اشتريت iPad 2 - 3G .. ما الافضل كيوتل أم فودافون ؟

[asulaiti]

الإخوة الكرام ..

اشتريت iPad 2 - 3G .. وأبغي الحين اشتري كرت له ..

ما الأفضل من حيث الخدمة والسرعة في شبكة 3G بالنسبة لهذه الأجهزة ..

( كيوتل ) أو ( فودافون )

أكثر المناطق التي سوف أستخدم فيها الانترنت الغرافة والمنتزه ..
وطبعاً باقي مناطق الدوحة .. لكن الأهم المنطقتين المذكورتين أعلاه ..

واللي عنده خبرة ياليت يفيدنا بأنواع الخدمات المتوفرة بالشركتين وأفضلها إذا قام بتجربتهم ..

هل الاشتراك الشهري أفضل ؟
أم بطاقة المسبقة الدفع ؟

والشكر مقدماً للجميع ..

[asulaiti]

لا إله إلا الله

[Khaled Qatar]

كيوتل ، خذلك كرت هلا ولازم تعبيه اظن في الاسبوع 20 ريال ل 250 mb

فودافون تعيس مافي ارسال

واذا عندك اي فون تقدر تشبك الاي باد عن طريق نت الاي فون

[بوعلي2]

فودافون تعبيه ب ١٠٠ ريال يعطيك ١gb
او ٢٠٠ ريال يعطيك ٤ gb
وسريع
خذ كرت تعبئه ومدته كل شهر تعبيه نت يا بو ١٠٠ او بو ٢٠٠ انت ادرى بحجم الميجابايت يعني اماكن التصفح
انا عن نفسي يكفيني ١٠٠ ووايد بعد علي
وشكرا

[asulaiti]

اخواني Khaled Qatar و بوعلي2 .. الله يجزيكم خير ..

بس ياليت تفيدونا وين تستخدمون الآيباد .. في أي منطقة ؟؟

لأن الموضوع تغطية كيوتل وفودافون تتباين في الأفضلية من منطقة لأخرى ..

[asulaiti]

باقي الأعضاء يا ليت يشاركونا برآئهم وتجاربهم ..

غداً إن شاء الله يجب أن أقرر واشتري .. يا من كيوتل أو من فودافون ..

[asulaiti]

للرفع ....

[QTR SHOOTER]

عيب كيوتل اذا كرت ان له تاريخ محدد وينتهي الرصيد سواء استخدمته ولا لا!!

[asulaiti]

اعتقد حتى فودافون نفس الشيء ...

أو بالأحرى .. كل شركات الاتصال في العالم تتبع هذه السياسة ..

[QTR SHOOTER]

بس كيوتل الفترة قصيرة الصراحة مقارنة بفودافون مثل ما سمعت

[السهم الحلال]

في كل المناطق شبكة كيوتل أفضل حسب علمي

بالنسبة للاشتراك في كيوتل عندهم اشتراك شهري ب 100 ريال وتحصل على 2 جيجا شهريا
ومع العقد السنوي ب 80 ريال

[بن غيث]

كيوتل في الدفنة 0%
خصوصا منطقة الابراج
فودا افضل في هذه المنطقة فقط

[تحداني]

كيوتل يا اخوي مافي مجال للمقارنه ابدا حتى لو فودافون عندها عروض
بالنهايه العميل يبحث عن الجوده ..



جملك الله رضاه

[asulaiti]

قريباً .. سأتخذ قراري .. واخبركم من .. والاسباب ..

ارجو ممن لديه اضافة أن يشاركنا لتعم الفائدة ..

[QTR SHOOTER]

في الانتظار

[@سنافية قطر@]

موفق أخوي بالقرار المناسب ومبروك عليك الآيباد 2

اسمح لي استفيد من خبرتك ومن خبرة الإخوان لو حبوا يساعدوني لأني طرحت موضوع عن الآيباد بس محد رد علي إلا وحدة من الخوات مشكورة وهذا رابط سؤالي

http://www.qatarshares.com/vb/showthread.php?t=485802

المشكلة ما أعرف ايش الفرق بين آيباد 2 وآيباد 2 3G
لو تشرح لي أكون شاكرة وبغيات اعرف منهو الوكيل عندنا للآيباد 2 في قطر وكم سعره لل64 جيجا

انا لقيت آيباد 2 مواصفاته:

64 غيغا +واي فاي+3 G +حقيبة+ واقي الشاشة بسعر 2999 ريال
أيش رايك فيه وهل سعره زين وإلا غالي؟ وهل لازم أشتري له كرت هلا من كيوتل؟ وأيش فايدته؟ مب هو بيشتغل وايرلس؟ وبعدين كم لازم ادفع شهريا حق كيوتل على هالحال؟

مشكور أخوي واسمح لي على الأزعاج

[asulaiti]

أخذت اشتراك كيوتل للآيباد .. والسبب الرئيسي تنوع العروض لديهم .. بينما فودافون عرض واحد فقط ..

أما بالنسبة لمستوى الخدمة .. فمن خلال سؤالي واتصالاتي مع الربع هنا وهناك .. الأثنين سواء في مستوى الخدمة ..
لذا كانت كيوتل أفضل لي في الوقت الراهن بسبب العروض المختلفة ..

وسأحاول وضع شرح وتقيمي لخدمة كيوتل .. لكن بعد تجربة الخدمة لمدة كافية حتى أقيم المستوى ..

[البحار00]

أخذت اشتراك كيوتل للآيباد .. والسبب الرئيسي تنوع العروض لديهم .. بينما فودافون عرض واحد فقط ..

أما بالنسبة لمستوى الخدمة .. فمن خلال سؤالي واتصالاتي مع الربع هنا وهناك .. الأثنين سواء في مستوى الخدمة ..
لذا كانت كيوتل أفضل لي في الوقت الراهن بسبب العروض المختلفة ..

وسأحاول وضع شرح وتقيمي لخدمة كيوتل .. لكن بعد تجربة الخدمة لمدة كافية حتى أقيم المستوى ..

بس ياليت اخوي تقولنا عن اسعارهم وعروضهم لاشتراك الايباد

[asulaiti]

المشكلة ما أعرف ايش الفرق بين آيباد 2 وآيباد 2 3G
لو تشرح لي أكون شاكرة
iPad 2 العادي تستطيعين تصفح الإنترنت والإيميل ولكن من خلال اتصال وايرليس للإنترنت
في البيت أو العمل أو الكوفي شوب .. لكن لو كنت في مكان لايوجد فيه انترنت وايرليس ..
ماتقدرين تشوفين الانترنت أو الايميل .. ويطلق عليه عادة iPad 2 Wifi ..

أما iPad 2 3G .. نفس الآيباد العادي .. من حيث القوة والأداء .. وتصفح الانترنت ..
لكن زيادة عليه تقدرين تشوفين الانترنت في أي مكان طالما توفر الانترنت الوايرليس .. أو ارسال
جيد لشبكة 3G من مقدم الخدمة .. سواء كيوتل أو فودافون .. وتشوفين الانترنت من أي مكان ..
وطبعاً برسوم شهرية .. أو عن طريق تعبئة الرصيد مثلا كروت هلا من كيوتل ..

بالضبط مثل لو كان عندك بلاك بيري أو آيفون .. تقدرين تشوفين الروابط المرسلة حتى وأنت خارج المنزل .. أو في السوق .. في العمل
أي مكان .. وذلك بسبب توفر شبكة 3G في معظم مناطق الدوحة .. الآيباد نفس الشئ .. لأنــك راح تركبين شريحة تلفون فيه ..
وطبعاً مش لغرض الاتصال كتلفون .. بل تصفح انترنت فقط .. وطبعاً راح تكسبين ميزة في الآيباد وهو كبر الشاشة مقارنة
بشاشات الهواتف أو الآيفون ..



وبغيات اعرف منهو الوكيل عندنا للآيباد 2 في قطر
مو مهم من الوكيل .. لأن إلى الآن مانزل بشكل رسمي واضح في المنطقة العربية .. أو يمكن نزل الآن لكن مافي ورشة صيانة يعتمد عليه ..
لكن الآيباد من مميزاته إنه ضمانه دولي .. يعني أول ماتشترين الجهاز وتسجلين عند أبل كمستخدمة لهذا الجهاز ..
راح يبدأ العداد يشتغل ويحسب لك لمدة سنة .. خلال هذه السنة لو صار عليه شيء .. اخترب .. روحي لأقرب موزع لأجهزة أبل وهم يصلحونه
اذا مسألة سوفتوير .. وإذا هاردوير .. راح يرسلونه لدبي على ما اعتقد عند الوكيل الرسمي هناك ويصلحونه لك مجاناً ..
واذا عدى ضمانه راح تدفعين قيمة التصليح ..
يمكن الموزع يرفض يصلح على أساس إنه ماشريتيه من عنده .. أو مانزل رسمي بعد .. الخ
اتصل لي على الوكيل في دبي .. واذا ما انحلت المشكلة .. إيميل لشركة أبل ... وامورك راح تمشي ..

اذكر مرة طلبت تبديل كيبورد لجهازي الماك من عند الموزع المحلي ..
وكنت شاريه من امريكا .. ورفض الموزع المحلي يجيب لي كيبورد عربي .. لأني ماشريته من عنده !!
ارسلت ايميل شكوى لأبل الأم في امريكا .. وهم حولي رسالتي إلى الوكيل في دبي الذي اتصل
بي هاتفياً يعتذر .. وارسل لي الكيبورد بعد ما دفعت قيمته لهم عن طريق حواله ...




انا لقيت آيباد 2 مواصفاته:

64 غيغا +واي فاي+3 G +حقيبة+ واقي الشاشة بسعر 2999 ريال
أيش رايك فيه وهل سعره زين وإلا غالي؟
سعره وايد ممتاز .. أرخص من أمريكا !!
وين لقيتيه ؟
وهل هو iPad 2 أو iPad 1 ؟؟
لازم تتأكدين .. لأني أشك بهذا السعر ..




وهل لازم أشتري له كرت هلا من كيوتل؟ وأيش فايدته؟ مب هو بيشتغل وايرلس؟ وبعدين كم لازم ادفع شهريا حق كيوتل على هالحال؟
انت واختيارك .. كيوتل أو فودافون .. أنا اخترت كيوتل علشان العروض وايد عندهم .. ومغرية .. لكن ما اعرف هل مستوى الخدمة احسن من فودافون أو لا ؟؟
فودافون ماعندهم إلا عرض واحد فقط .. وهو 200 ريال شهرياَ أو تعبئة كل مرة ولكن كذلك بقيمة 200 ريال ..
كيوتل في بـ 100 و 200 و 400 .. وفي بعد تعبئة مثل هلا .. لكن أغلى والمدة ثلاثة ايام أو عشرة ايام ..
فوجدت أن كيوتل افضل لي من فودافون .. في الوقت الراهن على الاقل ..

بالتوفيق ..

[@سنافية قطر@]

ipad 2


سعره وايد ممتاز .. أرخص من أمريكا !!
وين لقيتيه ؟
وهل هو ipad 2 أو ipad 1 ؟؟
لازم تتأكدين .. لأني أشك بهذا السعر ..




..


يعطيك ألف عافية أخوي ..بارك الله فيك والله يعطيك ألف عافية ..كفيت ووفيت..

أشكر لك شرحك ووضوح وصفك ..والله يجعله في ميزان حسناتك..

بالنسبة للسعر أخوي هذا عرض على الأيباد 2 في اللولو هايبر ماركت بعد شوي بمر عليهم وباشوف العرض وباتاكد وبارد لك خبر..

تسلم اخوي ومبروك عليك الآيباد 2

[@سنافية قطر@]

هلا أخوي

رحت اليوم اللولو وسألت عن اليباد

طلع فعلا آيباد 2 مش 1

64 غيغا واي فاي 3 جي اللون متوفر أبيض وأسود

ب 2999 ريال

بس ما اخذته لأني ترددت يوم سألته عن الضمان قال ماعليه ضمان وقلت له وين صناعته قال لي صيني :discuss:

قلت خلني أشوف رايك وراي الخوان قبل ما اتسرع خاصة ان الجماعة في هالقسم يقولون في أجهزة لوحية متقدمة جدا بتنزل خلال 4-5 شهور وانا مش محتاجة الآيباد 2 جدا..

أيش رايكم يا جماعة الخير؟

[asulaiti]

مسألة الضمان تكلمت عنها في مشاركتي السابقة .. واذا كنت تهتمين بضمان بشكل كبير ..
انصحك بشراء بطاقة iPad AppleCare .. بسعر 70 دولار يعطيك ضمان لمدة (( سنتين )) تصلحين
الآيباد في أي مكان في العالم .. في الدوحة .. في الخليج .. أو حتى في أوروبا ..
وبذلك تضمنين حقك وتتجنبين تكلفة التصليح لو تعطل الآيباد ..
بس لازم يكون عندك عنوان في أمريكا .. وتقدرين على ذلك من خلال شركة آرامكس ..

رابط تمديد الضمان:
http://www.amazon.com/AppleCare-Protection-Plan-NEWEST-VERSION/dp/B0044SVD50/ref=sr_1_1?ie=UTF8&qid=1323063742&sr=8-1


الآيباد صناعته صيني المقصود من ذلك أنه منتج أبل وصنع في الصين .. معظم منتجات أبل تصنع في الصين
لضمان تسويقه بسعر منخفض حيث تكاليف صناعته هناك تساعد في تخفيض سعره ..
لكن لا تقلقي .. فهو بجودة عاليه وليس التقليد .. فقط تأكدي من وجود علامة أبل (التفاحة) على الكرتون ..

والسعر اللي حصلتيه ممتاز .. توكلي على الله .. ولاتنتظري الآيباد الجديد .. لأنه سيعلن عنه في مارس القادم ..
والإعلان سيكون فقط عن مواصفاته والزيادات .. لكن ما راح ينزل السوق إلا بعد كم شهر من الإعلان ..
وأول ما ينزل يبغيله بعد شهرين او شهر ونص لين ينزل في الخليج .. واول ماينزل في الخليج راح يكون سعره قريب
5000 ريال !!

يعني قصة طويلة .. اخذي الحالي واستفيدي منه .. وعقب سنة او سنتين .. بيعيه او اهديه لاي واحد من العيال وخذي الجديد ..

بالتوفيق ..

[@سنافية قطر@]

روح ياخوي ياعلك موفق وين ما عطيت ويهك..:omen2: آميييين

والله كلامك درر وريحني وخلصني من الحيرة اللي أنا فيها ..

بس مشورة أخيرة:
Tthe i pad case
عندهم بس أسود أو برتقالي والآيباد عندهم لونين في أسود وفي أبيض !!!

أي لون تنصحني آخذ آيباد أبيض أو أسود؟

أنا خاطري في الأبيض بس قلت مع التلبيسة اللي عندهم الأسود بيطلع احلى وعشان ما يتوصخ من العباية بعد خبرك العبايات لعوزت كل شئ جلد لونه مش أسود :anger1:

ثانيا:

لمل اشتري الآيباد لازم اوديه محل كمبيوترات يبرمجه وينزل عليه شئ يقولون عنه جليبريك وآيتونز وما أدري شنو؟

إذا الإجابة بأي فأي محل تنصحني فيه قريب من الغرافة؟

تسلم ياخوي وارحم الله والديك والله يبارك لك يلرب في عمرك وصحتك

[asulaiti]

بس مشورة أخيرة:
Tthe i pad case
عندهم بس أسود أو برتقالي والآيباد عندهم لونين في أسود وفي أبيض !!!

أي لون تنصحني آخذ آيباد أبيض أو أسود؟

أنا خاطري في الأبيض بس قلت مع التلبيسة اللي عندهم الأسود بيطلع احلى وعشان ما يتوصخ من العباية بعد خبرك العبايات لعوزت كل شئ جلد لونه مش أسود :anger1:

الأبيض شكله أحلى من الأسود .. فكان اختياري على طول .. أما موضوع التلبيسه فخيارات السوق كثيرة ..
مو شرط تشترين من عندهم case .. عندك اللاندمارك .. محلات الهواتف في سوق الغرافة ..الخ



لمل اشتري الآيباد لازم اوديه محل كمبيوترات يبرمجه وينزل عليه شئ يقولون عنه جليبريك وآيتونز وما أدري شنو؟

هذه النقطة اللي ابغي انصح فيها كل واحد .. ويجب الانتباه لهذه المسألة ..
بعض اللي اعرفهم وعندهم آيباد .. قاموا بعمل اعدادات الايباد في محلات الهواتف مقابل مبلغ مالي ..
والمحل منزل لهم البرامج اللي على كيفه .. والألعاب ذات الشعبية عند الجمهور ... الخ
لكن الآيباد صار مسجل بإسمه أو بإسم المحل .. ومسجل ايميل المحل أو ايميل المبرمج ..
وفي الأخير المستخدم ما يقدر يضيف برامج أو يحدث الآيباد إلا عن طريق نفس المحل !!

ومسألة إعدادات الآيباد والله سهلة ومو محتاجه روحه للمحل ودفع فلوس زيادة .... الخ

دوري في النت على طريقة إعدادات الآيباد وستجدين أن المسألة سهلة ..
واذا خايفه تسوين الاعدادات بنفسك شوفي لك وحده عندها خبرة شوي في طريقة الاعدادات
وتعلمي معاها .. وبعدين راح تتفاجئين من سهولة الإعدادات ...

واذا احتديتي على محل علشان يسوي لك الإعدادات .. خليه يسوي لك الاعدادات امامك طالما انك راح تدفعين مبلغ له ..
وجيبي معاك لابتوبك الشخصي .. لأن اذا كان الايباد 2 من الدفعات الأولى .. يحتاج يشبك الآيباد في كمبيوتر ويسوي له الاعدادات المطلوبه ..
لأن اذا شبك الجهاز بكمبيوتر المحل .. فما استفدنا شيء من روحتنا للمحل .. لان الايباد راح يربط نفسه بذلك الجهاز
ولن يقبل أي نسخ احتياطي لبرامجنا وملفاتنا وغيرها إلا عند طريق نفس الكمبيوتر اللي تم عمل اعدادته به ..

أما اذا كان الآيباد من الدفعات الحديثة .. فيمكن عمل الاعدادات بدون كمبيوتر لأنه جاي مع السوفتوير الجديد iOS5 ..
وبعدين نقوم بعمل نسخ احتياطي له ولملفاتنا عن طريق كمبيوتراتنا الشخصية ..

وقولي للمحل يعمل لك اعدادات لمستخدم جديد (مو يحط اسم مستخدم هو مخصص حق الكل !! كل ما جاله واحد علشان يبرمج له الايباد ..
كلكين بالماوس والباقي البرنامج يشتغل مع الآيباد .. وآخرتها نص الايباد اللي في الدوحة بنفس الاسم !!)
واكتبي له ايميلك على ورقة خارجية واطلبي منه انه يضع ايميلك انت .. او اطلبي منه انك انت ستكتبين الايميل بنفسك عندما يطلب منك الايباد ذلك أثناء وضع الاعدادات ..
وحاولي عند كتابة الباسوورد في المحل .. انه يكون سهل جداً .. 1234 .. 1111 .. لأنك تقدرين تغيرينه على طول لما يتم الانتهاء من اعدادات في الايباد ..

بالتوفيق ..

[@سنافية قطر@]

هلا أخوي الفاضل

تسلم على ردك وتجاوبك معاي في استفساراتي

أبشرك اليوم عقب الدوام الظهر رحت شريت الآيباد 2 واي فاي 3 جي 64 غيغا مع حماية شاشة وتلبيسة للآيباد ب 3000 ريال

واشتريت سيم كارت من كيوتل ب 100 ريال اشتراك و50 ريال ثمن الشريحة وللأسف ما شفت ردك إلا الحين وانا تركته عنده في المحل ينزل لي الألعاب حق اليهال وبرنامج الآيتونز والسوفت وير بروجرامز بس وصيناه ما يحط باس وورد عشان آيبود بنتي غربلها أخبر لن المحل حاط باسوورده وما قدرت تنزل العاب جديدة ولازم كل شوي نروح المحل...

وقلنا له نزل جيليبرك عشان ننزل ألعاب جديدة وبرامج مجانية من ابل ستورفور فري ..قال لا ما لازم جيليبريك ما تحتاجينه هاي نسخة .........ما تحتاج جليبريك سيدا نزل من النت اللي تبيه طبعا بصعوبة أفهم كلام النيبالي بالأنجليزي بس أظنه يقصد أنه أصدار حديث من الأجهزة وما يحتاج تنزيل جليبريك..

على العموم المغرب باروح آخذ الجهاز وباشوف شو السالفة..

مشكور اخوي والله يجزيك كل خير..

[asulaiti]

مبروك عليك الجهاز ..

حتى لو قام المحل ببرمجته .. تقدرين تحويل الاسم لإيميلك ..
شرط أن لا يكون قام بتسجيله في موقع أبل .. فقط اشبكيه على جهازك وسوي
الاعدادات المطلوبة .. لكن راح تمسح كل البرامج والشغل اللي سواه لك المحل ..
وبعدين سوي تسجيل في موقع أبل ..

بالتوفيق ..