مواطن يزوج بناته الثلاث بـ"ريال"

[هبوب الكوس]

عشيرة - عبدالله بن شليه:
اكتفى مواطن في محافظة الطائف بمبلغ ريال واحد ووليمة عشاء لا تتعدى خروفين, وذلك كمهر وحفلة عشاء لإتمام زواج ابنته من أحد الشباب من أقاربه وهو الأمر الذي كان له أثر كبير في إتمام الزواج بسرعة كبيرة بعيداً عن حجوزات قاعات الأفراح والتي تمتد مواعيدها لأكثر من شهر خصوصاً خلال الإجازة الأسبوعية.
وعلى الرغم من محاولة والدة العروس ثني زوجها عن قراره وإقامة حفلة كبرى لابنتها إلا أن تلك المحاولات بأت بالفشل أمام إصرار الأب الذي أكد لـ(الرياض) و لمن حضر وليمة العرس المختصرة أن هدفه من هذا الاختصار هو التيسير على العريس وعدم التكليف على أقاربهم في المدن البعيدة بالسفر وحضور المناسبة مؤكداً أن الدعاء للعريسين بالبركة والتوفيق خير من تكبد عناء السفر وتحمل التكاليف الأخرى التي أنهكت الكثير من الأسر الذين يرغبون في تزويج أولادهم وبناتهم, يشار أن مهر (الريال) تكرر في زواج جميع بنات هذا المواطن الثلاث.

[Class]

كفوووووووووووو والله

[يحفظك ربي]

الله يبارك لهم في هالزواج ويوفقهم

[بوجبر]

المهر حق شرعي للزوجة بنص قرآني..

قال تبارك وتعالى: وَآتُوا النِّسَاءَ صَدُقَاتِهِنَّ نِحْلَةً ..

[المفترسه]

قلنا نرخص المهور ونسوي تنزيلات بس مب ريال عاد شدعوه

نفس السعودي اللي زوج بنته بريالين لرجل على قولته متدين
وفي الاخير تطلقت منه لانه كان يناديها اهوا وهله تعالي يابوريالين
وروحي يا بوريالين حتى الناس اللي كانوا يزورونهم كانوا يسالونهم
وين مرت ولدكم اللي خذتوها بريالين مسكينه البنت ماتحملت واهلها زعلوا
القصة مش من وحي الخيال قريتها فالجريده والله اعلم

[هبوب الكوس]

كفوووووووووووو والله



كفو كفو

وياريت يخفون عندنا المفوشر في الاعراس

[هبوب الكوس]

الله يبارك لهم في هالزواج ويوفقهم

امين وللجميع

[Class]

كفو كفو

وياريت يخفون عندنا المفوشر في الاعراس



ايه الله ياخوي يخفون من خرابيط المفوشر

ولا بتصير هجرة للشباب القطري للزواج من دول الخليج الحالية لأن الأمور سهلة وبسيطة

أو لدول الخليج المستقبلية - المغرب والأردن ومصر -

[هبوب الكوس]

المهر حق شرعي للزوجة بنص قرآني..

قال تبارك وتعالى: وَآتُوا النِّسَاءَ صَدُقَاتِهِنَّ نِحْلَةً ..

صحيح كلامك بوجبر

المقصد مثل هذا العمل تقليل المهور

وعدم ارهاق ميزانية المتزوج

[chillis]

صحيح كلامك بوجبر

المقصد مثل هذا العمل تقليل المهور

وعدم ارهاق ميزانية المتزوج

محد قال يرهقونه على الاقل 40 الف او 50 الف يعني تقديرا لها

[بوجبر]

صحيح كلامك بوجبر

المقصد مثل هذا العمل تقليل المهور

وعدم ارهاق ميزانية المتزوج


مرحبا اخوي هبوب الكوس

معاك في تقليل المهور بس ليس لهذه الدرجة:)

[قناص 787]

قلنا نرخص بالمهور بسس مهب كذا هذا ارخص ببنته يعني على الاقل قال
10 الاف او 5 الاف بعد مهب غالي المهر لكن ريال يعني كذا ظلم البنت
يالربع البنت تبغي تجهز تسوي اشياء جديده لانها راح تدخل في حياة جديده
والله انا ضد المفوشر وضد غلاء المهور لاني شفت غلاء المهور عندنا شي
مهب طبيعي نادر ماتلقلى اللي يطلبون مهر 70 و 80 الناس قامت تتكلم
من 140 وفوق الله المستعان الواحد كل ماراح بيت يبغي يخطب يشرد
من ام البنت الله يعين بسس

[هبوب الكوس]

قلنا نرخص المهور ونسوي تنزيلات بس مب ريال عاد شدعوه

نفس السعودي اللي زوج بنته بريالين لرجل على قولته متدين
وفي الاخير تطلقت منه لانه كان يناديها اهوا وهله تعالي يابوريالين
وروحي يا بوريالين حتى الناس اللي كانوا يزورونهم كانوا يسالونهم
وين مرت ولدكم اللي خذتوها بريالين مسكينه البنت ماتحملت واهلها زعلوا
القصة مش من وحي الخيال قريتها فالجريده والله اعلم

المقصد مب ريال وريالين المقصد تقليل المهور

وبخصوص انهم يعيرونها هو رفس النعمه ولم يقدر بالعربي قليل اصل

[هبوب الكوس]

ايه الله ياخوي يخفون من خرابيط المفوشر

ولا بتصير هجرة للشباب القطري للزواج من دول الخليج الحالية لأن الأمور سهلة وبسيطة

أو لدول الخليج المستقبلية - المغرب والأردن ومصر -



هههههههه

[chillis]

قلنا نرخص بالمهور بسس مهب كذا هذا ارخص ببنته يعني على الاقل قال
10 الاف او 5 الاف بعد مهب غالي المهر لكن ريال يعني كذا ظلم البنت
يالربع البنت تبغي تجهز تسوي اشياء جديده لانها راح تدخل في حياة جديده
والله انا ضد المفوشر وضد غلاء المهور لاني شفت غلاء المهور عندنا شي
مهب طبيعي نادر ماتلقلى اللي يطلبون مهر 70 و 80 الناس قامت تتكلم
من 140 وفوق الله المستعان الواحد كل ماراح بيت يبغي يخطب يشرد
من ام البنت الله يعين بسس

والله البنت الي تفكر جذي هي الي بتاكلها وبتم بجبد اهلها وان جاب لها بتعيش معاه بديون لين الله يشوف لهم وتالي بتكبر المشاكل بينهم لان مهب قادر يصرف عليها :) من الاول خلهم يمشون على مقدور الريال يعني 50 الف على الاقل :)

[هبوب الكوس]

محد قال يرهقونه على الاقل 40 الف او 50 الف يعني تقديرا لها

هذا لب الموضوع

[بوحارب]

الله يجزاه خير :)

[غالية قطر]

قلنا نرخص المهور ونسوي تنزيلات بس مب ريال عاد شدعوه

نفس السعودي اللي زوج بنته بريالين لرجل على قولته متدين
وفي الاخير تطلقت منه لانه كان يناديها اهوا وهله تعالي يابوريالين
وروحي يا بوريالين حتى الناس اللي كانوا يزورونهم كانوا يسالونهم
وين مرت ولدكم اللي خذتوها بريالين مسكينه البنت ماتحملت واهلها زعلوا
القصة مش من وحي الخيال قريتها فالجريده والله اعلم

ههههههههههههههههه
أضحك الله سنك اختي الغالية
وعليـــــــــــــــــــــــــه مايسوى علها:funny:

[أم مشعل]

هالأب الله يهديه مصخها ...........ريال عاد..........

وبعدين هو اشدخله يحدد المهر ............والبنت وينها .........احنا ما نطالب بالمهر العالي احنا ضده

على طول الخط ونحاربه ........لكن ما نرضى بالمهانة لبنات جنسنا ..........أنا هذي اعتبرها اهانة للبنت

لما يكون مهرها ريال وريالين وخروف ........اشهالكلام احنا ضد غلاء المهور لكن في نفس الوقت

ضد شراء المرأة بريال وريالين وخروف ........

[بوجبر]

ايه الله ياخوي يخفون من خرابيط المفوشر

ولا بتصير هجرة للشباب القطري للزواج من دول الخليج الحالية لأن الأمور سهلة وبسيطة

أو لدول الخليج المستقبلية - المغرب والأردن ومصر -





الشباب ماشاء الله عليهم مهما كانت الاحوال دفيعة للارقام المميزة وللسفرات والسيارة اخر مديل كل سنة....المهور فقط هي اللي تثقل كاهلهم:)

[chillis]

الشباب ماشاء الله عليهم مهما كانت الاحوال دفيعة للارقام المميزة وللسفرات والسيارة اخر مديل كل سنة....المهور فقط هي اللي تثقل كاهلهم:)

:nice::nice: قصدك يقولون نتزوج من برا ارخص

[Class]

الشباب ماشاء الله عليهم مهما كانت الاحوال دفيعة للارقام المميزة وللسفرات والسيارة اخر مديل كل سنة....المهور فقط هي اللي تثقل كاهلهم:)



لا يغرك كله سلفيات

[R 7 A L]

ياخي أكتب سعودي

اول ماقريت العنوان
وجهي صار كذا :omg:

[هبوب الكوس]

صحيح كلامك بوجبر

المقصد مثل هذا العمل تقليل المهور

وعدم ارهاق ميزانية المتزوج

:nice:



مرحبا اخوي هبوب الكوس

معاك في تقليل المهور بس ليس لهذه الدرجة:)

حياك الله بوجبر :)

[ريتويت]

انشالله تطبق عندنا ... نتمني ان الناس ترضي بس

[قلبي الطيب]

ياخي أكتب سعودي

اول ماقريت العنوان
وجهي صار كذا :omg:

نفس ويهي :omg::omg:

[هبوب الكوس]

قلنا نرخص بالمهور بسس مهب كذا هذا ارخص ببنته يعني على الاقل قال
10 الاف او 5 الاف بعد مهب غالي المهر لكن ريال يعني كذا ظلم البنت
يالربع البنت تبغي تجهز تسوي اشياء جديده لانها راح تدخل في حياة جديده
والله انا ضد المفوشر وضد غلاء المهور لاني شفت غلاء المهور عندنا شي
مهب طبيعي نادر ماتلقلى اللي يطلبون مهر 70 و 80 الناس قامت تتكلم
من 140 وفوق الله المستعان الواحد كل ماراح بيت يبغي يخطب يشرد
من ام البنت الله يعين بسس

تحطيم الرقم :nice:

الله يستر لا يصك 2 مليون وشدعوى عباية :secret:

[هبوب الكوس]

الله يجزاه خير :)

ويجزاك مثله

[هبوب الكوس]

ياخي أكتب سعودي

اول ماقريت العنوان
وجهي صار كذا :omg:


نفس ويهي :omg::omg:

:shy:

خليجنا واحد

[هبوب الكوس]

ان شاءلله تطبق عندنا ... نتمني ان الناس ترضي بس

نتمنى ذالك

[ريتويت]

ياااااارب والله

[بـــــــنت النوخـّــــذه]

قلنا نرخص المهور ونسوي تنزيلات بس مب ريال عاد شدعوه

نفس السعودي اللي زوج بنته بريالين لرجل على قولته متدين
وفي الاخير تطلقت منه لانه كان يناديها اهوا وهله تعالي يابوريالينوروحي يا بوريالين حتى الناس اللي كانوا يزورونهم كانوا يسالونهم
وين مرت ولدكم اللي خذتوها بريالين مسكينه البنت ماتحملت واهلها زعلوا
القصة مش من وحي الخيال قريتها فالجريده والله اعلم

:weeping::weeping:

المشكله يا أختي البعض يلتفت للمادة بشكل كبير يعني اذا ارخص معناته بتعيش بسعاده اكيد اكيد اكيد مايتلفتون للتوافق والمتطلبات الاخرى 00
كلامي مهب انتقاد لتصرف والد العروس بالعكس ياما سمعت الوالد يقول للي يخطبون لو هي ذبحيه ماعشتك كنت استغرب اقول شنهو بيذبحنا وبيعشيهم 00 فالاخير اكتشفت أن بعض الاقوال فعلا" (يستحقها الرجل اذا كان كامل والكمال لله سبحانه والنعم فيه ) من جميع الجوانب

يعني كلمة (يتجمل ) بها جدام النسايب مهب صج بيذبحنا وبيعشيهم <<< متأثرة بموضوع تحداني الزمن التجمل امام الاخرين :p

لكن بشكل عام حلو يتجمل بكلام جدام نسايبه وهم عاد لايمصخونها ريالين يعني ريالين
شبتشتري فيهم عشان تتزين وتفرح على الاقل خلاها 20 ألف ريال (سعودي )

يلا دامهم راضيين وعيال عم ويقربون لبعض كيفهم واحنا مالنه فيهم :omen2:

[صعبة وصوفه]

خبر يرفع الضغط!!!!
ريال شتسوي فيه تشتري فيه حلاوة مثلا؟؟!!!

مسكينة البنت من حقها تجهز وتشتري حالها حال باقي البنات، وابوها الله يهديه ظلمها،،

اللي مستغربة منه شلون المأذون رضى يملك عليهم بريال؟؟؟؟!!! اللي اعرفه في حد أدنى للمهر بالسعودية اظن 5000 او عشرة؟؟؟ مب متأكدة كم بالضبط،،

[STAR]

ايه الله ياخوي يخفون من خرابيط المفوشر

ولا بتصير هجرة للشباب القطري للزواج من دول الخليج الحالية لأن الأمور سهلة وبسيطة

أو لدول الخليج المستقبلية - المغرب والأردن ومصر -



الله معاااااك ‏‏(‏‏=‏

[chillis]

الله معاااااك ‏‏(‏‏=‏

ههههههههههههههههه

[بـــــــنت النوخـّــــذه]

الله معاااااك ‏‏(‏‏=‏

:eek2:

من الضحك ماقدرت اكتب إلا بالعافيه

[معلم فكري]

يا اخوان انتوا تتوقعون ان هالريال هو قيمة البنت !
هو ثمن رمزي لمشروع أسمى وأكبر من أي مال الا وهو مشروع الزواج
وبالنسبة لمن يقول أن البنت تحتاج للتجهيز ولشراء ما تحتاج فتأكدوا أن الأب سيعوضها وستشتري ولن ينقصها شيئ في ليلة عرسها
مؤسف أن يتحول المهر لقيمة يدرك الإنسان به ثمن زوجته !

[هبوب الكوس]

خبر يرفع الضغط!!!!
ريال شتسوي فيه تشتري فيه حلاوة مثلا؟؟!!!

مسكينة البنت من حقها تجهز وتشتري حالها حال باقي البنات، وابوها الله يهديه ظلمها،،

اللي مستغربة منه شلون المأذون رضى يملك عليهم بريال؟؟؟؟!!! اللي اعرفه في حد أدنى للمهر بالسعودية اظن 5000 او عشرة؟؟؟ مب متأكدة كم بالضبط،،

هذا يسمونه حث على تقليل المهور

[هبوب الكوس]

الله معاااااك ‏‏(‏‏=‏







ههههههههههههههههه





:eek2:

من الضحك ماقدرت اكتب إلا بالعافيه

:waiting:

[ريتويت]

انا وبكل صراحه شديده اعتبر ان المهر مجرد رقم بمعني مب مهم ..الاهم هو الرجل الصالح هذا الي يجب نقدر قيمته*

[هبوب الكوس]

يا اخوان انتوا تتوقعون ان هالريال هو قيمة البنت !
هو ثمن رمزي لمشروع أسمى وأكبر من أي مال الا وهو مشروع الزواج
وبالنسبة لمن يقول أن البنت تحتاج للتجهيز ولشراء ما تحتاج فتأكدوا أن الأب سيعوضها وستشتري ولن ينقصها شيئ في ليلة عرسها
مؤسف أن يتحول المهر لقيمة يدرك الإنسان به ثمن زوجته !

كلام جميل وسليم

هذا المؤسف

[نورهان88]

شدعوى ريال خلاها 10000ريال من حق العروس

حرام والله أعترض بشدة هههههههههه

[صعبة وصوفه]

هذا يسمونه حث على تقليل المهور

ريال واحد تسميه مهر؟؟؟!!!
حرام والله عالأقل خمسة الألف وهذا من حقها مب صدقة،،

[halcrow]

ونا اقول من الكفو الي يزوج بنته بريال عسى ماشر.

[ع.م]

لا وايد بالغ..

ماعجبتني الحركة توحي بأن فيها show مثله مثل المهر العالي .. بغض النظر عن نيته.. ماشوفه أصاب..

مافكر فالبنت و وضعها كعروس بعد تحتاج شوية فلوس مهما كان..

[missperfect]

الله يبارك لهم ويوفقهم ويسعدهم يااااارب


*

*

[شقرديه]

ماستغربت تصرف ابو البنت .. لانه لحد الآن يوجد آباء يرددون كلمه " ريال وشيمه رجال "

مع انه معظم الرجال لما يعلم انه لايوجد مهر .. تلقونه مايصدق على الله وياخذ البنت بعباتها وينتهي الموضوع
في المقابل فيه رجال لما ابو البنت يشرط ريال واحد للمهر ..يقوم الرجل حياء منه بتجهيز المهر للبنت على حسب مقدرته وامكانياته ..

عمومن انا ضد انه البنت تسكت عن حقها وهذا حق شرعي من المفترض انها تطالب به ....
ولكن يمكن لصغر سن البنت او لسلطه الاب عليها لم تستطع البنت ان تطالب بمهر ولو بالقليل .. :)

[المخفي]

يمكن انه ريال كفو و و نادر ما تحصل واحد في هذا الوقت

[رجل مثالي]

المهر حق شرعي للزوجة بنص قرآني..

قال تبارك وتعالى: وَآتُوا النِّسَاءَ صَدُقَاتِهِنَّ نِحْلَةً ..



تعليق - المهر حق شرعي صراحة رخص الكثير من قدر البنت والله اعلم

[هدى ورحمه]

كفوووووووووووو والله



اي كفو على بالكم الناس اللي حواليهم بتشوف لهم على انه تيسير زواج في مجتمع يتمتع بالرفاهيه الماديه!! انا مب مع التبذير او المبالغه بس مب للدرجه هذه !!
الشي الثاني بكره ابسط مشكله بين الزوجين اذا البنت قالت له ودني بيت ابوي بيقول لها اصلا هلج ولا مفتكرين فيج ماصدقوا زوجوج وبرخيص بعد ( والله العظيم تصير وصارت اصلا )
حتى بين النساء الا ماتسمع لها كلمتين كيف رضيتي وهذي ليله العمر عالاقل تفرحين بين هلج وناسج ، قلنا عاد يسروا الزواج وقللوا تكاليفه المبالغه بس مب لدرجه ان التيسير يخلي البنت كن مالها قيمه عند اهلها وماصدقوا يفتكون منها بكره زوجها يعايرها يقول لها انتي وعلبه البيبسي واحد لانهم بريال :tease:
اصلا هذا الزوج الحين عنده قناعه ان الزواج سهل يعني اذا طقت في راسه وقال بتزوج عليها عشان يخفف من العنوسه بيقول الزواج مايكلف وسهل انقي لي اي زوجه ثانيه ومايكلفني الزواج شي نفس الاولى ، وعنها الاولى رضت او مارضت عن زواجه الثاني المهم هو بس يسوي اللي فراسه بأقل تكاليف .

يا بنات تحملوا ترضون بهذه النوعيه من الزواج ، التيسير زين بس مب لدرجه الوحده تطلع من بيت اهلها لبيت الزوجيه بريال وخروفين عشا ، هذا فيه تشجيع على ان الزوج يحط في باله يتزوج عليج الثانيه والثالثه بكل سهوله وعنج مارضيتي ، خاصه في مجتمع ذكوري بحت فيه مفاهيم الدين وجوهرها مغلوطه في مناطق كثيره في السعوديه الا من رحم ربي.

[هدى ورحمه]

انا بس نفسي حد لما يقول المهر حق شرعي للبنت بليز يكمل الجمله عشان في اخوات واخوان وايد مفهومهم للمهر كحق شرعي ناقص ، الحق الشرعي في المهر ليس اساسه ان تجهز البنت نفسها ، المهر قالها الشيخ الكبيسي على قناه دبي في احد البرامج بث مباشر قالها صراحه شرع الله المهر للمراه حين تتزوج لانه ارضاء لها كي يستمتع الرجل بفـ...
بالعربي لا من حق الاب ولا الام ولا الجن الازرق يقرر كم يكون مهر البنت او ياخذه او يقلل من اهميته او يمكسه عنها هو حق كامل لها لكن لا بأس بتوجيهها في استخدامه من باب الحرص عليها وعلى مصلحتها .
العلم نور

[waryaa]

الله يبارك لهم في هالزواج ويوفقهم

[المسك1969]

كلام جميل وجزاه الله خيرا هذا الأب على فعله

وكان المهور أيام الصحابة رضوان الله عليهم كلا وحالته الماديه فهناك من دفع درعا وهناك من زُوج على آيات من القران وهناك من زوج على دراهم وهناك من زُوج على ذهب

لكن يبقى أمر التقدير لولي الأمر ... ودائما أولياء الأمور لا ينظرون للمهر الكبير بقدر ما تنظر له الأمهات

وعموما في زماننا هناك من زوجت بريال مثل الاخوات في القصة إلى من زُوجت بملايين...

وفي تيسير المهور خير للزوج والزوجه... فلزوج ذلك أنه لن يثقل كاهله فخلفه أمور أكثر أهميه من تجهيز البيت وحفلة الزواج... وللزوجه أنها ستلقى زوجها فرحا بها لا مهموما بعد فترة بالديون ولا يكره منها تصرفا فيقول ياليتني لم أدفع ولم أفعل ولم أخسر نفسي

وفي الأخير صدق حبيبي رسول الله فإن أقلهن مهرا أكثرهن بركه أو كما قال عليه الصلاة والسلام

واللي ما يلقى في أول بيت يروح للثاني وأن مافي للثالث وخلوا اللي بياخذ مهر كثير بناته عنده والله المستعان

جزاك الله خيرا:nice:

[رجل مثالي]

انا بس نفسي حد لما يقول المهر حق شرعي للبنت بليز يكمل الجمله عشان في اخوات واخوان وايد مفهومهم للمهر كحق شرعي ناقص ، الحق الشرعي في المهر ليس اساسه ان تجهز البنت نفسها ، المهر قالها الشيخ الكبيسي على قناه دبي في احد البرامج بث مباشر قالها صراحه شرع الله المهر للمراه حين تتزوج لانه ارضاء لها كي يستمتع الرجل بفـ...
بالعربي لا من حق الاب ولا الام ولا الجن الازرق يقرر كم يكون مهر البنت او ياخذه او يقلل من اهميته او يمكسه عنها هو حق كامل لها لكن لا بأس بتوجيهها في استخدامه من باب الحرص عليها وعلى مصلحتها .
العلم نور


:victory::victory:

[الصاعقة]

بيض الله وجهه وجزاه الله الف ... ويسر ولا تعسر

[Dana’1]

أنا إمرأة واقول لكم...في حالة وحدة اقول كفو من كل قلبي ومشاءلله عليها لاحظو عليها
الي هي في حالة هي من طلب ان يكون مهرها 1ريال ومو ابوها هو الي طالب
لان المهر حق المرأة وهذا معروف في الدين الحنيف وواضح...ولا شخص يقدر يحددة سواء مهر مرتفع ومكلف او بسيط ورمزي الا برضى البنت وهو بكيفة يقبل او ما يقبل ايضا هو حر في قرارة هذا الي اعرفة عن دينا الإسلامي انة دين كفل الحريات للأشخاص من إناث وذكور..واعرف انة حث على عدم المغالاة في المهر بس ما اذكر مر علي تحريم او تحديد للمهر بقليل او بكثير..والله ظاعلم
فعلى ايش تقولووون كفو او مو كفو بدون ما نعرف ايش كان وضع البنت؟راضية او لا؟!!
هذا غير الي قال حرام ما عطها مدري كم لية شحاذة هي هذا مهر وعادي لو راضية 100%
بعضهم معذور ما عندة شي يقدمة للعروس فقير مرة الله يرزقهم وبعضهم قادر انا رائي الشخصي هنا يبان الرجال كريم والا بخيل مو شرط ماديا اقصد بأخلاقة بجديتة وحبة وتقديرة لهذي العلاقة بيعطي ما يملك بالمعروف الي يقدر علية واتوقع المرأة وأهلها راح يوصلهم هالشعور الصادر من الخاطب.. والأهم في الموضوع كلة التراضي بينهم هذا اهم شي
وفي وحدة اظن بريطانية اسلمت ..طلبت من المتقدم لها مهر وهو ان يعلمها حفظ أخر عشر سور من القرآن الكريم فماجات على كم ريال!!
كنت بقتبس لكم بعض الايات الكريمة مع تفسير لأبن كثير
لكن قلت اوقف لهنا واتمنى الرجال يثقفون نفسهم شوي بحقوق المرأة وفق الشرع طبعا
الي لو مشى عليها الواحد مع اهل بيتة كان مرتاحين من زمـان
والسلام ختام

[ابوضاري]

اسميك انه شـــــــــنـــــــــــــــــــــــــــــــــــــــ ـــــب ماعطى العجوز فرصه ههههههه

ماحد يعرفة ولا عنده بنات باقين ههههههه

[بو خليفه 123]

وين أم البنات اكيد مب موجوده ولا كان توسدت في مبلغ المهر

[همسه]

استغرب من ردود المعارضين انا كنت احسب اغلب اهل قطر كذا وهذا المتعارف عليه لقيت اغلب الردود مستغربين من موقف الاب ليش

هذي عاده معروفه عند ابوانا كلهم اذا خطب عندهم الرجال و نشدو عنه و شافو انه كفو و وافقوا عليه عند الملكه يقولون المهر ريال والخاطب هو و شيمته يرد موافق انه يحط ريال ولا 60 او 80 او 100 الف لكن ولي امر البنت مايطلب ولا يفن المهر لأن عندنا عيب يعتبر كأنه سعر بنته بسعر معين و بنته في نظره غاليه واجد ما توازيها كنوز الارض فسواء المعرس دفع ريال او مليارات هذا ما يأثر في اهلها لا الابو ولا الام و الحمد لله شايفين خير من متى كانو اهل قطر يطمعون في مهور بناتهم عيب اصلا ما يلمسون منه ريال و الحمد لله اهل العروس دايم يزديونها على مهرها الله لا يغير علينا

آمين يارب

:)

[عازف العود]

اشهد انه رجال كفو والرجال قليل في هالزمن وين تلقى مثل هذا الاب

[غايه الطواش]

اعرف عوايل وايد يحطون في ورقه الملجه المهر خمسه او عشره لكن الريال يدفع اكثر من جيه ..هل البنت حطوه في الشيمه عاد يطلع هو قدها مو يصدق .... ان هاي صج المهر

[شبح الصمت]

ماشاء الله ماشاء الله ماشاء الله

[بـــــــنت النوخـّــــذه]

صبحكم الله بالخير

ألي ماتزوج الله يسهل اموره
وألي ماتزوجت الله يرزقج الزوج الصالح ألي يستاهلج
وشكرا"

[الحال مايساعد]

والله والنعم فيه لكن كان المفروض يكون المهر معقول شوي وأهل الزوجة يساعدون المعرس
أشوفها أحسن!!

[العنيده]

الله يبارك لهم بهالزواج ..

احنا مانقول مهر لازم بالمئات بس على الاقل شي طبيعي .. في بعض راح ياخذه باستهزاء ويتم يعايرها ,,
انا ضد المفوشر وضد ارهاق ميزانيه راح تاثر على حياتهم مستقبليا بس على الاقل شي للبنت تعد نفسهااا لا اكثر ,,

[همسه]

هو الخوف من هالجيل الحالي انهم ما يعرفون يردون المعروف للشيبان و يكرمون بناتهم ولا الاولين يعرفون يقدرون و يعزون بنت العرب و يحشمونها

بس هذي النقطه اللي تخوف في الموضوع

و شباب هالوقت الله يصلحهم و يهديهم

آمين يارب

[شبح الصمت]

والله والنعم فيه لكن كان المفروض يكون المهر معقول شوي وأهل الزوجة يساعدون المعرس
أشوفها أحسن!!




شكله ما صدق مجهز لهم ربطه العيد بوريال

الحين زين نفس ما قالت وحده من الاخوات اذا ضيعوا في اسمها ينادونها ام ريال اذا ماطلعوا فيهم خير


والا اذا تهاوش معاها بيناديها ام ريال تعالي ..

:weeping:

[همسه]

اذا نادها ام ريال تقوله ابوي من طيب اصله ولأنه شايف خير ماحب يثقل عليك وقالك ريال لأنها سلوم العرب و عوايدهم لكن انت القحي ماصدقت قالك ريال وافقت هذا من بخلك وعاد لك لسان تتكلم و تعاير من اكرمك وعزك و رزك و زوجك بنته فوق شينه قوة عينه

بس و تشل عليه قبل لا تسطر

ههههههههههههههههههههه

[R 7 A L]

اعرف لي عايلة في قطر عددهم كبير ماشاء الله
مهرهم الى متفقين علية 30 الف والحفل يخلونة في البيت
وباقي الفلوس يروح الزوج وزوجتة لاي دولة في العالم يقضون شهر عسل كامل وبعدها وهم راجعين يومين في مكة بعدها يرجعون ومعهم فلوس

[بو خليفه 123]

اعرف عوايل وايد يحطون في ورقه الملجه المهر خمسه او عشره لكن الريال يدفع اكثر من جيه ..هل البنت حطوه في الشيمه عاد يطلع هو قدها مو يصدق .... ان هاي صج المهر


هذا الروتين الحاصل في البيوت القطريه "اغلبيتها"

[المتأمل7]

هنا يثبت من كان يؤمن بالله واليوم الآخر

اما أهل الدنيا فيعضون عليها بالنواجذ

[عذب الكلام 1]

اى والله ريال مادري اصدق او لا بس يعني لو مبلغ بسيط 40 او 50 الف من حقها بس




















لو عنده رابعه بكم يمكن ريالين

[عساف النعيمي]

الله يوفقهم ويوفق الجميع ان شالله

[QatariFallah]

البنت هذي اللي تزوجت بريال هي واخواتها
يدرون ان هالريال = انهم صاروا تاج على راس ازواجهم..وهم يملكون كل مايملك الزوج..ف مايهمهم الريال فالبدايه من الاساس

اللهم وفقهم يارب العالمين لما تحب وترضى وخذ بنواصيهم بيدك وانصرهم على عدوك وعدوهم ياقوي ياعزيز ... اللهم وفقهم لما تحبه وترضاه واحفظهم من كيد الكافرين

[مضارب دوسري]

للاسف مثل هذي الزيجات تكون له اثار سلبيه احيانا
مثلا سمعت عن زوج تزوج بريال وعقب مامرت السنين قعد يعاير زوجته بانه خذاها من اهلها بريال
ومره يسميها يا قوطي بيبسي ومره يا قلاص كرك ومن هالكلام اللي ينكد عالزوجه

طبعا انا مع التخفيف من الاعباء ولكن عالاقل يكون المهر مب اقل من 10000 ريال

[بـــــــنت النوخـّــــذه]

بسم الله الرحمن ارحيم



الســــــــــادة المحترمين
تحيه طيبة وبعد ,,,



الموضوع (المهور)

نفيدكم علما" بأن ظهرت مستجدات في الساحة العربية وبالتحديد الخليجية
تتعلق (بالمهور) , لانخفيكم بأن قد وصل الأمر بمجتمعنا التباهي بمبلغ المهر سواء عالي او منخفض والتركيز على المادة بشكل ملحوظ , في الوقت التي تناسى به الغالبية العظمى التكافئ والأمور الأساسية المهمة لدوام الاستقرار في محيط أسري سويّ
نحن على علم ويقين أن هناك تساهلات من البعض بالنسبة لمسئلة المهور , وهذا مانشجع عليه ولكن هذا لايعني أن تخفيض المهور هو باب للسعادة والاستقرار
وعلى هذا نحن في حيرة من أمرنا هل (التدقيق ) بقصص تخفيض المهور بشكل ملحوظ هو مفتاح للسعادة والتوافق بين الزوجين أم هي اسباب قد تؤدي لتسهيلات بالنسبة للخاطب الكفئ الذي يستحق فعلا" التضحية من قبل أهل الفتاه00 نتمنى من سيادتكم التدخل عاجلا" لتصحيح المفاهيم لدى البعض فقد بلغنا أن شباب المنطقة بدأوا في نصح بعضهم البعض بالتوجه خارج الدولة للزواج نظرا" لرخص المهور
دون الالتفات للامور الاساسية الأخرى التي قد تتسبب بنتائج مستقبلة ادهى وأمر من تكاليف المهر

هذا والله وليّ التوفيق وشكرا" لحسن تعاونكم


مقدمة الطلب : فاعلة خير

[ام السعف]

المهر في الإسلام من حق البنت ،، وعلى الأب ان يجهز بنته اذا ما طلب مهر من المعرس

بس هل ياترى المعرس بيي في عينه فعايل الأب ؟

ننتظر المستقبل وآخر الأخبار الواردة منه ان شاءالله

[سهيل قطر]

انا عمي زوج اخوي وولد عمي كل واحد ب 10 الاف ريال

ورده الفعل انهم بعد الزواج فتح كل واحد منهم حساب لزوجته ووضع مبلغ 80 الف ريال ك هديه لهاا بدل المهرر الذي اجبروو ان لايتعداا ال 10 الاف ريال وبالعكس اكررمووهم من كرم ابيهم الذي قال (( أنا ماا بعت بنتي انا أحبها واغليهااا ولوو ب ابيعهاا بالمال مابعتهاا بكنوز الدنيا كلها ولكن اريد لها التوفيق واذا وصلت بيت زوجهاا لوو يبي يكسيهاا ذهب كيفه ))

كثرر الله من امثالك والله العظيم انه لاحظناا احتراام ل بناته وله وكلن يرريد قررب منه من حسن تدبيره مع الاسف باقي عمامي غير عنه وبعيدين كل البعد عنه ..


تجربه شخصيه وصارت وحبيت انقللها ونسال الله التوفيق

[QatariFallah]

للاسف مثل هذي الزيجات تكون له اثار سلبيه احيانا
مثلا سمعت عن زوج تزوج بريال وعقب مامرت السنين قعد يعاير زوجته بانه خذاها من اهلها بريال
ومره يسميها يا قوطي بيبسي ومره يا قلاص كرك ومن هالكلام اللي ينكد عالزوجه

طبعا انا مع التخفيف من الاعباء ولكن عالاقل يكون المهر مب اقل من 10000 ريال

واذا 10 الاف؟ بسميها فاتورة كيوتل

[المفترسه]

بخصوص اللي يقولون عادي ترى المهر حق شرعي للمراءه حتى لو كانت غنيه لانها وهبت نفسها لرجل يتمتع فيها بالحلال غير انه المهر يرفع قدرها ويحسسها انه مرغوبه من
الرجل ويمكن للمراه انها تجهز نفسها لعش الزوجيه من مالها الخاص والا ليش امرنا الشرع بارجاع نصف المهر في حالة حدوث طلاق قبل
الدخول بها احنا مع تخفيف المهور وعدم المبالغه في حفلات الزفاف وتوابعها ياليت لو تقرون فتاوي الشيخ ابن باز بخصوص المهور

[ام السعف]

بخصوص اللي يقولون عادي ترى المهر حق شرعي للمراءه حتى لو كانت غنيه لانها وهبت نفسها لرجل يتمتع فيها بالحلال غير انه المهر يرفع قدرها ويحسسها انه مرغوبه من
الرجل ويمكن للمراه انها تجهز نفسها لعش الزوجيه من مالها الخاص والا ليش امرنا الشرع بارجاع نصف المهر في حالة حدوث طلاق قبل
الدخول بها احنا مع تخفيف المهور وعدم المبالغه في حفلات الزفاف وتوابعها ياليت لو تقرون فتاوي الشيخ ابن باز بخصوص المهور
بالفعل بعض الأباء يظلمون بناتهم ،،

المهر من حق البنت ولا يحق للأب انه يتنازل عنه ،،
بس شنقول الله يهديهم ويصلح بالهم

[قلب قطر..!]

ارخص ببنته وايد

وحتى اهل قطر القبايل مايطلبون مهر وانما يقولون

((( لو هي ذبيحه ماعشتك )))

ويخلونها بشيمه الرجال وهو ومقدرته

اما انه يحدد سعر لبنته هذا الشي هب عندنا

وشكرا

[بـنـت ڪرز]

لا الصراحه زين سوى المهر بريال
عشان تقدر تشتري فيه علج نعناع .. مهم

[مضارب دوسري]

واذا 10 الاف؟ بسميها فاتورة كيوتل

هههههه

ضحكتني وانا مابي اضحك
قربنا من نص الشهر والربع ساحبين علينا

[قطريه ماركه]

الله يهديه ....

ريال !!

[هبوب الكوس]

شكرا لكل من علق على الموضوع المؤيد والمعارض

والسالفه مب سالفة ريال

اكيد في مصاريف من عرس الحريم وتجهيز الزوجه

لكن هذه تقدير من ابو الزوجه لعدم الثقل على الرجل من تكاليف وديون

ان شاء الله وصل المقصد :telephone:

[همسه]

وصل القصد هبوب الكوس

وهذا شي مب جديد و متعارف عليه بين القبايل

يمكن فيه ناس بالنسبه لهم الموضوع جديد وما قد سمعو به فهم معذورين اذا استغربوا

الابو ما رخص بنته بالعكس هي اغلى عنده من نور عيونه

بس الاباء اللي يطلبون مبلغ يذكرونه مهور لبناتهم يعني هم حطو اسعار لبناتهم هذي اللي مب حلوه كلش بصراحه

لكن بعد المتعارف عليه ان المعرس يدفع مهر وما يكتفي بكلمة ريال اللي نطقها ابو البنت هو و شيمته


الله يوفق الجميع بالازواج الصالحين و الزوجات الصالحات هذا الاهم من المهر و غيره التوفيق اهم شي

[هبوب الكوس]

وصل القصد هبوب الكوس

وهذا شي مب جديد و متعارف عليه بين القبايل

يمكن فيه ناس بالنسبه لهم الموضوع جديد وما قد سمعو به فهم معذورين اذا استغربوا

الابو ما رخص بنته بالعكس هي اغلى عنده من نور عيونه

بس الاباء اللي يطلبون مبلغ يذكرونه مهور لبناتهم يعني هم حطو اسعار لبناتهم هذي اللي مب حلوه كلش بصراحه

لكن بعد المتعارف عليه ان المعرس يدفع مهر وما يكتفي بكلمة ريال اللي نطقها ابو البنت هو و شيمته


الله يوفق الجميع بالازواج الصالحين و الزوجات الصالحات هذا الاهم من المهر و غيره التوفيق اهم شي

اي نعم اختي همسه كلام صحيح

يعني اتخيل نفسي مكان الرجال وقالي ابو الزوجه المهر ريال

لكن انا من نفسي بدفع اللي اقدر عليه وبالمعقول وعدم المبالغه

[بوحارب]

شكلك تبي تتزوج وحده بريال :(

[شبح الصمت]

شكلك تبي تتزوج وحده بريال :(



شكله قاعد يمهد

:funny:

[GOOKLUCK]

والله غريبه ردود بعض الاخوه والاخوات

يعني هو زوج بناته بريال وله بمليون شي يخصه

وسالفة ان الابو ارخص بناته ؟!! يعني الحين لو مخلي الريال يدفع 100 الف مثلا بكون باعها بسعر ممتاز ؟!! ترا الدعوه ماهي بيع وشرا يا جماعة ..
من اتاكم من ترضون دينه وخلقه فزوجوه او كما قال رسول الله ..

وبخصوص بعض الناس الي تاخذ المعرس بالشيمه ( ليش الاحراج يعني ) ؟!!
ولو نفترض الابو خذا المعرس بالشيمه وقام المعرس وقال ( 20 الف ) تهقون الابو بيوافق ؟!!!
في مجتمعنا الاغلب تكون الاجابه الرفض ..

المهور سالفتها سالفه ، وبما اننا نحب نقلد الي افضل واغنى منا ، ودايما نقول ليش فلان وفلانه ليش ما تحاول الفئه الي الله انعم عليهم انهم يكونون قدوه لنا في هذه الامور وكمثال بسيط نسمع في يوم من الايام ان الوجيه ( فلان بن فلان ) زوج بنته بـ ( مبلغ بسيط = رمزي ) واقام الوجيه ( فلان بن فلان ) عرس بسيط لأبنه ، ليقوم المواطنين بتداول هذه القصص فيما بينهم ويكونون قدوه لنا جميع في هذا الامر طالما ونحن نحاول تقليدهم في كل شي .

بالنهايه .. اتمنى للجميع التوفيق والسلام ختام .

[بوحارب]

شكله قاعد يمهد

:funny:

ياريال عنده فلووووووس بس خاشها :anger1:

[هبوب الكوس]

والله غريبه ردود بعض الاخوه والاخوات

يعني هو زوج بناته بريال وله بمليون شي يخصه

وسالفة ان الابو ارخص بناته ؟!! يعني الحين لو مخلي الريال يدفع 100 الف مثلا بكون باعها بسعر ممتاز ؟!! ترا الدعوه ماهي بيع وشرا يا جماعة ..
من اتاكم من ترضون دينه وخلقه فزوجوه او كما قال رسول الله ..

وبخصوص بعض الناس الي تاخذ المعرس بالشيمه ( ليش الاحراج يعني ) ؟!!
ولو نفترض الابو خذا المعرس بالشيمه وقام المعرس وقال ( 20 الف ) تهقون الابو بيوافق ؟!!!
في مجتمعنا الاغلب تكون الاجابه الرفض ..

المهور سالفتها سالفه ، وبما اننا نحب نقلد الي افضل واغنى منا ، ودايما نقول ليش فلان وفلانه ليش ما تحاول الفئه الي الله انعم عليهم انهم يكونون قدوه لنا في هذه الامور وكمثال بسيط نسمع في يوم من الايام ان الوجيه ( فلان بن فلان ) زوج بنته بـ ( مبلغ بسيط = رمزي ) واقام الوجيه ( فلان بن فلان ) عرس بسيط لأبنه ، ليقوم المواطنين بتداول هذه القصص فيما بينهم ويكونون قدوه لنا جميع في هذا الامر طالما ونحن نحاول تقليدهم في كل شي .

بالنهايه .. اتمنى للجميع التوفيق والسلام ختام .

صحيح اخوي السالفه صارت من اللي يدفع اكثر

[هبوب الكوس]

بوحارب

شبح

لا توقضون اللوه :(

[القحطاني505]

الله يوفق بناته

[الراقيه سبشل]

طيب عرس ومش مهم , بس كيف بدها تجهز حالها البنت لو مبلغ بسيط ؟ :(

والله يوفقهم ويسعدهم يارب

[qatara]

الله يبارك لبناته لتيسيره
عليهم وعلى ازواجهم
وازواجهم راح يقدرون هل الشي
عند بدايه الزواج او بعشرتهم
او حتى عند حدوث اي خلافات مستقبليه
وجزاه الله خير
وخيرهن اقلهن مهورا

[حقيقه]

الحمدلله والشكر

[khaleeji]

عند قول المصطفى صلى الله عليه وسلم: (خيركن أقلكن مهرآ) يتوقف الحديث بالنسبة لي
والريال كان مهرهم احسن مئة مره من الي مهرها 200.000 وتصرفة على خرابيط

[gulfstar]

السلام عليكم مشكلتنا دائما في النقاش نترك لب الموضوع ونناقش القشور ياناس افهمو وتعلمو با الاباء و البنات في قطر الي قاعد ايسر انة اغلب العوايل تطلب مهور غالية وصالات فنادق غالية وبوفية غالي وكوشة وحفلة خطوبة كانها عرس في صالة وكل وحدة همها المظاهر على حساب المسكين المعرس وبعد كم يوم طلاق
لانة الله مش مبارك فية لانة اقلهن مهرا اكثرهن بركة وصدقوني انا ملاحظ الفترة الاخيرة الشباب يرحون يتزوجون من السعودية والبحرين ودول عربية والسبب الشروط التعجيزية ومن يروح فيها مسكينة البنت تكبر
ومافي حد يخطبها وتعنس ليش مايسير المهر بسيط وتكلفة العرس في البيت بدل الفنادق ويتم تحديد المهور
من 30 الف ريال حق المطلقة 50 الف ريال حق البنت البكر وصدقوني كل بنات قطر بيتزوجون ومايسير طلاق بينهم لانة شي ميسر على الطرفين والله بيبارك فية يعني عرفتوا اتسون في المنتدي حماية المستهلك ضد رفع الاسعار وكلكم يد وحدة وماعرفتوا تحددون المهور وتخلون ايدكم وحدة وتنادون بصوت عالي نعم للتحديد المهور لانة قلبي يعورني على بنات بلادي وشبابها الي قاعدين يعانون من مشكلة الغلاء وشكرا لكم

[بوخالد911]

بورررك فيه

[Dana’1]

صحيح اخوي السالفه صارت من اللي يدفع اكثر
بالعكس مو كذا الساللفة
اغلب اهلنا محددين مهر معين للزواج من الاقاربوالحمدلله راضين لأن رجالنا يستاهلون:)
وغير محدد لرجل من خارج القبيلة لا بكثير ولا بقليل
وايضا ما يقولون ويحددون المهر لأن اهم شي ابو البنت عارف اخلاقة زين ما زين وكذالك البنت رضت فية 100% وحابة سمعتة وارتاحت نفسيا لة في الشوفة الشرعية يعني اقبلت بة من غير ما يحددون المهر مع انة من حقها بعد بس كذا جرت العادات وهذا هو الأفضل انها ما تحدد يخلونة هو واستطاعتة ..لأ، بكل بساطة ابوها ماراح يقصر فيها وبالي ينقصها مع انة مو مكلف بس لأن هو شاري الرجال لأنة رجـــــال ويستاهل ان شاءلله
لكن انة يحدد المهر بريال على بنتة ما حبيتها ... كان خلى الرجال واستطاعتة يعني ما يضغط علية هذا هو الزين
الا برضاهن كلهن سواء بإعطائهم الضوء الأخضر للأب لتحديد المهر...او انة العريس عرض هالمهر لان هذا قد استطاعتة والاب وبناتة وافقو اوك هنا تنقال كفو وكفوين
أهم شي التراضي
وحدة من جماعتي تقدمو لها اثنين وكلهم مو من الجماعة من طرف صديقاتها الأول
بيقدم لها فيلا فخمة بإسمها وخدم و مهر عـــــالي وهم ناس تجار معروفين بالدولة وهي ترددت لكذا أمر من وجهة نظرها لا يصلح
والثاني قدم لها سكن مستقل لها لكن بحوش بيت اهلة يعني ملحق كبييير والمهر ما حددتة هي ولا حتى اخوانها ويوم الشيخ كتب العقد قال المهر مبلغ وقدرة الرجــال الخاطب على طول قال المهر وكان زين ولله الحمد وهي تستاهل ولو انة قال هم الي يحددون كان يمكن يخلونة مثل الجماعة او اقل بعد عادي كل همهم رجال ويحشم ويكرم اختهم
والاهم هي اختارت الثاني مع ان الأثنين ماكانو مرفوضين من قبل اهلها
بس هذا اختيارها والرضى هو أهم شي ..هذا رائيي وحسيتة رأئي الاغلبية

[لابس بشت]

كفو والله وماقصر
وان شاء الله المعرس بعد يطلع كفو ويستاهل :)

[..er..]

ياكثر اللي راح يقولون كفوو

واللي سواه صحيح انه نادر

بس يمكن ضلم بناته




المهر حق شرعي للزوجة بنص قرآني..

قال تبارك وتعالى: وَآتُوا النِّسَاءَ صَدُقَاتِهِنَّ نِحْلَةً ..


كلامك صحيح بس ماعتقد حقه الشرعي يكون على حسابي وابوها او اخوها اللي طالبه

[تربوي]

سنة حسنة فمن يسير عليها :nice:

[ريم الشمال]

المهر بعض عوائل قطر ما تطلبه ولا تشترط فيه وهذا معروف عنهم
وانتم مبين عليكم تبون تسوقون للخارج بس أبي أذكركم إذا أنتم أباء
قطريين ولكم بنات وخوات فلا تسنون سنة في العرب وقصدي التسويق الخارجي
متلها أنتم بتاكلوها ... وخلوا عنكم الكلام الي ما يودي ولا يجيب الي يبي يتزوج من بنات قطر
يعرف من يناسب ويروح للعوائل الي ما عندها مفوشر وتبي الستر حق بناتها ولا تسنون سنة في قطر
ياكلونها بناتنا ... اقول الباب الشرق مناك يمينكم .... وبناتنا غاليات ولا نرخص فيهم

ريم الشمال

[هبوب الكوس]

الله يوفق بناته

امين وبنات المسلمين جميعاً

[GOOKLUCK]

والله لو عندي ملايين الدنيا ما ارضى الا بالزوجه الي مهرها بسيط مو بخل حشى والله ولكن البركة في الزواج والسعاده هي اساس هذا الامر وما دام الرسول وقد ربط بركة المرأه بيسر مهرها فلابد لنا من التركيز على هذا الامر ..

[الـقـاسـي]

هو لو كان رجال بمعنى الكلمة اللي بياخذها بالعكس بتكبر في عينه وبيقدرها وبيقدر ابوها ..
لكن اذا كان عقله ناقص بيعايرها ولا هو بمحترمها وهذي المصيبه ..

احنا نتمنى تخفيف المصاريف في الزواج ..

[Miss]

شدعووه ريال :eek5:
المهر من حقها هي مب من حق ابوها ..
وراها تجهيزات لنفسها من وين بتجيبها اذا ابوها على قد حاله !!
الله المستعان
الله يوفقهم

[Miss]

شكرا لكل من علق على الموضوع المؤيد والمعارض

والسالفه مب سالفة ريال

اكيد في مصاريف من عرس الحريم وتجهيز الزوجه

لكن هذه تقدير من ابو الزوجه لعدم الثقل على الرجل من تكاليف وديون

ان شاء الله وصل المقصد :telephone:

وصل وصل
بس من البدايه جان قالوا مبلغ تقديري مب مهر مره وحده :(

[عضو نشيط]

الله يستر على جميع بنات المسلمين

[هبوب الكوس]

طيب عرس ومش مهم , بس كيف بدها تجهز حالها البنت لو مبلغ بسيط ؟ :(

والله يوفقهم ويسعدهم يارب

لا تحاتين اكيد الرجال من طيب اصلة وتقديره للأب

بيعطيهم مبلغ للتجهيز :nice:

[بومحمد المطاوعه]

الله يوفقهم ان شاءالله

ياما ناس تزوجو بالملايين واحسن الفنادق وساكنين في الفلل واخرتها تطلقو

وياما ناس على قد حالهم وتطلقو حتى لو بريال مهرها

وفي ناس الحمدلله عاشو بريال ولا ب 100 الف

العيب عيب الاخلاق وعيب النفس مب عيب الفلوس ولا عيب المهر



كما في الحديث: (خير الصداق أيسره)، والنبي -صلى الله عليه وسلم- قال لبعض الناس لما قال ما عنده شيء، قال: (التمس ولو خاتماً من حديد)، وزوج بعض الناس بتعليم القرآن، وتعليم سورٍ من القرآن، فالأمر في هذا واسع، فالسنة للمسلمين أن لا يغالوا، ولا يتكلفوا، حتى يسهلوا الزواج لمن رغب بالزواج.

ولقوله -صلى الله عليه وسلم-: (يا معشر الشباب من استطاع منكم الباءة فليتزوج، فإنه أغض للبصر وأحصن للفرج، ومن لم يستطع فعليه بالصوم فإنه له وجاء)

منقول من موقع ابن باز رحمه الله

[هبوب الكوس]

الله يبارك لبناته لتيسيره
عليهم وعلى ازواجهم
وازواجهم راح يقدرون هل الشي
عند بدايه الزواج او بعشرتهم
او حتى عند حدوث اي خلافات مستقبليه
وجزاه الله خير
وخيرهن اقلهن مهورا

هنا مربط الفرس