نصيحة بخصوص أبواب الخشب

[ahmed jasim]

عملت بلاستر والبيت جاهز لتركيب الأبواب الخشبية للغرف (سمى سولد تيك)
عند تركيب الأبواب لاحظت 2-4 سم فراغ بين فريم الباب والبلاستر
الباب مثبت بمسامير فى البلاستر بس فى فراغ وهو مغطى بإطار البرواز
طلبت من النجار يحط فوم يملى الفراغ قال ماله داعي وبأعطيك ضمان 10 سنين

هل طريقة التركيب صح
شنهو السلبيات لوجود الفراغ بين الفريم والبلاستر


أنتظر خبرتكم وجزاكم الله خير مقدما

[Almossafer]

هلا اخوي

احنا واجهتنا نفس المشكله

اذا قصدك فريم الباب اللي بالطوفه

فهذا يغتبر خطا مثل ماحدث عندنا وكان الخطا بان الفريم مش قياس الاطار نفسه وكان هناك 4 سم بين الفريم والبلاستر

الصحيح اا ذا كان 1سم مايبين اما اذا كان 4 سم فهذا يعتبر خطا بالتركيب


ارجو اني افدتك اخوي

[ahmed jasim]

مرحبا أخوي Almossafer
نعم فريم الباب اللي بالطوفه
المشكلة الأساسية من البلاستر مو مضبوط عدل
يعنى فتحة الباب تقريبا متوازى الأضلاع بدل مستطيل
وشكله النجار عمل الفريم على أقصر عرض بين الطوفتين
ولذلك طلع الفراغ 1 سم من جهة و4 سم من جهة

[Almossafer]

هلا اخوي

اعتقد حتى لو كان هناك خطا بالبلستر ع اللي يعمل الابواب

يضيف خشب ع الجهه اللي واضحه اللي ب 4 سم ويصبغ لك اياه علشان مايبين الفراغ

انشاءالله وضحت لك الصوره

[ahmed jasim]

تسلم أخوي Almossafer
يعنى فوم أو صجاجة خشب لملأ الفراغ كافي
يزاك الله خير

[Almossafer]

اخوي اول شركه اللي عملت لنا الابواب

شغلهم كله خطا في خطا وهم وضعو فوم لكن بين ع الطرف ان فيه فوم

فيفضل ان يضع لك خشب ع الفراغ ويصبغ لك نفس لون الفريم

ممكن احد يفيدك اكثر مني عنده خبره اكثر

بس لان شفت الشركة الثانيه عملت نفس الطريقه هذي

انشاءالله الرؤيه وضحت عندك

[الســـهم]

مرحبا اخوي ahmed jasim ..

اللي سواه النجار بإنه خذ اصغر مسافة بين الطرفين هو الصح , لان الفريم بتكون قياساته موحده ومستطيل فلابد ياخذ القياس بهذي الطريقه عشان يكون التركيب صح ..

وبالنسبة للفراغات , فاعتقد طبيعي جدا تطلع فروقات بين الطرفين , وبالنسبة للفروقات ماشوفها وايد كبيرة , صارت معاي قبل والحمدلله الابواب ماشاء الله لين اليوم مثل ماهي , كل اللي سواه النجار ان حط خشب بين الفريم والطابوق على اساس يستند عليه الفريم ( حشو ) ، حتى ان الخشب مايحتاج ينصبغ بنفس لون الباب لانه بيكون مخفي , وبعد تثبيت الفريم تتغطى الفراغات كلها بالبرواز اللي المفروض يركب على الفريم ويمتد لين الطوفة على اساس يغطي كل الحشو اللي وراه ويكون ديكور للباب ويبين طبيعي جدا , ولا تحاتي ترى افضل واغلى نجار راح يعمل نفس طريقة النجار اللي اشتغل عندك ..



جعله منزل مبارك وعامر بأهله ..

[ahmed jasim]

أخوي الســـهم

عندى ثقة بالنجار بس حبيت أتأكد وأعالج الموضوع فى وقته
يزاك الله خير وإرحم الله والدينك على النصيحة والدعوة

[eqahtani]

انا اشوف اغلبيه البيوت تحط الفريم قبل البلستر علشان مايكون مسافه فاضيه بين البرواز والطوفه
وبعد ذلك تقدر تفصل الابواب بالمقاس بالضبط

[الســـهم]

انا اشوف اغلبيه البيوت تحط الفريم قبل البلستر علشان مايكون مسافه فاضيه بين البرواز والطوفه
وبعد ذلك تقدر تفصل الابواب بالمقاس بالضبط


مرحبا اخوي eqahtani ..

في ناس للحين ماشية على الطريقة القديمه اللي انت ذكرتها , بس شغل النجارة اليوم تغير عن السابق , اليوم لما تركب الباب بعد البلاط والصبغ افضل بكثير للاسباب التالية :-

1- ان الباب بيجيك مصبوغ وجاهز من الورشة وماعليهم فقط غير التركيب , وهالشي يضمن لك نظافة الشغل من صبغ ونجارة , ويلغي تماما فكرة ان الخشب ينصبغ فالبيت ويوصخ الطوف حوله وفالنهاية فينشننق تعبان ..

2- الباب اذا كان فوق البلاط يعطيك عمر اكبر وخصوصا انه بيكون معزول عن الحشرات والرطوبة الموجودة بالارض ..

3- التركيب بيكون انظف ومثل مايقولون النجارين عالمسطرة , نظرا لانك مفصل الباب وبتركبه نفس ماهو , وماتضطر انك تعدل الباب او تلعب بميزانيته عشان يركب عالفريم الثابت فالطوفة مثل مايصير فالطريقة التقليدية ..


واسمحلي عالمداخلة البسيطة واللي كان الهدف منها توضيح بعض المميزات فالطريقة الحديثة ..