((دعوة مستعجلة -اثبات حالة))

[ali22]

السلام عليكم ورحمة الله وبركاتة
اخواني الاعزاء ارجوا منكم المساعدة والمساندة حيث انني في صدد
رفع دعوة اثبات حالة على المقاول الخاص ببناء فلتي عقدي معاه 12 شهر
تسليم مفتاح ، بتاريخ 25/4/2010 ولحد الحين ماخلص عظم مع ان الدفعات
تنزل اول بول يعني الحين صار له 18 شهر !!! :eek5: اللي ابغيه منكم النصيحة
او اللي يقدر يفيدني شلون نكتب الصيغة ((دعوة مستعجلة -اثبات حالة)) او ينزلها مرفق
والسموحة على الاطالة ......:cry2:

[أسير الاسهم]

لا دعوى ولا إثبات حاله .. يا مقاول أطلع برا ولا عاد أشوف وجهك هنا فالموقع .. وقدم شكوى فالمحكمة في شكوى تكون مستعجله تطالب فيها بغرامة تاخير وبعض المستحقات اللي يكون أخذها واهو لم ينجزها ..

واخذ في نفس الوقت موافقة بإستكمال أعمال البناء مع مقاول آخر وبس

وخله يتمرمط فالمحاكم وانت ريح مخك

[ali22]

وقدم شكوى فالمحكمة في شكوى تكون مستعجله تطالب فيها بغرامة تاخير وبعض المستحقات

مشكور اخوي على النصيحة بس ((دعوة مستعجلة -اثبات حالة))
هي نفسها شكوى مستعجلة ....صيغتها شلون؟؟؟؟
:eek3:

[ali22]

وييييييييييييين اطق براسي

[بوشاهين2]

الله أيعينك .. أخوي شسم الشركة .. عشان غيرك مايتوهق معاه ؟؟

[أسير الاسهم]

مشكور اخوي على النصيحة بس ((دعوة مستعجلة -اثبات حالة))
هي نفسها شكوى مستعجلة ....صيغتها شلون؟؟؟؟
:eek3:


مركز الشرطة تقدم شكوى على المقاول .. والمركز يحولها للمحكمة يمكن .. بالضبط كيف مادري ؟

[قطري قديم]

اخوي انا بارد لك خبر اليوم انشاء الله بس بتاكد وباقولك.

[بن غيث]

طال عمرك ترفع دعوة قضائية عادية وتكتب في صحيفة الدعوى المشكلة وطلباتك
وتتقدم بصفة مستعجلة وتثبت انك متضرر بسبب ايجار بيت و ...
وتحديد جلسة سريعة عشان تطلب من المحكمة مختص يقيم الوضع في الفيلا
واسباب التاخير قبل لا تستكمل باقي اعمال الفيلا
والله يعينك ويصبرك
وخلك بارد ولا تتعصب وكل مشكله ولها حل
وجايز يكون تاخير سكنك في الفيلا لمصلحتك .. سبحان الله

[قطري قديم]

كلام اخوي بن غيث صحيح .

[قطري2012]

اخوي حطلك محامي لان هذا الطريق يبيله محامي شاطر
عط الخباز خبزه لو ياكل نصه وريح بالك
وبعدين اطلب اتعاب المحاماه مع التعويض

[محامية قطر]

أخي في دائرة خاصة بالمحكمة المدنية أسمها دائرة الأمور المستعجلة عادة في مثل هالقضايا يكون فيها التأجيلات كل أسبوعين تقريبا - بالنسبة لدعوتك ترفعها أمام هذه الدائرة وتطلب فيها تعيين خبير لأثبات حالة البناء على وضعه - والمحكمة تعين لك خبير يطلع الموقع ويعاين على الطبيعة البناء - بعدها يتم الحكم في الدعوى بإثبات حالة البناء على ماهو عليه - الغرض من الدعوي فقط أثبات حالة البناء على ماهو عليه - بعد صدور الحكم تقدر تحط لك مقاول ثاني يستكمل البناء وانت ترفع دعوى ثانية اسمها دعوى موضوعيه أمام المحكمة المدنية اللي راح تنظر في موضوع الدعوى وفي هذه الدعوى تقدر تحط كل طلباتك بناء على التقرير الستبق من المحكمة المستعجلة وتقدر أطالبه بجميع المبالغ اللي أستلمها بدون وجهة حق وتطالبة بالتعويض عن فترة التأخير اذا كان العقد بينك وبينه ينص على الغرامية التأخيرية وأي تعويضات ثانية تكون لحقت بك من جراء تأخير أتمام البناء مثل بدل الأيجار - أو حتى تعويضات معنوية
ومثل هالقضايا أنصحك تشوف محامي يصيغ لك موضوع الدعوى ويحدد كافة الخسائر اللي لحقت بك
أخي هذا شرح على عجالة واذا عندك أي أستفسار أنا حاضرة
بالتوفيق

[حسن]

السلام عليكم ورحمة الله وبركاتة
اخواني الاعزاء ارجوا منكم المساعدة والمساندة حيث انني في صدد
رفع دعوة اثبات حالة على المقاول الخاص ببناء فلتي عقدي معاه 12 شهر
تسليم مفتاح ، بتاريخ 25/4/2010 ولحد الحين ماخلص عظم مع ان الدفعات
تنزل اول بول يعني الحين صار له 18 شهر !!! :eek5: اللي ابغيه منكم النصيحة
او اللي يقدر يفيدني شلون نكتب الصيغة ((دعوة مستعجلة -اثبات حالة)) او ينزلها مرفق
والسموحة على الاطالة ......:cry2:

نصيحتي للك لادعوه ولا اثبات حاله سايره لين يخلص ابرك لك اما على المحاكم رد مطولك ياليل

[ali22]

الله جزاكم خير ماقصرتوا ردودكم اتطيب الخاطر
رحت لمكتب محامي وتفقت وياه ان اول مايقرب ويخلص عظم
بعطيه على قفاه وبسطرة بدعوة مستعجلة الله لا يوفقة
وأول مارفع الدعوة بحط لكم اسم الشركة وراعيها عشان محد ينلدغ منه