999 المرور ... زحمة و مخالفات وينكم !!!!

[الوان]

بسم الله الرحمن الرحيم

*

المرور وشو ينتظرون عشان يتحركون

هل لازم تصير حوادث عشان يسوون شي؟

الاجانب تمادوا في المخالفات

و الكل يشهد على هالشي

اعطيكم مثال

اشارات المعمورة

لما تكون جاي من داخل المعمورة باتجاه الاشارة

اذا خذت يمين تروح على تقاطع خليفة العطية

اذا خذت يسار تروح باتجاه دوار ارامكس

اوكي؟

الحين الشارع اللي في المعمورة

فيه خطين

واحد رايح

واحد جاي

المشكلة الخط اللي رايح

زحمة

ايش يسوون العالم

و معظمهم اجانب

مسوين الخط حق سيارتين بدل سيارة وحده

فاللي جاي من الاتجاه المعاكس ما يقدر يمشي

يا يدعم السيارة وجه بوجه

او يركب رصيف

او يوقف ينطر الاخ اللي مخالف يدبر نفسه

وين المرور عنهم

و هذا موقف واحد من مواقف كثيره

موقف ثاني

اللي طالع من لفة فرعية الى شارع رئيسي

اللي بيروح يمين من الطبيعي ان يلف بالسيارة يمين شوي و

ينتظر لين يفضى الشارع

ايش يسوون الاجانب

اذكياء !

اللي بيلف يسار يلف بالسيارة شوي يسار بعد

قمة الذكاء

انزين هو بيسكر الدخلة للشارع الفرعي !

ما يهمه

تحصل الدخلة من الشارع الفرعي فيها خط واحد و واقفين فيه سيارتين

ياليت تكون الصورة وضحت

و الرسالة للمرور وصلت

و الله المستعان

[الحال مايساعد]

تصادفني مواقف كثير وادق على 999 ، انا من صوبي أحاول أحل الأزمة بحل عملي ، يصادفني إزدحام مروري على جسر الخيسة وانت طالع خط الشمال فترة الصباح والحقيقة في إستجابة كل يوم في دورية توقف على الدوار.
وفي حالة عدم الإستجابه بإمكانك تقدم بلاغ في مستلم الشكوى

[مرتبش]

اعداد شرطة المرور غير كافية

وشغلهم للاسف متركز في امور تنظيم السير على بعض الدوارات ..اتمنى الداخلية تهتم بالمرور لانه الواجهة الحقيقة للبلد وللنظام..

كثيرا مانسمع المطار هو واجهة البلد بس اشوف الشوارع لما تكون مثل الغابة والفوضى عارمة تعتقدون اللي دخل المطار وحصل على افضل ابتسامة وترحيب من موظفين المطار ومن امن المطار وركب التاكسي وتوجه للفندق وشاف السياقة في الشوارع شنو بيظن البلد؟ دولة متحضرة والا دولة متخلفة مافيها قانون..

[حراير قطر]

والله يا اختي بكل مكان

تعالي عند اشارات الدفنه وعند دوار قاعه المعارض والقوس

والاغلبية اجانب لو تشتكي تطلع انت الغلطان

ولا يفتكرون يدخلون عليج بالخط ولازم اتكونين منتبه والا بتدعمينهم :( ...

[راشد محمد]

شنسوي..نشوف تجاااوزات من قطريين واجانب وما باليد حيلة.

[همر]

انا لاحظت من كثر ماكنا نتحلطم بسبة الدوريات اللي مرززه في كل داعوس وطايحين له مخالفات حزام وسوالف بايخه، انقرضوا من فتره .. وماقمت اشوف دوريات وايد.. وصارلي فتره ما اربط الحزام .. ولا اشوف شرطي ينقز من ورا عمود الكهربا ويطير في الهوا جنه كابتن ماجد عشان يلصق المخالفه عالجامه قبل لا اربط الحزام !!

يمكن بعد من دعاوي الناس !!

قلنا خفوا علينا ياجماعه ماقلنا انسونا :nice:

[SOONALL]

والله اني اشوف ان مب الاجانب الي يخالفون لانه خايف على معاشه من المخالفه وانا دايم اشوفهم لابسيين الحزام بس المخالفييين اكثرهم من الشباب الي مستعجل على المطعم ...وانا اشوف ان الحل صعب اشوي بس لو يفتحون اكثر من خط سريع مثل خط الشمال بيكون حل حلو

[بوراشد82]

اخوي ترى الخطأ يرجع بالمقام الاول لبعض القطريين

واقصد فيها من سرعه وتجاوزات وتشحق ارصفه

هذا الي خلى الاجانب يتشجعون اما لو بعض اليهال يسوقون مثل الناس العاقله كان الاجانب احترموا نفسهم والدليل انتوا اخواني الاعضاء خصوصا المسافرين برا

سواقتكم في السعودية غير سواقتكم في البحرين والامارات

في السعودية ادعس على كيفك وتجاوز ولف جنه شارع ابوك لكن في الامارات والبحرين لا تسوق حالك حال الي حولك والسبب في الحالتين ان اهل البلد يسوقون باخلاق مختلفه وانت تتاثر بهم سواء ايجابيا ولا سلبيا

بعضنا لو محترم قوانين المرور كان الباقي وخصوصا الاجانب انصاعوا لطريقه واسلوب قيادتنا

وتقبل مروري

[ولد شرق]

عفوا... من بعض الردود

الحين صار القطري هو الغلطان؟
صح ماقول القطري مايخالف لكن اغلب المخالفات من الأجانب
واللي يقول سبب مخالفات الاجنبي هو القطري اسمحولي هذا مريض
يعني اذا خالف القطري لازم الاجنبي يخالف؟
وبعدين الاخ كانب الموضوع يتكلم عن مخالفات الشوارع وعدم احترام خطوط السير... ابغي اعرف اش جاب حزام الامان في السالفه؟
بعدين اصلن عدد القطريين اللي يسوقون سيارات 10 يمكن % من عدد الاجانب
وانا شخصيا اذا سافرت بره احترم قانون البلاد غصبن عني... يا غريب خلّك اديب

[OM_OMAR_QATAR]

معاناة الشوارع والناس الي فيها كل من يقول ياروووحي

يخي صج لي قالو السواقة اخلاق وفن

[قلبي الطيب]

بسكم عاد يعني شنو الحل مايسوقون مثلا
القطري والاجنبي بشر وكل واحد مسؤؤل عن نفسه

[الوان]

وايد اللي يخالفون

و منهم قطريين بس من رأيي ان القطري لين خالف

يعرف متى و شلون يخالف بدون ما يربك السير

او يسبب اضرار

بس معظم اللي يخالفون اجانب

لأن نسبتهم كبيرة جدا في الدولة

و بشكل خاص و محدد

الجالية الهندية !!!

يخالفون بقوة عين

[مرتبش]

اللي يقول القطريين سبب المشكلة

كم عددهم؟ وكم نسبتهم في الشوارع 10% فقط..فخلك منطقي وقول 90% من الاخطاء والمصايب في الشوارع بسبب الاجانب

كثير منهم حديثين عهد بالسواقة والسيارة وفي بلدانهم مايسوقون

شلون نلوم المرور اذا اقصى تفكيرهم الحزام ويظنون اي مشكلة بسبب القطري وانتو متنفقين معاهم تظنون كل شي بسبب القطري

[بوحارب]

على كثر رجال المرور الا مانشوفهم في اماكن الزحمة !!!

لكن حق تسجيل المخالفات الكل يطلع ما شاء الله عليهم :(

[حراير قطر]

مسكين هالقطري كلكم اتلومونه

يعني خالف يخالفون نفسه ولا يحترمون بقانون الدولة

انا اروح صوب دوار قاعه المعارض اقعد اتلفت يمين ويسار

كلهم اجانب اللي حولي وان حصلت 10 قطريين طول الطريق :(

وكلهم والله اللي مخالفين اجانب يتجاوزن يمين ...

[Rashid554]

الله يعطيهم العافيه شرطة المرور والدوريات
قايمين بواجبهم على اكمل وجه وهذا مو ذنبهم
هذا ذنب اشغال هي الي متسببه بهالزحمه
ما توفقت يا صاحب الموضوع بموضوعك
ان شاء الله يحطون دورية مرور عند سيارتك عشان حضره جنابك ما تتاخر

[تاجر كشخة]

الله كريم