دوام تايم ملل :(

[صدى الحق]

السلام عليكم ورحمة الله وبركاته
كلمة يتداولها البعض وشفتها من خلال برودكاست على البلاك بيري .

سؤالي ايش اللي يخلينا نتملل من الدوام ؟؟؟

مسؤولك ؟
صعوبة الشغل عليك ؟
بيئة الشغل ؟
التوقيت ؟
امور ثانية ودك تشارك بها وتعبر عن اللي بخاطرك ؟؟؟

وايش الحل برايك حتى يكون توجهنا لمكاتبنا واشغالنا شي حلو نحبه وننتظره بداية كل اسبوع ؟؟؟

بوسعد

[الرايــق]

انا اتملل من الشغل اذا ما عندي شي اسويه... وقتها تحس يومك طويل.....

[دااانة قطر]

وعليكم السلااام والرحمه
سؤالي ايش اللي يخلينا نتملل من الدوام ؟؟؟

مسؤولك ؟
طبيعي .. بحكم ان مسؤؤلي أجنبي فأشوف إن واايد يتسااهل مع الأجاانب اللي معااي في التيم

صعوبة الشغل عليك ؟
بالعكس مب صعب لكن احياانا يصير ضغط نزهق بسببه وأحياانا نجلس بدون شغل فيصيبنا الملل

بيئة الشغل ؟
البيئه لها دور ..

التوقيت ؟
طويل 8 ساعاات:rolleyes2:

امور ثانية ودك تشارك بها وتعبر عن اللي بخاطرك ؟؟؟ياليت يتم تخفيف ساعات العمل (female) مرااعاة لاحتيااجات الأسره

وبس الله يعطيكم العاافيه

[مشعل 111]

الملل من بيئه الدوام اغلب الأحيان صدقني

المدير بيده يخليك تحب الدوام وودك تشتغل طول اليوم ماعندك مشكله وانت مبتسم

وبعض المدراء للأسف يخليك تكره شي اسمه دوام لأنه وبكل بساطه ماعنده حسن اداره

ويعطيك العافيه عالموضوع وسبحان الله امس اتكلم عن الشباب في هالموضوع

[للصبر اخر]

الملل من شيين
اذا ماعندك شغل وقاعد زيادة عدد
والوقت الطويل
8 ساعات والله طلعت الروووووح

[صدى الحق]

حياك الله اخوي ...

هل هذا له علاقة بسؤ التخطيط في جهة العمل ؟
او له علاقة بتوزيع العمل ؟
او الادارة عندها مشكلة في توزيع الادوار والمسئوليات ؟

[صدى الحق]

بارك الله فيك وشكراً لك اضافتك اختي ومشاركتك .

اتمنى يتغير وقت الدوام ويا حبذا لو ينتهي بعد صلاة الظهر وبالخصوص لخواتنا حتى يكون لهم جزء لو بسيط في الاسرة .

[صدى الحق]

شاكر لك مرورك ومشاركتك اخوي ...
وفعلاً البيئة مهمة جداً وقد يكون لنا دور في تغيير البيئة من خلال بناء العلاقات الطيبة مع الاخرين .
والمدير كالقائد في المجموعة من المهم انه يكون مقبول عند الكل حتى يكون الناتج طيب في نهاية الامر .

[(حوريه)]

الاحساس بالملل من العمل

دليل على غياب الهدف

[صدى الحق]

اشكر لك مرورك ومشاركتك ...

يعني اضافة الى سوء التخطيط وتوزيع العمل او الادارة .

[صدى الحق]

وانا اخوك ممكن تخبرينا بايجاز عن غياب الهدف ومن السبب فيه والعلاج ؟؟؟

شاكر لك مرورك واضافتك .

[ثابت]

مشكلة الدوام ملل لنة اكثر المسؤلين يستعبد الموظفين تحتة وتوصل الي انة يزعق عليهم وتحصل الموظف متضايق طول الوقت ولا يعطي اهمية لشغل بسبب هذا المدير الي قد يحمل شهادة ولا يحمل خبرة تعامل مع الموظفين وللاسف وقت الدوام سبب قوي لنة 8 ساعات منهكة للموظف يليت يخففون الوقت لصالحهم وصالح الموظف

[بلوتنيوم]

الملل مايجي الا اذا مافي شغل :telephone:
اطلب من مسئولك شغل وقتها ما بيكون عندك ملل تايم ؟؟ :)

[الزعفراني]

أنا أعتقد الملل في الدوام له علاقة بـ " الحالة النفسية " و " المزاجية " للموظف .

[صدى الحق]

بارك الله فيك واشكر لك اضافتك اخوي

يعني الادارة والوقت مثل ما اتفق عليه اغلب الأخوة والاخوات .

[ملكت الكون]

أنا أحب الدوام وأحب الشغل وايد :shy:

بس للأسف صرت أقول الدوام ملل :weeping:

لأن مافي شغل يومي نسويه وشغلي مرتبط بأوقات معينة فالسنة :yawn:

يعني وقت فراااااااااااااااااغ فالدوام :telephone:

مع ان شغلي وايد حلو

وصرت أقول ملل لأن تغير مكتبي وصرت مع مسؤولتي في مكتب واحد :rolleyes2:
وضع صعب وأحس إني مقيدة حتى في شغلي
:cry:

وحتى الابداع اختفى >> خفي علينا :shy:

[صدى الحق]

طيب ولو نظام العمل عندك ما يسمح بأنك تطلب شغل على سبيل المثال التراخيص التجارية اذا ماكو معاملات وش الحل ؟

اشكر لك المشاركة وبارك الله فيك

[صدى الحق]

شكراً لك اضافتك ...

طيب كيف تساعد الموظف المتملل او المزاجي في ايجاد حل لمشكلته اخوي ؟؟؟

[QatariFallah]

تبون يكون الدوام مش ملل
تبون اتحبون الدوام
تبون تتركون اهلكم كل يوم بدري واتأخرون عليهم عشان ميتين وشفقانين عالدوام؟ هههه

انا بقولكم شلون

واحد من الاثنين

1- انت بنفسك قوم من مكتبك وروح شوف الناس تحت بالقاعات وبالممرات شتبي تسوي وتخلص وخذهم من يدهم وساعدهم..وخذلهم الورق ووده وجيبهم وعطهم..منها اتخلص الرجال ومنها ثواب ومنها دعوه صالحه من شخص مظلوم لربما

أو اذا كنت من النوع اللي مايحب يسوي جذي..بس يبي شغل مكتبه وخلاص لكن يبي الجو حواليه يتعدل..اذا ف ينفعك الاختيار الثاني، وهو ...

2- جهة العمل تبدأ تطبق وتنتهج ماتفعله كبار الشركات لموظفيها..مثل شركة Google وشركة Microsoft وبعض الشركات الأخرى فالخارج
توفير القمة في راحة الموظف ولا يجبر على العمل المتواصل ووقته "فليكسيبل" ويعوضه باي وقت في فتره محدده
وتوفير خدمة مطاعم للمكتب من داخل الشركه
وهدايا ومسابقات الكترونيه تعرض على شاشات عملاقه في المكاتب وخط مشترك للحديث والمزح وبرك سباحه والعاب حتى وغيره من هالاشياء..الموظف مايتملل..يقطه شغله شوي ربع ساعه وللا نص ساعه يروح يطلع كل اللي فيه ويرجع..وهذا شي مفيد لانه مش راح يدخن وهي النفسيه نفسها نفسها عمل وبس..لا..راح زاول نشاط اخر مختلف تماما عن مايعمله وجدد نشاطه بشي محبب اليه مما ارجعه الى نقطة "الساتيوريشن" او نقدر نقول ال"بفر" اللي بمخه سواله "ريسيت"..

في بعض الاشياء من هالجو قاعد يصير بقطر
انا لاحظت ان شوي مغيرين جو العمل
ويحاولون يسوون شاشات وخدمات في مكاتبهم..والوان وصور ودلع واللي يبي يسوي شي يسوي ع كيفه
تدرون وين..

مكتب فودافون الموجود في حديقة العلوم والتكنولوجيا التابعه ل مؤسسة قطر فاونديشن

الوحيد اللي لاحظت عليه هالشي..وعجبني


وشكرا

[صدى الحق]

شكراً لك اختي على اضافتك ...

وربي يعينك بس بعد بيكون بيدك التأقلم مع الوضع اذا كانت هذي طبيعة عملكم ، واعتقد محاولتكم الاسهام في اي جهة رسمية كعمل تطوعي اثناء فترة الدوام بيكون مخرج طيب لكم ؟

[دااانة قطر]

مشكلة الدوام ملل لنة اكثر المسؤلين يستعبد الموظفين تحتة وتوصل الي انة يزعق عليهم وتحصل الموظف متضايق طول الوقت ولا يعطي اهمية لشغل بسبب هذا المدير الي قد يحمل شهادة ولا يحمل خبرة تعامل مع الموظفين وللاسف وقت الدوام سبب قوي لنة 8 ساعات منهكة للموظف يليت يخففون الوقت لصالحهم وصالح الموظف



أما يزااعق وتسكت له؟؟!!:eek5:

[صدى الحق]

تبارك الرحمن اضافة رائعة نسأل الله ان ينفعنا بها ، مجموعة حلول وافكار طرحتها واتمنى لو نبدأ بتطبيقها اليوم قبل بكره ...

الحقيقة نقاط تصلح تفتح لها موضوع مستقل تحت عنوان ( كيف تكون مؤثراً في بيئة عملك ) او اي عنوان اخر تشوفه مناسب ...

شكراً لك وبارك الله فيك .

[صدى الحق]

مع شديد الاسف هناك بعض المسئولين يستخدمون هذا الاسلوب لتغطية فشلهم في الادارة .

[موضي قطر]

انا وحده احب شغلي لدرجة اسوي اي شغل يجيني :(


لأني احب هالشي ومايمنع آخذ فترة ماتتعدى


نص ساعة بريك .. مديري ماشاء الله عليه ان


وحده ماسوت شغلها حذفه علي .. رؤساء أقسام


اخيتكم موضي انشهرت عندهم انها تسوي كل الشغل وماتقول لاااااااا:weeping:


والله في يوم هالجمعه انه جابوا لي مرة شغل وحده وكانت في اجازة وكان عبارة عن ادخال

اسماء الموظفين والموظفات في الوزارة والأماكن التابعه لها سويته وما جا آخر الدوام الا وانا مدخله اسم 3000 موظف مع بياناتهم كاملة آخرتها مديري معطيني جيد
جداً مع اني كله آخذ امتياز .. حتى لما كانت موظفة معانا الله يذكرها بالخير تشتغل

بذمة وضمير كان يشكر غيرها ويوقف لها على تأخير 10 دقايق او ربع ساعه لأنها توصل عيالها المدرسة رغم انها تشتغل وماتم فاضية طول اليوم والتقدير حق الموظفات
اللي مروينه العين الحمره:anger1: ومرات شغلهم

يوزعونه على غيرهم والمدير عادي عنده

بالذمة ماتبون الموظف او الموظفة يتملل

ويكره شغله:omen2:

[الدوحه 2006]

ههههههههههههههههههه

انتوا ما خليتوا شي عيل انا شقول ؟؟؟

دوام 12 ساعه وغير هذا القطري الوحيد في الشفت ولا عندي اي شغل اسويه

والله انه ملل تايم بالقو بعد

عندكم اقتراحات ؟؟

[الخيالة]

سؤالي ايش اللي يخلينا نتملل من الدوام ؟؟؟

مسؤولك ؟

اي أكيد مسؤولي والغريب ان مسؤولي قطري وشايف نفسه علي شنو مادري وبالعكس الأجنبي لما يجي يسلم علينا يسولف معانا ننسي الوقت معاه اما القطري مايدانينا لأن احنا مب نفس البنات اللي في باليه حسبي الله عليه

صعوبة الشغل عليك ؟
لا عادي أصلا أحب اشتغل مو مشكلة نوعية الشغل بس الناس التعبانين اللي معانا يخلينا نتملل ونكره الشغل والمكان بكبره

بيئة الشغل ؟

هو لها دور بيئة الشغل بس احنا مثل ماقلت أكثر شي بسبة المسؤولين والمشرفين الله يهديهم

التوقيت ؟

:( دوام شفتات ومرات نداوم أكثر من 11 ساعة بعد يعني شنو تتوقعون نكره الدوام ولي نحب المكان خصوصا حق البنات مب شي لا ودوام ليل لين الصبح حسبي الله علي المدير اللي مب راضي يفهم

امور ثانية ودك تشارك بها وتعبر عن اللي بخاطرك ؟؟؟


يفكرون فينا أكثر يقللون من ساعات الوقت مديرنا يهتم فينا أكثر يشوف شغلنا مب يمشينا علي مزاجه ويشوف حركة البنات واذا عجبه اي بنت يهتم فيها لو حتي هالبنت ماتشتغل واللي يشتغلون مايهتم فيهم لان مب من النوع اللي يبي وهاي كله غلط وبيجي له يوم ان شاء الله

وايش الحل برايك حتى يكون توجهنا لمكاتبنا واشغالنا شي حلو نحبه وننتظره بداية كل اسبوع ؟؟؟

والله بالنسبة لي دام هالمدير موجود مابستانس كلش بس شقول مجبورة اروح لين يوم اللي نفتك منه ماقول غير حسبي الله ونعم الوكيل

[راشد محمد]

لانه ما به شغل فنتملل

[صدى الحق]

بارك الله فيك أختي وشكراَ لك مشاركتك .

يعني المشكلة لا تقدير ولا دعم والخلاصة المشكلة في الادارة عندك .

[صدى الحق]

المشكلة وانا اخوك التطوير وبقائك على هذا الحال سلاح ذو حدين البعض يقول راحة والاخطر ان التطوير والطموح للأفضل امر هام في حياتنا وفي المجتمع اللي ننتمي له ومن واقع وضعك ماكو تطوير.
لذلك بادر .
ربي يوفقك للي فيه الخير لك .

[صدى الحق]

إدارة وانا اخوك .
وهذي النوعية من المدراء ما ينسكت عليهم وواجب الابلاغ عنهم وانا متأكد بأنه راح ينقط بالبيت من غير حسافة عليه .
فالمسئولين مايرضون بوجود مثل هذي الاشكال .

[صدى الحق]

ادارة وانا اخوك
المفروض يكون فيه شغل حتى تنتفي سالفة مافي شغل .

شكراً لك مرورك بارك الله فيك .