حاسبوا من المستشفيات الخاصه (قصه صارت لي)

[وتبقى الدنيا حلوه]

الموضوع صار له كم شهر بس طرا على بالي وحبيت انبهكم وترا هالقصه صارت لي شخصيا


بعد مارديت من الدوام تغديت مشاوي و رحت غرفتي و بعد فتره حسيت بالتعب و بألم غريب فوق زر البطن و مع الوقت قاعد احسه قاعد ينتقل من زر البطن الى الجانب الايمن السفلي وعمري ماحسيت في هالألم لدرجة اني كنت انحني من الألم وما اقدر اوقف عدل و حاولت ان اسوي أي شي عشان يخف الألم بدون فايده و عقب عالمغرب تقريبا قررت اروح المستشفى ورحت مستشفى خاص (بو قلوب (المحبه سر) خخخخخ) المهم دخلت الطوارئ وبعد الفحص بلغت الدكتور أن فيني القولون و عطيته تقرير كان موجود بشنطتي و قال لي لازم أسوي تحاليل + أشعه << أتوقع رنيم او شي جي و بعد ما خلصت الفحوصات و طلعت النتيجه جا الدكتور وقال: فيج الدوده الزايده لازم فورا ندخلج غرفة العمليات !!! جدامج بس 12 ساعه قبل ماتنفجر الدوده الزايده وممكن تصير مضاعفات و تؤدي الى الوفاة
و طبعا الوالدة كانت وياي و قالت له: طيب يا دكتور احنا ما نبي نسوي عمليه بنروح مستشفى ثاني
و طبعا هنيه عصب الدكتور و قام يقول بصوت عالي شو هذي مب معقوله مستحيله << عن أمي
للأسف ما قدرت ارد عليه لاني ما كنت فاضيه له و أمي طبعا ما قالت شي
وخذنا التقاير و طلعنا و رحنا مستشفى ذخيره و دخلنا وماقلنا لهم أن رحنا من قبل مستشفى وقلت لهم الأعراض وكل شي يمكن شافوني 3 دكاتره و سوا لي تحاليل و صوره و طبعا بلغتهم أن فيني القولون و عطيتهم نفس التقريرو بعد ما طلعت النتيجه
قالوا لي : مافيج شي !!!!! يمكن المشاوي هيجت القولون بس كانت نفس اعراض الدوده الزايده
طبعا أنا قمت اضحك من الموقف اللي صار يعني دكتور يقولي باقي لي 12 ساعه اذا ماسويتي العمليه بتموتين والثاني يقول مافيج شي !!
شو هالتناقض !!
المهم ردينا البيت و اقدر اقول 70% من الألم اختفى و للعلم ما خذت ولاحبه حبوب او أي نوع من الدوا

ترا أنا لليوم عايشه و خلصت الـ 12 ساعه ( و اناقز مثل الينيه<< مشاء الله) ومافيني الا العافيه و الحمد لله

والله بخاطري كنت اروح له و اسوي له سالفه يعني تخليووو ما كان فيني شي و بيسوي لي عمليه غير ضروريه !!
شو كان يستأصل بالعملية !!!

المشكله راسلت المستشفى ولاحد عبرني يعني معقوله استهتار لهل الدرجه !!!

بس حبيت انبهكم من هالنقطه و أن في دكاتره في المستشفيات الخاصه اهدافهم ماديه


و الشر مايجيكم ان شاء الله

[اليزوه1]

لا اله الا الله محمد رسول الله

[MAZEN37]

حمدلله على السلامه
سبحان الله ما احب الخاص لانهم بكل تاكيد بسوون افلام

[مبتدئة]

ياما سمعنا بلاوي عن الأهلي

الحمدلله على سلامتج حبيبتي

والله يحفظنا ويحفظ المسلمين من شرهم

[@north_star@]

حسبي ونعم الوكيل فيهم لانه صحة الانسان صارت مجرد تجارة بالنسبة لمثل هالمستشفيات والحمد لله على السلامة اختي

[وتبقى الدنيا حلوه]

الله يسلمكم

[alfahad1]

كان المفروض قبل ما تطلعي من العيادة الخاصه تأخذين التقرير عشان يكون دليل

[وتبقى الدنيا حلوه]

كان المفروض قبل ما تطلعي من العيادة الخاصه تأخذين التقرير عشان يكون دليل

عندي التقرير

[هارودز]

سلامات و الحمدالله ع السلامة

[محمد]

اجابه صحيحه

الشر مايجيك

صح كلامك أنا عندي تأمين وكنت كل ما اروح لهم حتى لو فيني شي مايستاهل لازم اكثر من تحليل

وطني الحبيب !! شو بيسون لي



ما راح يسوون لج شي
لكن مثل هالمستشفيات وقع الكلام عليهم اشد من السيف في برامج مثل وطني الحبيب !
وبتكون صفعه لهم ويمكن لعل وعسى ينتبهون ويحسنون من خدمتهم ..

[R 7 A L]

حتى المستشفيات الحكومية يقعون في نفس الاخطاء

[بو خليفه 123]

عندي استعداد اراهن انه المستشفى الاهلي



جعلك ماتشوفين شر والحمدالله عدت على خير

لكنك لي عتب صغير عليك بأنك خليتي الموضوع "يعدي بسكات"

ولا تقولين لي مراسلتهم تعتبر تأدية واجب ..


هالمستشفى يجب اغلاقه اليوم قبل الغد


اجر و عافيه , ولا تقولين عن عمرك جنيه لا تطيحين علينا مره ثانيه :(

[بوسلمان 2010]

الحمدالله على السلامة وخطاك الشر والمهم انك بخير الحين والحمدالله على كل حال

[حراير قطر]

الحمدلله على سلامتج اختي

انا جابوا لي اسعاف شلني من البيت

لاني ما قدرت امشي من الم وكان تخمين انه الدوده الزايده

وكنت في مستشفى الولادة لانه صادني هالشيء عقب ولادة بنتي بعد اربعة ايام

وعقب التلفزيون طلع ما فيني شيء والسبة كان دخول هواء بجسمي :rolleyes2:

هذا رابط فيه اعراض الدودة الزايده ...

http://www.ru4arab.ru/cp/eng.php?id=20050511222817&art=20050513234936

[قطري مفلس]

الحمدلله على السلامة وهذا أهم شي

وأنا اشوف ان كل المستشفيات تخطي ، واولهم مستشفى حمد

الحافظ الله سبحانه ،،

وبخصوص التأمين والله انهم مقطعينه تقطع هالتأمين :(

والي يذبحني ( اذا كان عندي موعد يتصلون لي قبلها بيوم ، عاد انه اهتمام وتذكير ، والله العظيم ان اوصل ثاني يوم على الموعد ، ينقعوووووني ساعه او ساعتين والسبب يطلبون الملف ))


انزززززززززززين ليش مسوين لي تذكير على الموعد امس

يمقن استهبال يمقن مافي شغل

[قطريه ماركه]

بل !!

حسبي الله عليهم من دكاتره ....

الحمدلله على سلامتج اختي .. و خطاج الشر ...

[السديم]

اجر و عافية اختي

المستشفيات الخاصة صار همها الاول الربح المادي لتغطية التكاليف و الربح

يعني عادي مافيج شي يقولون لج زايدة

وبالذات ينصبون على اصحاب التأمين لانهم عارفين ان المريض مب دافع شي فيشفطون شفاط

الاهم في الطب الواحد يراعي ذمته لكن هالزمن محد عنده ذمه

[كازانوفا]

حسبي الله ونعم الوكيل شغل تجارة
الحمدلله على سلامتك

[Cute Mother]

الحمدلله على سلامتك أختي ....

[شيزكيك]

انا رحت حق هالمستشفى وفي نفس الروحه الدكتور قرر عملية ويمه منهم حتى الاستشاره ياخذون ٣٠٠ ريال وطبعا اقامه يوم عندهم فدفعت مبلغ وقدره وانا بعد ماعندي تامين

[بـــــــنت النوخـّــــذه]

انزين عاد دزي لي اسم المستشفى على الخاص عشان ناخذ الحذر اخاف باجر لاقدر الله اشتكيت من شي قالو لازم تستأصلة ويشلونه مني وهو صاحي مافيه شي:(

يلا دزيلي على الخاص

وعلى فكره مهب كل الخاص نفس الشي عشان مانظلمهم بعضهم احسن من مجزره مستشفى 0000

[القطــــــرية]

اجر و عافية اختي

[CH Engineer]

سلملي على وزارة الصحة

[ra3shat hadab]

والله يا وخيتي مستشفيات قطر كلها حظك نصيبك لا من مستشفيات خاصة ولا حكومية يعني مستشفى حمد اللي مقصرين ،،، خلينا ساكتين بس،،،،،


اجر وعافيه

[ابوالكلام]

بلدنا تشجع الاستثمارات وهذي هي النتيجة كل شيئ صار تجاري حتى صحة الانسان ولاحسيب ولارقيب والحبل على الجرار

[زئير الاسد]

نفس حالتي تقريبا

انا من شهر رحت مستشفئ حمد بعد الفحص قال فيك قولون وعطاني علاج واستمريت عليه

لين زادت الحاله من كم يوم ورحت الاهلي عطوني مثل العلاج

ودخلو علي 3 دكاتره كل واحد يقول فيك شي !!!!

يعني الحين صارلي شهر ع هالعلاج مانفعني تعطوني مثله !

[راشد محمد]

الحمد لله على السلامة

[نورالهدى]

لاحول ولاقوة الا بالله العلي العظيم

[بو خليفه 123]

للأمانة .. لكن من خلال تجربة .. مب كل التخصصات فيه سيئة ..
قسم الطوارىء سيء .. لكن فيه تخصصات ومن خلال تجربتي جيدة
لكن بشكل عام المطلوب اكثر بما انه مستشفى خاص وحالة الاخت حالة ما ينسكت عنها .. شكله الدكتور يبي بونس بما ان كل عملية يسويها دكتور معين له بونس .. بس السؤال اذا الدودة الزايدة مب شايلها .. بيشيل شنو ؟! ولا بيشق وبيخيط ؟ :telephone:



والله يا وخيتي مستشفيات قطر كلها حظك نصيبك لا من مستشفيات خاصة ولا حكومية يعني مستشفى حمد اللي مقصرين ،،، خلينا ساكتين بس،،،،،


اجر وعافيه


هناك فرق بين المستشفيات التي لها اهداف ماديه

و هناك فرق بين المستشفيات التي يقع فيها "اخطاء بشريه" التي لا حول ولا قوة لها

[قدها وقدود]

الحمدلله ع السلامه وخطاج الشر

الموضووع عباره عن تنبيه وتحذير

انا صادني نفس الموقف حسيت بألم في بطني وزاد عليي شوي شوي ورحت المستشفى وقالي الدكتور وين تحس بالالم قلت في بطني قال عيل خلاص فيك القولون بدون مايستعمل اي شي من الاجهزه قلت على كيفك قولون قال هالمكان معروف قال باعطيك حبوب والله وعطاني حبوب اشكال وألواان يوم رحت البيت راح الالم مني شوي شوي والحين اناقز مثل اليني والحبوب خليتهم زينه في البيت

[فـيـراري قطر]

والله لو مكانج كان رجعت للدكتور و_ _ __ _ خلاص لو مكانج كان عرفت شسوي ماكنت رح امشي الموضوع لان هاذا الشي الي يخلي الموظفين يتمادون في ظلمهم

[وتبقى الدنيا حلوه]

الله يسلمكم كلكم و الشر مايجيكم

المشكله ان عندي كل التقارير اللي من عندهم ومن عند مستشفى ذخيره و اقدر اروح و اكلم المستشفى بس كل اللي بيسونه "بيسكتنوني"

اذا اشتكيت عليهم بالمحكمه مثلا : بتم سنين بالمحاكم

امممممممممم بس يمكن اتصل وطني الحبيب

[وتبقى الدنيا حلوه]

اللي يبط الجبد ان الدكتور معصب ومب عاجبه