكس السير وخذتي موقفها

يعني انا عندي علم الغيب ؟؟؟

معقوله ادري تبي الموقف واصف بدالها ؟؟

هذا معناته اي موتر بذاك الشارع يبي الموقف ولازم ابتعد ولا اصف ؟

وبعدين اللي يصف فلنفرض بالخطأ .. له الحق انه ينسب ويتلفظ عليه بالفاظ دنيئه ؟؟

ترضاها على اهلك ؟؟؟

في بنات جذي فيهم دفاشه وقله ادب عيني عينك لا متناهيه

ياكثرهم .. !

غلطانه

شلون تطلبين كابينة شرطة حق هالامور و انتي كنتي تقدرين تسجلين الرقم و تشتكين للشرطة ؟

هالاشكال ما ينفع معها الا الشرطة تسنعها ..

بالعكس لمن الشرطة موجوده مااعتقد تتجرأ .. لانه بيعطيها مخالفه ويمكن يحول الموضوع

بومحمد911

23-09-2011, 04:33 PM

زين سويتي انج طنشتي لها عفية عليج

هالاشكال مقرفة

قــ502ـطرالعز

23-09-2011, 04:35 PM

على فكره من ناحيه قانونيه هذا يعتبر قذف واتحول على النيابه العامه اما من ناحيه اخلاقيه سكوتج عنها وانج ماشتكيتي يدل على اصلج الطيب وانتي بنت ناس تعرفين الاصول احييج الصراحه على صبرج عليها وحكمه تصرفج في هالموقف

الرايــق

23-09-2011, 04:36 PM

صادني نفس الشي قبل كمن شهر قدام مواقف المول صوب بنك قطر الوطني ...

كانت وحدة وقوية عين فتحت الدريشة وتبي تهاوش انا حركت لانها وحدة و في كلا الحالات بيعتبروني غلطان لو تكلمت كلمة وحدة :(

فعلا ناس مقرفين

أوركيدهـْ ~

23-09-2011, 04:55 PM

هذا اللي يصير غالبا تحصل واحد منتظر موقف بس جاي عكس السير
فالعالم يجون ويصفون ويبررون موقفهم بانه جاي عكس السير

لو انها على الاقل معطيه اشاره كان ماترردت ولا لحظه اني اعطيها مجال

بعدين انا وش دراني تبي تصف

ياما صارت معاي اعطي اشاره ويجي واحد ويصف واحرك وانا ساكته

وسعي صدرك ولاتشتكين ولاشي عادي تحصل في احسن العائلات بعدين وينها الي تبي يخصصون مواقف للنساء

اي مواقف الله يهداك .. اللي تبي موقف خاص بها عندها ببيتها ..

برا البيت الرجال والحريم كلهم سواسيه وانا ضد الفكره

مخالفة عكس السير 6000 ريال على ما أظن
لو منج والله أشتكي وأخليها تتحسف على اليوم الي دشت فية عكس
وعلى الاسلوووب الخايس

كلامك عدل 100% .. لكني ترقى من اني ارد عليها بالمثل

والعالم متجمعه ومعاي ضيفه .. والا الهندي مسيكين جاب لي الرقم لانه ماعحبه الوضع

ما عتقد السب يجي بدون سبب وتتفل عموما ماشوف ان الموضوع له اهميه ان ينحط هني ولو كانت صج بدون سبب اشتكي عليها

ضحكتني من قلب .. تبي تقول تفلت علي لاسباب بدرت مني ؟

واذا الموضوع ماله اهميه .. ابش رديت عليه ؟

اسمحي لي اختي انتي غلطتي لانج ما اشتكيتي عليها

هالأشكال ما ينفع معاها الا الشرطة ياخذون حقج ويأدبونها ويعلمونها تحترم الآخرين

انا تنرفزت شلوووووووووووووون تتركين حقج شلوووووووون

صادقة والله .. بس مااحب الشكاوي فالسكوت مع هالشاكله افضل

اذا هي مو متربيه .. فهذا يعكس شخصيتها وتربيتها

ماعندك سالفة.. لو جاي عكس السبر تستاهل حبس.. اشلون تاخذ موقف وتصارخ وانت مخالف.. صج شر البلية ما يضحك..

تعجبيني .. ومشكوره على الرد

هالالفاظ تبين لناان اللي قالتها انسانة لاتحترم نفسها بالمقام الاول ولاتحترم الاخرين. ،،،ندعوا لها بالهداية

الله يهدي الجميع

لو صج تعتقدين انج ارقى جان ماكتبتي الموضوع.

الرقي في التصرف ! والكتابة ماله علاقة لانه ماغلطت على اي عضو حتى على اللي سبتني

لو انا ولقيت واحد من الشباب جاي عكس السير وواضح انه متعني عشان يدخل الموقف اكيد بلتمس له العذر وخليه يصف. دام طبعا كان قبلي. دايما في شي اسمه روح القانون مو كل حاجه لازم اصير فيها قانوني برايي الغلطه غلطتج ولكن مو معناته اني معاها في الي قالته

بس انا ماكنت اعرف تبي الموقف .. حسبتها وحده تسوق وداشه غلط لانه ماكان يبين تبي الموقف

كانت بعيده جدا عن الموقف

الحل كان بيدج .. كنتي تقدرين تتصلين وتشتكين عليها وانتهى الموضوع

وبما انج ما سويتي الشي اللي المفروض يصير .. خلاص محد بيسوي لج شي فالمنتدى

وكل اللي بتحصلينه مجرد ردود لا تسمن ولا تغني من جوع

فكان من الافضل انج تبلغين ولا الصراحة الموضوع ماشوف منه اي فايدة

..

واسمحيلي اختي على صراحتي

مسموح اخوي .. لكن اذا اشتكيت عليها .. تقدر تنكر

واللي تسب وتتفل وتتلفظ بالفاظ بذيئه ممكن تتكر بكل سهوله .. !

Best Man

23-09-2011, 05:15 PM

زين انج مارديتي عليها ..في هالمواقف تحتاج بروده اعصاب

STAR

23-09-2011, 05:21 PM

لالالا السالفة فيها تفلة..هاذي فيها قبااايل ‏...هههه

والله بصراحة مهما كان اي شخص غلطان المفروض نرتقي بالاسلوب ونتمالك اعصابنا...

يعني لو انا مكانها بجي اكلمج بأدب اقتنعتي كان بها ماقتنعتي ماله داعي اسب واستعرض واتفل بعد وين قاعدين..

وووين الانووثة فالموضوع ‏‏)‏‏=‏

خليها تولي وخذي رقمها واشتكي عليها عشان ماتكرر فعلتها..

احنا بنات قطر المفروض نكون ارقى من هالاسلوب السوقي..

طرفه

23-09-2011, 06:27 PM

الي سويته عين الصواب
وهذى يدل على طيبتك وحسن تربيتك

الله يبارك فيك

سهيل قطر

23-09-2011, 06:53 PM

الله يصللحهم جميعاا

ومن الغباء ماقتل

23-09-2011, 07:15 PM

يمكن انتي ماخذه حقها فالموقف ماظن هالسب كله بدون سبب اكيد انتي استغليتي انها داشه عكس السير وخذتي موقفها

اسمح لي الشيخ ، الي يدخل عكس السير ماله حق في الموقف حتى لو كان اقرب له ، لانه لو كل من شاف موقف فاضي دخل له عكس السير عشان يلحق عليه بتصير المسألة فوضى!! ، مسألة الدخول عكس السير مسألة مش بسيطة ، وحتى مخالفتها مغلظه.

moonبنتnight

23-09-2011, 07:38 PM

حمدالله وشكر على نعمة العقل 00
لا موقف 00

المفترسه

23-09-2011, 08:51 PM

تدرين في مثل هالمواقف الوحده تخلي الانوثه على جنب
وتفلع هالاشكال بالكعب على راسها لانه عيب هالكلام يطلع
من انثى رقيقه وناعمه

ROSE

23-09-2011, 09:16 PM

تدرين في مثل هالمواقف الوحده تخلي الانوثه على جنب
وتفلع هالاشكال بالكعب على راسها لانه عيب هالكلام يطلع
من انثى رقيقه وناعمه

:funny::funny:

عدل شغلج اختي وان هي نزلت من نفسها بهالطريقة فانتي ارقى من انج تنزلين لهالمستويات

الله يكملج بعقلج

المفترسه

23-09-2011, 09:29 PM

:funny::funny:

عدل شغلج اختي وان هي نزلت من نفسها بهالطريقة فانتي ارقى من انج تنزلين لهالمستويات

الله يكملج بعقلج

مشكوره اختي روز وماطلبت منج تعلقين علي وتدعينلي

ومب اي كلمة الواحد يكتبها يقصدها هاي تعبير عن الغضب

qatari 111

23-09-2011, 09:33 PM

اللهم لك الحمد .. ظهرت عيوب افتراح الاخت اللي اقترحت مواقف خاصه بالحريم

والمفروض تشتكيين عليها فالشرطه لان هاذي اهانه لج .. الطيبه والترفع ما يفيد في هالزمن مع الاشكال اللي مب متربيه

راقي

23-09-2011, 10:12 PM

قــويه ـ!!!

اصلن حتى لو هي جايه قبل اصلن واقفه عكس السير

ووحتى لو الاخت خذت الموقف بعد والله عييييييب ثم عيب بنت تنزل الدريشه ولا بمكان كذاا تعلي صوتها وتقط كلاام اصلن اشك انهـأأأأ بنت مربيه : )) وياكثرهـم ...

ولد شرق

24-09-2011, 12:09 AM

..............................................

فتحت شباك موترها وقالت لي بصوت عالي :

صج انج حقيره ومامتربيه .. الحين انا ابي اخذ الموقف وتجين تاخذينه على الجاهز !!

قلت لها انا

قالت لي : حقيره وقوية عين .. تفووووه عليج وحفصت وراحت !!

جاني هندي ( شكله دريول ) قال لي ... مدام انا يسجل رقم سياره

سوي تلفون شرطه .. قلت له شكرا .. انا ارقى من هالسوالف !

عفوا اختي
سبتج وقالت لج تفووو عليج وحقيره ومب متربيه وفوقها حفصت عليج....

وانتي ارقى من انح تشتكين عليها... يعني راضيه باللي قالته لج...؟
عيل ليش اتلومين نفسج؟
دام انج ارقى واكبر من انج تاخذين حقج بالقانون بعد ماقالت عنج تفووو عليج وحقيره ومب متربيه وفوقها حفصت عليج... عيل في اي موقف غير بتكونين مب ارقى وبتاخذين حقج؟

عفوا اختي... انتي اللي خليتها اتسبج ودام ماتبين تاخذين حقج فمادري شالحكمه من انج كاتبه الموضوع في المنتدى؟

بنـ الدحيل ـت

24-09-2011, 12:16 AM

لا تزعلين يا الغالية
وأنتي الراقية والأفضل
وإن شاء الله كسبتي الأجر لأنج ما رديتي عليها

«والكاظمين الغيظ والعافين عن الناس والله يحب المحسنين»،

الكلدي

24-09-2011, 12:21 AM

تبين الصراحه مع احترامي لك البنت احتقرتك بهل طريقه لان موترك عادي لو موترك ......كان احترمتك

للاسف مثل هل مناظر اشوفها كل يوم في شوارعنا الناس تحترم السياره والرقم

ابن قطر

24-09-2011, 12:24 AM

كبري عقلج احسن شي انج سكتي عنها

النائب

24-09-2011, 12:31 AM

دام إنها بنت وتسوق مانستغرب منها هالكلام !

sh50

24-09-2011, 12:34 AM

اشتكيها لله سبحانه
وصدقيني الله بياخذ حقج منها
كل انسان متكبر ويغلط علئ الناس الا ينتقم ربي منه وبسرعه قولي حسبي الله ونعم الوكيل فيها

الراقيه سبشل

24-09-2011, 02:17 AM

احسن شي سويتيه

وطنشيها مابتستاهل تعبريها اصلا :)

الأصيلة

24-09-2011, 02:31 AM

دام إنها بنت وتسوق مانستغرب منها هالكلام !

استغفر الله..
هذي قاعده تسوق سيارة يا أخوي مب لاسمح الله قاعده في بار وإلا في مرقص...
البنت تحكمها أخلاقها مب سواقة سيارة وإلا غيره..

حقيقه

24-09-2011, 02:38 AM

اخخخ لو كان عندتس غرشة بيبسي عصير كرك وغسلتيها فيه :oops:

هنت المهونه

24-09-2011, 02:47 AM

ياجماعة الخير ..

تبوني احلف ان هذا مهوب غريب على الحريم ..

مع احترامي لهم لان منهم امي واختي وزوجتي ..

بس هذا تعودناه من الحريم يتهادون فالاعراس ويتبادلون كلام القفاء والنمه عندهم ببيزه

يعني لو انا راعي السياره وشخص ماخذ علي الموقف وشفت معه ضيف هل انا بقول مثل

هالكلام ..؟ حتى لو تشرهت بقول مثل الالفاض السوقيه ..؟

ردو كل شي للشرع والسنه ..

هل لو كان الرسول بيناا بيسمح للنساء بالسواقه ؟

Dawn

24-09-2011, 02:50 AM

دام إنها بنت وتسوق مانستغرب منها هالكلام !

الصراحه غير مقبول ابدا ان نربط بين قلة الأدب وسواقة البنت
يعني انتا بشكل غير مباشر تغلط على صاحبة الموضوع لانها تسوق وتغلط على كل بنت تسوق ..

انا من قبيله تمنع منعا باتا سواقة البنت وتعتبرها شيء مهين لقدرها ومكانتها .. لكن في نفس الوقت نعرف كل المعرفه ان السواقة منعها ما كان لسبب ديني وانما عرف وسنع اجتماعي .. فالاحترام عندنا واجب لاي وحده اجبرتها ظروفها على قيادة السياره رغم انه شيء غير مقبول عندنا ..

دايما اردد نفس السؤال عندما ارى شخص رأيه مشابه لرأيك

هل كان الرسول صلى الله عليه وسلم يمنع النساء من ركوب الخيل - الجمل - الحمار ؟؟؟؟

حقيقه

24-09-2011, 03:01 AM

bu 3li

24-09-2011, 03:18 AM

انتي مب مشتكيه وغيرج مب مشتكي والشعب كله بيطنش وبيتعامل ببرود مع المخالفين
لا بالله بينصلح حال الناس وبينضبطون لانهم يدرون انه في حد بيحاسبهم !!!

اذا كل واحد سوى مثلج وطنش .. عمرنا ماراح نشوف نظام فالبلاد
كان اولى انج تشتكين ( دخول عكس السير + قذف وسب + تلاعب وتحفيص )

العطار قطر

24-09-2011, 05:21 AM

الله يعينج والله

بس أشوف الأفض ما تلتفتين لها وادشين المول على طول دون ما اتناقشينا خصوصاً انها مزعجة العالم بالهرن حقها

Industrial

24-09-2011, 05:55 AM

اعجبني انك ترفعتي من الرد على هالاشكال لان الرد عليها يعطيها قيمه

ولا شلون مره في مكان عام تطول صوتها وتسب بعد ! انا رجال استحي من ذا السواه

امـ حمد

24-09-2011, 06:16 AM

السكوت أبلغ من الجواب

انت أختي سويتي الصح ماعليج منها

العساس

24-09-2011, 07:06 AM

اجركِ عند رب العالمين
وعدم ردكِ دليل تربيتك

الله يكثر من امثالكِ

بوسلمان 2010

24-09-2011, 07:39 AM

حتى اخوي المليون الفقير لو انها الاخت اغلطت عليها ماتجراء وتقط مثل هذا الكلام الواجب من الاخت ان تشتكي

لان مثل هذي الاشكال حرام الواحد يسويلها قدر ولازم تنردع عدل علشان يشفون من المتربي فيهم والله لوهذا

الموقف صادني لاقدر الله والله ادعمها وكسر سيارتها واكسرها معها

احمد بن علي

24-09-2011, 08:38 AM

الترفع عن بعض الاشكال نعمه
دامها متردده تتدخل للموقف مب مشكلتج انج تنتظرينها
والحمدالله على كل حال

دروب

24-09-2011, 08:56 AM

تتفل ... والله قوية ..

الله يعينا على الألوان والأشكال اللي نلاقيها واحنا نسوق ...

وكلج ذووووووووووووق يا بنت الأصول

وحقج تاخذينه من رب العباد ...

أوركيدهـْ ~

24-09-2011, 10:42 AM

أوركيدهـْ ~

24-09-2011, 10:46 AM

حتى لو كانت صاحبة الموضوع اخفت شي من الحقيقه مثلا و قامت المرأة الثانية قالت هذه الالفاظ النابية فأيضا ما لها عذر تقول هالكلام مهما كانت الاسباب...هي خذت منها موقف و الا اخذت ميراثها؟...ولا تقحص بعد

انا ضد صاحبة الموضوع انها ما اشتكت عليها

والله مافي موقف ولا شيء صار وماذكرته

انا بموتري ولا ادري وش السالفه مجرد اسمع هرن متواصل

بعدين وحده واقفه باول اللقه وبالعكس والموقف بعيد عنها بكذا سياره

وش اللي يدريني تبيه ؟؟؟

أوركيدهـْ ~

24-09-2011, 10:49 AM

مع احترامي لج انتي الغلطانه

الموقف لها سواء عكس السير ولا غيره فيه مرور يحاسبها

اما تاخذين موقفها وتقولين هيه داخله عكس السيرهذا مب شغلج

او انج ضاربه اشاره هذا مماايعطيج الحق تعدين على دورها

اشلون الموقف لها وهي واقفه عكس السير باول اللفه والموقف بعيد عنها

بكذا موتر يعني مو بالبدايات ابد بعد النص بشوي !

اذا هذا رايك عيل لو شفت اي موتر بنفس المكان مااصف .. ا

اخمن من عندي انه الكل يبي الموقف !

الفا برافو

24-09-2011, 10:49 AM

انا حصل لي الموقف بالعكس اكثر من مره وكله من نسوان
يعني صاف تنطر السياره تطلع من الموقف.. وتييي وحده وتدخل الموقف ولا كانها تشوفك
تدق هرن لها وتاشر لها انك واقف قبلها
وهي معطتك الاذن الصمخه ولا كانها تدري شالسالفه
الواحد شيقول حق الاشكال ؟
مايبي يتلاسن معاها لانها في النهايه حرمه
لكن في نفس الوقت تقول صج قلة حيا وتربيه

أوركيدهـْ ~

24-09-2011, 10:49 AM

قلة عقل وقلة ادب وقلة تربية

وش نقول بس :)

صح لسانك :nice:

أوركيدهـْ ~

24-09-2011, 10:53 AM

البت اللى سبتك لها لون معين

مافهمتك !!!

بس لانها نزلت شباك الموتر لمحت وهي تسب .. في حرمه قدام معها واثنين ورا

والميكب فل ! كانهم رايجين عرس

بايع بايع

24-09-2011, 11:01 AM

قفلت موتري ومشيت ابي ادش المول ..

فتحت شباك موترها وقالت لي بصوت عالي :

صج انج حقيره ومامتربيه .. الحين انا ابي اخذ الموقف وتجين تاخذينه على الجاهز !!

قالت لي : حقيره وقوية عين .. تفووووه عليج وحفصت وراحت !!

ابصراحه انتي الغلطانه

المفروض تكملين طريقج وتدخلين المجمع وبسبب وقفتج لها جاج هالكلام

وهالاشكال ماتستاهل حتى انج تلتفتين عليها

ومب تردين او تناقشين او تاخذين وتعطين بالكلام لان الكلام ضايع وياهم ومايجيج الا تنزيل النفس

وراح تشوفين كثير منها الايام الجايه

واحد من الشباب صارله نفس الموقف مع شلة بلشتيه

سبوه وقطو عليه كلام وقح

قالهم (طز فيكم ) وكان يبيهم ينزلون له

انزلوله اربعه وهو بنفسه

والرجال يلعب قتال الموثاي (Muay Thai )

وطبعا معرف باقي السالفة

واللي مايعرف

هاي مثال على اللي صار
http://www.************/watch?v=YP5wSzfieBs&feature=relmfu

وطبقي المثل اللي يقول طنش تعش تنتعش

رجل اطفاء

24-09-2011, 11:06 AM

صار خير

Qatarianes

24-09-2011, 11:07 AM

شرطه يجرونها وعندج شاهد تروح ورا الشمس :)
غلطانه الشيخه
صارت لي مواقف من هالقبيل وهالاشكال ماتنعطى مجال في قانون فالبلد

أوركيدهـْ ~

24-09-2011, 11:07 AM

مستحيل تتصرف بنت الاصل والفصل بهذة التصرفات

لاكن الساقطات في الاخلاق اكثرو عسى الله يخلف.

بصراحة بعض الحريم بالذات اللى يسوقون يفتقرون للذوق في السواقة لاتعطى طريج في الشارع..والباركنغ غصب تاخذة عكس الرجال ذوق بصراحة

صدقت .. اغلب الشباب يعطون فرصه للحريم يصفون وماصدف اني شفت

احد يتصرف تصرف غير لائق مع الحريم بالباركنات .. بارك الله فيهم

البنت ذكرت في الموضوع انها واقفه عند السيارة اللي بتحرك من الموقف قبل اللي جات مخالفه

وذكرت ان البنت اصلا كانت متردده تدش مخالف ولا لا
يعني بعيد عن السيارة اللي بتطلع يعني هي ما عليها غلط في اخذ الموقف

اشكرج لانك فاهمتني .. وكلامج صح 100% وياريت الاغلبيه تتفهم

هدي اعصابك وفكري : بالنهايه من خذ الموقف ?

انا مو بمسايقه تحدي اخوي

بالعكس مو هذا تفكيري .. لانه الموقف لي اصلا

المفروض تجاهلها من البدايه وعدم الرد عليها او الالتفات نحوها

ردي بسيط عليها ومارديت مثلها ابد

وحبيت ابين لها انها عكس الاتجاه

مممممممم بعض من النص مفقود

حلوه .. وش رايج تكملين المفقود من النص .. بس ترا بيكون من تأليفك !

وبعض الاعضاء الله يهديهم ردودهم مش ولابد
وشلك خص كتبت في المنتدى ام لا مش عاجبك لا تدخل الموضوع
والمسؤولين عن المنتدى اعلم بالمصلحه العامه

اشكرك اخوي واشكر تفهمك وردك

نورالهدى

24-09-2011, 11:08 AM

أختي مع إحترامي لموقفك
لكن الساكت عن الحق شيطان أخرس
أنا معاكي مارديتي عليها ولا لاغيتيها
لكن الصحيح إنك تبلغي الشرطة عليها
واللي كتب لك الرقم يكون شاهد على قلة أدبها
بس إنك تتجنبيها بهذا الشكل
له معان أخرى
أبسطه أن لك مركزا ولا تريدين بلبلة أو تشويش
أو أنك لست بقطرية ولا تريدين الخوض بالمشاكل
لأنه صعب أن أقول أنك سلبيه
واضح من كتابتك أنك ذكية

تحياتي

أوركيدهـْ ~

24-09-2011, 11:20 AM

زين سويتي انج طنشتي لها عفية عليج هالاشكال مقرفة

من قلب !

على فكره من ناحيه قانونيه هذا يعتبر قذف واتحول على النيابه العامه اما من ناحيه اخلاقيه سكوتج عنها وانج ماشتكيتي يدل على اصلج الطيب وانتي بنت ناس تعرفين الاصول احييج الصراحه على صبرج عليها وحكمه تصرفج في هالموقف

تسلم لي وشكرا على ردك ورأيك الصائب

صادني نفس الشي قبل كمن شهر قدام مواقف المول صوب بنك قطر الوطني ...

كانت وحدة وقوية عين فتحت الدريشة وتبي تهاوش انا حركت لانها وحدة و في كلا الحالات بيعتبروني غلطان لو تكلمت كلمة وحدة فعلا ناس مقرفين

للأسف هالشاكله كثرو ويحسسونك انه الشارع شارعهم وحتى الموقف لهم

ومافي احترام للطرف الثاني او لقوانين المرور

زين انج مارديتي عليها ..في هالمواقف تحتاج بروده اعصاب

لاتنسى معاي ضيفه وسببت لي احراج .. يعني زين اني ترفعت عن الرد

والله بصراحة مهما كان اي شخص غلطان المفروض نرتقي بالاسلوب ونتمالك اعصابنا...

يعني لو انا مكانها بجي اكلمج بأدب اقتنعتي كان بها ماقتنعتي ماله داعي اسب واستعرض واتفل بعد وين قاعدين.. وووين الانووثة فالموضوع ‏‏)‏‏=‏

خليها تولي وخذي رقمها واشتكي عليها عشان ماتكرر فعلتها..

احنا بنات قطر المفروض نكون ارقى من هالاسلوب السوقي..

كلامج صحيح إذا كانت هي لها الحق

وصدقيني الاخلاق والرقي والاسلوب بالتعامل مايحدده اي جنسيه

الي سويته عين الصواب وهذى يدل على طيبتك وحسن تربيتك

الله يبارك فيك

تسلمين .. ويبارك فيك ويخليك

الله يصللحهم جميعاا

امين يارب

اسمح لي الشيخ ، الي يدخل عكس السير ماله حق في الموقف حتى لو كان اقرب له ، لانه لو كل من شاف موقف فاضي دخل له عكس السير عشان يلحق عليه بتصير المسألة فوضى!! ، مسألة الدخول عكس السير مسألة مش بسيطة ، وحتى مخالفتها مغلظه.

ياسلام .. هذا الرد الصحيح .. وياريت اللي مو متقبل الغلط يفهم ويدرك الموقف مثلك

أحييك يااخوي

أوركيدهـْ ~

24-09-2011, 11:34 AM

تدرين في مثل هالمواقف الوحده تخلي الانوثه على جنب
وتفلع هالاشكال بالكعب على راسها لانه عيب هالكلام يطلع
من انثى رقيقه وناعمه

مااؤيد رايك .. الواحد يتحكم باعصابه احسن

وكل انسان تصرفاته تعكس شخصيته .. وادري بلحظات الغضب يمكن الواحد يتهور ..

اشكر احساسك

اللهم لك الحمد .. ظهرت عيوب افتراح الاخت اللي اقترحت مواقف خاصه بالحريم

والمفروض تشتكيين عليها فالشرطه لان هاذي اهانه لج .. الطيبه والترفع ما يفيد في هالزمن مع الاشكال اللي مب متربيه

اي مواقف ؟؟ اصلا غلط يكون فيه مواقف للحريم وللشباب

اللي يسوقون كلهم سواسيه .. وبما انه قررنا نسوق بارادتنا .. نتحمل حالنا حال الشباب

المواقف الخاصه فقط للمعاقين

بدل ماتقترحون مواقف للنساء اقترحو مواقف لكبار السن

اصلن حتى لو هي جايه قبل اصلن واقفه عكس السير

ووحتى لو الاخت خذت الموقف بعد والله عييييييب ثم عيب بنت تنزل الدريشه ولا بمكان كذاا تعلي صوتها وتقط كلاام اصلن اشك انهـأأأأ بنت مربيه : )) وياكثرهـم ...

هي كانت بعيده جدا عن الموقف وصدقني لو عطتني اشاره انها تبي الموقف تنازلت لها

لكن تسب وتهرن كانه ببيتها .. هذا عيب

عفوا اختي... انتي اللي خليتها اتسبج ودام ماتبين تاخذين حقج فمادري شالحكمه من انج كاتبه الموضوع في المنتدى؟

اشلون خليتها تسبني ؟؟؟ ماسويت لها شيء ..

بعدين انا قلت لها حطي يدك على الهرن وازعجي العالم ؟؟؟

ومو كل من سبنا سبيناه ... الانسان اخلاق

ومو انت اللي تقرر اكتب موضوع او لا .. محد غصبك ترد عليه اذا مامنه فايده ..

المواقف اللي تمر علينا بحياتنا .. حلو نطرحها علشان نستفيد منها

بالعكس انا سعيده اني طرحت موضوعي عشان استفيد من راي الاخوه والاخوات المتفهمين للموضوع

بالمواقف القادمه

أوركيدهـْ ~

24-09-2011, 11:39 AM

لا تزعلين يا الغالية
وأنتي الراقية والأفضل وإن شاء الله كسبتي الأجر لأنج ما رديتي عليها

«والكاظمين الغيظ والعافين عن الناس والله يحب المحسنين»،

تسلمين يالغاليه .. كلك ذوق

تبين الصراحه مع احترامي لك البنت احتقرتك بهل طريقه لان موترك عادي لو موترك ......كان احترمتك للاسف مثل هل مناظر اشوفها كل يوم في شوارعنا الناس تحترم السياره والرقم

يحليلك

موتري بورش 2011 وموترها كامري

كبري عقلج احسن شي انج سكتي عنها

وهذا اللي سويته .. تسلم لي اخوي وبارك الله فيك

أوركيدهـْ ~

24-09-2011, 11:51 AM

دام إنها بنت وتسوق مانستغرب منها هالكلام !

مو شرط .. لاتعمم اخوي .. الاخلاق والتصرفات مايحدده جنس

اشتكيها لله سبحانه وصدقيني الله بياخذ حقج منها
كل انسان متكبر ويغلط علئ الناس الا ينتقم ربي منه وبسرعه قولي حسبي الله ونعم الوكيل فيها

حسبي الله ونعم الوكيل

احسن شي سويتيه وطنشيها مابتستاهل تعبريها اصلا

صدقت .. خليها تحترق ..

اخخخ لو كان عندتس غرشة بيبسي عصير كرك وغسلتيها فيه

هذي حركات مراهقين .. مستحيل افكر اسويها

يعني لو انا راعي السياره وشخص ماخذ علي الموقف وشفت معه ضيف هل انا بقول مثل

هالكلام ..؟ حتى لو تشرهت بقول مثل الالفاض السوقيه ..؟

ردو كل شي للشرع والسنه .. هل لو كان الرسول بيناا بيسمح للنساء بالسواقه ؟

والله السواقه باحترام مو عيب وكل اسره ولها ظروفها

انا ضد انه يكون سائق بالبيت .. مو عدله السايق يوصل البنت للمدرسه او الجامعه وما معهم احد

لو في حرمه تسوق بالبيت اولى بالتوصيل

وحتى لو بغينا نتقضى اغراضنا .. مو عدله نطلع مع سايق

وكل وحده وتربيتها اخوي ودام الوالدين اعطونا الثقه .. فمافي مانع للسواقه

اذا كل واحد سوى مثلج وطنش .. عمرنا ماراح نشوف نظام فالبلاد
كان اولى انج تشتكين ( دخول عكس السير + قذف وسب + تلاعب وتحفيص )

المفروض اشتكي .. لكن ترفعت عن التفاعل او مجرد التفكير بشكوى لانه كل فكري مع الضيفه

اللي لحد اليوم مانست الموقف

الله يعينج والله بس أشوف الأفض ما تلتفتين لها وادشين المول على طول دون ما اتناقشينا خصوصاً انها مزعجة العالم بالهرن حقها

انا رديت عليها رد عادي وماغلطت معها

لكن وش ذنب العالم جننتهم بالهرن وازعجتهم ! ؟

khaldoon

24-09-2011, 11:55 AM

والله مافي موقف ولا شيء صار وماذكرته

انا بموتري ولا ادري وش السالفه مجرد اسمع هرن متواصل

بعدين وحده واقفه باول اللقه وبالعكس والموقف بعيد عنها بكذا سياره

وش اللي يدريني تبيه ؟؟؟

اختي انا متفق معاج في كل شي مثل ما قلت قبل الا بشي واحد وهو سكوتج لان سكوتج مب ظلم لنفسج بس بل يمكن يكون ظلم لنا كلنا لانج بتسمحين بسكوتج لهذه الاشكال انها تتجرأ على غيرج مستقبلا لانها راح تعتقد انه الكل بسكت مثلج.

أوركيدهـْ ~

24-09-2011, 12:02 PM

اعجبني انك ترفعتي من الرد على هالاشكال لان الرد عليها يعطيها قيمه

ولا شلون مره في مكان عام تطول صوتها وتسب بعد ! انا رجال استحي من ذا السواه

صادق والله .. موقفها يفشل والناس متجمعه وتصارخ لا وتحفص بعد

السكوت أبلغ من الجواب انت أختي سويتي الصح ماعليج منها

اجركِ عند رب العالمين وعدم ردكِ دليل تربيتك الله يكثر من امثالكِ

الترفع عن بعض الاشكال نعمه دامها متردده تتدخل للموقف مب مشكلتج انج تنتظرينها
والحمدالله على كل حال

بارك الله فيكم

الموقف صادني لاقدر الله والله ادعمها وكسر سيارتها واكسرها معها

بوقت الجد مستحيل تسويها .. هذا تهور بلحظة غضب

الله يعينا على الألوان والأشكال اللي نلاقيها واحنا نسوق ...

وكلج ذووووووووووووق يا بنت الأصول وحقج تاخذينه من رب العباد ...

امين يارب العاليمن

انا حصل لي الموقف بالعكس اكثر من مره وكله من نسوان
يعني صاف تنطر السياره تطلع من الموقف.. وتييي وحده وتدخل الموقف ولا كانها تشوفك
تدق هرن لها وتاشر لها انك واقف قبلها
وهي معطتك الاذن الصمخه ولا كانها تدري شالسالفه
الواحد شيقول حق الاشكال ؟
مايبي يتلاسن معاها لانها في النهايه حرمه
لكن في نفس الوقت تقول صج قلة حيا وتربيه

زين تسوي اخوي .. الواحد مايتلاسن مع هالاشكال

أوركيدهـْ ~

24-09-2011, 12:28 PM

ابصراحه انتي الغلطانه المفروض تكملين طريقج وتدخلين المجمع وبسبب وقفتج لها جاج هالكلام

وهالاشكال ماتستاهل حتى انج تلتفتين عليها

ومب تردين او تناقشين او تاخذين وتعطين بالكلام لان الكلام ضايع وياهم ومايجيج الا تنزيل النفس

وراح تشوفين كثير منها الايام الجايه

وطبقي المثل اللي يقول طنش تعش تنتعش

وانا ماره فتحت الشباك وتتكلم بصوت عالي .. وش تبيني اسوي لها ؟ امنعها ؟؟

خلها تتكلم وتصارخ لين بكره

ولو ماطنشتها .. كان اشتكيتها بنفس اللحظه ... الهندي سجل رقم الموتر

شرطه يجرونها وعندج شاهد تروح ورا الشمس غلطانه الشيخه
صارت لي مواقف من هالقبيل وهالاشكال ماتنعطى مجال في قانون فالبلد

باذن الله بالمواقف الجايه والله لايجيب هالمواقف

بس إنك تتجنبيها بهذا الشكل له معان أخرى
أبسطه أن لك مركزا ولا تريدين بلبلة أو تشويش
أو أنك لست بقطرية ولا تريدين الخوض بالمشاكل
لأنه صعب أن أقول أنك سلبيه .. واضح من كتابتك أنك ذكية

حبيبتي بالفعل لي مركز ومسؤولية بالمجتمع وقطرية ايضا

ولكن كما وضحت بالبداية الانسان احيانا يترفع عن هذه المواقف بالرد

أوركيدهـْ ~

24-09-2011, 12:36 PM

اختي انا متفق معاج في كل شي مثل ما قلت قبل الا بشي واحد وهو سكوتج لان سكوتج مب ظلم لنفسج بس بل يمكن يكون ظلم لنا كلنا لانج بتسمحين بسكوتج لهذه الاشكال انها تتجرأ على غيرج مستقبلا لانها راح تعتقد انه الكل بسكت مثلج.

والله سكوتي بالاساس انه معاي ضيفه بنفس مجالي بالعمل جاية زياره لقطر

وانت ماتدري يوم ازورهم بالامارات وشلون يضيفوني ويوجبوني بجد ماتتخيل

فالموقف هذا فشلني قدام الضيفه ومو عدله انشغل وقتها بشكوى ورد عليها

والضيفه معاي .. احتمال لو كنت مع الاهل ماتجرأت والله العالم

لكن اقتراحي لو فيه شرطي كان ماتجرأت حتى تهرن بهالطريقه لانها بتخاف من المخالفه

ابوالكلام

24-09-2011, 12:46 PM

اختي يقول لك المثل الحقران يقطع المصران احسن طريقة انا اسوي نفس الشي

JN000N

24-09-2011, 12:49 PM

لا حبيبتي
بالعكس ماراح يكون في شي من تاليفي :)

انا بقولج اللي صار باختصار.....

رحتي مجمع وع اساس انج تعرضتي لسب وقذف والخ الخ وقلتي انج ارقى من انج تردين ع هالاشكال طيب يوم انج ارقى ليش من البدايه وقفتي وبررتي لها وقفتج فالموقف..
وعندي سوال،، يوم بررتي لها موقفج رحتي لها عند سيارتها تفهمينها والا زعقتي عليها مثل ماهي زعقت في سيارتها؟

بعدين يوم تقولين معاج الحق ودريول ياب لج رقم السياره وقال لج اشتكي رحتي قلتي له انج ارقى!!! اوكي انتي ماتبين تشتكين ليش ماقلتي لابوج اخوج حد بدالج يروح يشتكي ع اساس هالفئه تتادب
يعني بالنسبه لبقية الاشكال هذي العيار اللي ما يصيب يدوش
مافي حد ع حق ويسكت عن حقه ،، مهما يكون الا اذا في شي خايف منه

طيب ما اشتكيتي فالمكان الصح ،، لكن جيتي المنتدى وكتبتي عن القصه اللي صارت والبنت ذموها شكثر وانسبت ،، وهي خبر خير واللي صار ان سيئاتها تتبدل حسنات من كلامكم عنها
لاتقولين موقف وحبيت انبه الكل عنه لانها مش قصه تنبيه وكل واحد ويتصرف ف موقف بيصير له بدون ما يجي هني ويقول سبوني وقالو عني،، سبوج غلطو عليج عندج جهات رسميه تشتكين لها
وممكن لما تجوفين انها ظاهره منتشره ومتكرره تكتبين عنها باسلوب مختلف جدا
وفالنهايه،، شلون تبين يكون في كابينة للشرطه وانتي اصلا ماشتكيتي للشرطه

almaf1a

24-09-2011, 12:51 PM

وشسالفة المواقف هل اليومين

بوعلي2

24-09-2011, 12:54 PM

:unsure:

الله المستعان

نورهان88

24-09-2011, 12:57 PM

مع احترامي للكل ....

الأخت اذكرت الموقف اللي سار فقط ولم تذكر أسمها ولا رقم سيارتها ولا حاجة

فكيف تبدلت سيئات المذكورة إلى حسنات؟؟؟؟؟؟؟؟؟؟؟؟؟؟؟؟

الفهد1

24-09-2011, 01:10 PM

الي اهلهم ماربوهم الحكومه تربيهم. روحي واشتكي ......
الموضوع بالمنتدي مراحل يربيها او يحل المشكله....
اذا كل مو قف نتعرض له مراح نأخذ حقنا بالقانون الكل راح يتجرأ ......الطيبه والمسامحه ماتنفع مع كل الناس

بقولك شي اخوي الكريم من كم شهر نفس الموقف صادف لشخص الله يستر علية راح وبلغ الشرطة وتحسف انة راح وبلغ وحجزوة وعرضوة على النيابية وتبهدل تبهدل وتحسف انة راح وقدم بلاغ ومن عقبها حرم على نفسة ان يبلغ على اي حد يعترض علية يسكت ويروح بيتة استر لة والله يفرج على كل مظلوم

مهره

24-09-2011, 01:25 PM

والله ما اسكت عنها

saryalia4u

24-09-2011, 01:29 PM

جاااان لخيتيها بالكعب اللي عندج

بصمة قطرية

24-09-2011, 01:55 PM

غلطانة اختي المفروض ما تسكتين لها ..
كل شخص يتعرض لشي جذي بيقول انا ارقى من اني ارد ..!!
معناته مافي داعي لشكاوي و شرطة ..
خلاص طنشوا ..:secret:

دامج ارقى من انج تنزلين نفسج ليش وقفتي
و حاولتي تبررين لها ..
دامج مب غلطانة وتقولين هي داخله عكس السير ..
يعني هي غلطانة 100 ليش اصلاً بررتي لها ..

ناصر30

24-09-2011, 02:03 PM

كان المفروض ماتوقفين ولاتسمعين لها بمجرد ماحسيتى انها

من هالنوع وعموما اللى سويتيه يعتبر درجه عاليه من الرقي

ولك هذه الابيات من كلام الشافعي :

قالوا سكتُّ وقد خوصمتُ قلتُ لهم
إنَّ الجــوابَ لبابِ الـشـــرِّ مفتــاحُ

والصمَّتُ عن جاهلٍ أو أحمقٍ شرفُ
وفيه أيضاً لصونِ العرضِ إصلاحُ

أما تَرَى الأُسْدَ تُخْشى وهْي صَامِتة
والكلبُ يخسى لعمري وهو نباحُ

عندي أمل

24-09-2011, 02:05 PM

كان المفروض تشتكين عليها في الشرطة والشرطة بتحول الشكوى للنيابة العامة ..لان الكلام اللي قالته لك يعتبر جنحة يعاقب عليها القانون والافعال الغير مهذبة(التفل)بعد تعتبر جنحة إذا بالفعل قدرتي تثبتين هالشي عليها من خلال الشهود..انا لوكنت مكانك كان اشتكيت عليها على طول تدرين ليش؟؟أولا لان هذا حقي اللي كفله لي القانون. وثانيا علشان تتأدب اللي غلطت عليك وعلشان ماتسوي أو تكرر هالشي في واحد أو وحدة مرة ثانية لان لو تركنا كل واحد يسوي اللي يبيه ويغلط على الناس ترى الفوضى بتنتشر ..أنا أدري ليش مارديتي عليها لان هالاشكال ماحد يرد عليها مثل ماتقولين بس هذا الرأي غلط والغلط الأكبر منه انك مااشتكيتي عليها.

قلبى طيب

24-09-2011, 05:58 PM

حسافه على بعض بنات قطر صاروا مثل الشباب يتسابقون ويحفصون وقله ادب

qatarya-vip

24-09-2011, 06:16 PM

والله انتي اسلوبج رااااقي وماعليج منها

هي غلطانة ومالها حق بالموقف حتى لو كانت اقرب لأنها اصلا داخلة عكس السير مالها حق

ولو كلنا التزمنا بالقانون والله ماشفنا حوادث وولا مخالفات لكن للأسف نغلط ونبرر الغلط لنفسنا بعد

لو ماكانت هي غلطانة ماكانوا حطوا مخالفة بهاالسعر حق عكس السير

انتي صح وارقى ماعليج منها

بس زين ما جاء واحد ثالث وتخطاكم واخذ الموقف عنج وعنها ههههه تصير والله ومثل ماقلت لج فوق لو كلنا نلتزم بالقانون ماشفنا لا خبط وولا حوادث

أوركيدهـْ ~

24-09-2011, 09:19 PM

انا بقولج اللي صار باختصار.....

لايكون بس كنتي معاي ؟؟ :)

رحتي مجمع وع اساس انج تعرضتي لسب وقذف والخ الخ وقلتي انج ارقى من انج تردين ع هالاشكال طيب يوم انج ارقى ليش من البدايه وقفتي وبررتي لها وقفتج فالموقف..

شكلك مو متابعه !!

هي واقفه عكس السير ببداية الشارع وانا لو صفيت لازم امشي علشان ادش المول وبمر ببداية اللفه اللي تطلع منها المواتر وكانت واقفه وتهرن طول هالوقت يوم شافتني امر نزلت الشباك وصرخت وانا قلت لها كلمتين ما كثرت معها ومشيت :)

وعندي سوال،، يوم بررتي لها موقفج رحتي لها عند سيارتها تفهمينها والا زعقتي عليها مثل ماهي زعقت في سيارتها؟

تم الرد على هذا السؤال ( شوفي الفقره السابقه ) :)

بعدين يوم تقولين معاج الحق ودريول ياب لج رقم السياره وقال لج اشتكي رحتي قلتي له انج ارقى!!! اوكي انتي ماتبين تشتكين ليش ماقلتي لابوج اخوج حد بدالج يروح يشتكي ع اساس هالفئه تتادب

بالفعل انا ارقى ومااحب سوالف الشرطه والشكاوي

وابوي الله يرحمه متوفي من 8 سنين وعندي اخ واحد مسافر

مافي حد ع حق ويسكت عن حقه ،، مهما يكون الا اذا في شي خايف منه

مااخاف إلا من ربي سبحانه وتعالى

لكن طبيعتي مو حقت بربره وهواش ومشاكل .. احب الهدوء

و ارقى من هالسوالف والوالده ربتني على جذيه ..

الصمت مو دوم خوف وضعف بالشخصيه بالعكس .. الصمت للعقلاء !

طيب ما اشتكيتي فالمكان الصح ،، لكن جيتي المنتدى وكتبتي عن القصه اللي صارت والبنت ذموها شكثر وانسبت ،، وهي خبر خير واللي صار ان سيئاتها تتبدل حسنات من كلامكم عنها

لاجبت طاري اسمها ولا شكلها ولا حتى عنوانها !

لاتقولين موقف وحبيت انبه الكل عنه لانها مش قصه تنبيه وكل واحد ويتصرف ف موقف بيصير له بدون ما يجي هني ويقول سبوني وقالو عني،، سبوج غلطو عليج عندج جهات رسميه تشتكين لها

لو كل مشكله صارت لنا .. نروح نشتكي .. كان عمرنا لاأنتجنا ولا كان لنا هدف بحياتنا

اليوميه .. لازم نكون ارقى وخصوصا الحين الناس صار عندها وعي وادراك مو مثل

زمن اجدادنا وابهاتنا .. ثقافتهم اقل ومانلومهم لو فكرو مثل هالتفكير ..

وممكن لما تجوفين انها ظاهره منتشره ومتكرره تكتبين عنها باسلوب مختلف جدا

هذا اسلوبي .. واحب البساطه وعدم التكلف .. ومااعتقد اسلوبي غلط

ولست بكاتبه في زاوية باحدى الجرائد :) لكي اكتب بغموض :)

شلون تبين يكون في كابينة للشرطه وانتي اصلا ماشتكيتي للشرطه

يحليلج :) ... الشرطي له احترامه ومكانته ..

يعني مثلا . اذا في واحد يسوق الموتر ومو رابط حزام الامان

واول من يوصل الدوار ويشوف الشرطي ربط الحزام .. ياترى ليش ؟؟