ازالة الحجر هل له تاثير على الطابوق؟

[PGR]

السلام عليكم ,,, شباب انا البيت ركبوا عليه حجر يعني شوي من واجهتين نصهم تقريبا وماعجبني الحجر وقلت له شيلهم كلهم وركبلي غيرهم لانه وايد في اختلاف في الوانهم ,,, هل لما بيشيلهم بيكسر الطابوق ولا هو يقدر يشيلهم بطريقه عاديه بدون ما ياثر على الطابوق؟؟

[ولد المنصور]

ماياثر على الطابوق ابدا ....
بس اخوي ياليت تفيدنا وش لون مختلف اللون ؟؟؟؟
واي نوع من الحجر مركب عشان الواحد يستفيد ..؟؟؟
واعتقد الحجر طبيعي ..

[دهــن العود]

اظن اخوي الحجر الطبيعي ما يجي الحجر كلة نفس اللون لازم تلاقي اختلاف في تدرجات اللون وهذا ما يقلل من جمالة إلا اذا كان بدرجة وااااضحه


موفق

[PGR]

اتكلم عن الحجر السوري,, الابيض تجي فيه عروق مختلفه بعضها وردي محمر ,,, انا قلت له يشيل الحجر اللي فيه هالعروق ,, لكن حتى الحجر العادي عروقه يجي فيها بني على بيج هل لما بيركب كامل بيبين انه فيه اختلاف ؟

[شموخ دائم]

,

,


مرحبا


اخوي الكريم

فك الحجر من الحائط الحمدالله ماله اي مشاكل اللهم ينتبه العامل وهو يفك
ما ياثر على الحجر الي جنبه وما يطبل

الحجر الطبيعي والرخام يحتاج شركه عندها خبره كبيره بالتوريد والتركيب
و90% من المشاكل في البيوت الجديده تلاقيها اما في الحجر او في الرخام

المسئله تحتاج ترتيب من مدير الشركه ومن العامل الفورمن المسئول عن التركيب

لازم يفك الحجر من الصناديق ويعمل له ( فرز ) يفردهم على الارض بالحوش
يخلي الحجر الفاتح في ناحيه والغامق شوي في ناحيه والي فيه عروق في ناحيه


ويشرب له سيجاره وشاي احمر :) ويفكر كيف بيتم توزيع الحجر على البيت كامل
يدرس البيت وتنسيقه وديكوره


نفرض الحجر الفاتح بعد الفرز طلع كميته 100 متر
والغامق شوي الكميه 120 متر
والي فيه عروق 50 متر

واجهه البيت عندك نفرض تحتاج 120 متر صار الموضوع سهل ومعروف شنو بيحط
:)
بتطلع الواجهه البيت كلها ماخذه لون متوحد

والحجر الثاني ياخذه للبيت من الخلف بيركب من الخلف متوحد كامل ومحد بيلاحظ الاختلاف

الحجر يبين الاختلاف لما نحط غامقه وفاتحه جنب بعض
:)

المسئله تبي لها واحد شاطر وخبره بالتركيب
مو عامل الله بالخير يخلط الامور
:)

الحجر الي فيه عروق نقدر نداريه في الاماكن الميته من البيت ناحيه ( الملحق ) مثلا
نفرض البيت بينه وبين السور متر واحد جنب البيت نقدر نحطه هناك لانها مو باينه من خارج المنزل
ومو باينه من الحوش او من حديقه المنزل



عموما تقدر تصر عليهم يخلون الحجر متوحد بكل جهه وهذا حقك ومن المفروض
يتساعدون معاك ويعدلون

والصح قبل التركيب يكون الاستشاري او المالك يشوف الحجر مفروز كله على الارض قبل التركيب
ويوقع على التركيب كل نوع وين بيركب وشلون الطريقه

وباذن الله مافي مشاكل اذا الترتيب صح من البدايه والله يعطيك العافيه

,

,


اخوك


شموخ دائم

[PGR]

اخوي شموخ دائم ما شاء الله على تحليلك وردك ,, بستخدم كل كلامك اللي ذكرته لي لما اواجه العامل اليوم ,,, وطريقة التركيب بالاضافه للاسمنت براغي واسيام عشان اضمن الشغل ,,

[راشد1]

ليش تريد تشيل الحجر...؟