استشارة بخصوص المكيفات

[q6ryah]

ولجماعة الخير بدينا في بنيان بيت العمر والحين إحنا مختارين في نوعية المكيفات الي نحطها هل نحط سنترال ولا سبيليت ولا ويندو
أنا قلت لزوجي نحط سنترال احسن من السبيليت ولا نحط سنترال في الاماكن الداخلية وباقي الاماكن ويندو
لأني بصراحة مب حابة السبيليت لان دائماً له مشاكل مهما كانت شركته
الحين أنا افكر بالسنترال ياليت لو تساعدوني بمميزات وعيوب كل نوع
ووين احسن شركة للسنترال *

[ابوعلي]

مرحبا اختي اتمنى هالرابط يفيدج

http://www.qatarshares.com/vb/showthread.php?t=393030

[مضارب دوسري]

انا من رايي
السنترال اذا اخترب معناه البيت كله بيوقف
بس السبيلت اذا اختربوا اثنين او ثلاثه عالاقل بيكون في اماكن ثانيه فالبيت بارده
والويندو يدخل الغبار والاتربه للبيت والرطوبه بعد وفوق هذا بعض المقاولين مايخلي فتحة المكيف سلوب والنتيجه ان الماي يدخل فالطوفه وتسوي مشاكل وتشوه منظر البيت

السبيلت افضل حتى لو كان عوار راس

[wadha-qa]

احنا حطينا الطابق الارضي و الصالات اللي فوق سبيلت و غرف النوم كلها اللي فوق وندوو
و السبيلت مشاكله كثيره بس اهم شي خذي نوعيه زينه و ابتعدي عن ال جي

[MAZEN37]

انا رائي الافضل للمطابخ والمجالس والصالات بالطابق الاول ويندوز
وغرف النوم سبيلت علشان الهدوء

[باحث علم]

اهم شي اخذري من ال جي وسامسونج وباناسونيك
هالثلاثه كل واحد اتعس من الثاني كلهم جربتهم
وانصحج بالدكت سبيليت هذا اللي مفكر اسويه في بيتي
بالتوفيق

[OREO]

- السنترال شكله حلو لكن عيبه في الصيانه الدوريه و تكلفة الصيانه و خاصه بعد انتهاء الضمان و استهلاكه في الكهربه عالي و خاصه اذا احسبوا علينا الكهرباء بفلوس من عيون الحساد في الايام الجايه ،،

- الاسبليت شكله مهب بطال و حلو و صيانته سهله و استهلاكه للكهرباء اقل لان كل يونت بروحه و التحكم فيه اسهل و الحلو فيه ان ما يدخل غبار مثل الوندو ،،

- الويندو شكله مايواكب العصر و سعره رخيص و تبديله سهل و صيانته اسهل ،، لكن عيبه يدخل غبار و في الصيف تمسك فيه الرطوبه بشكل سريع ،،


انا شخصيا ركبت اسبليت لكل البيت من ماركة فوجي ،، و طبعا الاسباب بأن اتفادى الغبار و قلة التكلفه من ناحية الصيانه الدوريه و تبديل اليونت اذا اخترب بعد الضمان و بالاضافه الى استهلاكه للكهربه بشكل اقل لان كل مكيف له كمبريسور خاص فيه ،،

ربي يوفقج اختي و استخيري قبل كل شي ،،

[خالد32]

السنترال حق مجمعات و مكاتب كبيره
اما للفلل الكونسيلد سبلت او الدكت سبلت افضل و ارخص
و طبعا السبلت العادي
الماركات الممتازة مثل متسوبيشي ديا و فوجي و دايكن و جري و كارير

كلهم عندي فالبيت عدا كارير و عندي جنرال و جنرال كول و ما انصح فيهم
بيتي الجديد ركبت فيه كونسيلد دايكن للصالات و المجلس و سبلت للغرف*

[Fendi]

انا مشورتي لج في شي جديد اسمه سبيلت سنترال هو نفس السنترال

صحيح مكلف شوي بس اقل من السنترال بشوي نفس شكله بعد

من ميزه هاي الشغلات او النوعيات يكون البيت كامل مكينه وحده

وماتصرف كهرباء نفس لسبيلت لان حسبي عدد المكفات الي بتحطينهم وعدد المكينات

لاكن هاي مكينه وحده فوق السطح وبدون تسرب ماي مادري ايش

وبعد في جهاز صغير حق كل غرفه اسمه vib هاي الجهاز حق كل غرفه تتحكم في قوه التبريد

انا انصح وبقوه لان منافعه اكثر من مضاره

[Mish3al qtr]

والله انا احب اضيف شي اذا ماعندج مشكله بالامور الماديه انصحج مثل ماقالوا الاخوان لكن اذا اقتصادي شوي انا اشوف انه جنرال كوول من الريس اذا تم استخدامه بشكل جيد والصيانه الدوريه له يكون من افضل الانواع الرخيصه او المتوسطه السعر وانا صراحه فبيت الوالد مركبينهم ولافيهم اي مشاكل وحاليا انا بركبهم فبيتي الشهر الجاي اول ماسكن ومقتنع فيهم وبالنسبه حق الانواع الثانيه ماعندي خبره صراحه الاخوان ماقصروا

[Umahmad]

السنترال لو بتاخذين نوعيه جيده مامنه خوف لكن مكلف

الدكت افضل شي وبعده السبيلت

اما الويندو فهو ازعاج و يدخل منه الغبار وغير انه يطلع اشيا سوده تبهدل البيت