مطوع ولكن

[SOONALL]

السلام عليكم

والله اليوم سارت لي قصه غريبه شوي حبيت اكتبها لكم

اليوم جاني مطوع الى البيت وتعرفون المطوع لما يجي للبيت الواحد يرحب فيه ويقدره على اساس انه مطوع وطبعا عارفيين المطوعيين كيف اشكالهم الثوب القصير والريحة الطيبه والوجه الطيب ...والله انا فكرت بالبدايه انه من اهل الدعوه او ضيف بالبدايه....
بس القصة تبدا من الحين والله بعد السلام والترحيب(اتفضل ...لا يعطيك العافيه)قال لي ياخي انا محتاج منك طلب قلت له خير انا حاضر قال والله انا ابي 25 ريال.. قلتله خير انشالله ليش ....قال والله السيارة خربانه وماشتغلت ....قلت له تعال معاي بسيارتي وانا معاي اشتراك وانشالله تشتغل... قال لا البطاريه خربانه... قلته انا باجي معاك الى السياره اذا خربانه بعطيك 25 حتى لو 100 ريال ماعندي مانع ..قال لا الاهل معاي بالسياره انا هنا عرفت انه يكذب علي رديت عليه بعصبيه (ليش انا باكلهم ) انا بس بساعدك .....قال لي تبي تعطيني 25 ريال ولا لا ...قلت له لا المهم الرجال راح ... بعد ساعه تقريبا طلعت بالسيارة وشفته عند بيت ثاني وقفت وقلت له انت جاتني عند البيت تذكرني قال صح قلته كيف السياره قال خربانه قلتله خربانه انت متأكد..قلت له خلاص انا بتصل بالشرطه وبنشوف خربانه ولا لا.. قال ياخي انا محتاج وفقير وليش انت كذا تهددني قلتله تعرف ليش لو قلت لي انك محتاج كنت قلت لك تفضل 25 ريال بس تكذب وتقول ان السياره خربانه ...اخواني طبعا انا غلطان في اشياء مثل اني غلط على الرجال او ما عطيته شي بس انا الي زعلني انه الرجال عامل نفسه مطوع......

[مخطط قطري]

شوف 90% من المطاوعه ونعم فيهم والله يثبتهم على طريق الحق بس مع الاسف في نسبه بسيطه منهم ترا تخرب سمعتهم ومب شرط مطوع خلاص نزيهه ومعصوم هو بعد بشر يصيب ويخطي
انا مره جاني مطوع في موضوع المكتب وكانت تصرفاته مادل على انه راعي ورع والتزام ويخاف الله
وصارت مناقشات وسجالات حاده من بيني وبينه على موضوع معين
قلت له دام هشكل كلامك والفاظك وانت تدري انك قدوه ليش مربي اللحيه عيل
تدري شرد على قالي هذي بس حق المعاملات هاللحيه وهو ماسكها يعني يمشي بها اموره
هنيه قلت له الله يعينك على روحك ويكمل عليك نعمه العقل لاني بصراحه حسيت اني اضيع وقتي مع شخص سفيهه
فلاتزعل اذا شفت مطوع مستقبلا وبدر منه تصرف غير طيب لانه مب كلهم سوى

[(الفيصل)]

[center]انا الي زعلني انه الرجال عامل نفسه مطوع......


مركز تحميل (http://www.qzal.net/)http://www.qzal.net/2011-11-1/13222578211.jpg

مطوع ولكن!!!
سلامتك اخوي من الزعل ، والفال نشوفك(مطوع حقيقي) مظهر وجوهر ،ولايغرك الطير بصفة(ت) الريش .

[ذيب ازغوى]

غير ماشوف دورية الفزعه شالته ويجلدونه جلد ولا مارتاااح

[SOONALL]

مشكوريين
...........

[الخفي]

(( العيب في الاشخاص وليس في الدين وهو يسئ لنفسه ولايسئ للدين

ولا يعني ان شخص غير سوي ان كل المطاوعه مثله وفي نفس الوقت مانزكي

احد ومثل مافيه مطوع سئئ هناك حاكم سئ وهناك مسئول سئ وهناك وزير

حرامي وهناك وكيل غير امين في النهايه الاخلاق والخوف من الله هي الفيصل

[ريتويت]

الله المستعان

[فيزيائية]

لا مش مطوع ....ممثل ..مقتبس..عايش الدور
وما أكثر الذين يلبسون ثياب غيرهم فيتصنعون
ولهم اهداف ونوايا بذلك لايعلمها الا الله

[قناص 787]

طال عمرك مهب كل من شفته ملتحي مطوع :weeping:

ترا حتى اليهود ملتحيين يعني في ظنك هم
مطاوعه :sneaky:

[بـــــــنت النوخـّــــذه]

لان يعرفون ان احنا شعوب عاطفيه نتأثر بالمظاهر كثير اذا ملتحي وثوبه قصير خلاص هذا شخص صادق ومايكذب 00

تذكرت شغاله مره كات عندنا اذا شافت حد من اهل البيت مار صوبها اتعلي صوتها تقرى قرآن عشان انقول وعليه يحليلها حافظه القرآن واخرتها الاخت لها حركات وكلها مظاهر خداعه وسفرناها

عموما الله اعلم بحاجته بس تصرفه غلط طبعا"00
ومهب الكل كذلك انهم كذابين لان الظليمه شينه

[بوحارب]

اخوي ماله داعي تجيب طاري المطاوعه ومكرمين عن هالأشكال

المهم انت عليك بالجوهر ولا تهتم بالمنظر

ومحشومين المشايخ كلهم شيبان وشباب :)

[intesar]

مو كل من حط له لحية وطولها يكون مطوع.. فيه ناس تحطها عن عادات وتقاليد.. ومنهم للخديعة..

[القحطاني505]

ليس كلّ من ربى اللحية صار مطوع

[ورقــة أمــل]

عادي انا مر علي مطوع بسيارته وانا بسيارتي وبطل الدريشة يكلمني فكرته مضيع الطريج الا يقولي انا جاي من الطايف وو الله لو انج ساعدتيني لا اروح مكة وادعيلج قلت له اساعدك بشنو اخوي الا يقول ابي فلوس ارجع فيها بلادي بترولي مخلص وماعندي شي اكله وع فكره سيارته كامري وكشخته مب كشخة فقيرر لكن شكله مطوع وملتحي قلت له ماعندي خرده في بوكي اذا تبي مساعده كلم احد غيري وسكرت الدريشة الا اشوفه يلف دار مدار المكان يدور له احد ثاني.....

لا يغرك الشكل ومب كل من ربى لحية وقصر الثوب يعني مطوع ...

[قوت القلوب]

اخوي ماله داعي تجيب طاري المطاوعه ومكرمين عن هالأشكال

المهم انت عليك بالجوهر ولا تهتم بالمنظر

ومحشومين المشايخ كلهم شيبان وشباب :)

ماعليك زود وبيض الله وجهك

[NOOUR]

والله يا جماعة القصة مو قصة مطاوعة ...

الحين في قطر كتير منتشرة ظاهرة التسول والشحادة ،،، وأنا صار معي كتير حالات تشحد
وبالأخص من السعودية معه كروزر ولا سيارة فخمة ويشحد وما يستحي على وجهه

أنا أشوف إنو نبهدلهم ونطردهم لأنو أغلبهم نصاااااااااااااااابين وحرامية ويتسترو باسم الدين

[وطن]

اخوي غلطتك هددته وما نفذت
كان المفروض تنفذ بدون ما تهدد

عشان نصفي المجتمع من هالأشكال

[بـنـت ڪرز]

يقول 25 ماراح اتأثر واكيد انك بتعطيه

الظاهر انه حاسب حسبته كم يبي يطلّع الـtotal فاليوم وكم بيت هو بيمر ، من جذي قال لك 25 .. يعني وناسه 100 ريال من صفّة 4 بيوت بس في خلال كم دقيقه

[pinky-qtr]

أسلوب جديد للطراره ..

[شبح الصمت]

اخوي تسمح لي بس ليتك ما كتبت مطوع !!

لانه الكلمة ما تنطبق على الشخص الي ذكرته

مربي لحيته مقصر ثوبه !!

مب شرط كل من سوى هالسواه خلاص

المطوع الي احنا نعرفه الرجل صاحب الدين صاحب الخلق صاحب العلم ..

الله يسامحنا ويسامحك

وتعليقي على مثل هالفئات من الناس

اتمنى لو انه محتاج ما يتطلب هالمبلغ لانه شكله مسوي هالامور لغرض في نفسه

ونتمنى يتخذون معاهم اجراء صارم

اللهم لا تؤاخذنا بما فعل السفهاء منا

[SOONALL]

اخواني انا كتبت مطوع بس للتحذير اما المطاوعه على عيني وراسي بس
بس انا اقصد مظهر الرجال لدرجة اني انحرجت منه بس انا حبيت اذكر لكم السالفه بس للتحذير
مع العلم انا ضد اي انسان يغلط على الفقير بس انا زعلت من طريقت تمثله بالدين لغايه الشحاته وطريقة الشحاته عن طريق النصب

[المهاجر2]

ياخوي جزاك الله خير هاي الاشكال لا هم مطاوعه ولا ما يحزنون مجرد فبركه تربية لحيه وتقصير ثوب ومسواك واحنا مشكلتنا نتاثر من المظهر لا ياخوي ما كل واحد ربا له لحيه وثوب قصير قلنا له امام ولا مطوع والغلط ان احنا نلصق التهمه بالمطاوعه كلهم والدليل عنوانك قلت مطوع ولكن هاي ياخوي حرامي سواء بلحيه ولا بدون والشرع ما يجوز لاحد يلعب على المسلمين سواء بلحيه ولا بدونها فغلط نجمع الكل والسلام

[.خالد]

المشكلة فينا احنا اللي نعامل الملتحين بطريقة فيها تقديس ... واذا سووا شي غلط ننصدم ونعمم على كل الملتحين ...