انصحوني لاني نويت ابني بيت العمر ان شاء الله

[ريم 28]

الصراحه انا محتاره ابني بيت كبير يعني فيه صالات كثيره والا ابني بيت وسط

انا اختي واخو ريلي ينصحوني بيت صغير يقولون انهم ندمانين لان البيت الكبير يبغيله خدم اكثر ومن عيوبه بعد ان محد يشوف الثاني طلعو لي عيوب كثيره

وانا فكرت كثير ياليت حد عنده خبره يفيدني اكثر واكثر

وابي فله ارضيه والا دوري شنو الاحسن

معليش اسئلتي مش لابد بس استحملوني

[شموخ دائم]

,

,



مرحبا


البيت انتوا من يحدد نوعه وحجمه على حسب


1- عدد افراد الاسره
2- حجم الارض
3- المبلغ المرصود لهذا المشروع

اذا ارضك كبيره وعدد افراد الاسره كبير تحتاجون فيلا كبيره بحدود مساحه 800 متر واكبر

اذا الارض صغيره والمبلغ بحدود بنك التنميه تحتاجون فيلا دورين في حدود 450 متر
وكل واحد يمد ريوله قد الحافه

اذا المبلغ المرصود فوق 3مليون ووضعكم فوق النخل
دلعوا نفسكم شفيها الدنيا
بيت كبير
اصنصير
حمام سباحه
وحديقه كبيره
:)
وطاووس نافش ريشه يمشي بالحديقه
ههههه

,

,


اخوك


شموخ دائم

[ريم 28]

هههههههههه عجبني كلامك اخوي شموخ

مشكور على النصيحه ما قصرت

[Just Smile]

صباح الخير

شوفي عزيزتي خذيها نصيحة من مجرب..ابني البيت على قد احتياجك انتي و زوجك و عيالك الله يحفظهم لا تسوينه اكبر من احتياجاتكم لانك بتتعبين مستقبلا بتحتاجين اكثر من خادمة له و بعدين بتحسين فيه بالوحدة و بالعزلة بعد ما يكبرون العيال الله يحفظهم و تكثر طلعاتهم و يتزوجون

و هم بيصير كل واحد ياكل و يقعد طول النهار بغرفته و بتقل قعداتكم مع بعض

يعني الغالية افضل على قدكم بس ممكن يكون فيه شغلات دلع و خلي تصميم البيت مفتوح على بعض عشان ما تحسين بالوحدة و خصصي مكان للاصنصير للمستقبل تحتاجونه في حالة ناس كبار في السن

و جعله منزل مبارك يارب

[ريم 28]

Just Smile واللله ريحتني بكلامك جزاك الله خير

انا هذا اللي افكر فيه اسوي على قد احتياجنا والا اكبره وازيد الصالات ووو

يعني انا مساحة ارضي 1200 كم المسحة المناسبه ابغي 4 غرف نوم ووحده رئيسيه ومجلس للنساء وغرفة طعام ومطبخ تحضيري بالداخل وبرا الملاحق بيكون مطبخ وغرفة الخدامه والغسيل

عجبتني تصاميم كثيره

بس دايما افكر هل اسويه دور واحد والا دورين طبعا انا بالنسبه لي دور واحد اريح بس ما راح يكون عندي حووش كبير

متردده ابني دورين والا دور واحد

واذا في اي بينزل لي مخططات لفيلا ارضيه اكون شاكره له

[بوجبر]

الفيلا الصغيرة مالها حلاه....مساحة البناء 700مناسبة اذا كانت مساحة الارض 1000متر

[الفارس]

اخوي مسوي فله ارضيه كلت الارض وتحسف انه ماسوا دورين وانا مسوي فله والحوش عندي واسع مساحه الارض عندي وعنده ١١٧٦ يعني انصحج بفله دورين ولج لاختيار

[بوخالد2]

هذا بيت العمر انصح بالكبير افضل بكره اليهال يكبرون و كلن يبي خصوصيته

اما بيت صغير له فتره معينه من الزمن و لين اكبروا يضيق البيت عليكم

[dream~qa]

طبعا كبري في البيت على قد ما تقدرين إذا امكانيتكم المادية متوفرة وكثري من الصالات وكبري مجلسج العيال بيكبرون وكل واحد منهم بكرة يبيله غرفتين بدال الغرفة وحتى اذا تزوجوا عيالهم بيترسون عليكم البيت . عن نفسي احب البيوت الكبيرة الشرحة وأشوف كثير من اللي بنو بيوت صغيرة متحسفين .

[MAZEN37]

انا رائي انه لكل وقت اذان

[فواز1976]

اختي انا مهندس معماري وكنت اصمم بيوت وقصور ...... وكان اهم شئ معرفه متطلبات اهل البيت واعمارهم وايش خططهم المستقبليه. لانه البيت حين يبنى لازم ينأخذ بالحسبان الحاجه الحاليه والمستقبليه الي هي بعد 5 و 10 و 15 سنه .... وعلى هذا الاساس تخططي. فاذا كان عندكم ابناء وترغبوا انهم يسكنون معكم بعد زواجهم فانصح بترك مساحه من الارض تكون حق التوسع المستقبلي وما يمنع انكم تشملوها بالتصميم بس ما تنفذونها.

بالعموم انا اعشق الفلل الصغيره, على شرط تكون مدروسه 100% وكل شي بمحله , والتشطيب يكون دقيق ونظيف. لانه اهل البيت راح يشعروا بحميميه اكبر وتواصل اكثر بين بعضهم.

ايضاً هناك امر اخر يأخذ بالحسبان طبيعه اهل البيت , بمعنى فيه اسر كثيره مناسباتهم , وكثير ضيوفهم , هذا بالاكيد راح يهتم اكثر بمساحه المجالس واذا ممكن اضافه ملحق للضيوف.

بالتوفيق

[ريم 28]

جزاكم الله خير


كلامكم عجبني افكر فيه وهذا المطلوب ابغي اراء اكثر لو سمحتوا الله يوفقكم ويسعدكم

انا حاليا عجبني تصميم لدور ارضي والمساحه 700 تقريبا بس بعد محتاره اقول دورين يمكن احسن

[barod]

الدور صحيح اريح ولكن بياخذ منج مساحه الارض فانصحج بالدورين بس خلي مكان حق اللفت للمستقبل

[Bozizoo]

خذي حاجتك في المساحات من كل غرفه او صاله
لا تبالغون في المساحات الي مالها داعي
وعقب تدورون بعظعكم في البيت

[بوحارب]

تعجبني البيوت المتوسطة اكثر بواااااااجد

خلي المساحة الباقية للحوش والحديقة وموافق السيارات والله احلى :)

[لمعة الالماس]

دورين افضل

فكري بالمستقبل

[ريم 28]

جزاكم الله خير على كل كل كلمه كتبتوها جد ما قصرتوا

خلاص قررت ابني دورين والمساحه بخليها للحوش والحديقه وراح ابني بيت وسط مش كبير ولا صغير

تقريبا صالتين مفتوحين على بعض وغرفة معيشة تحت وفوق و4 غرف فوق بحماماتها ومطبخ داخلي وخارجي بس ما بكبر في مساحتهم وببني مجلس نسائي واحد بس اما الرجالي بيكون منفصل وبعيد عن البيت شوي

ما زلت محتاجه لخبرتكم حد يقول لي اذا ناقص شي واتمنى انكم ترسلون لي مخططات وافكار جديده

[alshobaki7]

ترى ضروري يكون في البيت مصعد حتى لو تكلفتي زيادة...... سويه وبتدعيلي.

[مستر بن]

احنا الحيين بيتنأأآ مو كبيير وأآيد وأآييدد

واحلى لأآن ملمووم ,,

يعني نشووف بعض ’’

والحين بيتنأآ الجديد بيخلص ’’

هوو وأآيدد كبيير ’’

والوأآلد الله يحفظه فكر للمستقبل وسوأآ اصنصيير ’’ وكل شيء ’

بس احسس مب شيء ’’


لآن مأ بنشووف بعض دأآيمأآ

[ريم 28]

اي والله البيوت الملمومه احلى شي بس اذا كبروا اليهال كل واحد يبي غرفه واتزيد طلباتهم

شكرا لكل من ارسل لي رساله خاصه ومخططات


بارك الله فيكم

[بوسياف]

السلام عليكم .. اختي ريماس

أنا راح انقل لج تجربتي ....

بيت الوالد الله يحفظه كبير وعلى مساحة ارض كاملة ،، أنا اتكلم عن 1300 متر مربع طابقين ونص طابق ثالث ، والسبب كبر العائلة ..

لكن فعلياً البيت من كبر مساحته صار الواحد يكسل حتى ينزل او يطلع ،،
وهم الطابق الي تحت نهائيا مانستخدمه إلا بالمناسبات او اذا فيه ضيوف لانه طابق كامل مجالس وصالات
وبالنسبه للخدم خمس وموب ملحقين ، صدقيني احنا لأننا عائلة كبيرة الجو العائلي موجود ، لكن موب بنفس فاعلية البيت الملموم حتى على مستوى الوجبات اليومية عدد معين من العائلة اهم الي يجتمعون والبقية كل واحد متى ماقعد من النوم او متى مافكر يأكل .

ولهالشئ قررت ابني بيتي على احتياجي ونظرتي المستقبلية ،، بنيت بيتي على مساحة 520 متر مربع
طابقين وبنت هاوس وبدون ملاحق بعد ، البيت احسه فعلياً بيت اتحكم فيه وارتبه على راحتي وأقدر ابدع فيه
ونتنقل فيه بكل راحة ،،، وأستفيد من باقي الأرض حدائق وجلسات ومكان متنفس لي ولعيالي .

أنا انتقد أهل قطر الي حجم عائلتهم صغير أو اهو وزوجته ويروح ويبني بيت شكبر شالفائدة أنا مادري

وبالنهائية واهم من كل شئ استخيري الرحمن سبحانه ، والله يقدم الي فيه الخير...

موفقه بأذن الله وعساه منزل معمور بذكر الله

[ريم 28]

جزاك الله خير على كتابة تجربتك

وينكم يلا اكتبوا تجاربكم خلونا نستفيد

[محمدوميار]

ارى ان يكون البيت مناسب للعدد بحيث ان تزوجوا الاولاد وحبوا يجتمعوا معاكم فى الاعياد يكون المكان كبير ويسع الكل وده هتكون قمة فرحك ساعتها

[بوعيود]

السلام عليكم انا انصحك يا خوي انك تكبر البيت اللحين وتصمم وتتعب عشان بعدين ترتاح مستقبلا وانت بالنهاية بتدفع حق البيت سوى مليون ولا مليونين