أستفسارات بخصوص الابواب الخشبيه

[Chambray]

السلام عليكم ورحمة الله

استفساري يقول :

الحمامات الله يعزكم ودي اركب ابواب خشب لها ..
لكن اخاف تخترب مع الرطوبه

لكن اشوف في كل الفنادق ابوابهم خشب للحمامات ولاتخترب !!!!!!!!


السؤال الثاني : علل مايلي خخخخخخخخخ شدخل ..

الاستفسار الثاني .
بخصوص فريمات الابواب الخشب

ناس تقولي لازم تركب الفريمات قبل الدفان الداخلي علشان يكون الفريم ثابت مايتحرك

وناس تقول العكس
بعد تركيب البلاط يجي دور الابواب والفريمات .. وهذا افضل عن الرطوبه !! وعن الصراصير الالمانية ..



الاستفسار الاخير

ايش افضل الابواب عزل ( للاصوات والازعاج ) ..
هل في انواع معينه ؟؟؟؟؟؟؟؟

وجزاكم الله خير

[MAZEN37]

تصوري للحمامات الالمونيوم من غير تردد
الجو والرطوبه والماي تخرب الخشب ويصير مرتع صراصير
بالنسبه لتركيب الفريم قبل البلاط انا افضل بعد البلاط بس بيتم مكان البرغي ممعجن بالمعجون والنجار يقولك ركب الفريم قبل البلاستر علشان طبقه الاسمنت بالبلستر تيجي مع حافة الفريم ويكون سطح الطوفه مستوي
لكن الشركات الي تشتغل صح يركب لك صب فريم عباره عن 18مم بلويت اسود بعرض 23.5سم ويظبط عليه البلاستر عقب البلاط يركب الفريم فوق البلاط منها يثبت الفريم على البليويت ومنها تكون الورشه خلصت وحافظ على الفريم من التكسر والتخبط ومنها ساوى البلاستر على الفريم

[MAZEN37]

الابواب العازل يسموه تشيب بورد مجوف من الداخل
ويوجد عازل صوت وضد الحريق جبس خاص لابواب المطابخ وهو غالي

[الســـهم]

مرحبا اخوي Moyen Orient ..

بالنسبة لباب الحمام ( تكرمون جميعا ) افضله خشب , احلى وارقى من الالمنيوم واليو بي في سي , وبإمكانك عزله عن الماء بأنك تركب قطعة بلاستيك شفاف وتحمل تركب المنيوم , وهذا البلاستيك تحصله عند المحلات اللي تسوي لوحات الاعلانات للمحلات التجارية والنيون , وتقدر تطلبها من النجار ممكن يجيبها لك اذا كان مشتغل فيها قبل , شكلها احلى ولا تشوه الباب ابدا وتقدر تطلبها بالحجم اللي تبغيه , وانا افضل ان ارتفاعها مايزيد عن 40 سم ..

اما بخصوص برواز الباب , فتقدر تحط بينه وبين البلاط قطعه رخام او جرانيت قريبه من لون الباب , وتقصها على شكل مستطيل بارتفاع من 10 الى 15 سم واعرض من البرواز بـ سم واحد من الطرفين بحيث انها تحمي الفريم وراها , وهالقطعه تقدر تشكلها على كيفك وبالشكل اللي تحبه , يعني ممكن تكون عباره عن مستطيل وفوقه مستطيل اصغر , او تقدر تخليها قطعه وحده محفوفه من الاطراف ..

وبهذا الشكل انت عزلت الماء اللي مايجي على الباب الا وقت غسل الحمام ( الله يكرمكم ) , والرطوبة امرها هين وبتروح مع تشغيل المروحة او الشفاط ..

اما بخصوص الفريم ومن تجربة للطريقتين انصحك تركبه بعد التبليط , اولا بيجيك التركيب انظف بحيث ان الفريم بيكون في معزل عن الرطوبة والحشرات , وثانيا اطلب الباب يجيك مصبوغ وجاهز من الورشه (يجيبونه مغلف ببلاستيك للحماية من الخدوش) ويتركب فالموقع بدون اي صبغ الا بالتتش في اماكن تركيب البراغي مالت الفريم بعد تغطيتها بمعجون خاص بالخشب , ولا تحاتي وقت التركيب ممكن تشوف في فتحات بين الفريم والطابوق وهذا طبيعي , ويتفادونه بحشو خشب في الفتحات ومن ثم تغطيته بالبرواز وبعدها بتشوف الباب ولا احلى منه ..

اتمنى اني قدرت افيدك لو بشي بسيط , وهذا رأيي ومن تجربة والقرار يرجع لك فالنهاية ..

بالتوفيق ان شاء الله , وجعله منزل مبارك وعامر بأهله ..

[ضوى]

بصراحة الأبواب الخشبية وايد ارقى ، وبامانة انا حمامات بيتي ابوابها كلها خشب ، ولا تغير فيها شي وهالكلام من 15 سنة والله ولا تغير لونها ولا صادها الماي ولا اشتكي من صراصير ولا نمل ولله الحمد والمنة ، وهذا يعتمد بالدرجة الاولى على طريقة التنظيف ، يعني اذا الواحد بيهد المياهه لين توصل للباب فهذا شي بيسبب رطوبة وتاكل لحواف الباب بس مع الحرص على عدم ملامسة الماي للحواف بيكون كل شي في السليم ، وتجفيف رطوبة الحوائط اول باول مابيخلي الرطوبة تنزل على الابواب وبتحافظ على الخشب
اتكلم من تجربة شخصية

بخصوص تركيب الفريم قبل البلاط ، الصراحة المقاول قال لازم الفريم قبل البلاط وشرح لي اسباب مافهمت منها شي بس شفت النتيجة وايد حلوة ، بس بصراحة يوم جيبت الغي باب من الابواب اللي عندي اثناء التجديد اضطريت اكسر سيراميك الأرضية وهالشي وايد اثر على شكل الارضية لانه ماعندي نفس السيراميك وكنت كسلانة ادور شي مقارب ، لانه اللي شال الفريم شلعه من الجذور

تجربتي واتمنى تفيدك

[شموخ دائم]

,

,


مرحبا


احب اشكر الاخوان والاخوات

وخاصه السهم وضوى اجابه شافيه ووافيه

اتفق معاهم 100%

الالمنيوم بصراحه ( مافيه فخامه ) والصوت مسموع بوضوح للاسف لانه مافيه سماكه
ويتركب في البيوت التجاريه

تسلمون على التواجد المفيد

,

,


اخوك


شموخ دائم

[المحقق كونان]

بغيت محل يسوي بيبان خشب حلوه واسعاره مناسبة

[Chambray]

Mazen37 و السهم وضوى و شموخ دائم

اشكركم على مداخلتكم الاكثر من رائعه
وجزاكم الله خير على هالمعلومات المفيده ..

بارك الله فيكم

[تحداني]

جرب ابواب الخشب عند " الدرويش " خيال وجوده وروعه


جملك الله برضاه

[@north_star@]

اخوي ركب ابواب خشب واعزلها في مادة تنباع عند الدرويش اسمها wood treatment أو wood preserver .
صناعة انجليزية وتحمي الخشب من الحشرات والرطوبة وبالنسبه للفريمات بعد ما تعزلها ركبها قبل السيراميك وبالتوفيق ان شاء الله

[amal qatar]

عساكم ع القوة .. ممكن أعرف وين مكان الدرويش ؟

[@north_star@]

عساكم ع القوة .. ممكن أعرف وين مكان الدرويش ؟

'طريق سلوى قبل دوار المدماك وانتى رايحة باتجاه الدوحه والله يعينج على الحفريات

[amal qatar]

'طريق سلوى قبل دوار المدماك وانتى رايحة باتجاه الدوحه والله يعينج على الحفريات

ألف شكر