مطلوب واسطة لفتح معبرامصلال علي بخط الشمال اسوة بامصلال محمد

[باحث علم]

غريب أمر الواسطة في بلدي !
واسطة شخصية .. تأتي من شخص واصل أو غني نقول معليه
واسطة قبلية .. تأتي من شخص ينتسب لعائلة مرموقة .. يمشي الحال
واسطة دولية .. ممكن تأتي عن طريق ممارسة ضغوط سياسية أو اقتصادية

بس واسطة فرجان هذي من وين نجيبها يا أشغال !!

العلم : افتتح مؤخرا مدخل منطقة ام صلال محمد والذي يربط بين المنطقة وبين خط الشمال ، وفرح أهالي المنطقة نسأل الله أن يتمم فرحتهم ، ونحن لسبنا بصدد حسدهم على ذلك ، بالعكس نتمنى حتى أن يكون لهم جسر خاص مثل منطقة الخريطيات وزغوى .. عادي يعني :)

القهر : وفي الوقت ذاته كان ولا يزال أهالي منطقة أم صلال علي ( جارة ام صلال محمد ) يطالبون بافتتاح الشارع الرئيسي الخاص بالمنطقة على خط الشمال ، ولكن للأسف رفض طلبهم بحجة أنه (( لايمكن فتح مداخل على خط الشمال )) .. طيب وام صلال محمد؟؟ (( اشششش مو شغلك ))

أصل الحكاية : الأخ الزلمة الطيب اللي عمل تصميم خط الشمال وضع جسور على طريقتين :
الأولى : حسب الواسطة .. بحيث تدخلت قوات واسطية قوية ووضعت الجسور في المواقع التي تروق لتلك الواسطات .

الثانية : طريقة ( عكرة بكره ) بحيث يتم فتح جوجل ارث ، واختيار نقاط عشوائية على خط الشمال تكون هي الجسور الأخرى .

مثلا ، منطقة ام صلال علي وضعوا جسر قبلها ووضعوا جسر بعدها وعند مرورهم أمام هذه المنطقة تجاهلواها تماما .. وفي رواية ( غضموا عيونهم ) فأصبح ليس لهذه المنطقة أي منفذ على خط الشمال اطلاقا ، فالذي يريد أن يدخل أو يخرج من ام صلال علي يجب عليه اختيار أمرين ، إما عن طريق جسر ام صلال محمد الشمالي أو عن طريق جسر ام عبيرية !

يا اخوان .. مطلوب واسطة قوية مثل واسطة هل ام صلال محمد .. رسالة ع الخاص لاهنتوا




رسالة بقالب جميل ولكنها مضمخة بألم وتعب يومي نرجو من أشغال النظر فيها وأن يتقوا الله في العوائل وسكان منطقة أم صلال علي .


- نسخة لعضو المجلس البلدي / أحمد الشيب

[أحاول]

اضم صوتي الى صوتك عندما تريد ان تدخل ام صلال علي لابد ان تصل لام العمد والطريق الموصل من ام صلال محمد غير معبد الا الي بجهة الشرطة وهو خط ضيق والجسر محلك سر ولو شفت شوارع ام صلال محمد تجدها مرصوفة ونظيفة وام صلال علي شوارعها ضيقة والترصيف امام البلدية فقط خط واحد ولا توجد صيدلية ولا جمعية والله المستعان

[qtr1]

االله يعينكم ياباحث علم وفتحت الباب :telephone:وومدري شلون طريقة شغلهم اشغال هل مثل ما قلت عكره بكره ولا غمضو عيونهم اول شي من الاخطاء الي اشوفها واكيد مريتو عليها الا وهي وانت رايح من اشارات المناصير للصناعيه اذا تبي طريق بو سمره حاطين مخرج حق سياره وحده يعني شف كم مليون انصرفت واخرته مخرج ابو 3 متر وبالعكس اذا طالع من دوار الصناعيه بعد مدخل بو 3 متر منين جايبين المهندس مدري شكله مصدق عدد السكان 300 الف قطري:sneaky: لو علينا مو مشكله يسوي مخرج بو مترين ونص عادي خلك من هذا الجسر الي قبل منطقه السيليه يعني ضحو في 3 مناطق لعيون الصناعيه الجديده :weeping:والحوطه الي مسكره الشارع من جهة الشمال طيب سوو جسر ثاني بين 3 مناطق مبيريك والسيليه الجديده وسيليه الجيش الحين الجسر هذا ماله فايده الا الي بيروح الصناعيه الجديده يعني بالعربي الجسر هذا شلون خليتوه قبل هالمناطق الثلاث يعني مهتمين في الشاحنات الي تروح للصناعيه ولا مهتمين في الحوطه الي مسكره نهايه الشارع من الشمال :secret:يطووووول الحديث بس شنقول الله كررررررريم:(

[حسن]

احمد الشيب مسكين حتى بيته ماسلم من الشارع الجديد قصو ويهه خلوه بدون خشم

[فتى الجود]

السلام عليكم

مر على

العميد محمد عبد الرحيم معرفية
رئيس قسم السلامة المرورية

واكتب له اكتاب بموضوعك

ويفضل انك ترسم كروكي حسب فكرتك ومقترحك

وتحت بلكتاب سو نسخة و اكتب نسخة لعضو المجلس البلدي

واذا ماقدرت تتواصل معاهم او تدخل عليهم

طرشها لهم بالبريد الممتاز

العميد +
عضو المجلس البلدي اللى المفروض من الواجبه انه يحل مشاكل دائرتة:sneaky:

[فتى الجود]

السلام علييكم
يارجال خط الشمال وخصوصاً عند اللولو كلها غلط بغلط

حاطين زرع !!!


انزين ليش!!!!!!!!!!!!!!!!!!!!!
انزين اشلون العمال يرحون هالزرع

ولا احسبوا احساب للعمال ( الزراعيين )

او جسر للمشاة

ما أظنتى ان المصصمين مهندسيين ؟؟؟؟

[بوحارب]

يارجال اصلا خط الشمال الجديد ظلم الكثير من المناطق وحرم بعض المناطق من مداخل خاصة

مثل الدحيل والخيسة وفريج المنانعة والمسلم وازغوى

الصراحة لازم يسوون مدخل لكل فريج ومنطقة عشان يخف الضغط شوي

ولو تلاحظ الحين تلاقي الزحمة زادت في مداخل المناطق الحالية وجسر الخريطيات خير دليل والأشارات الفاشلة تشهد !!

[.خالد]

اؤيد كلام صاحب الموضوع ، اهل ام صلال علي لازم ياخذون جسر الصخامة ويرجعون عشان يدخلون فريجهم واذا بيطلعون مالهم الا مخرج واحد ، ودبر نفسك ..

[فديت الدوحة]

لا تستعجلون يا جماعة الخير

لان خط الشمال تنفتح فيه المداخل بالتدريج

ولو لاحظتوا فمدخل ام صلال محمد ما يفتح مباشرة على خط الشمال انما يدخل في الشارع الفرعي الموصل للجسر ومن بعدها تخرج السيارات لخط الشمال
ثانيا الي في ام صلال علي مب مضطرين للتوجه للجسر للخروج من المنطقة
اعتقد المنفذ ما زال موجود
واتوقع بعد استكمال الجسر راح يصير المخرج من المنطقة مشابة لمخرج ام صلال محمد



اما بخصوص العيوب فالحديث عنها ذو مجووون خالي من الشجون
لكن بالمقارنة بالوضع السابق
فالحمد لله على النعمة
دمتم بخير

[R 7 A L]

لو افتحوا امام كل منطقة جسر او معبر او كبري ماصار طريق سريع
راح تكثر الحوادث
بعيدن كم تبعد ام صلال علي ان ام صلال محمد ؟

[درع الوطن]

لو افتحوا امام كل منطقة جسر او معبر او كبري ماصار طريق سريع
راح تكثر الحوادث
بعيدن كم تبعد ام صلال علي ان ام صلال محمد ؟

من المفروض يستفيد من الطريق السريع .. مش مفروض سكان هالمناطق؟..
وبعدين ليش تكثر الحوادث طالما فيه تخطيط سليم .. مثله مثل كل الطرق السريعه ..مداخل ومخارج .. ولا الدعوه مثل عين عذاري .. ولا مثل ماقيل .. ظميان وقدامه الماي .. بس مايقدر يوصل

بس اللي عايش في هالمناطق هو اللي يحس بالمعاناة ...

الله يكون في عونكم ياأهل أم صلال علي .. وفي عون كل المتضررين ....

[باحث علم]

لو افتحوا امام كل منطقة جسر او معبر او كبري ماصار طريق سريع
راح تكثر الحوادث
بعيدن كم تبعد ام صلال علي ان ام صلال محمد ؟

ياسلام :) نفس وجهة نظر اشغال
طيب تعال نحسبها

اولا : ليش تفتح مخرج خاص لام صلال محمد اذا راح تكثر الحوادث ؟
ثانيا : تبعد ام صلال علي عن ام صلال محمد قريب 7 كيلو
ثالثا : متوسط البيوت الحسابي ، يبغي لسكان ام صلال علي عشان يوصلون خط الشمال قريب 4 كيلو (((( بين مطبات وبيوت وشوارع ضيقة وفرعية ودواعيس ))))\

بلغة الرياضيات
4 كيلو = 5 دقايق
5 دقائق روحة و 5 دقايق رجعة = 10 دقايق
متسوط دخول وخروج الفرد الواحد في المنطقة من والى المنطقة مرتين الى ثلاث مرات في اليوم الواحد يعني خلنا نقول 25 دقيقه تضيع يوميا من الشخص فقط ليخرج او ليدخل منطقته

25 دقيقه في الشهر يعني قريب 13 ساعة في الشهر
في السنة 156 ساعة للشخص الوحد = 6.5 يوم في السنة تضيع من الشخص بسبب هالتصميم الغبي

6.5 للفرد الواحد وعدد سكان ام صلال علي قريب 10.000 شخص
يعني 65000 يوم يضيع من اجمالي عدد سكان المنطقة في العام الواحد

تدري هذا يعني ايش ؟ بلغة الاقتصاد ( الوقت = فلوس )
يعني ساعة الموظف تقريبا 142 ريال لو ضربناها في عدد اجمالي الايام
65000 ضرب 142 = 9230000 ريال قطري تضيع على الدولة سنويا بسبب هالتصميم

هذا كله من الناحية الاقتصادية
اما من الناحية النفسية فالامر اصعب واكبر

لكن اللي يده في الماي مهب مثل اللي يده بالنار
وللاسف ان فيه ناس همهم بس خلص شغلك وفكنا


يا اشغال اذا همكم ومطلبكم وشعاركم فعلا راحة المواطن هذا احنا مش مرتاحين .. تصرفوا

[wadha-qa]

ممكن تسوي كتاب لادارة تخطيط النقل و البنيه التحتيه في التخطيط العمراني و بعد ما يتم تصميم المقترح هم يطرشونه لاشغال

[باحث علم]

اضم صوتي الى صوتك عندما تريد ان تدخل ام صلال علي لابد ان تصل لام العمد والطريق الموصل من ام صلال محمد غير معبد الا الي بجهة الشرطة وهو خط ضيق والجسر محلك سر ولو شفت شوارع ام صلال محمد تجدها مرصوفة ونظيفة وام صلال علي شوارعها ضيقة والترصيف امام البلدية فقط خط واحد ولا توجد صيدلية ولا جمعية والله المستعان

لو نبي نتكلم عن رصف الشوارع وغيرها من التقصير بيطول الكلام
لكن في هالموضوع نبغي نركز على المدخل فقط لانه معاناه حقيقيه ويومية
الله المستعان
وياليت كل سكان المنطقة يتكلمون ويطالبون في هالشي ويوصلون صوتهم للمسؤولين

[بروكن برايس]

معاك حق أخوي في الكلام اللي ذكرته .. وصراحه معاناه بالنسبه لنا .. بس اللي سمعته يقولون راح يتم اعادة فتح لفة سوبرماركت الوسيل واللفه اللي كانت عند الكراج صوب مجسم الدله .. وراح يكون الطريق داخلي طريق خدمات ومكان هاللفات راح تكون دوارات صغيره .. وهالطريق الداخلي راح يكون موازي لخط الشمال .. ومخرج هالطريق كله من صوب جسر المرزوعه اللي عقب مركز الشرطة وانت متجه للدوحة .. هذا بالنسبة للي طالعين من أم صلال علي للدوحة .. وتبقى المشكلة مشكلة الدخول لام اصلال علي للي جاي من الشمال .. لكن اللي جاي من الدوحة اعتقد قدامه مخرج جسر المزروعه اللي للحين شغالين عليه وراح يتم ربط المخرج مع الطريق الداخلي اللي تكلمت عنه من اشوي واللي مايندرى متى راح يبلشون فيه :weeping:

بالنسبة حق لفة ام صلال محمد الجديدة اعتقد السبب في وجود المحلات التجارية خصوصا المجمع التجاري اللي شغالين عليه حاليا مول برزان ولتخفيف الضغط على جسر الخريطيات لان كل اللي طالعين من ام صلال محمد مجبورين على جسر الخريطيات لكن الحين الامور طيبة والضغط ماعاد مثل الأول .. ويشكرون على هالشغل اللي مسوينه .. وتخفيف الازدحام في هالمنطقة ...

[باحث علم]

معاك حق أخوي في الكلام اللي ذكرته .. وصراحه معاناه بالنسبه لنا .. بس اللي سمعته يقولون راح يتم اعادة فتح لفة سوبرماركت الوسيل واللفه اللي كانت عند الكراج صوب مجسم الدله .. وراح يكون الطريق داخلي طريق خدمات ومكان هاللفات راح تكون دوارات صغيره .. وهالطريق الداخلي راح يكون موازي لخط الشمال .. ومخرج هالطريق كله من صوب جسر المرزوعه اللي عقب مركز الشرطة وانت متجه للدوحة .. هذا بالنسبة للي طالعين من أم صلال علي للدوحة .. وتبقى المشكلة مشكلة الدخول لام اصلال علي للي جاي من الشمال .. لكن اللي جاي من الدوحة اعتقد قدامه مخرج جسر المزروعه اللي للحين شغالين عليه وراح يتم ربط المخرج مع الطريق الداخلي اللي تكلمت عنه من اشوي واللي مايندرى متى راح يبلشون فيه :weeping:

بالنسبة حق لفة ام صلال محمد الجديدة اعتقد السبب في وجود المحلات التجارية خصوصا المجمع التجاري اللي شغالين عليه حاليا مول برزان ولتخفيف الضغط على جسر الخريطيات لان كل اللي طالعين من ام صلال محمد مجبورين على جسر الخريطيات لكن الحين الامور طيبة والضغط ماعاد مثل الأول .. ويشكرون على هالشغل اللي مسوينه .. وتخفيف الازدحام في هالمنطقة ...

اخوي الشارع اللي تتكلم عنه ( الداخلي الفرعي ) هذا بيسبب ازمة اصلا
لانه يمر بجنب خط الشمال بالضبط ولكن يفتر فيك ويبعدك عن خط الشمال قريب 2 كيلو
وعقب يردك الى اول جسر المزروعه من صوب الغرب عند دوار صغير وعقب تركب الجسر
يعني نظام وين اذنك ياحبشي
الشغله الثانية اذا هو سالفة محلات ففي ام صلال علي ايضا محلات + مبنى بلدية ام صلال + سوق الوسيل + حديقة كبيرة للعائلات .. يعني فيها منشآت مهمة للغاية والمفروض مايتم تجاهلها ويدخلون الناس للشوارع الضيقه وقدام البيوت ((((( هني بتصير صج حوادث دهس للاطفال ))) وزحمة سيارات وزيادة مطبات

والحل في منتهى السهولة ... مجرد فتحة على خط الشمال تحل كل المشاكل ياخي

[باحث علم]

االله يعينكم ياباحث علم وفتحت الباب :telephone:وومدري شلون طريقة شغلهم اشغال هل مثل ما قلت عكره بكره ولا غمضو عيونهم اول شي من الاخطاء الي اشوفها واكيد مريتو عليها الا وهي وانت رايح من اشارات المناصير للصناعيه اذا تبي طريق بو سمره حاطين مخرج حق سياره وحده يعني شف كم مليون انصرفت واخرته مخرج ابو 3 متر وبالعكس اذا طالع من دوار الصناعيه بعد مدخل بو 3 متر منين جايبين المهندس مدري شكله مصدق عدد السكان 300 الف قطري:sneaky: لو علينا مو مشكله يسوي مخرج بو مترين ونص عادي خلك من هذا الجسر الي قبل منطقه السيليه يعني ضحو في 3 مناطق لعيون الصناعيه الجديده :weeping:والحوطه الي مسكره الشارع من جهة الشمال طيب سوو جسر ثاني بين 3 مناطق مبيريك والسيليه الجديده وسيليه الجيش الحين الجسر هذا ماله فايده الا الي بيروح الصناعيه الجديده يعني بالعربي الجسر هذا شلون خليتوه قبل هالمناطق الثلاث يعني مهتمين في الشاحنات الي تروح للصناعيه ولا مهتمين في الحوطه الي مسكره نهايه الشارع من الشمال :secret:يطووووول الحديث بس شنقول الله كررررررريم:(

الله المستعان وحسبنا الله على من كان السبب

[باحث علم]

احمد الشيب مسكين حتى بيته ماسلم من الشارع الجديد قصو ويهه خلوه بدون خشم

الاخ عبدالمعين مب طالبين منه شيء غير انه يراوينا انه فعلا قاعد يشتغل لمواضيع المنطقة
قضية نجاحه او فشله في ايجاد حل هذي موضوع ثاني
لكن اقلها نبغي نشوفه يشتغل ويتكلم في الموضوع وجزاه الله خير