ابي اشتري كاميرا !!!!! احترت بين كانون ونيكون ؟؟

[نتفـه]

السلام عليكم ..
بغيت مساعدتكم .. ابي اشتري كاميرا احترافيه .. وطبعا كالعاده .. التصوير مجرد تجربه جديد كليا وعاجبتني .. لا عندي خلفيه و لا شي .. ولكن افكر اشتري كاميرا نيكون دي 7000 .. وفي نفس الوقت اغلب الناس يقولون كانون 550 دي !!!! او دي60شنو الحل ؟؟؟؟؟
شفت تصوير الكيمرتين .. يهمني ان تكون سهلة الاستخدام وفي ثبات في التصوير ووضوح في تصوير اللقطات حتى المتحركه منها !!!!
وعند اقتراح الكاميرا ياليت اقتراح عدسة مناسبه معاها تناسب اغلب انواع التصوير .. وسعر الكانون والنيكون المذكورين فوق ..
وشكرا .. ضروري لاني ابي اشتري بهالفتره ..
وجزاكم الله خير ,,

[بنت امي]

احسن شي كانون

كانت عندي نايكون بس بعد ماجفت صور من تصوير كانون. بعدتها وحذيت كانون

والصراحة نايكون ثقيله اما كانون خفيفه

[الخيالة]

موضوعج لازم تحطينه في قسم الاستفسارات مب في سوق العام


ع العموم كانون أحسن اكيييد

[نتفـه]

شكرا على ردودكم .. والله بغيت احط الموضوع ف العام بس ممنوع .. والاستفسارات مهجور ما اظن حد بيرد اصلا .. شكلي باخذ نيكون وامري لله ..

[تمون]

اختي

اخذي كانون 600d كميره حديثة وفيها كل المواصفات الزينه بالتوفيق

[بوعلي-Qtr]

اللي يقول كانون احسن اكيييييد ياليت يقولنا ليش احسن
شوف انت امسكهم في السلام واستعملهم شوي .. اللي ترتاح لها خذها
وبعدين تقدر تطور بدون مشكله

[بصمة قطرية]

كل المصورين المحترفين اللي اعرفهم يستخدمون نيكون ..

[@north_star@]

بنظري النيكون احسن وعن تجربة
ومثل ما قال اخونا بو علي روح السلام وجرب الثنتين

[سعد]

اولا اختي اتمنى لج التوفيق في مجال التصوير

ثانيا سواء خذتي نيكون والا كانون ماراح تفرق كثير والاهم استخدامج الصحيح للكيمرا وتأكدي ان الكيمرا ماهي الا أداه أنتي اللي تتحكمين فيها وفي نتايجها والمصور الجيد يبدع ولو بكيمرا عاديه

d7000 nikon ممتازه وايضا 60D canon

لو خذتي اي وحده فيهم ماراح تندمين

في مقارنات بينهم في النت والنيكون تتميز بقلة النويز في الاضاءات الخافته وايضا اسرع منه ال60d بقليل

اتمنى اني افدتج موفقه ان شاء الله

[سداوي&مدريدي]

عندي Nikon D90

خذتها من السلام الدور الثاني بــ 5200 ريال مع شاحن وشنطه ومومري وعدسه الشركة

انا ماجربت الـ Canon لكن مرتاح مع الــ Nikon D90 وتصويرها ممتاز :nice:

وعلى فكره مافي فرق كبير بين Nikon وCanon .. كلاهما شركتين كبار ومشهود لهم :victory:

بالتوفيق :nice:

[قطر love]

تفضلي أختي الموضوع شوفي آخر صفحه للكيمرات والأسعار وكل شيء

وعندج الصفحات الأولى للتعليم

http://www.qatarshares.com/vb/showthread.php?t=433363&page=21&highlight=%E3%E6%D6%E6%DA+%D4%C7%E3%E1+%C7%E1%CA%D 5%E6%ED%D1


أي استفسار ثاني أنا حاضر وإذا عندج ملاحظات أو سؤال بعد لا تترددين شوفي الموضوع بالأول ومري على آخر صفحه بتحصلين كل شيء وإذا في خاطرج شيء في الخدمه :)