.......... دعمت ولد الجيران

[qatari 111]

السلام عليكم ورحمة الله وبركاته

عيدالله علينا وعليكم باليمن والبركه وعساكم من العايدين والفايزين .. كل عام وانتوا بالف خير ... والله يحفظكم من كل شر

اليوم العصر كنت دعمت ولد الجيران عمره ما يتعدى 8 شهور تقريبا وكان على الكرسي المتحرك وباب الطبيله مفتوح ومثل ما انتوا عارفين قدام الطبيله منحدرانسيابي على الشارع
وانا راكب السياره وراد ريواس ابي ادخل السياره فالبيت ... ولا واحد من الجيران اجوفه رايح صوب البيت اللي مقابل بيتي ولا اجوف جاهل برع البيت قريب من الشارع .. والله اني عصبت على اللي صاير .. وبنفس الوقت حمدت ربي اني ما دعمته لولا عناية الله وبحفظه للجاهل ولي انا .. والمصيبه الكبرى ضربنا الجرس والباب لا حياة لمن تنادي .. والسيارات مب موجوده فالبيت .. لا الاب ولا الام موجودين فالبيت .. وفالاخير ظهر لنا اخوه من بيت الجيران اللي احذاهم .. وقلنا له وين ابوك وين امك .. يقول محد فالبيت .. والاعتماد على الخدامه والمربيه ...

نفترض الله يبعد عنا وعنكم كل شر .. دعمت الولد ويش اللي راح يصير من ورى اهمال الاب والام .. اولا ضياع مستقبلي وراح انسجن ودفع غرامه ماليه وضياع مستقبل عيالي لاني المتسبب في دهش الطفل .. وثاني شي ندم الاب والام ومطالبتهم بحقوق طفلهم مع ان هم من اللي تسببوا بالحادثه واهمالهم ... والله ان عيالهم بعمر 11 سنه و8 سنوات يلعبون بسياكلهم فالشارع .. ورغم اني منبههم .. لكن الله يحفظهم ويحفظنا من كل شر..


خافوا الله يالاب والام في عيالكم تراهم امانه في اعناقكم وراح تحاسبون اما الله يوم الحساب

لا تعتمدون عالخدم والمربيات لانهم فالاخير مب عيالهم ولا هم من لحمهم ودمهم .

واذا مب قد المسؤليه في تربية عيالكم وما تقدرون نحافظون عليهم من كل مكروه .. مافي داعي تخلفون وتجيبون عيال وتحذفونهم للخدم وتتحملونهم المسؤليه على كل صغيره وكبيره اذا صار شي الله يبعنا عنا وعنكم من كل شر ..

[كحيلآن]

الحمد لله على السلامه ...

واقع وحاصل ما تقدر تغيره مواضيع كثيره تطرقت لـ هالموضوع ولكن لا حياة لمن تنادي

مشكور على هالموضوع والحمد لله على سلامتك مره ثانيه وسلامة الولد والله سترك والا كان رحت فيها والسبب مثل ما قلت اهمال الاهل .. تدري وين المصيبه ..؟ إذا فيه ناس من هالنوعيه ويقرون الموضوع ولا يتأثرون .

[المسك1969]

الله المستعان والحمدلله على سلامة الجميع

هذا فعلا اهمال وأرجو أنك تكلم الأب عن اللي صار وياليتك مارديت الولد لبيت أهله وخليته في بيتك وخليتهم يدورون عليه (بس لي صاح أكيد ماعندكم حليب ولا حفاظات) خصوصا الخدامات اللي ماعندهم أمانه...

لو منك مابرده لهم ليين اييون ويدورون عليه .. عشان يعرفون أن الضنا غالي وما ينهد عند أي أحد بسهولة... صج نخليهم وقت الدوام متضطرين بس عقب الدوام ويانا مسندرينا ربي يحفظهم

بس بو ثمان شهور ما ينحط في البيت الصراحة

جزاك الله خير

[PIX]

والله عندي نفس المشكلة اعاني منها يوميا

الله بلاني بجيران الله لا يبلي احد

كل يوم داش المكافحة او المراكز اشتكي والسبه الجيران

وسجنت احد اولاهم 15 سنه ولا في فايده عايله رايحه فيها

وكل يوم والثاني مشتكي في البلدية بسبة الماي المهدود في الشارع طول اليوم

وعيالهم صغار وكل لعبهم سياكل ولا يحلى لهم اللعب الا عند باب بيتي باب الطبيله

ومتروكين في الشارع لا رقابة ولا حسيب ولا رقيب

[الرايــق]

اوف ... الحمد لله على كل حال ..

[tarek]

لا حول ولا قوة الا بالله والحمد لله على السلامة وصدقت الامر ليس بالسهل ولكن اذا الامر بيتكرر او تكرر معك لازم عليك تشوف حل

[فواز1976]

قالوها الاولين "الجار قبل الدار"

بعض الجيران فعلاً يكرهك بالحاره وبالبيت ..... بس اهم شئ الواحد يصبر على جاره ويجيه بالحسنى لانه اذا بدأت المشاكل والشكاوي ماراح تنتهي وبدل ما يكون جارك حامي دارك تصير متهوجس منه واي شي يصير لبيتك ولا لسيارتك تشك فيه

[فيصل 89]

والله عندي نفس المشكلة اعاني منها يوميا

الله بلاني بجيران الله لا يبلي احد

كل يوم داش المكافحة او المراكز اشتكي والسبه الجيران

وسجنت احد اولاهم 15 سنه ولا في فايده عايله رايحه فيها

وكل يوم والثاني مشتكي في البلدية بسبة الماي المهدود في الشارع طول اليوم

وعيالهم صغار وكل لعبهم سياكل ولا يحلى لهم اللعب الا عند باب بيتي باب الطبيله

ومتروكين في الشارع لا رقابة ولا حسيب ولا رقيب


اوووووووووووووف سجنت واحد من جيرانكم 15 سنه ليش يالاخ شمسويلك انت حدك سلطه !!!!!!!!!!!!!!!!

خوفتوني وين قاعدين تشتكي على جارك تحبسه 15 سنه لو انك بروسيا ماصارت :eek5:

[المبرمج صلاح]

اوووووووووووووف سجنت واحد من جيرانكم 15 سنه ليش يالاخ شمسويلك انت حدك سلطه !!!!!!!!!!!!!!!!

خوفتوني وين قاعدين تشتكي على جارك تحبسه 15 سنه لو انك بروسيا ماصارت :eek5:

هههههههههههههههههههههههه انت فهمت غلط
اعتقد قصد اخوي pix ابن الجيران عمره 15 سنة هو الذي سجنه اكيد مسوي له مشكلة في البيت وهذا شي متوقع من هذة الفئة المراهقة

فعلا صدق اللي قال الجار قبل الدار

الله المستعان

[PIX]

اوووووووووووووف سجنت واحد من جيرانكم 15 سنه ليش يالاخ شمسويلك انت حدك سلطه !!!!!!!!!!!!!!!!

خوفتوني وين قاعدين تشتكي على جارك تحبسه 15 سنه لو انك بروسيا ماصارت :eek5:


اخوي فيصل اخوي محترف مع ان ردكم زعلني بس بعد اقول معذورين اخوان ومعذورين

هذه الصوره فيها الحكم من المحكمه والتاريخ روحوا وتاكدوا من المحكمه

وتأكدوا انه جاري الطوفه في الطوفه

http://farm7.static.flickr.com/6106/6329636794_d74ac47a77_z.jpg

[فواز1976]

اخ pix شكل موضوع جارك خطير الي حكم عليه بالسجن ١٥ سنه

[PIX]

اخ pix شكل موضوع جارك خطير الي حكم عليه بالسجن ١٥ سنه


للعلم بلغني ان الجار اخذ مؤبد

بس للعضه الجار قبل الدار يا جماعه جمله وفيها حكمة من قديم الازل

[فواز1976]

Pix ..... والله أثرت فضولي اعرف ايش هو عامل عشان ياخذ ١٥ سنه ولا مؤبد

[تاج المراجل]

لاحول ولا قوه الا بالله ، الله يعين بعض اولياء الامور ، خلاص يتركوا عيالهم بدون رقيب ولا حسيب ، وهذه مشكله

[GCC]

الحمدلله عالسلامة اخوي وانها جات سليمة

أرحم هالاطفال، مساكين وش ذنبهم لو صار فيهم شي لا قدر الله

واشلون راح يكون شعور الام والاب لو صار شي والعياذ بالله

مايدرون انهم محاسبين امام الله!

الله يحفظ الجميع من كل مكروه*

[Rashid554]

للعلم بلغني ان الجار اخذ مؤبد

بس للعضه الجار قبل الدار يا جماعه جمله وفيها حكمة من قديم الازل


ياخوي الله يهداك انت خليتنا ننسى الموضوع ونركز بموضوع جارك هههههه

والله صار لغز الحين يا ترى شنو المشكله الي خلته ياخذ 15 سنه حكم :omen2:


بس بما انك قلت بردك السابق كلمة " مكافحه " اعتقد الأمور وضحت :nice:

[GCC]

شر البلية ما يضحك..الحين كل واد فينا، الأفكار تاخذه وتوديه بحثاًعن السبب ياللي خللا المخلوق يدز السجن ١٥ سنة

نسأل الله السلامة

[كازانوفا]

لا اله الا الله يعني الخدامه تاركاه يلعب بالحوش بروحه والله حرام
بس المسؤوليه على الام وليس على الخدامه لانها مش هي اللى مفروض ادير بالها عليه كثر امه
وحسبي الله ونعم الوكيل

[نتفـه]

هاي ناس ما تحس بنعمة العيال .. وغيرهم فيه عقم او يعالج يبي عيال او حتى وده يتزوج علشان ربي يرزقه عيال وما يقدر !!!
سبحان الله .. والحمدلله على سلامتك وسلامة هالياهل المسكين اللي مب مفتكرين فيه لا ام و لا ابو ,,

[توشيبا]

فديت جيرانا

والله فريجنا كل اللي فيه ينحطون فوق الراس

والجار قبل الدار

[قطرية كشخه]

تستاهل السلامه الحمدلله ربك سلم

ديرو بالكم يا جماعه وايد ناس مهملين بعيالهم هالايام :anger1:

[Amal_QTR]

والله كانك تتكلم عن الماساه اللي عايشتها
كل مره اطلع من البيت اتم على اعصابي لين ما اطلع من الفريج
بيتين الله يحفظ عيالها و اعتقد انهم اهل اعمراهم ما تتعدى 7 لين عمر 1 يمكن
و مقللين فالشارع
يلعبون وسط الشارع
سياكل و كوره و ركيض
و لا حتى خدامه واقفه معاهم
كل واحد شايل نفسه
ولا يخافون من السياره
لين شافوني جايه يركضون جدامي
والله اني اخاف عليهم بس لو هالمنظر مره ولا مرتين بقول طلعوا بدون شور اهلهم
بس هالمنظر يتكرر يوميا !!!!!!
طبعا البنات لا جوتي ولا نعال الله يعزكم و ركيض في الشوارع
غير اللي يناقزون فوق البيك اب !!


الله يحفظ عيالنا جميعا

[هدى ورحمه]

الحمد لله على السلامه ...

واقع وحاصل ما تقدر تغيره مواضيع كثيره تطرقت لـ هالموضوع ولكن لا حياة لمن تنادي

مشكور على هالموضوع والحمد لله على سلامتك مره ثانيه وسلامة الولد والله سترك والا كان رحت فيها والسبب مثل ما قلت اهمال الاهل .. تدري وين المصيبه ..؟ إذا فيه ناس من هالنوعيه ويقرون الموضوع ولا يتأثرون .

لالا السالفه مب كذا
الموضوع ومافيه ان الاب والام اللي تقول عنهم ولا راح تهزهم كلمه هالنوعيه تنتظر لين حج من عيالهم يندهس والا يتكسح
ذكرتني بسالفه صارت في فريجنا احداثها بدت الساعه ال12 فالليل تخيل بالصدفه طالبينا بيتزا توصيل منازل ويوم جات الطلبيه الا الخدامه تقول لي في ياهل عند باب البيت عمره سنتين جالسه عالرمل جنب بيتنا كنه قطوا وساكت ما يتكلم انا انرعبت بصراحه قلت لها هاتيه وجابته الياهل متعرض لصدمه مايتكلم بس مبين عليه قطري؟؟!!! اتصلت بالشرطه على طول ووشوي الا اهل الولد مطرشين عيالهم ثلاثه مراهقين يقولون عطونا اخونا قلت لهم مابسلمكم ياه الا اذا جات الشرطه وحد من والدينه والا انسوا. وجات الشرطه عند الباب وجا ابوه وامه قطريين وامه تصيح ولا قالت شكرا ولا بطيخ بس اظنها تطلقت من عقب اللي صار لان ابوه مبين عليه مقفل من هالاهمال وبيتهم طلع فالشارع المقاابل لبيتنا وعند تقاطع انا بس اللي مستغربه اشلون قطع هالتقاطع وفي نص الليل وجا عند بيتنا؟؟ لا ومنتطقتنا نصها عمال ..الله سلم الولد منهم والا كان راح فيها وقسما بالله ولا الجن الازرق يدري عنه .

[شبح الصمت]

الله يستر على عيالنا وعيال المسلمين والمسلمات ..

اول شيء الواحد لازم ينتبه ينتبه للبرزان الي في بيتهم في الدشه والطلعه ..

لانه الواحد اوقات يدخل البيت على سنه ( البعض وليس الكل )

وفي الطلعه المفروض يشوف اليهال اذا يلعبون حزت العصاري لانهم ماشاء الله هذه وقتهم ..

وبخصوص عيال الفريج حدث ولا حرج ..

يهال مفلتين منيه ومنيه

اخبر شفت ياهل ما تعدى 4 سنوات على سيكل واخبر ذكرت القصه من بيتهم لين الدكان يمكن 500 متر :eek5:

وتميت الحقه وهو قدامي اغطي عليه عشان محدن يجيه كفخ ويطيره ويوم وصل بيتهم طقيت البيت عليهم اطلعت لي امه قلت لها وين هاده الياهل استكتت طلع لي واحد من الجيران يقولي ابشرك كل يوم على هالحالة لا تعب نفسك ..

ياهل عمره ما تجاوز 4 سنوات بروحه ..

حسبي الله ونعم الوكيل

وينقدون علي الربع

يقولون لي اشله ما تخلي عيالك يطلعون يعايدون يفترون على البيوت ..

قلت لهم عيالي يجون معاي عالموتر المكان الي اروح له ينزلون معاي عيادي وادوره في الفريج لا يوبه ..

الدنيا عادها بخير بس المخابيل يا كثرهم في الفرجان ..

الطيش ضارب روؤسهم

[الـخـالـدي]

لا حول ولا قوة الا بالله

[OM_OMAR_QATAR]

لاحول ولا قوة الا باالله

[متعاون000]

اوووووووووووووف سجنت واحد من جيرانكم 15 سنه ليش يالاخ شمسويلك انت حدك سلطه !!!!!!!!!!!!!!!!

خوفتوني وين قاعدين تشتكي على جارك تحبسه 15 سنه لو انك بروسيا ماصارت :eek5:

اتوقع هذا القانون الي في بنغلاديش

[الحال مايساعد]

لا حول ولا قوة إلا بالله
الحمد لله انه ماصار شي ، انا اناشد الجهات المعنية بفرض غرامه أو شروط تأديبية على الناس إللي تهمل في تربية أبنائها ، في الدول الأوروبية الأم والأب يسجنون والأطفال ينحطون بمراكز الرعايه