ما حصل لي شخصياً..........ليله امس

[red velvet]

بسم الله الرحمن الرحيم
إخواني أخواتي الأفاضل



انقل لكم ماحصل لي أنا أختكم ريد فيلفت شخصيا من امام مستشفى وعياده الدوحه ليله امس


الموضوع كالتالي


اسمحوا لي لأني بكتب اللي حصل بالعاميه نوعا ما




واللي حصل وانا طالعه من عياده الدوحه
رحت لسيارتي اللي كانت واقفه مقابل الحلويات السويسرية


وتوني بصك الباب الا مره من جنسيه عربيه وعليها العبايه والنقاب وقصيره القامه مسكت الباب قبل اصكره المهم قلت لها نعم الا طلعت لي من بين عبايتها لوحه صغيره او كتيب الشهاده لله ماعرف شنو كان معاها بالضبط بصراحه شي يخوف واحترت شنو اسوي لانه كلش مايمدي اتصل على ألشرطه المهم حست أني بسوي شي


وشردت وتمت تركض والله يااخواني وخواتي أني ماعرف وين اختفت اتوقع دشت بين الدواعيس في شارع النصر




الحذر إخواني وأخواتي ونرجوا من الداخليه أخذ الإجراءات الازمه في هذا الشان لان الوضع بدا يخوف


والله يستر علينا وعليكم ويحفظنا من كل شر يارب



بس هالفئه ش تبي بالضبط



والسموحه لو فيه اخطاء لأني اكتب من الاي باد



تحياتي لكم

[Dawn]

ما فهمت شنهو الشي اللي يخوف في لوحه او كتيب بيد المره اللي شفتيها ؟؟

اتوقع انها طراره .. لانهم يزيدون قدام العيادات والمستشفيات ..

[روح الاطلس]

واما السائل فلا تنهر


وين المشكله لو كانت فقيره فعلا او غنيه ونصابه وعطيتيها ٥٠ ريال مثلا !! لو فقيره بتنفعها ولو غنيه ماراح تضرج ولن ينقص من مالج شيء ولج الاجر ، واعتبريها صدقه بنية ان ربي يشفيج بما انج عند العياده


والاعمال بالنيات اما الفلوس رايحه رايحه

[خليدان]

سبحان الله من شهر تقريباً
كنت في عيادة الدوحه وجتني وحده بنفس المواصفات
وكانت ﻻبسة قفاز

طلبت فلوس لبنتها !! مسويه أشعه إن ماخاب ظني

وبين الكلام افصخت القفاز وعطتني خاتمها تقولي اخذه لين ارد لك الفلوس أو قالت بيعه نسيت والله

بس أنا استغربت !! ليش جايه عياده الدوحه وهي ماعندها التكاليف

ليش ماراحت مستشفى حـمد

[كبير المتداولين]

اكيد محتاجه وتبي تعطيج كتاب وفاه زوجها او كتاب عمليه جراحيه هاي سوالفهم كان كسبتي فيها اجر بغض النظر عن حاجتها

[R 7 A L]

فعلاً مثل ماقالت الاخت روح الاطلس


واما السائل فلا تنهر

[المليونير الفقير]

اي ريال يندفع بنية الصدقه لوجه الله اجر

[شميرام]

بعض الاحيان المحتاجين يعطونهم ورقه مصدقه تثبت انهم محتاجين

[مايبخ]

واما السائل فلا تنهر


وين المشكله لو كانت فقيره فعلا او غنيه ونصابه وعطيتيها ٥٠ ريال مثلا !! لو فقيره بتنفعها ولو غنيه ماراح تضرج ولن ينقص من مالج شيء ولج الاجر ، واعتبريها صدقه بنية ان ربي يشفيج بما انج عند العياده


والاعمال بالنيات اما الفلوس رايحه رايحه


طبعاً لم توفق اخي في ردك
حيث توجد قوانين تجرم هذه الافعال
وتوجد مؤسسات خيريه تنضم الصدقات والتبرعات وحتى الاوقاف
كي تبتعد عن الشبهات
لاننا لانعلم من هم هولاء المتسولين وماهو هدفهم او اين سوف تتجه هذه التبرعات
وهنا الحديث سيطول
تقبل تحياتي

[خليدان]

طبعاً لم توفق اخي في ردك
حيث توجد قوانين تجرم هذه الافعال
وتوجد مؤسسات خيريه تنضم الصدقات والتبرعات وحتى الاوقاف
كي تبتعد عن الشبهات
لاننا لانعلم من هم هولاء المتسولين وماهو هدفهم او اين سوف تتجه هذه التبرعات
وهنا الحديث سيطول
تقبل تحياتي

أهنيـك على ردك :victory:

[الكواري 1972]

كل يوم حكايه جديده

على بالي طلعت مسدس

يعطيك العافيه

[فارس قطر]

هاذولاء طراروة

مكثرهم في سوق الخضرة وعند البنوك يلاحقون الشياب والعجايز

وهما معروفين من جنسيتين وحدة خليجية وثانية شامية

والاكشن كل يوم يتجدد مرة مريض ومرة بيسافر ومرة بترول سيارة .....الخ

[الخيالة]

سبحان الله من شهر تقريباً
كنت في عيادة الدوحه وجتني وحده بنفس المواصفات
وكانت ﻻبسة قفاز

طلبت فلوس لبنتها !! مسويه أشعه إن ماخاب ظني

وبين الكلام افصخت القفاز وعطتني خاتمها تقولي اخذه لين ارد لك الفلوس أو قالت بيعه نسيت والله

بس أنا استغربت !! ليش جايه عياده الدوحه وهي ماعندها التكاليف

ليش ماراحت مستشفى حـمد






اي صح بلضبط نفس الشي حصل معاي يوم كنت تعبانه واختي معاي وجات
بس ماكان معانا اصلا كاش عشان نساعدها بس استغربنا ان شلون جايه تعالج بنتها في عيادة الدوحه وتقول ماعندي فلوس وانا مب مقيمه أهني ومن هالكلام عقب ما شافت ان ماساعدناها راحت وشفناها عند وحده مع بنتها قعدت ومادري شصار

[AL-MAYSTRO]

طبعاً لم توفق اخي في ردك
حيث توجد قوانين تجرم هذه الافعال
وتوجد مؤسسات خيريه تنضم الصدقات والتبرعات وحتى الاوقاف
كي تبتعد عن الشبهات
لاننا لانعلم من هم هولاء المتسولين وماهو هدفهم او اين سوف تتجه هذه التبرعات
وهنا الحديث سيطول
تقبل تحياتي

كلام سليم ومنطقي 100 %

[♫ احسـاسـ طفلـهـ ♫]

لا والله انا قبل اقول واعليه مساكين حرام الواحد يكسب فيهم اجر لكن والله من اللي عايشته من الكذب والغش والاستخفاف بعقول القطريين بالذات ما اشجع هالامور نهائيا


اخر موقف صارلي كان بسوق العسيري يمكن المهم وحده من هالاسواق وحده منقبه بعد ومن جنسيه عربيه ولما كلمتني على اساس انا فلسطينيه لكن طلعت الاخت عراقية وهالشي قالوه لي في السوق بس عقب متى ؟؟ عقب ما دفعت لها مبلغ محترم وفوق هذا حجج و تشكي ودمعة من هني و قلوبنا رهيفة ما اتحمل :weeping: والله وعطيتها لوجه الله سبحانه وماكان عندي اكثر فلست وقتها قلت لها اسمحي لي والله ماعندي وتمت تحن علي قلت لها والله ماعندي :eek5: انطريني كم يوم بس وبجي مره ثانيه حق غرض هني وبشوفج وبعطيج وكنت اصلا جايه لخياط وعطيته قماش يفصل والمهم لما رجعت بيتنا قام واتصل لي الخياط جزاه الله خير وقال لي كل السالفه وقال ترى هاي تقص عليج وماقدرت اقولج جدامها لانها تدري وهذي عراقية مو فلسطينيه واصلا صارلها سنين بقطر مب مثل ما قالت لج توها هالسنه جايه ويحليله الهندي قام يقولي الفلوس اللي عطيتيها اياها خلاص صدقه لوجه الله والله بيعطيج اجر بس لا يقصون عليج مره ثانيه انتي قلبج طيب وهذول كذابين صدمني ههههههههه ..


بصراحه هالنوعيات المفروض والله يتخذون معاهم اجراءات لان حرام استغفال القلوب الطيبه وثاني شي يجون بعضهم يحنون على راسك ويلزمونك تعطيهم ؟؟ عمر الصدقه ما تجي بالغصب يمكن الواحد صج ماعنده من وين يجيب ؟؟؟؟؟؟؟؟؟


لا حول ولا قوة الا بالله بس :omen2: ..

[موضي قطر]

انا الأسبوع اللي راح في عيادة الدوحة بس الصبح وانا انطر الدور الا وحده اعتقد

هي نفسها اللي ذكرتيها متنقبه قالت لي لو سمحتي ابيج شوي قلت لها تفضلي قالت

لااا تعالي هني <<< تقصد اقوم واوقف معاها بعيد شوي ..قمت قلت لها آمري اختي ..

قالت انا مو من نفس الديره وناقصني 270 ريال لبنتي حالتها خطيره ؟!

قلت لها وين بنتج هنيه في العيادة قالت ايه .. قلت لها تعالي معاي بدخلج حمد العام

قالت لاااااا وحسيتها تنرفت من ردي .. بعدها جاتني وحده قالت لي هذه طرارة

وانا شافتها من اسبوعين في عيادة الدوحة للأطفال ونفس القصة ..

[سان سيمون]

التكافل واجب علينا كمسلمين ولكن عندما يكون تكافلنا مساهم في زيادة المعاصي وارتكاب الحرام فهذا لا يعتبر التكافل الذي حدثنا الله علية ونبيه صلى الله عليه وسلم
فقد قيل انصر أخاك ظالما او مظلوما ، فنصرة الظالم أني ابصره بحقائق الامور واعينه على عمل الخير وامنعه عن عمل الشر باي طريقة كانت أجدها تناسب الموقف

فالصدفة خير و المقصد منها تفريج الكرب و ضوائق الناس لكن عندما يستخدمها البعض في الطرق المشبوهه والحرام فلا تجوز الصدقة أبدا ، انا مره سالت دكتوري في الجامعة وقد لا يخفى عليكم الله يرحمة (((( الدكتور حسن عبدالظاهر )))) اذا جاءتني منسوبة هل أعطيها فأخبرنا بموقف رسول الله مع المتسول عندما اعطاه اعتقد دينارين او دينار وجزء منه اكل وجزء منه شراء فاس علشان يخطب &&&&& اذا فيه خطا في القصه مني موب الدكتور ،،،، الكبر شين &&&&&& الزبدة قال وجهيها للعمل و لكن لننتبه لو جات وانت أتعرفين انها كذابه بس اول ما اطلبت قالت@@@@@ أسالك بالله@@@@@@ أعطيها مهما كان لانه طلبت ودخلت باسم اكرم الأكرمين

واذا العكس انا ما اعطيهم اوجههم لصندوق الزكاة والجهات الخيرية و ممكن انا أخاطب لهم هالجهات اذا قالت ما اعرف وما الى ذلك لكن اتصدق وسوري تروح تدفعها في شقة الله اعلم ايش البلاوي الي فيها سووووووووري *

[موضي قطر]

كل يوم حكايه جديده

على بالي طلعت مسدس

يعطيك العافيه


لا تستهينين فيهم ..

اذكر من كم سنه وحده من اهلي .. عندها موعد في المستشفى .. اضطرت يومها تروح اجلك الله الحمام ..
ولما دشت وجات تطلع الا 2 من جنسية عربية يسألونها عن من دكتورها ومن هالكلام .. صار شي حسسها بعدم الراحة لهم جات تطلع وحده منهم سدت الباب والثانية تبي تاخذ ساعتها من ايدها <<< الشيخة لابسه رولكس .. اللي خرب الموضوع حريم يبون الحمام واسمعوا الصوت وتموا يفتحون الباب وعلى طول شردوا .. شكلهم متعلمين على الشرده .. ودقت على زوجها للاسف قالها مب مبلغين الأهم سلامتج :(

[blackjacket]

أنا مستغرب من عيادة الدوحة ليش مايطلبون الشرطة مادام الشي قاعد يصير في العيادة عندهم و بشكل متكرر ،الطرارة تعتبر جريمة و يعاقب عليها القانون :telephone:
هذول بس يستغلون طيبتنا و كرمنا والله في قلبهم يقولون عنا أغبياء :anger1: تخيلو لو طول اليوم بس 20 واحد دفع لهم مبلغ 50 ريال شوفو مدخولهم بيكون كم :eek5:
أنا صادني موقف و أنا عل كاشير في اللؤلؤ جاتني وحدة معاها اغراض تقولولي حاسبلي هذول لو سمحت والله قلت لها بالحرف الواحد ليش أحاسب لج بصفتي منو ! هدتني و راحت على كاشير ثاني تشوف لها واحد ثاني ممكن تضحك عليه
و في مواقف ثانية الي يطلعون شهادات و كتب مساعدات و كلهم حريم منقبات أنا اول ما يجوني يطلبون مني اقول لهم تدرون انه التسول و طلب المساعدات ممنوع من الشرطة، صدقوني اول مايسمعون هل كلمتين يقولون لي شكرًا و يختفون

[ريتويت]

بسم الله اتوقع انه سحر

[هبوب الكوس]

لانهم يدرون الحين الحريم صكت رواتهم 50الف

تراكم مستهدفين من كل النواحي حاسبو

[بحرقطر]

دخلت بقاله اشتري كم غرض المهم جاني رجال وقال لي تكفا ابي حفاضات الله يعزكم حق ولدي وما عندي فلوس قلت له ان شاءالله ومشيت معاه لين مكان الحفاضات قلت اي مقاس قالي اي شي قلت له انزين كم عمره ووزنه قال ما ادري اي شي عادي هههه شكيت انه عيار المهم خذت له الحفاضه وطلعت بس كنت واقف عند الباب وما ابين وهو على باله اني رحت الا الحبيب رجع الحفاضه وخذ الفلوس ههههه حركه يديده

[روح الاطلس]

طبعاً لم توفق اخي في ردك
حيث توجد قوانين تجرم هذه الافعال
وتوجد مؤسسات خيريه تنضم الصدقات والتبرعات وحتى الاوقاف
كي تبتعد عن الشبهات
لاننا لانعلم من هم هولاء المتسولين وماهو هدفهم او اين سوف تتجه هذه التبرعات
وهنا الحديث سيطول
تقبل تحياتي

طبعا نعلم ان هناك جهات خيريه. والتسول ممنوع قانونا ولكن ردي من باب انساني وليس قانوني،، باب أجر وخير لي ليه أسده ؟؟
ولو بعطي مبلغ بسيط حتى لو عشر ريال لا راح تضرني ولا راح تغنيه لكن اني ما انهر السائل ومنها صدقه وانا اللي بكون كسبت الاجر لكن هو لو مو محتاج عقابه بيوم القيامة والله وحده العالم بكل انسان مش انا اقول نصابين وترا جمعياتنا الخيريه ماتعطي شي يذكر كل التبرعات للخارج ،،

[الدمعه]

صادني موقف قريب عند مركز نسيم الربيع ..

جاتني وحده تقولي بنتي تعبانه وابي اسوي لها اشعه في المركز ..

قلت لها اوكيه وين بنتج تعالي معانا داخل وعلاجها على حسابي ..

قالت لا بس هو مطلوب 500 عطيني اياها وانا بتصرف والبنت مب معاي احين :secret:

قلت لها عيل تيسري ابرك لج ..

وسحبني ريلي من عندها يقول لي انتي غبيه ماتشوفينها طول وعرض يمكن خاشه سجين

تحت خمارها وتروحين فيها لاعاد تكلمين حد ماتعرفينه .. :(

[مهرة]

في ردوود غريبة خذتهم العاطفة والرحمة لمثل هؤلاء الفئه الغريبه المخيفه والي لازم الحيطة والحذر منهم ,, لو انهم مايسوون شي غلط لا يخافووون ويشردوون ,, الله يجيرنا ويحفظنا منهم ..

[مسك روز]

انا بعد صار لي موقف بس مع واحد مدعي انه قطري

وثاني يقول انه سعودي


هالاشكال اذا عطيناها ويه ، راح يتمادون اكثر

[بوحارب]

نفس هالأشكال يجب ان لانتعاطف معهم معروفين بالشحت بس

اللي يبي يتصدق الجمعيات الخيرية موجودة في قطر كلها وفلوسه راح توصل للناس المحتاجة بأذن الله

[intesar]

هذولي لازم ينسجنون.. لا هم محتاجين ولا شيء

[البدع]

الي يقول فأما السائل فلاتنهر

ليش السائل مايروح الجمعيات الخيرية

كلنا نعرف عن النصابين الي أكثروا هذي الايام

[قطر70]

انا صادني موقف مشابه نوعا ما
وانا واقف عند اشارات فيلاجيو والا وقفت سياره خليجيه احذاي المهم سالني وين طريق مراكز سلوى
ودليته الا يقول اخوي احنا رادين بلادنا وقاصره علينا الفلوس وماعندنا نعبي بترول قلت له ابشر اللحقني وبعبيلك فل الا يقول لا اللحين البترول اوكي المهم احتسبت المبلغ لوجه الله وانا امد يدي اعطيه المقسوم
الا الحبيب واللي احذاه حطين عندهم مكان القلاصات فربتشينو من ستاربكس الا القول في بالي ياسلام طراروه بطرانين

[مضاربه]

الي يقول فأما السائل فلاتنهر

ليش السائل مايروح الجمعيات الخيرية

كلنا نعرف عن النصابين الي أكثروا هذي الايام

ههههههههههههه الشيبه الي يوقف عند المسجد اختفى

[tawareq]

من شهر تقريبا وانا طالع من عيادة الدوحة جاتني نفس المراه ( من خلال مواصفاتها المذكورة ) وتطلب فلوس وتقول انها مسوية اشعة ومحتاجه فلوس.

[elders]

المؤمن كيس فطن يا اخوان

مش الكل نصاب وكذاب ..خد واعطي معاه تقدر بحدسك بعد عون الله تمييز حاجته من عدمها وحتى لو اخطأت بتاخد اجر على حسب نيتك ، مرة كان في وحدة شافتها زميلتي قدام جرير الريان وطلبت مبلغ علشان دوا زوجها المريض فلما قالتلها شو الادوية فورا قالت اسمائهم وانتبهت انو في صيدلية وقالتلها خذي ادويتك وانا احاسب وبالفعل صار هيك.. فما اتوقع كانت كذابه

[كحيلآن]

عن نفسي أعطي واحسبها أجر عند الله .. والواحد شيبي غير الاجر ... نصآبين ..؟ بسلامتهم أكسسب أجر يآخي أنت ونيتك .. نيتك صدقه ؟ الله بيأجرك على أنها صدقه .. مب قايلك يوم القيامه بنشطب هالاجر هذا لآن الي جاك او جتك نصابه .. بيأجرك على نيتك ... وانت ونيتك مثل ما قلت ... ويالله يارب لا تحرمنا الاجر ..

[كحيلآن]

وبخصوص الجمعيات الخيريه .. ترى الجمعيات الخيريه مب اي واحد تعطيه هذا أولاً .. ومب كل واحد جآهم قال انا محتاج فتحوا له الدرج وعطوه المبلغ .. وطبعاً الجمعيات الخيريه مب معطيتهم المبلغ الي يسد أحتياجاتهم

[الصغيره]

والله الحالات كثيره احيانا قدام الصيدليات واحيانا بالسوق

اما حد يقدم خاتم اخذوا الحذر لان يمكن خدعه وبعد مده تقول انسرق او يون به شي لقدر الله

[مخطط قطري]

انا حصلي موقف تقريبا يشبه هالموقف وكنت قريب من شارع حمد الكبير وجاني واحد مقيم عربي
وقالي انا ابي ارجع بلادي ومحتاج حد يساعدني وكان بوكي داخل الدرج والاشكاليه
في درج السياره تقريبا 300 الف
والله العظيم ودي اعطيه في نفس اللحظه بس المشكله مابي ابطل الدرج قدامه مب عشان اني خايف يسوي شي ولا بيمد يده
ولا بيسرق لانه الكنترول عندي واقدر اسيطر على الموقف اذا حصل شي لاقدر الله
وقلت له روح وقف على الرصيف وراح وطلعت المقسوم وعطيته
شوف بس عشان قلت له روح للرصيف حسيت اني نهرته ومتضايق اني قلت له هشكل حسيت اني ذليته
فمبالك انت تنهره ولا تغلط عليه وتقوله روح جميعات خيريه
قوله الله يعطيك واتركه ولا ابتسم له وروح عنه وان كانت 500 ولا الف مب ضارتك دفعه بلا
ترا بعض الافعال نسويها بدون قصد وهي لها اثم كبير

[al wafi]

من شهر تقريبا وانا طالع من عيادة الدوحة جاتني نفس المراه ( من خلال مواصفاتها المذكورة ) وتطلب فلوس وتقول انها مسوية اشعة ومحتاجه فلوس.



وانا بعد جاتني
قلت لها ان شاء الله بدفع تكاليفج كلها
بس جيبي لي فاتوره او ورقه الاشعه


وبس من عقبها انقرضت :rolleyes2:

[كبير المتداولين]

لانهم يدرون الحين الحريم صكت رواتهم 50الف

تراكم مستهدفين من كل النواحي حاسبو

وخاصه المدرسات

[خليدان]

سبحان أكثر من موقف مشابه في عيادة الدوحه

[بحرقطر]

شسالفة هالمره شكلها ما ادل الا عيادة الدوحه
احس عندها خير وبيوت وعمارات واسهم هني وفي بلادها

[كازانوفا]

توقعت انها طلعت رشاش
على العموم الموضوع هذا سمعنا كثير عنه والله العالم اذا محتاجه او لااا

[موضي قطر]

قريت ردود البعض .. وانه هالمره قالت لهم اللي قالته لي ولغيري ..

كله بنتها تعبانه واشعه .. وتبي فلوس .. واذا قلنا وينها بندفع .. تهرب ..

غير هذا عياده الدوحة ماتسوي اشعه الا لين ندفع اول .. هي تقول قاصرها ..

سووت الأشعه وقاصرها فلوس .. هذا اللي خلاني احسها تخرط .. ولا بالعاده

ينكسر خاطري واعطيهم المقسوم ..

على العموم بقولكم مواصافتها على قد ما اقدر عشان لو صادفتوا نفس الموقف .. يدري

انها عياره .. هي مب طويله اتوقع 157 سم وحجمها نقدر نقول صغير .. ومنقبه حتى

عيونها كأنها مغسله وجهها ومب منشفه الماي<<< لاحد يعلق على التشبيه:shy:

[%FTM%]

استغفر الله أنا بعد واجهتني نفس المواصفات وكان معاها وحده بس من فترة اكثر من شهرين...الله يستر عليها ويساعدها اذا كانت محتاجه والله يهديها اذا ماخذة السالفة لعبة و فلوس على الساهل ...

[clouds]

انا جاتني عند فيلاجيو وكلمت الشرطه وانا اتصل في الشرطه اختفت في لمح البصر بس بلغتهم عن المكان والبوابه وانها لابسه نقاب وتدور في المواقف

[Xx QATARI xX]

الكلام ذيه كله على وحده متنقبه ،، ياجماعة الخير ماوصيكم على واحد يلبس غترة وعقال عمره تقريبا في 45 ،، لقيته في محل في النصر وجاني يطر ،، المشكله في حريم في المحل ولا كان عطته بوز ،، مللني باسلوبه الوصخ وملاغته لكن خذ المقسوم وراح
في رمضان ولا واحد يصارخ ويطق باب المجلس يوم طلعت الا هو ،، ماتوقع اللي اسمعه ،، انصدم
يوم سمع طاري البحث الجنائي و شرد

ماوصيكم عليه ،، اي واحد يشوفه على طول يقبضه ويبلغ البحث الجنائي

لانه الصراحه هالاشكال لا شفقة ولارحمة معاهم

[اليزوه1]

لا اله الا الله محمد رسول الله

[وتبقى الدنيا حلوه]

هذي مسنتره للحين من كم سنه يمكن شفتها

شكلها جمعت لها ثروه صغيره خخخخخخ

[بنت الاجواد]

الصدقه تدفع البلاء فلا تبخلوا على انفسكم بالصدقة ولو بشق تمرة

[بوسلمان 2010]

ياجماعة الوضع زاد عن حده وكثرو في البلاد هذولا مع العلم بان يوجد جمعيات خيريه تقدر تساعدهم لاكن الي



صاير انهم في كل مكان وانا من فترة مع زوجتي في احد محلات الانارة على طريق سلوى جاتنا وحده من جنسية


عربية وقتلها ليش ماتروحين جمعية خيريه تلعثمت في الكلام وتهاوشت مع راعي المحل اشلون تسمح لهذا الشي


في محلك ولاخذت من عنده الاغراض مع اني كنت محتاجها وقتله بشتكي عليك وطلعت عنة وهذا الشي لازم يكون


في اجراء صارم لانه نيت الي يسوي هذا الشي اتكون في بعض الاحيان موطيبة