تربي اولادك او اولادك يربوك ؟

[MAZEN37]

السلام على اهل السلام:)
جيل غريب ما تقدر عليه وعلى تربيته ولا لك كلمه عليه ؟
العيب في طريقتنا والي تعتبر قديمه ومن الجاهليه او العيب بجيلهم المنفتح وجيل حقوق الاطفال والضرب ممنوع !
في امور كثير متداخله بتكوين شخصية هذا الجيل والي برأي راح يجي يوم ما تقدر تكلمه
اولها نشئته بأيادي غريبه مثل الخدم وتغير نمط الاسره الي اصلا ما تجتمع مثل قبل
وما تنسى المرحله الابتدائيه الي كل مدرسينهم حريم لا حول ولا قوه لهم مع شقاوة الاولاد وما تنسوا التكنلوجيا الحديثه صاحبة الفضل باطلاع هذا الجيل على ما لا يخطر على بال ناهيك عن اصدقاء الحي والمدرسه والمجتمع عامة - بفرضية الواقع السريع والمفروض علينا كمربيين وعليهم
كيف نهتدي للطريقه المثلى لتربية اطفالنا بوسط هذه الفوضى ؟

[R 7 A L]

والله صارت الاوضاع صعبه للغاية

[khaldoon]

والله يا اخوي اعتقد انه كل جيل بيقول عن اولاده انهم جيل غريب و صعب السيطرة عليه وما اعرف كيف اتعامل معاه نتيجة المتغيرات و التطورات بين كل جيل و الجيل اللي يجي بعده و راح تستمر الحياة على هذا النمط

اعتقد افضل الوسائل في التربيه هي مب الضرب بل الحرمان من اي شيء يحبه الطفل لو انه غلط عن تعمد

لو أخطأ اول مره بسامحه و بفهمه غلطه بس المره الثانيه ايش عذره...ناسي مثلا...طيب و الثالثه و الرابعه....؟

ما تنسى اخوي انه اولادنا الحين صاروا يسكنون بالشقق اكثر من اول و الشقق بيوت مغلقة ما في حواري كثير مثل اول و الشوارع الداخلية تخوف مثلها مثل الشوارع الخارجية و كثير منا صار يخاف على اولاده خصوصا مع زيادة عدد الجالية الاسويه اللي ياكلون اي شي ...فالولد اليوم اللي على طول بالبيت قضى وقته على النت و الالعاب و صار فهمه و اختلاطه بالناس اقل من فهم و اختلاط ابوه اللي تربى بالحارات و قضى طفولته في الشوارع

و مثل ما تفضلت تربية الخدم لها دور كبير....بس بعد جيلنا تربى على ايدي الخدم مثل جيل اولادنا

الحديث يطول جدا

على العموم كلكم راع و كلكم مسؤول عن رعيته

[MAZEN37]

اشكر رحال واخوي خلدون بما تفضل
تصديقا لكلامك بالماضي كنا نرى انفسنا جيل فاشل يوم نقارنه بجيل ابائنا
لكن اكتشفنا انه جيلنا افضل كثير من الاجيال الي بعدنا واكثر مسؤليه
وبعدين من كثر ما هم محبوسين على البلاي ستيشن والنت صارت لهم كروش
ولد بالصف الرابع راعي كرشه !

[شبح الصمت]

اخوي Mazen:)

ليش كله ندخل مواضيع الخدم في التربية !!! الخدم مهب كل بيت معتمدين عليهم :)

في خدم مهمشين في مواضيع التربيه يمكن الطفل تهتم فيه لين سن السنتين فقط وبعدين خلاص يمسكونه الاهل

وفي بعضهم من البداية

اشوف الأطفال ماشاء الله عليهم فيهم عناااااااد في اغلب الاوقات ..

والأسباب ترجع لكيفية تربية الطفل وكيفية معاملته

عن نفسي آآوقات عيالي يعاندوني بس ما امد يدي عليهم إإإإلا وقت الضرورة أأأن نرفزوني وان طقيت آآطقهم طق خفيف ..

قبل آبائنا رحمة الله على من مات منهم والله يطول بعمر من عايش منهم ... آآآمين

ان قالك اجلس خلاص تجلس ما تتحرك ..

بكلمك عن جيلنا ( جيل الشيبان لحدن يعلق ) :secret: جيل من نص السبعينات لين نص الثمانيات .... طبعا كنا حركين ونلعب ونتهاوش ونسوي ونسوي بس لي جينا صوب آبائنا وآمهاتنا خلاص نركد

أأأأجلس يعني أأأجلس سويت شيء غلط انطقيت عليه ..

الحين تقوله اجلس ما تجلس خلالالاص العناد ضاربهم تحس أن قفل الياهل قفل :secret:..


آخبر رحت زيارة فالعيد لواحد من شيبانا ربي يطول بعمره المهم ووديت عيالي وكانوا ساكتين ما يتحركون والفاله قدامهم قالهم تقدموا اكلوا قلت له لا يبه خلهم متفاولين قالي الحين اااااي نسيت يوم انك ما تخلي شي في المجلس :eek5: قلت له والله ما اذكر قالي انت كنت اخس منهم :shy: وابوك الله يرحمه ويغفر له يسكت ويخليك ..

خل عيااااك خلهم لا اقول لهم قصصك .. اخليهم يضحكون

:shy:
:shy:
:shy:

[al-buainain]

الله يرحم شيبانك يا اخوي / شبح الصمت

أخوي / mazen37

الفرق الي بين الجيل السابق والجيل الجديد شي واحد

ان الجيل السابق تربى بين اهله واخوانه وعمامه وخواله يعني الكل يساهم في التربية

مثال على الجيل السابق :

الاول كانو اليهال يروحون الرحلات مع اباتهم او عمانهم او خوالهم ويحتكون مع الرجال ويتعلمون منهم الاحترام والسنع وكيف انه ما يقاطع كلام الكبار و يشتد عوده في الرحله ويتعلم انه يعتمد على نفسه وينزل البحر ويباري الغزول معاهم وينجرح وتضربه اللخمه ويشدخ على ويهه في الحصى واذا في البر يروح ويحطب ويشب الضو ويصب القهوه ويسمع العلوم الغانمه ويتعلم ادب الكلام ويسمع السوالف الي ياخذ منها العبره. وفوق هذا كل يوم يروح العزبه :)

مثال على الجيل الجديد :

التربية بعضهم على الخدم والبعض الاخر على بيته الي هو عايش فيه فقط يعني لو تدخل عمه او خاله يقول له مالك خص هذول اعيالي واربيهم على كيفي.

حالياً اذا اليهال يبون يطلعون يروحون مع الخدم والاهل الى المجمع التجاري الاهل يتسوقون والخدم يلعبون اليهال في الالعاب وبعدها يروحون المطعم ويتعشون قدام الي رايح والي جاي واذا كبرو اليهال يروحون مع الدريول مكان ما يبون على كيفهم طبعا بموافقة من الاب والام المجالس ما دور عندهم كلش الحين نادر من تشوف يهال في المجلس يبون البلاي شتيشن واللعاب المشابه

ممكن سؤال في يهال يلبعون رين ولا قلينه ماطوع او خشيشه

في يهال فوق الاطوف الحين يقشعون لوز

في يهال يهيتون الظهر في الشمس

الحين المشكلة كل مسكرين عليهم الين يتخدون واللعبه بنات وصبيان ولا كبر الصبي قالو اشفيه متخدي

الخلاصه لو ان احن نربي اعيالنا مثل ربونا اهلنا كان ما صار هذا كله .

وتحياتي لك يا الشيخ

[intesar]

تعرفون ايش احلى عقاب مع الأطفال والمراهقين.. الحقران.. يقطع المصران.. عيالي يخافون يزعلوني.. لأني بعدها ما اكلمهم لو يذوبون تحت رجولي.. هذي أحسن أسلوب وثبت نجاحها بالنسبة لي.. الطفل هذي الأيام صار يخزن مكتسبات من كل مكان .. من النت ولا التلفاز ولا المدرسة.. صار لازم تتناقش معاه.. وما تفرض رأيك ورأيك وبس.. ناقشه واقنعه.. لأن إن فرضت رايك راح يعاند.. لغة التحاور أحلى شي.. صج ساعات يصدع الواحد من هذي اللغة.. لكن تبني للطفل شخصية مستقلة ومعتدة..

ودمتم بحفظ الرحمن..

[ام السعف]

اللهم اعنا على حسن التربية